ضفائر صبريه

١٧ جزء ثاني...

#قصة_صفائر_صبرية١٧
الجزء الثاني...
وئام علي

ا"نا الجربت الدنيا بكل لوعاتهة .._عفاف _"

💥💥💥💥💥💥💥💥٥٤٢٣ كلمة  تفاعلو ع الفقرات

وجه مرتبك انمد من الحجرة وملامح متصلبة وعيون حزينة لاكتني

تلاكت العيون  و بدت تحجي سنين الفركة توجع
شوي و طلعت  و همست
- شلونك مجد

و كفت .. املي عيوني سنين الفراق اشوف شنو تغير بيها شفت كدامي مرة متكاملة . 

من حسيت بنظرتي اخذت جانب محرم غضيت بصري ونزلت راسي

- هلا خوية انت شلونج ..

خالتي و حمدية عيونهن علينة ....

- تفظل خوية ..  لا توكف ... يا هذا وليدك

تحشرج صوتها وارتجف وهي تشيل ابني وتحضنه ..

و تبوسه وتشمه ...

ابتسمت واني احس من حضنتها لابني بعدها ذيج عفاف الي تحبني .. 

كلشي بعده مثل مجان ...

نفس المشاعر ..  الي تصارع بداخلنا بين خوف من الحرام لانها متزوجة وبين   منملك احنا قيادة و ميول احاسيسنا وقلبنا ...

- يمة شحلاته تعال علاوي اخذ  الولد
- اسمة يسار

- عادشت الاسامي ابنك ضعيف كلش ..

- اي عوده هيج ...

و احنا كاعدين واسولفلهم عن اموري من طلعت و مقتطفات من زواجاتي و عفاف مدنكة حمدية جابت ضيافة خلتها ع طاولة...

صالونهم او الديوانية مثل منسميها و البعض يسميها استقبال .   حيل مرتبة البيت بنيان حديث..

و قنفات وطاولات صح بسيطة بس الترتيب والنظافة برز جمالية الاستقبال ...

عفاف تسمعني مدنكة صافنه بحجاياتي وانة اشكي من زواجي

- خالة ولا ارتاحيت بمرة بعد حتى الزواج كرهته هاي ٣ زوجة ماكو حظ وطلعت من الثالثة بهذا الوليد...

- خالة خاف مسوالك سحر بس اروح للعارفة اخذلك خيرة ..

تحمحمت عفاف وكرصت امها ..

و تهمس لامها بشي بس وصلي عبالها ما اسمع ..
- بطلي ... هسة شيكول نهارنة كلة عد الكشاشيف النوب تكلة بس اروح اخذلك عبالك مكطعة طريق الكشافة انت ..

سكتت خالتي ووجها ينطي الوان .

ابيني وبينك نضرات .. و كلوبنة موجرة  ...

شوي وطب محسن وهو يصيح
- ولجن صبا وصابرين عليوي ابو خدود تعالوا اخذوا المسواك من السيارة ...

وكف صافن و هو مركز بوجه مجد زغير جان من سافر بس تبقى الملامح و شايف صوره هم اله بنقال امي

- اكلك انت مجد ...

- يا هلا بمحسن ترى عرفتك من صورك..

كام مجد وتسالموا .. و محسن عينه علي وشوي كال

- خضر بالسيارة اروح اجيبة عفاف  بس  حضري فراش اله ترى تعب    ...

- صار ..

كمت و بداخلي حسرة ع شاب مثل خضر هيج مصيرة من الحادث اختلفت نفسيتة كلشي اختلف ...

مو ذاك خضر القوي ...

فرشتلة بالحجرة ام مخليتها الي من اجي اني وزعطي و رجلي ...

من رجعت لكيت مجد وجهة متردد و اكف مكانة وهو يشوف محسن وحدة متحنبط بخضر يريد يكعدة بكرسيه و اكف بالممر يباوع من باب الحوش المفتوح طلاكتين وملامحة مترددة على مهمومة ..

- احم ... ممكن طريق ؟

التفت الي من بين جتافاتة

- تدللين ..
و خر عني و رحت لمحسن الضعيف الي كوة يشيل خضر الجثل ...

اعرف هاي المعانات حيل ينشلع كلبي ببيتنا خالتي مريضة بقلب ما ينفع .. تتحنبط بيه وكلشي علي ..

هواي اعاني عضمة ثكيل بس شسوي  و محسن يمر علي شبه يومي من يحل من جامعتة .  و يرجع العصر لاهلي و يسبحه هو لان ما اكدرلة ...

اوكات اكول شيكبرك يا علاوي وشيل حمل ابوك...

اسند خضر الي دنك و تهربت عيونة من النظر الي ولمحسن هذا حاله شعور العجز صعب ..

شعور لا يطاق ..
ان تكون محتاج الاخرين تتكفلك حتى بقضاء الحاجة .. و حتى بالصحيات ..

اعرفه عزة نفسه جبيرة و عجزة كم مرة اشوف دمعه تدحرج من عينة وهو يهمس تعبتكم ..

يمكن لان شكد مسوى هو داخلة طيب .. و الله امتحنة بالصبر على المرض و ابتلاه تخفيف لذنوبه السواهة ..
حاولت اكضة من متونة و محسن وياي .. من رجليه ونشيلة شيل ..

- محسن منو هناك شالة وياك ..

- تدرين عمارات الاطباء تروج بالسوك يم عبد الله بن علي و اهل الخير هواي يساعدون ...

بس ردت اوديه مكان ما قبل ..

صاح بية

- اسكت ...
- شنو محسن
بستان ابوي الي صار لخضر

الجول وراه فأشر  الى ذاك المكان وفهمتة

بداخلي الملجوم ابتسمت .. هم اكو زوجة تتقبل زوجها يفضفضلها عن حبة الضايع و عن ضياعه و اشتياقة يتنشق الضفيرة كدامها ..
و كل الناس تعودت هاي الزوجة الصديقة الي متقبلة هذا الشي هي اني .

و محسن عادي يحجي بالموضوع يمي  الكل عدهم عادي .. اني ممكن اتفهم مشاعر خضر و حبه  الي سلبها غازي وصياح و بقى بس بقايا رماد بداخل قلب مهشم . 

وجسد حطام .  لشاب .. كضى اعز فترة ربيع شبابة انتقام وصفى الوقت  بيه معوق ..

يدفع ضريبة ماضيه ...

صوت  تكسر عوادين الكصب الي  مشمرة  هنا وهناك ووياها بردي متيبس متناثر متساقط من كوارات الحطب..

انطاني علم احد وراي

شوي وسمعت صوت مجد وهو يكلي
- وخري ...

تلفتت جان مجد صاحب الجسم الجثل بطول بضخامة اكتسب عضلاته من تدريباته عسكرية ويلدو حافظ ع لياقته بالرياضة باخر سنين..

رفع خضر وجهة الي انطعن اصفر من شاف مجد..
و بيده عصرهة على ركبة رجليه وحتى اطراف صابيعه ترجف ..

حتى ارنبة خشمة انتابها رجفة غضب  بس مو من وجود ضيف من كونة عاجز و كدام غريمه..

اصعب شعور العجز..
و يصير قاتل من تشوف احد.ضحاياك بعد سنين
ضحية وغريم...

رفعت عيوني واني اركز بعيون مجد.. كلة شباب وكلة قوة و اني اخ . 
ضربت ركب رجلي بخفية و عصرت صابيعي اعاتب الرجلين الكسيحة و ادعي على صياح الي انطاني رصاصات حطامي و راح  ناهي بينا المواجهة بخسارتي   ...  لثاري .. و خسارتي لصحتي و هو انتصر . 

الغاصب الحرامي المتلون عديم الضمير انتصر واني خسرت .  و صبرية ضاع دمها هدر و الفضل لنقاط ضعفي عائلتي. 

حتى من رادني محسن من بعد السنين ازور القبر الي هجرتة ... رحتلة واني ضابط خجلان من خذلاني لصبربة و خجلان منها رحت اتعذر جيتي الها واني  الي بعتها ..  و بقيت هاي السنين على قسمي خلاص ما ازورها مدام ضيعت ثارها الخجل جان منها جبير

هاي الضفيرة الي صارت ظل الي من انضرلها ينتابني حنين جبير .  يواسي وحدتي رغم عائلتي .

غريب وانة بنص اهلي..

صوت مجد انتشلني من صفنتي و رسمت على ملامحي كبرياء وهو يسلم علي يبوسني  ويسندني مثل عضيد اني الكسرته و هو الي جبرني و مثل العضم الهيكل يسند الجسم رغم اني الي دمرته بحبه ..

كدر يرفعني وحده و خلاني بمقعدي وهو يدفعني ويسولف

- ادويتك جبتلك كمية تكفيك لمدة  ٣ اشهر و بس تخلص كل سفرة الي اجيبلك..

الي بالعراق مو شي ولا اصلي . 

تحشرج بلعومي  رغم السويتة يجيبلي ادوية

- لا تكلف نفسك..  خالي انطاك فلوسهن مو ؟

- انطاني ..

- اذا اغلى من الي دفعناه احجي لا تخجل . 

ارتبك و همس
- لا شلسالفة هاي هن وصلن .

حسيت الضاهر ضايف من عنده ..

- يعني ما ضفت فلوس صح عاجز بس عندي خير من الله ...

- خوية كتلك هاي هي ..

يدفعني وعيون عفاف الي حسيتهن .. تحاول تنازع صراع داخلي جريت حسرة وهم ايدي على رجلي و رجعت  بلعت غصة..

و بداخلي كلمة عاجز .. و هي زغيره هواي انظلمت .  هواي اذيتها..

يمشون امامي  ...
على جراح قلبي .. يعزفون لحن انكساري

و يقتلون كل ما تبقالي كن نبضاتي
رجلين..  
مرا بحياتي ..  فكانا مد وجزر وانا امواج بينهما افيض حينا بمشاعري
و احيانا بانخفاض اهاتي وحسراتي

اشوفهم كدامي  مجد يدفع بخضر بكرسيه

رجلين واحد منهم زوجي ومغتصب لسعادتي والثاني حلم لم يتحقق حتى الان
حلم حتى ما اجرؤ احلم بيه..

صوت مجد وهو يسولف وي خضر عن روحتة للطبيب

- ان شاء الله معافى

- سكر و ضغط

جواب من كلمتين خلاني اوكف خضر بيه سكر منين جاه يا ربي رحمتك كليتة زرع و هذا المرض عدو للكلية لاهو يمشي ووي العلاج و الرياضة يسيطر ع المرض

- خضر ايديك تتغب و كرسيك بطيء الحركة اكو كراسي ع بطاريات و تشحن و بيها مثل الرموت او عتلات دكم بالجهاز تقود ...

احسن مما تتعب ابديك

تسرع محسن وحجة

- يمعود هي ادويتة ذاك الحساب منيلة غالي

جفصة محسن الي حسيت بخضر انكمش رغم ما اشوف وجهة كدامي هم واني وراهم امشي ع كيف

بس صوت خضر و الكرامة تنضح من نبراته

- شبيك تشكي بوجه الله شبيه وضعي .  الحمد لله بخير بس انة ما اتحرك و احتاج حركة

فخل ايدي تتعب زينة الحركة بيها كل البركة . 
و الا من باجر اجيبلي كرسي

نزلت دموعي

عشرة العمر خلقت بينا مودة و معزة و صداقتنا اصلا قبل الزواج و بعده مرينا بضروف تالي رجعت صندوقه الي يفضفض  و يحجي همومه و احزانة . 

حتى اشتياقة لصبريه .. اتحمل مهما كان اني امرأة تبقى تكره زوجها يفكر بغيرها .. لان تحس انتقاص الها

بس اني مو بس زوجة العب دور الصديقة ..

الي تستمع ..  لكل نشغات وجعه

بقى خضر بالاستقبال يم مجد شوي ..
يساله عن اموره و صاح لابن مجد شفتة طلع خمسة من جيبه خلاها بيد يسار
الي بالبداية خجل ورفض عجبتني تربيته ..

بس خضر بوسه وخلاهن بجيبة ومجد اعترض

- شلقضية

- عمه و انطاه شلك غرض ...

- يابة شنو هاي الزحمة

- لا زحمة لا زخمة .. يمعود شمنطيه اني محسن اخذني انام راسي ..

مجد ترخصني والله الكعدة وياك حلوة بس تدري ..
اريد ارتاح شوي .. و هذا محسن يمك ...

اباوع لمحسن يجرة بعيد لا هواي  يارب اشفيه كومه على حيله صعب علي يبقى رجلي اشوفه هيج منكسر ...

شفت مجد مصفن ومركز بيه هنا حسيت بلفعة  هوى المكيف بخدي ... و برودة مبلله مديت ايدي لخدي الي مملية دموع..

و عيون حمدية و عضة شفتها الي تكلي عيب كافي
لو امي الي بيدها سبحتها مدنكة بس رفعت راسها شافتني وكفت تسبح و صفنت

كمت اتعثر الخطوة ..

- يمة عفاف صكد جذب يمة هاي ارادة ربج هو القاسملة   بهذا الحال عبنه الله يسلمه موش حذر و نبهناه من هذا المرومش الله لا ينطيه

طلعت وبقت عين مجد احسها تلاحقني بعيونة شفت  نظرة ما مفهومة بس يا خوفج لا ينظرلج بشفقة

حالج  مرت معوق و مريض و انت زغيرة .. لا ما اسمح يشفق .. اني مثل اي مرة عراقية تعلمت ع الصعبات و تتحمل مثل جبل . 
ما يهدة الضيم

يجوز تعلم على المايعات امهات خدم و حشم الي بالخارج عباله كلها سوى عبالة بسهولة يكسرني المصايب .

شوي وترخصت  ورجعت لبيت خوالي ....

ما اعرف شنو الخلاني اطلب دفتر وورقة و اكتب رسالة ادري ما اكدر ارسلها ..

اتعرفين...
ما فعلت بي تلك الدمعات على وجناتك التي زال رونقها .. من بعد ما علمتك السنين ان الحياة ليس كحلم ليش كذبة نؤلفها و نعيش بطولتها ليس خوارق
ان الحياة هي صراع..  لاجل العيش بكرامة
اذاني دموعك .. و احزنني قهرك و غيرتي طغت على كل المشاعر حبيبتي ..

فهل دموعك انك تتألمين لاجله هل احببته  هل نسيت عشقنا و همسات مكالماتنا ام انها مضت وانطوت طي نسيانك لن اوسمك بالخائنة لقلبي فانت من بعتيه من سنين بل سأقول  ياليتني اراك سعيده ..

طويت الورقة وخليتها بمحفظتي  ...
و رجعت يم الشباك احاجي نجوم .  و اعاتبها

الساعة يمكن ب ٢ وانة ما نايم   بس همسات
جذبت فضولي قريب شباكي مديت راسي محد بس الهمس صار مسموع حددت المكان بجانب حايط غرفتي .. بس بعيد عن نظري

-  حرام  عليج بعدج تخابرية و تحبين غيره

- روحي نامي وانت شكو تدرين ما امشي وي احد بالجامعة اخاف ع سمعتي لمن يخطبني يا الله بس نتخابر

صوت بجي
- علقتيه بيج و هسة تخابريه منطتة امل تنتظريه وانت تلفونات وي طالب ويانة
حرام عليج لا وما تنهين وياه خليه يشوف طريقة لا تصدميه لان يحبج وصاينج هذا هو الفقير مكرود لو ملعب ويفتر بيج بنص الجامعة ركضتي وراه موش بس مخليتة تسلية

- تحبيه هههه بس هو يحبني محسن من سنين كلت يحسن وضعة بس ملتهي بمرت ابوه عبالك امه و يصرف عليها لو ع اختة الارملة والثانية مرت المعوق انة اضيع بينهم ولج وضعة صار ما يلائم

- خطية يحبج وحرام عليج

- اووي كافي ولج
- موش حلو السويتيه اذا موش راغبتة لا تخابريه و تنطيه امل خصميها و كليلة ع الخطبج وانج تحبين غيره..

- عوع احجي عدل هاي الدارسة تكول موش ولج خايبة اذا ما تحسنين لهجتج و الله بعد لا تمشين وياي بالجامعة عوع النوب نرد لزمن الهوش..  

- ما انكر هلي عبني موش مثلج ...

- عبنج تناسبين محسن حجية خليط مدينة و عربي   ههههه  .

بجي توجع و ركضة .  

وخرت بضل البردة من الشباك بس من سمعت صوت مشي ووكفة يم الشباك شفت عيون كبار كلش تباوعلي

- عمو انت كاعد ؟

- اممم ما جاني نوم

- ها .. لعد اروح انام باي. 

- تصبحين على خير

شوي وصحتلها
- انتن الجنتن تتعاتبن بنات نجم مو ؟ لان فرقد خلف متاخر

- اي عمو ... عمو سمعت ؟

ابتسمت احتقر هاي جنها امها هجامة بيوت

- كلشي سمعت اذا متحبين محسن شكو تعلقيه بيج حاولي تنهين كلشي الرجل اذا ينخان مو كل رجل يسكت فكري بيها زين ..

راحت تركض .. ملامحها داكنة بسبب الظلام وضوة كمر المنخفض  الي تتراقص اشعتة وي ضوة العامود الي يضوي حديقتهم ..

--------

ورى ما طلع مجد ..

رحت  للحجرة ...
و كفت بهدوء من اسمع نشيغ و شهكات منتبه لفتحي للباب

- هيج عمر ميخلص شيخلصة ادعيلي صبر صابرين يم الله بلكت يستجابلج شهيدة انتي ادعيلي اريد اموت ولا هاي عيشتي

نزلت دموعي .. محتارة اعوفة لو ابقى . 
بس كلمات الندم الي سمعتها منه ندم شخص
حس بعد فوات الاوان انو اذنب ....

-هذا انت يا بني ادم تتجبر وتظلم و تنغر تترك كل دينك لاجل دنياك هذا انت ..

مجرد انسان هش .. باي لحظة توكع تموت وما يحويك بس التراب . 

شوي وكال
- فوتي عفاف . 

حس بية .. حتى بصمتي حس اني وراه

- عفاف مجد باقي لو يرجع ؟

سوأل جان طرحه بسيط بس حسيت بيه متخوف ...

رحتله

العب بشعره

- شعرك يرادلة حلاقة و  يمة شنو هاي اللحية شوف الشيب متناثر هههه ايا شايب

ابتسم بشفايف مرتجفة ...

- عمري شاب بس كبرتني الهموم يا عفاف

كعدت كبالة ..

-  نزلت عيني لايده و شفت الضفيرة كاضها بكل قوتة ..
يخاف لا تهرب منه يخاف لا يبقى وحيد دونهاة

- يمتة تنسى

- وانت نسيتي ؟

رجعت ورى و عثرت بكلماتة و كعدت على حيلي واني رافعة وجه مصدوم اله

- اني راعيت الله بيك.. حتى المشاعر الي لازم متكون الا الك بس مو بيدي ما املكلك الا المودة وحسن العشره مودة الازواج مو عشك الي يتغنى بيه الشعراء و ينوح بيه مواويل  

بس ابد مخنتك راعيت الله بيك....

رفع الضفيرة و هو يشمها

- كلت لمحسن يبعد الضفيرة يدفنها بس رجعت .. بقراري .. عفاف . 

انة خنتج وي ميتة ما كتمت حبي الها ما اكدر ..
انة اختلف عنج ..

عوفيني ..

- فرشتلك يلة  حتى تنام ...

بيت اهلي كلش صعب انزلة من كرسيه مو مثل بيتنا جرباية اكدر اسحة بساع ...

هنا محسن يساعدني انزلة اخاف ع كليتة الزرع لا اوكعة ع بطنة ..
( الكلية الزرع تربط فوق المثانة  )

- انام بالنهار

- مو ردت تتمدد
- اريد الجهال صيحيهم ضايج

صحت للبنات حيل متعلق بسوالفهن .. علاوي  بالباب يلعب دعابل صحتة ما قبل ..

رجعت شفتة هو و البنات يسولفلهن . .

- بابا يعني هذا ابو عوجية موجود صدك

جر صابرين باسها

- لا ما موجود هاي اساطير و سوالف بيبيتج الي غلبت امج

- يعني شنو
- بنات سمعني .. انتن كبرتن هسة بمرحلة انتقال بين طفولة للمراهقة .. رايحت متوسطة

السنة ان شاء الله بس يبدي الدوام..

صابرين شقاوتج تبطليها ماكو بعد تمشين وضربين بالعالم
شوفي صبا رقيقة . 

دنكت صابرين عود خجلت و هي تكلب بعيونها ...
شافني وكالي
- شوفي اللوتية

-ابو علاوي ما تعبت من الكرسي خل امددك

- و الله يا عفاف  انة حال الميت العايش ..

بس انتظر رحمة الله و الا شنو عيشتي هاي

خليت ايدي على حلكة ..

و البنات يباوعنا و بينهن يضحكن و حدة كضت ايد الثانية وشردن لبيبيتهن

حسيتة يبوس صابيعي

- ما انسى فضلج لو غيرج السويتة بيها تعوفني ..

- صدك جذب ترى الحياة مو بس شعر و حجي منمق الحياة تجارب و عشره وذن بينا خضر ... يعني شعبالك ما احبك غير انت ابو بيتي ..

وانة مو بس مرتك صديقتك

لميتة لحضني واستقر راسة على صدري وانة اسرع بشعره

- احجيلي شمضوجك لا تضم ولا تكول رجعة مجد هسة ياخذ عفاف الي عدها بيتها ورجلها جهالها ترى احنا منمثل مسلسل تركي ولا هاي سوري

احنا تعلمنا نجرع الصعاب ننفضها ونكوم يا خضر انت من الحادث مو انت احسك تحس بالضعف يابو عليوي انة سندك ضراعك ماكو ضعف و لا يأس انة وياك الك

و هسة من ايام زدت كلش بس منعزل و مالك خلك...

وخرت عنة ومسحت دمعة تسرسحت من خده

- عفاف .. انة تدمرت ..  احس بالعجز .. تعبت من هذا الكرسي اريد اكوم اشتغل اريد اشد حيلي اريد صحتي بناتي كبرن عفاف خايف كلش خايف الوضع مو تمام...
و الدنيا ما ترحم

- خضر لا تخاف انة بناتي متابعتهن خطوة بخطوة .. و ناوية ااجرلهن خط للمدرسة اامن .
و احجبهن ..

- بعدهن زغار ..

- لا عيني .. احنا زمن قبل جنا معدنا ذاك الوعي الديني اني اقرا كتب واعرف سن التكليف لازم تكمل التسعة وتدخل ب ١٠ يعني هسة راح يصير عمرهن ١٢ كافي . 

حتى صلاة ناوية اعلمهن هن وعلاوي خلي من زغر احسن ..

- يمكن اني محظوظ بيك  الله يبارك بيج..

بالليل راد اطلعة برة يم الباب
الجو صيفي .  وي هبات هوا بيها رطوبة

- خاف حارة عليك هنا يم السبلت ...

- عفاف مختنك و ضايج من الكعدة

- امشي نسير لبيت خوالي اخذك اني وياك بس ما اخذ الجهال يتعاركون و يخبصونة ها شكلت ...

بعيون باوعلي و تحسر

- اريد يم الباب  عفاف اذا تردين ترحين روحي.. هم مالها معنى احتكرج ..

حسيت كلامة بسمار عبالة اخذه لخوالي حتى اشوف مجد...
ضجت بس سكتت..

اخذتة يم الباب مثل ما راد ...
و امي و حمدية اجن كعدن يمه يسولفن . .

ما استحى منهن شو رحت جبتلة دواه الي لازم بوقتة يشربة اخذه وشرب الماي وكلي

- بلكت تنسين يوم دواي و بلكت الله ياخذني وترتاحين وشوفين حالج ...

انصدمت

- هااا شنو .. ما فهمت ...

سكت وعينة بعيد كبل مناك ...

رجع حاجة امي وعين حمدية تعضلي شفة سكتي وعوفيه

- عمة محسن يكول منكدر نشيل الرفات هي ما مامنه و يمكن  لازم تقرير شرطة انهم دفنوها و هوسة و معاملة يا الله دفان يقبل يدفنها يكول سالت ناس  ..
صوجي  انة بقيتها

- يمة حجج عبنهم موش ولد خير يردون فليسات .. اروح للنجف انطي فلوس لدفان بلكت يقبل يدفنها اشتريلها كبر لو اعرف  مدري شنو خل البنية ترتاح شعدها نايمة بالجول ..
بس محسن سال جماعتة ذول شفهمهم ..

شوي وطبن بقيت واكفة يمه

- ترى انت عبالك اريد اشوف مجد ترى لو اريد من يوم الي تبرأت من تهمة وشاية بصابرين اطلب الطلاق ..

بس انة ما اهجم بيتي ...

عفتة ... و رحت ضايجة من تفكيره على الاقل ما اشمشم باثر لمجد مثل ما لتزك بضفيرتها ودون مراعاة مشاعري

كلامات.  لا رصاصات لا انها همس اهات..

بعد ما راحت عفاف دخلت عيني بعيد هناك مشتاق كلش ...

اهمس بكلماتي و اغص بعبراتي

- يارب تعبت من وضعي ارحمني. 

صابرين كون اندفن يمج. 

غمضت عيوني و انة اسير ذكرياتي ...

و خدودي مسرح شعر .. و دموعي قصيدة

تمر بينا الايام  و بدة العام الجديد و احنا بسنة ٢٠١٢ 

ناجح للمرحلة رابعة هندسة كهرباء  و زينب مجموعة طبية ..

استمرت علاقتي بيها كل هاي السنين بنيت احلام حلم ورى حلم بيوم ننجمع سوى

من فترة هي احسها متغيرة علي ما اعرف شبيها ...

بيوم لكيتها تنتظر فورت ..
هي واختها ...

- احم زينب شنو ابو الخط ما اجة ...

دارت وجهها بعيد واني مستغرب الوضع حتى مكالمات ترفض بس اتصل تدوس رفض رسائل مجاوب هاي من  اسبوع  . 

- نروح فورت ما اجة

- صدك جذب صعدن صعدن انت و خيتج بطريقي ...
شنهي زينب موش ازلمة حوك موش بعينج انة وترحين فورت ما اقبلن والله

لوت حلكها بس اختها باوعتلي ادري بيهة من نظراتها معجبة بية

- صدك محسن وصلنا .... صعدت اختها وانجبرت زينب تصعد

- اعرف باختها تدري بينا لان جانت مرسال لرسائلنا ...

وصلتهن وشوي بس نزلت شفت ولد عيونة نار .  اجة يركض وكف يم زينب الي توترت  

- شعندج وي هذا ؟ 

استغربت الوضع رحت اريد اهد عليه

- وانت شكو ؟ روح موش محسن اذا ما اعجننك هنا بنص الجامعة

صوت زينب مرتبك

- محسن روح

الولد..
- محسن ها.  مو هذا ولج احجي منو هذا جاية وياه ...

رحت كضيتة من قميصة يتعرض لزينب لعرضي

- اسمع ولك اسويك فرجة احنا عشاير وين وكعت روحك

بس صوت زينب الي دفعتني

- عوفه محسن عوفه...

باوعتلها متعجب

- اربيه الج شلون هيج يعترض الطريق

- محسن هذا الولد حاجي علي وراح يخطبني اهلي يدرون اجن نسوان قبل يومين  متفقين على كلشي بس ع كعدة زلم

بتدريج ايدي شوي ارتخت من الولد متعجب و مصدوم اكول من فترة تلاكيني بالبستان بس جنها تريد تنهي علاقتنا وانة الزوج اصبرها اكللها اسويلج احسن عرس بس اتمكن ...

عفتها دون نقاش وامشي  حيل مهموم خذلان على صدمة ما فهمت شي شنو مخطوبة شنو وسنين عمري الكضت .. 

اشتغل ليل نهار حتى من تشكي من امها و بخلها ومن ابوها شلون قلل مصرفها اكمللها المصرف. 

اشتريلها شنو بنفسها .. 
اخاف عليها ما يوم بالجامعة مشيت وياها او بينت علاقتي كل علاقتنا رسايل وتلفونات و من اريد الاكيها بس حتى انطيها شنو تحتاج

صح انة مو كل هاي امكانيتي بس شغول و فتحت محل مواد كهربائية و شوي شوي يتيسر الحال...

اسمع صوت ناعم طفولي وراي ...

- محسن اوكف... عفية لا تضوج

درت شفت اختها ..

- شتردين انت الثانية وشنو السمعتة ليش ما صارحتني ما تريدني ليش خلتني هيج على عماي الله ينتقم منها عساها ما تتهنى بحياتها

- مدري شكلك بس حاجيتها هواي يجوز انحرجت تكلك هي و انمار .. على علاقة حب ..

شوكة انغرزت بكلبي وحفرت بروحي

- شنووو وانة شناقصني ها شناقصني .. احجي ....يمتة هاي العلاقة شو ما اشوفهم سوى دخت ولكم ..   امر افوت بكليتجن بس تمشن انتن وصديقاتجن

- ما ناقصك شي و تستاهل الافضل ...
دنكت وهي تاتا

- الدنيا ما وكفت الف من تتمناك ....
- احجي شلون هاي العلاقة يمتة وانة اعمى

- اكثر شي تلفون واذا يتلاكون بخلات محد يدري هي تخاف على سمعتها و متفقين ع بداية هاي السنة الخطبة

ضربت كصتي

- علاقة قديمة وتلفوناتنا وسوالف تالي الليل كلة خداع .  ايا **، متحملت فشرت

و اختها رجعت ورى عبالك انطيتها راشدي..

عفتها شوي ودك تلغوني شفتة مكتوب نبض روحي

- المن متصلة خاينة

- كدامي بس دقائق ترخصت من خطيبي ميدري اتصل بيك مدام عرفت هاي هي بعد امسح رقمي محسن احنا ما نصير اولا انت ابن عرب انة اريد واحد يرفعني مو ابقى بمحيطي وثانيا انت ما عندك ما متمكن توك فتحت محل و هم ياريت بس الك شراكة وي اختك عفاف يعني هم اكيد تنطيها من نصيبك للمساعدة عندك مرت ابوك واختك هاي الارملة و بتها شتحمل ..

راح تبقى طول عمرك بس تصرف عليهم

- انت ...

ما كدرت اكمل الشتيمة

- محسن العرك دساس اختك ماتت مقتولة و ناس تكول  ماكو حاجة احجي وناس تبريها يعني ما اريد باجر جهالي يتعيرون بعمتهم..
هاي غير اخوانك .. اوف ادري جرحتك بس والله فكرت صعبة يعني واحد جان بعثي فدائي وصمة عار و الثاني هو الي على علاقة باختك صح هو هسة اخوك عنده فلوس منصب بس انت ما تتنازل و تصير وياه وتعيش ..

- تفووو على كصتج اريد هيج انحدر يا ...

من عصبت كمت الطش حجي غلط شتم
- رديلي ولج سنيني سنين الانتظار

صوت بجيها ما رفلي حيالة خدعتني استغلتني. 

سديته وانة امشي لكليتي بكل قوتي ..

مثل ثور يريد ينطح شكو واحد كدامة . .

رحت مكان معزول اضرب برجلي الكاع و انة اطلع كل عصبيتي

- لج حرام بيج كل تضحياتي كل حلم كل تخطيط رسمتة

اشهك وابجي و امسح بعصبية دموعي بردن قميصي

- ليشش ... شنو ذنبي اتحمل وصمة واتعير باختي واخوتي شنو ذنبي

عرفت منا انو احتمال محد ينطيني بعد مرة . .
لان الناس تدور بالاهل اي شائبة ... تخاف لا الزمن يعيد والعرج دساس

- والله صابرين بريئة عيروني بخوتي لان عارات بس ليش بعرضي ليش بانسانة شريفة تطعنوها

ما داومت اليوم مالي خلك رحت تلهيت بالمحل و  الحمد لله الوارد زين مكفي اموري وامور اهلي و حتى عفاف تسترزق عليه اضافة للمحل البنتة بالحديقة يكعد بيه خضر...

تعبان وما بيه ارجع لبيتنا مريت بعفاف خاف هم تحتاج شي بحدها و رجلها جثل الله يساعدها شلون تدبر امرها

فتت لكيت خضر بالمحل ومجد يمه يسولف مبين خضر من وجهة مخطوف اكو شي ما عجبة

- السلام عليكم..

تباوست وي مجد و دنكت على خضر بستة

- ها خضر مو جنها باردة و يراد للمحل دفاية

- جابت عفاف صوبة بس كتلها طفيها .

- شخبار شغلك

- الحمد لله ..

من ردودة عرفت يضغط على نفسة شوي والخط نزل صبا وصابرية الي ركضن للمحل دخلن .  ( المحل مفتوح ع الشارع مثل محلات السوك )

- كوة بابا ..

رد عليهن .. عجبني اسلوبة ما يوم شفتة ضرب واحد من جهالة او عنفة كل اسلوبة هاديء

-  بنات من تنزلن لا تركضن انتن كبرتن . 

اباوع لبنات اختي عمرهن ١٢ سنة صار .  و هاي احنا باحداث سنة ٢٠١٢ .. و شهر الواحد مصار هواي على دورة السنة ...

خشنات شبابهن عالي على نورية وصابرين مو على امهن . 

اليشوفهن ما يكول توهن مراهقات . 

و حقة ابوهن يخاف عليهن حجابهن شحلاته ...

و محتشمات  .  يارب استر عليهن ....

شوي وترخص مجد بعد ما اشترى غراض

و البنات راحن لامهن

- محسن مجد اخذلة بيت هنا .. ما شوف هل شي غريب.  رجل متمكن و عندة خير من الله ...

يجي ياخذلة بيت بمنطقة تجارية شعبية

- خضر وين بالك ترى الرجل مشهود باخلاقة

- اي بس

- لا تخليها ببالك ..

باوعلي

- شبيك انت ضايج جن الدنية انتهت ...

باوعتلة كوة كاض عيوني من تنزل دمعها

يدري عندي حبيبة بس صعب اكلة بت عمك

تحشرجت كلماتي و عاندت تطلع بس غصتي  و احساس الاهانة و العار الي متناسيه عار اختي الي ممسوية شي بس بيهم اعتبروها عار وسفة هاي زينب بت خالها هيج تكول شبقت للغريب

عار اخوتي وصمة  تنضح من كصتي ... شكلة تعيرت .. بماضي

اكلة سنين  جنت بوهم و قشمر

دنكت و خضر خلا ايده على ايدي

- خاف متعارك وي الحب مدليني بيتهم اخطبها الك ولك استقر و عيش حياتك الدنيا منعرف شضم هذا انة شفت الدنيا دولبتني انظلمت وظلمت ودفعت غالي يا محسن ...

- خضر ماكو حبيبة جانت موش صح جانت وهم عبن انة ابن ناس ع كد  الحال ..  و عبني بكصتي ملطخ عار يا خضر واجهتني . 

ورى سنين امنياتي دمرتني انة موش مرغوب يخوي خلاص شلت الزواج من بالي منو ينطي واحد اخوتة عار واختة مقتولة و متهومة بشر..

ضرب حلكي بصابيعة وتوتر

- اششش اليجيب صبرية و يتهمها ادفنة ولك ادفنة ..  صبرية هي الشرف والعفة ..

ظل يضرب على رجليه

- كون بحيلي ... ولج صبر بعتج شلون بعتج لو دافنة ما وصلت لهذا الحال

- كافي خضر منا الناس كافي كلنا نعرف صابرين شنو وهذا اهم شي . .

سكت وظل ياكل بكلبة انتبهتلة جر بسكتة من صندوك الفلوس الي يخلي بيهن وارده جكارة وانة تسودنت

- من يمتا راجع تشرب ولك انت ضغط سكر كليتك زرع ممنوع عليك التدخين والنبي اكول لعفاف

جريتها منه و فتحت الوارد وهو يدفعني بس تقيدة بكرسيه مخلاه يتغلب علي وهذا خلاه يضرب برجليه

كلما يعجز عن شي يعصب ع وضعة ويضرب رجليه هذا حالة من تعوق  

- اهدا لمصلحتك راح اوصي عفاف بعد ابد ما تجيب جكاير للمحل . 

صحت على عفاف

- عفاف ... تعاي بلة

اجت تمسح بيديها

- هلا خوية

صاح خضر

- محسن لا تفتن هاي اختك مجرمة هسة  المحل و ما تخليني اكعد بيه بعد وانة اضوج ولكم وين اولي انتحر

رجعت تسال

- شبيه خضر شصاير

طلعلي باكيت جكاير

- ما تدرن رجلج يدخن بالبوكات ..

دكت على صدرها وبجت وهي تجي

- حرام عليك ولك اتشبث بيدي ورجلي بس تبقى خيمة على روسنا ليش خضر شسويت بزماني والله هيج يعاقبني ولك انت كم مرة تطلع من الموت يمته تعتبر ..

- شبيج عفاف يشاقى ما تعرفين اخوج ملطلط هو وشعره هذا

باوعتلي بامل يطلع اشاقى بس لا هيج موضوع ما ينضم

- بعد لجيبين للمحل بضاعة جكاير و ستري على روحج لا يموت الزلمة عبنة موش صاحي مسودن ما يفكر وراه ٣ جهال بدونة شلون حالكم

رجع يصيح

- شبيك محسن اليموت من روحه اختك تعرس وجهالي يكبرون بين صكعة وركعة عبالك اختك تبقى على ذكراي و حبيب الكلب مشتريلة بيت كبالي ...

خلت ايدها على كصتهة و كعدت على عتبة الباب الداخلي بالمحل الي يربط المحل بالحديقة

وهي تنحب مبينة تعبت ومبين خضر من رجعة مجد يضغط عليها بسوالفة ...

- خضر ارحمها ترى صاير كلش شنو هذا الحجي ..

- متعمد يحط كبال بيتي ...

- يارب شلون اروح لعمامك واكلهم عليك عوف الرجال لا تطعن ويتخيلك يمعود...

شوي ورجع مجد من بيتة سلم وهو مستغرب

الوضع المتوتر

- خو ما بيكم شي ...

عالج محسن الموقف

- لا ابو يسار بس شوي خضر ما يلتزم نفسة دنية على الجكارة وهاي عفاف عرفت وخبصتنا ...

باوع لخضر

- خضر لازم تلتزم بالدوة و باكلك يمعود موزين على وضعك الجكاير

عيني على خضر الي مدنك وعاصر ايديه يم ركبه

- ابو يسار مبروك على البيت بيت العامر باذن الله و حتى ندورلك مرة وتستقر

ابتسم وهو عاكد حواجبة عينه على عفاف الي مدنكة وضامة عيونها الي تبجي عنه

- لا ما ناوي ازوج يمعود لعبت روحي ماكو وحدة بيها خير تبت ابقى لابني وبس

بكلبي كلت لا طينت السالفة شيفكنا من خضر هسة يرعص

- شعجب هنا اخذت هسة عفاف   من عوضو خضر جانت ببيت يخبل بارقى منطقة بس بعد الصار و عملياتة وعلاجة  فرجعوا هنا طلب الرزق وهم ارخصلهم

رد خضر

- رجعت ع مود الجيران شمالني ما عندي من باجر اكدر اخذ وين ما اريد بيت

رد مجد

- و الله ما اكذب عليكم اني اخذت بيت هنا طلب القرب على بيتكم

اشوف ايد خضر من كد ما يعصرها عروك كفه بينت

كمل مجد

- بس لاني ولو ازاحمكم ردت اطرح عليكم الموضوع يعني اوقات تصيرلي طلعة او سفر ما اكدر وين ما اروح ابني وياي كلت اخليه بامانتكم عاد والنعم من ابو علاوي وام علاوي وكل مصاريفة ابني وياه ..  ما اريد اكلفكم

رد خضر وهو محتقن

- هلا بيك وابنك

كامت عفاف وانطتنا ظهرها ما حجت وخلت وراحت . 

شفت مجد انحرج من موقف عفاف

فلطفت الجو

- و الله زين تسوي عاد عفاف حنينة والدم يحن

دنك وكال
- يمكن تسرعت جنها خيتي ام علاوي ما راضية وما اريد ازعجكم ..

ترخص وراح

وانة متفشل دم ما بقة بية بس اعتقد عفاف ما حجت لان تدري بخضر شما تحجي عبالة فرحانة لان مجد جاورهم...

امشي واتلفت على المحل حيل انحرجت ..

صراحة ردت اجاورهم يمكن تجاوز مني يمكن ما كدرت اكون بعيد ردت بس مجرد المحها ...

و بحجة ابني بس موقفهة خلا داخلي غصة ..

عرفت رفضت يمكن حست غايتي الحقيقية ...

شوي و لاكيت علاوي توة راجع من المدرسة ....

- ها يا بطل .. جان يسحل بجنطتة الي تتربت شلتها عنه

- ليش هيج عمو ...

- تعبتني طاحت متوني

- اي بس مو سحل ... شلونك بالدراسة دنك مثل الضام ضمة

- على الله

ضحكت عليه

- بس لا مدعبلها

- هاي ام الاسلامية شادة وياي عبالك انة يهودي كاعد بصفها
استلمت الكارت و هي  مخليتلي ٤  هسة سويها خمسة شصار عليها

- ولك ابو لسان شعجب طلعت كسولي

بلة كارتك

باوعلى و دنك

- عمو مو خوش معلمات حتى ام العلوم
شادة وياي

عافني وركض و ما انطاني الكارت

من ورى ما عرفت بيه عفاف ادخن اخذتلها اسبوع تقوم كل واجبها وياي بس ما تحاجيني واذا تضطر من ورى خشمها .  

من يوم اجة علاوي مكمل زادت بالبيت اعصابها ..

و جنت ازغلط عليها روحي رجعت ترف على الجكاير...

ادز علاوي بسكتة يشتريلي لان منعت عفاف بيع الجكاير بالمحل ...

يمكن لان علاوي الولد الوحيد جانت عفاف تتغاضى عن وكاحتة ..
طلع مكمل بثنين تنفجر اعصاب بالبيت بس ما حاسبته ابد لا راحت تعاركت وي معلماتة تكلهن شادات وياه

رغم هواي حاولت افهمها غلط التسويه و هذا ولد يكبر يشبعج مرار لا تغطين على افعاله

مشيت بكرسيي لباب الغرفة اباوع شفت امي وهي تصيح على علاوي

- ولك لا تكمز شاذي ممذور عفاف كضي ابنج لا و النبي ابسطة مو عود تزعلين

شفت عفاف اجت من المطبخ وصاحت علي
- روح ادرس علاوي ولك متت والله و انة اصيح ادرس

شفت ما اكدر اشربلي جكارة ..

مشيت بالممر متجاهل الهوسة و الصياح

لاكتني صابرين

- بابا شوف علاوي مشكك ورقة من كتاب الرياضيات شوي وطلعت صبا تبجي

- بابا علاوي ضربني ببطني و يكلي ام ثرب بابا صدك انة عندي كرش وين ...

اباوع بس بعيوني و كتلها

- كلتي لامج مو خاف نحاسبة وتهد علينا مثل ما هدت على  المعلمات ...

عافت امي واجت الي

- اكول انت حاسبت ابنك و انة حجيت .. بس علاوي لان فقير .. تسوي هيج ...

انت شاد وياه .. و لا جنة بس هذا وحيد ...

- لا تفرقين شبيج انت بناتج تسمع تظل تتحسس و تالي ينزرع كره بينهن واخوهن ربي على الحب و المحنة شزرعين تحصدين

احجاية مني حجاية منها

فتت جان علاوي واكف يباوع مسوي روحة خانس فتت من يمة وجريت اذنه

- شوف ولك جر عدل كسولي اذا سمعت احد اشتكة منك اسكسر راسك لا تكول ما كلي ..

خليت ورحت للمحل سديت باب الي يربط المحل بالحديقة سركتة .. و فتحت المحل . 

طلعت الباكيت الضامة بسكته . 
و بديت ادخن وانة بهموم هاي الحياة وعيني على الرايح للسوك ...
لو الناس الراجعة و النسوان الي من غير منطقة تاجر تكسي ..

شوي و  دخلت عفاف من طلة المحل ع الشارع هاي دارت من الباب الخارجي و لزمتني ..

ظليت محتار وين اضمها ...

- لا ضمها شفتها تعبتني ...

اخذت الجكاير وانة مدنك و فتشتني و سحبت الباكيت

- بس لا تدز بيد البنات وتعلمهن هل دروب
دبكل لا مبالات كتلها

- دزيت العزيز علاوي

كسرت الجكاير وهي تبجي و تعاركني

- تعبتني شتريد مني تريد تموتني .. ليش خضر ..

عافتني وراحت للبيت فتحت الباب على صريخ علاوي

و رحت للبيت ..

امي تحاجز وعفاف هادة على علاوي بالصوندة ...

حسيت راسي مصدع من يومين راسي ..

و البيت هوسة

- عفاف عوفيه ع رسةبة بدرسن ما ربيتيه وعلى وكاحتة تغلسين هسة ع مود ادزة ع حاجتي تحاسبيه

رجعت باوعتلي وهي تدك وتلطم على وجهها

- ولك حرام عليك تعبتني ليش شسويت انة وهيج ربي يعاقبني بيك

تدك وتلطم ...
عصبت وصحت

- شمريني بالشارع ادري بيج مليتي مني و هاي حجج تردين اموت وترتاحين و يصفالج الجو

صرخت صرخة وهي تخمش بروحها

- يبووووو ولك يبوووو متتت ولك ارحمني لا كلشي وتبسمر ولك كافي والله موتتني ..

امي تبجي و هي تكول

- يمة تعبناج ابتليتي بثنين مرضى ...

هنا ... صاحت و هي طك براسها بالحايط وبناتي يلزمنها تمي راحت تريد تكضها

- مليت منكم ؟ ليش انة حجيت  لو قصرت بشي ليش هيج تجازون تعبي والله حبا بيكم ومراعاة العشرة تالي تطلعوني عاقة جاحدة ليش خالة من صحت تعبني مو منه والله بس من سوالفة ودكانة كضيت عمري وياه كل دكة يسويها بيا ازود من الوراها خالة ابنج يشرب جكاير وتدرين ممنوع ابنج يموت بطء وانة مشتريتة مشترى ..

ما يهتم بروحة ولا يكول كافي يزي ..  اجر عدل صاحب جهال وين يولون اذا متت

ظليت افتر بكرسي معصب
- انة شفايدج شو انة ماذيج و موتي راحة الج

- خضر . رحمة لابوك لخالي . اسكت شو ما تعرف تحجي ولك الاب خيمة لو بس حسة بالبيت ..

مو انة ضايكة مرارتهة لا تخليني احجي .

شوي و لبست عبايتها

صحت
- وين خوش صاير طرطور اي لان عاجز  مالي كلمة صرت

صفنت بيه وهي تمسح دموعها
- تدري وين اروح اجيب غراض للمحل وهم اريد اشم هوا مو موتتني بسوالفك و بشعور النقص الي صار بيك . 

شمرت عليها منفضة فافون اجت ببطنها

صاحت وهي كاضة بطنها

- اذا عدتي هاي الكلمة يا ويلج

خلت وطلعت... وهو يصيح وانة تعبت مو تعدي اله بس تعبني كلشي كل فعل كل حجاية بيها انة
البس بشحاطتي واسمع صياحة .

- يمة شفتيها طلعت وتعدتني شفتيها بعد ما بية نفع صرت خركة الله يدري وين تروح
- يمة غير للمحل شبيك يمة لا تعصب لا يرتفع ضغطك...

امشي و امسح دموعي والله تعبت ربي تعبت هم  الك بيها ارادة ربي اكشف عني الضر...

لا كيت مجد سلم وراد يوكف يسال شبية مبين على وضعي اكو شي
بس فتة وعفته .. 
كافي الي بالبيت مراويني الويل مو هذا الي راح تونس كضاهة يومية عرس ورجع هسة كابلني ببيتة .

و حسرة علي طلعة طبة ....

شوي وتلفوني رن اباوع فتحت الخط

- شنووو .....

يتبع ... 

ضغطوا النجمة والممصوت ع البارتات السابقة  فضلا يرجع يصوت

لا تنسون تعلقون للي يكدر

شكرا لكم ❤