ضفائر صبريه

٢.جزء ثاني ...

#قصة_ضفائر_صبرية٢
_الجزء الثاني_

بقلم وئام علي....

لا تنسوا اليكدر يعلق ع الفقرات + تصويت

خليتني مثل الجرح حتى بضحكتي اتعور
خليتني اتكرر دمع واجهب الناس الغربة
مو حلوة اذا واحد يجي وينشدني عن جفاكم
رحتوا بعد فات الوكت لا ليل يجمعنا سوى
ولا صدفة اليجيبنا يمك جيبك
وكلوبنا البيض التدك صارت بعد ذاك الوكت متعوبة تشبه شيبك ....

----------------

كدرت اواصل شمس و حتى اتفقت وياها تهرب وياي هاي تفيدني كلش لانها عدها علاقات بالخارج نطلع ايران بالاول و تالي نشوف دولة ...

بس قررت امر ع اهلي بالسلف اودع امي لان ضال بالها اكيد..

و كدرت اروح للسلف متنكب و شفت رحت لبيتنا ...

شفت قطعة تعزية و تبين الفاتحة ببيت شيخ رحيم قريت اسم غازي ودارت الدنيا بية ...

سالت صبي

- البيت محد بيه

- لاع يعمي هذا غويزي جتل صبرية بالسيف و حوبة المرية وكعت بيه تعوق وانتحر و امهم تخبلت

جفيلك العباس بيت انهجم وانسد بابة ..

همست بمشاعر مختلطة
- ماتت ... رجفت ايدي ما اعرف شعور شنو لفاني خططي انتقم من خضر لو حزن لو مدري شنو

- ام البيت بالفاتحة ام صباح

- منهو صباح تغصد غويزي لو ذاك الي اختفى صياح

- اي واحد المهم وينها شنهي حالها

- المرت جنها تخبلت و اخذوها هلها ..

عفت الولد وشفت من بعيد عم خضر تخفيت ورى نخلة لمن فات وطرعت بسرعة من السلف وسافرت لسفوان لازم اترك العراق جن الوضع ما يعجبني ..

--------------'
*عفاف

واسعة عيوني اباوعله و يباوعلي بعيونة شر ما شايفتة قبل اكثر شر.. حقد وكره من كد ما حسيته عصب على تصنتي عليه حسيت بالجرح الي بوجهة برز اكثر...

برز بطريقة وحشية...

و السمعته معقولة؟

- انت ...سلاب ... اااخ ما اصدك .. ظليت ايدي على راسي وانة افكر ...
و دوخة اخذتني ..

شلون اصدك يمتة و ليش ؟

معقولة موت صبرية وطريقة قتلها اثرت بعقل خضر لدرجة ينحرف عن كل ما تربى عليه شديصير دخت يمة لحكيني ...
مهما كان شكد كلت اكره لان جبرني بس من كشفتة اخذتني رجفة خوف عليه يبقى زوجي ..
يبقى ابن خالي الي افضالة غطتني تبقى العشرة ايامنا حتى مناكرنا

يبقى الحب الاول الي عشتة من طفولتي الي تمنيتة قبل ظهور مجد..

معقولة ممكن التربية متكون سور رادع تحمي من الانحراف..