ضفائر صبريه

٨ جزء ثاني ...

قصة_ضفائر_صبرية٨
الجزء الثاني ...

بقلم وئام علي..

" حين تلتقي عيناي بعيناك الزيتونية وتحكي قصة حب منسية فترد عيناك على قصتي بزمجرة اعاصير غاضبة
ولا يسعني الا اقول انما قسوتك سهم اخترق خافقي و اماتني وانا حية "
بقلم وئام ...
❣❣❣🎈🎈❣❣❣

بعد الكمين الوكعتنا بيه رحيق .. و انتقامها مني و من عنف حازم... النذلة بلغت علينا ...

وسط مطاردتنا مدري منين اجت سيارات شرطة وحزب طوقت سيارتنا قطعت الطريق توقفنا اجباريا ...

سحلونا من السيارة وواحد من الامن وهو حزبي جبير بين فشاير وضرب بعصي خاصة..

جرونا للمركز...

بقينا هناك يومين تالي تحولنا لسجن الامن ..

و دك تعذيب وضرب ....

وانة يا ريح ما يهزك شي ..
ابد ما اعترف ... و طعنت بالادلة
حتى التسجيلات اول كلت هاي مو صوتي و اكيد تسجيل مفبرك بس تالي ورى فحص جنائي للكاسيت ...

انو التسجيل ممتلاعب بيه... رجعت كلت شقى اصدقاء محمد صديقي شلون اقتله...

ما اعرف منين جتني طاقة تحمل ...

كهرباء... عصي مغطس و يكهربو المي راسي لثوان بالمغطس..

انواع وانواع من التعذيب...

اليوم يمكن صارلي اكثر من اسبوعين.. فقدت قدرة تميز الوقت..
ها ليل .. لا نهار.. فقدت تميز حتى التاريخ

اسوء ايام مرن بحياتي .

متمدد بالكاع تعودت انفاسي على ريحة القذارة و العفونة .

عيني على واحد من جماعتنا منهار يبجي وحازم طلب منه بأمر ما ينهار ... و يبقى ثابت على موقفه....

- حازم ورطتوني شجابني على السياسة انة واحد حرامي اسلب ابوك من ظيمي و فقري الجوع فتك بعايلتي و استسهلت هذا الطريق انة والمعارضة شنو؟
- اششش لا تصير حرمة تتبجبج ..

- بعد ما اكدر . .

جان واحد هناك توة طلع من الزاوية الي بيها تنك لقضاء حاجاتنا ....

عنده طبيعي ومتعود على الوضع ضليت اتخوء اريد اتقيأ حتى كمية المي للطهارة شبه معدوم...

سمعته يستغفر وهو يندعي .

رحت كعدت يمه و فضولي قاتل ....

- حجي ... شجابك هنا ...

باوعلي و عيونة تحجي الموت كبل الحياة
- ولدي ... يا ابني ...

سولف عن ولده الي اعدمهم صدام بتهمة اشتباه انتماءهم لحزب ...

- بوية كرفوا عايلتي كلهم ولدي راحوا جوة التراب و اهل بيتي ما اعرف وين صفى الدهر بيهم وانة هنا سنتين لا انة المحكوم لا انة الطالع اولاد عمي ما خلوا شي ما سوه .. هسة تهمتي تجسس لصالح ايران.... و الله يبوك انة حدقجي اشتغل جنت بمنتزه ... لا بيها لا عليها.. حتى تحقيق محد يحقق وياي من سنة ونص انتركت قضيتي و ما اعرف شنو النهاية ....

رجع بيده سبحتة يدور بيها وهو يسبح يطلب الفرج و الخلاص من هذا الوضع حتى لو اعدام... او مؤبد .

شوي وانفتح الباب الضوة الي اجة من الممر صدم عيونه لان اعتادت شبه الظلام ...

- خضر سهيل خضر الماهود.. كوم.

كمت واعرف اجة هم وقت تحقيق وياي ....

جرني العسكري .. و كلبجاتي خلاهن بيدي ..
دخلني غرفة مو للتحقيق..

رفعت راسي اشوف عمامي وياهم مجد...

حسيت الهوا اختنك بيه الزمن الدار وخلاني بمواجهة وي مجد... يشوفني بهذا الوضع...

كام عمي نجم حضني. و بجة و ياه عمي فرقد..

- ليش ولك مو انت وحيد ابوك شجابك على السياسة ... لا والنوب تسليب ؟ ولك محتاج؟ شو خير من الله ليش ولك ليش ؟

عتاب و عتاب و عتاب .
مجد على صفحة بس اكتفى بسلام بارد . ..

هزيت راسي ب اي اله ومجاوبتة التهيت بعتاب عمامي.. .

- خضر شلون نطلعك التهم لابستك.

رد بسيط وقصير طلع من شفايفي...

- بريء ...

نظرة مجد الما مصدكة تلاكت وي نظرة عمامي الي كلها حسرة و امل ان اكون بريء

- و الادلة ولك بصوتك تكول انت بحزب معارض ...وهواي حجي واوراق توقيع .. حتى الجنائية اكدت ماكو تزوير ...

رجعت بعناد و عيني بعيون مجد..

- كلة تلفيق.. جائز حاقد ورى كل هذا .... شتكول حضرة النقيب مجد...

شفت شاديلة ٣ نجمات ... و بسمرتة ادري انة شنو ذنبي بس ردت ابقى بكل عنفوان وكبرياء القي التهمة انو هو ورى كل هذا ..

رد هو مدعي مفاهم شي ..

عمي صاح بية
- ولك الولد مخلا واسطة شتلمح عليه خليه ساتر عليك بلكت نلكالك حل ..

استمرت لقائي باهلي عمامي اما مجد عن طريق جماعتة جان هو واسطة التقي بعمامي ..

و هم عرفت يحاول بجهات عليا انو اوراقي ما ترفع..
بس الطامة اعترافات الوياي حتى حازم اعترف بكلشي ...
هنا ثبتت التهمة علي .. و ماكو مجال للنكران...

ورى الادانة اخذونة لموقع الجريمة وتعالوا مثلوا شلون صار الحادث ...

كاعد على ركبي بكلبجاتي . مضيع نفسي .. وسط اهوائي .

بعيني نظرة بعيدة هناك للجرف شوكي لمكانه انة وام ضفاير حمرة...

هبت بخشمي بخيالي جن شميت عطر الريف وي صوت الحيوان وي تربة و صوت مضخات المي تضخ للكيعان خير وبركة من ماي دجلة .. .

رسمتلي بشفافي لوحة عشك.. و كتبتلي قصة حب لدرجة الهوس ... لدرجة الجنون حبي لبنت الريف....

وسط احلام يقضتي وذكرى ماتت بس عايشة بنص روحي كل هاي الصحرا وكدامي مواقع لملجأ مهدم بيه اخذت اخر ثار للواشي بصبرية...

وسط كل هذا صحاني صوت ضابط وي ضربة متني

- يلة ولك هسة تمثللنا شلون قتلت الأستاذ محمد ال..

جنت مثل الغركان بمي شط يوصلة الصوت مشوش...
والنظر عبالك ضبابي كدامي ابد مو صافي ...
ما استوعب حجيهم ... اسمعة وافهمة بس عقلي وقتها حسيتة بس طيفها يلمح...

بعد ما فتح الشرطي قيودي و قيود حازم والشاركوني باخذ ثاري ..

مثلنا شسوينا لمحمد و شنو دوافعنا .. .

حسيت بتنفسي يعلو وينخفض ..

عرك جبيني الحنطاوي ... و نسمة هوية مرت تلاعبت بخصلات من شعري وكعت على عيوني حاولت اوخرهن ...
بس رجع الضابط والعسكر قيدونا . وهم يثبتون الواقعة..
...
رجعت عيوني تزغلل و ما اشوف شي بس الجرف و الي صبرية تكعد عليه و تبتسم و اني بخيالي جني فكيت قيودي و امد ايدي الها بس ما انوشها حسيتها بعيده عني . .

ومن وصلت الجرف الزم ضفايرها الي كلهن حياة و تلتفت بوجهها الي وتبتسملي .. ...

نزلت دمعة على خدي وتبعتها شهكة

وياها حسيت بخنكة ومرت صورة ضفايرها هل مرة ملطخة بالدم... و الجسم وذر وذر ..

صرخت بعلو صوتي...

- صااااااااااااااببببررررين .. ما يهمني انعدم اخذت ثارج يرويحتي..

مر شهر واحنا بالثامن هسة ...هذا شهر عيد ميلاد بناتي ... و اليوم محاكمتي ..

بتهم تخريب وتسليب و قتل فدائي سابق غازي و عدة فدائين و محاولة اغتيال امين سر شعبة فرقة الجمهورية و اغتيال رجل مخابرات امن قومي محمد....

اسمع التهم ... و راها اجة امر القاضي باعدامي ...

و تحدد نهاية شهر العاشر من سنة ٢٠٠٢ .. يعني كدامي .. بالحياة بس شهرين ....

انتقلت لسجن ابي غريب..

و بدت حياة اخرى بالسجن... الناس هنا الي فرار و يقضي ست اشهر عقوبة الي مؤبد الي سجين سياسي مثل حلاتي.

شكد اتمنى اشوف بناتي .. بس لا نسني .. ضحكتهن تسوى الدنيا..

يمكن لو الدنيا ترجع ورى ما اتورط ... لخاطر هل بنات.

بس رجعت باصرار احاجي نفسي لا والله اقتل غازي و كل شخص ساهم باذية صبرية....

-------

صدقت من قراءة القرآن على صوت الصريخ .. ركضت ملهوفة مهمومة ..اشوف امي وخالاتي يلطمن و يصرخن..
من وجه خوالي عرفت الحكم شنو ..
مجد شفت بعيونة يركز بوجهي ويقرا شنو انفعالاتي ..

بس بهذا الموقف كل تفكيري ببناتي الي راح تتيتم و الناس تعيرهن بنات المعدوم بنات الخاين...

رجفة خذتني وعيوني تتوسل مجد...

- مجد خو ما مؤبد لو اعدام فدوة احجي ...

يمكن سؤالي سؤال شخص يائس كل هل صريخ و اتأمل بحكم بلكت سجن كم سنة ...

شفت بعيونة شي اكبر من الشفقة لحالي ...
دار وجهه عني و همس بصوته الي يرجف..

- اعدام ... و مصادرة جميع املاكه ..وبيتكم الي باسم ابوه يتفلش ..

ظليت ارجف واني احس اسناني تصطك صك ...

لا اكدر احجي لا اكدر اصرخ دارت الغرفة بية اريد شي استند عليه مديت ايدي للحايط احسة بعيد عني ...

بديت احس نفسي خارت كل قوتي بدة نظري يميل بميلان جسمي .. لمن ما حسيت بشي منعني اوكع...

غمضت عيوني و انة بس ارجف وسنوني تصطك سمعت صوته يهمسلي..

- عفاف ابجي لا تكتمينها ابجي طلعي العبرة الي بكلبج لتحبسينها يلة ابجي ...

تنفسي السريع من مصيبة الي جتني ... شفت من عمري و اترمل .. و عندي توم بنات .

اتخيل يكبرن والناس ما ترحمهن ... تتجنبنا مثل مرض معدي...

هاي ارملة .. مرت الخاين المعدوم...

خوالي ملتهين يسكتون بنسوانهم التبجي وامي تواسي خالتي سعاد الناس التمت على الصريخ عبالك عزة سونها.

جرني مجد و شالني للمضيف ... فتح الشباك و كعدني يمة وانة بس سنوني تصطك سن بسن...

- عفاف ... اهدي مو هيج ...؟ لازم تصيري قوية لاجل هل بنات مشوارج طويل.

رفعت عيني بعيونه و انة بس اشهك.. و ما اكدر اسيطر على نفسي..
شفت بعيونة خوف و قلق .. و حزن وانكسار.

كام وكف بعيد يم الباب المفتوح..

من شفت حالي لوين وصلت .. شنو ذنبي الاحبة كدامي و بعيد عني نفس الوقت ورجلي سبب معاناتي و اخر شي يريد يرملني بعز شبابي .. .

بين حسرة .. و بين غضب ... انطلقت . صرخة من جوة روحي من كل كلبي المكسور.

- ليييييييشششششش و لك لييييييييششششششش .... و تكسرت حروف كلماتي ملجومة بونيني وانة انحب من كل كلبي ضياعي و دماري ومسؤوليات وانة بعمر زغير...

ليششش ....اااااه ااااااااااااااااخ كلبي موجوعة والله ولج يمة لحكي بنيتج يمة مختنكة وروح ابوي....

لييييييش خضر ... ليششش

ظليت اكررها وانة كوة اجر النفس مرة اكح مرة اشهك...

كمت مثل المسودنة و هديت على مجد كضيتة من ياقة قميصة الزيتوتي ...
و اباوع توة رتبتة حاليًا رائد. ..

- ها مجد.... رائد مو؟ . شنو قدمت للوطن وكافؤوك... لو دورة تسريع لا اكيد قدمتني اضحية للوطن خاف انت بيدك ثبتت التهمة على خضر .. ولك ليش حرام عليك..

اشهك وابجي وايدي مجلبة كوة بياقتة ما همني انكطعت دكمة من قميصة العسكري وبين جزا من صدرة وفانيلتة الداخلية والتماع سنسلة فضة تحمل سورة الكرسي .......

اجر نفس و يطلع صوتي مثل فحيح.. مبحوح خشن مكسور..

- انتقامك مني مو ؟ اترمل لان رفضتك وما شردت وياك ... تريد تيتم بناتي ....

حسيت ايديه على صابيعي بكل قسوة وعنف الدنية عصرهن حيل ونترهن من يم ياقته . .
وبصوت هامس وهو يلتفت للباب بس كاز على عيونة وصوته جان مخوشن من كد ما ضاغط على روحة .. ويحجي...

- كافي .. كافي خبال كلامج ابد ما معقول انت شجاي تحجين ؟ مو جنج تخربطين ...

شفتها شلون هيج انفعلت عبالك انة الي حكمت بالاعدام على رجلها شلون تهجمت علي ...

- شجاب رتبتي على موضوع خضر ...

تلفتت هرج ناس وسوالف وي خوالي .

الي يلوم الي يشمر بالحجي الي يواسي بس بحذر الناس تخاف لا ولدها هم تنوخذ . ...

تخاف وكل كلامها بحساب ....

سديت باب المضيف و انة معصب كلش والله يا عفاف صابر ... فوك ما رضختي لواقع مر وحطمتي نفسج هسة تتهميني! ...

ما عجزت رجعت بشراسة تريد تنوش وجهي تزلغة بضافيرها...

لااا هنا يا عفاف ستوووب ....
كضيت ايديها وهي بنحيب وبجي و تهم تحطهن بوجهي...

- اكيد انت السلمتة لو بلغت عليه و فبركتها ع ناس ثانية .. انت ذول بالامن و الي بالشرطة جماعتك.. اكيد جبرتوه يعترف على شي ممسويه..

تعجبت من حجيها شبيها هي .. كلنا ندري خضر شنو وشلون تخبل ورى ما قتلوا صابرين وظل بهوس يقتل ويسلب و اندرج بكل مكان شين....

صحت بيها وانة الوي ايديها بعيد عن وجهي ...

- خسرتيني بتصرفاتج اولا كتلج اخذج بعيد غصبا ع العشيرة ميسون شي جنت ناوي اعرف شلون اخذج من حلك السبع واكلب الاوراق لصالحنة خفتي ع نفسج و بحجة متردين مرتين ابوج ينجاب طاريه شكلك بنات راضي ينهبن وي الزلم.. .

رضختي تنفذين عادات ما الها دخل بالاسلام ... عادات ريف و همجية ...

ضيعتي حقج وضيعتيني .. خليتي بداخلي حسرة..
ظلت تحاربني بيديها

- اكيد تنتقم مني ... مو؟ اترمل و تالي تجي تاخذني غصب بحجة لازم اتزوج تضغط ع خوالي يجبروني واذا ارفض ياخذون بناتي .

نبتت ضافير وحدة من ايديهة بركبتي تريد تخنكني ....تضغط بضافيرها وصابيعها على زردومي

- هاي خطتك مو ؟

تعجبت هاي من كل عقلها ؟ اصلا كلامها وان دل دل على غباء ..

- لج غبية من عقلج عود اساهم بموت شخص رغم هو يستاهل هو الي رمى نفسة بالتهلكة ...

ووصل حاله لطريق مسدود حتى واسطاتي ما فادت ...

تدرين شكد دفع خوالي رشاوي وفلوس بس حتى اوراقة متصعد وتنسد السالفة ...
بس مصارت ...لا رجعولهم حق الكاع الي نباعت ولا طلعوه تدرين البقالكم بس البيت و الداير مدايره من كيعان مبقى شي رادوا يعادلونة ذهب بس ما صارت وفوكها يخافون يداعون بالي نهبوه منهم من رشاوي ...

تدرين اركض من بصرة لبغداد على معاملتة . مخليت باب مدكيته الجرائم لابستة وهسة تتهميني اني الواشي بيه يم الحكومة..

اكو ادلة اكو تحقيقات مو هيتة هي.
اصطكت اسنانها وظلت تطك سن بسن وهي تلهث وتحجي.. احس حتى يمكن بلعومها انشحط تضغط كلماتها من حنجرتها من كل همها و يأسها...

- ما تقنعني...

وخرت ايدها عن ركبتي بقسوة جبرتني اضربها . اصحيها على زمانهة...

- يا ريت هاي الراشدين صحنج.. و خليها ببالج بعد لو تصيرين اخر مرة بالعالم جزت روحي منج اطماني من ينعدم رجلج. ما ادك بابج و لا اتوسل بيج تزوجيني.

اكو الف من تتمناني مضال عليج انت.

رجعت ورى وهي تبلع بريكها ..

باوعتلها بتحذير و خليت صبعي يم شفايفي

- اشش ولا كلمة اسمعها منج لسانج بعد ما يخاطب لساني مفهوم؟

درت و طلعت عفت البيت الي يروج بالجيران..

و طلعت سقت سيارتي عبالك اطير بيها ...

وانة اضرب الستيرن واحاجي نفسي.

- شنو شايفتني بلا شرف ولج تزوجتيه وخليتي وصلج حسرة بكلبي شنو شايفتني لهاي الدرجة اساهم بتيتيم بناتج...
شايفتني ظال عليج اصلا الف من تتمناني و بنات بيوت.
تافهة بغرورج تصورين رجلج اني الساهمت بحكم اعدامة حتى اجبرج تزوجيني لهل درجة تدرين بحبي الج قيد مكدر اتخلص منه ..

بس يا عفاف الا الكرامة و الله ادوس عليج وعلى راسج لابو العرفني بيج و اخذ بنية و اغثج بيها اني الج...

-----------'

طعم الاكل بحلكي مر ..

حاضنة بناتي و من ورى مواجهتي لمجد بعد ما شفتة ولا تلاكينا ...

بس يتصل بخوالي...
و يمر عليهم...

و بطل يجينا ...

اكعد من وقت الصلاة ... ما بطلت اندعي ربي

و صرت كلش حقيرة وي منتوبة الي تفتر بالكيعان وتجن يم بابنا ...

مديت راسي من الباب .. شفت غراب البين..

- شعندج هنا ؟ من وراج حالي هذا . خبلتي الزلمة و انهوس و ضيع روحة .. و بناتي راح تتيتم و انت مكابلة بابنا .. روحي لهلج شنو مسيبيج علينا جنج جلب سفارة سلوكية كاضة بابنا ...

بكل كره الدنيا يمكن تصرفي خطا لان هي مرة جبيرة لو شكد ما سوت تبقى حوبة العمر . و ام اخوي محسن...

رفعت عينها ورجعت مدتلي بيدها عصة لافتها بخرك بيض ...

باوعت على العضة و انغمت كلبي...

- شنو هاي ولج روحي من تشوفج تجيني مصايب الدنيا كمت اشائم منح روحي لخوتج لا تكابلين بابنا...

ضحكت وهي وجههة كلة مكلوب كلاب الشعر شعفة و من الوسخ تحك بيه الشيلة ماكو ..

ملامحها متغيرة عبالك متلبس بيها جني شكلها ما اعرف بس غريب.

ذكرتني بقصص الاساطير..

الحيزبون ... هيج شي ...

- اهج تدنيلي شوفي شجبتلج ... هاج هذا فريخج ...( ابنج.)

وسعت عيوني يمة هاي شنو تفاولني منين يجي الولد ورجلي راح ينعدم....

باوعت للي بيدها جان كربة الصفحة العريضة مطلعتة من الخرك والضعيف مثل الي مكمطتة و مسوية بصخام دوائر عود عيون و خسم وحلك ع الجانب العريض..

شمرت الكربة يم رجلي كمزت ورى خايفة هاي تخبلت وخاف هم بعدها سوي سحورة كلش خفت من تصرفها ركضت للمطبخ اخذت جيس ملح و رحت شمرتة كلة على الكربة ..

وهي تضحك وتنوح و جيب محسن بنواحها كلش نرفزتني..

تفاول ع محسن هو شبقالي وتفاوليني بالشر..

دنكت خذيت حجار زغار شمرت وحدة يمها ...

اريد اخوفها حتى متكض البيبان يمنا ...

- روحي لاخوانج ولي وجهج يطير النعمة ...

جاي اشمر الحجارة الثانية بس صوت منتفض يلهث واجهني ..

- طكيني كبل لطكين امي عبن شكد مجانت غلط تبقى امي ..

شفت بعيون محسن دموع... وهو من زغر مهموم بحال امه...

- يمة لا سوين هيج شنهي حالتج..

محسن هسة بداية مراهقة ..

اباوع لخط خفيف لخضار شارب توة بدة ....

- ما شوفها اليفوت تشمر عليه حجار لو تركض ورى الجهال تخوفهم امس ما ندري داخلة الحوش لكيتها يم بناتي صافنة بيهن و بيدها مكص تريد تكص شعرهن بلة موتت بناتي محسن امك ما كلنا شي بس مترهم تجي يمنا وديها لخوانها ...

بحدة واجهني .
- عدها حق الها حق بالبيت و الي هم اريد امي حتى لو جانت غلطانة هسة هي مجنونة بلا عقل ولا حول ولا قوة لو مثل عقلها قبل موش حاجي وروح بوية بس هاي مريضة واجبي ارأف بيها .

هزيت ايدي هاي الي يلفي ولد منتوبة ..
صحت لامي وسولفتلها ..
- شفتي تعبج وارباج هي يمته ربتة شو كلة يمج ....

و الله يا الله شلون وكف بوجهي .. هي اصلا لو بيدي اكطعها وذرة وذرة ...

جانت امي تستغفر بسبحتها و تسمعني ومدنكة ...

شوي رفعت راسها وهي تجر حسرة

- شوفي يعفيف لا تدوهني ودوهنينا وياج منتوبة الله اخذ حك الظلمتهم بدنية والاخرى العلم عند الله ...
هي هسة موش بعكلها يمة .. حالها حال هاي البهايم بلا عكل .. تصرف ما يصلح التسويه بعجوز .. ما ربيتجن هيج ولا خالج رباج على الحقد ...

تشمرين عليها حجار لو تضربيها لو ترى خاف عبالج ما ادري يوصلي من ذابة عليها سطل ماي تنظيف الدجاج.

لا يمة عفا عليج .. عوفيها بتصرفج شفرقج منها تضلمين عجوز بلا عكل .. من تسوين هيج عبالج ربج يرضى . لو ما يكتب عليج خطيتها وذنب..

اذا جانت هية عدها ذنوب ربج يتولاها موش انت .. فهمتي يمة لو لا
واذا محسن .. همة جبير يبنت منين ميدور ناس تعيره امك الخبلة لو اختك كتلها اخوك لو اخوك انتحر ..

تبقى امه يمة و شكد مجانت ظالمة واجب عليه يبر بيها .. وهسة اوجب لان معدها عكل يمة ..

ما عجبني حجي امي . هديت اراددها
- نار بكلبي يا ناس شسوي اشك هدومي شوفوا شتحجي امي مو بهذلتج شنو هل ضعف حتى وهي مخبلة مسيطرة عليج وتخافين منها .
موتت الزلمة ابوي ربت ولدها اعوذ بالله ساهمت بموت صابرين و انوار انسلت من وراها ومن الصار .
حمدية ما نعرف عايشة ميتة . ضاع الخبر عنا .
خضر ظل يشابج منا ومنا و ضيع روحة وضيعنا.
هي سبب دمار مو بس ولدها ولا بس احنا دمار حتى خضر ..

و ترديني ارحمها انة مو انت يمة .
رحت هادة و بيدي عصا .
و امي تركض وراي
- خايبة شنهي مالج رداد عوفيها ولج الله عاقبها دنيا والاخرى الها حساب .

عوفيها التسويه ذنب لا تصيرين مثلها ظالمة . .

رجعت تسبح و ما دارت بال للنار الي بكلبي ...

بكل هم الدنيا صحت..

- زين زين ...تكدرين تكليلي صبرية تبقى مدفونة هناك ؟

اشرت لشي مبهم بس القصد مفهوم .. الجول...

- بنتي رجلها رايدها هناك مالنا حكم احنا ..

صحت وامة اعصر ايدي ...

- اااااا
لا مو لان رجلها عايفها هناك لان تخافون حجي الناس صبرية الناس تنظرلها مذنبة ما مقبول دفنها بارض طاهرة بالنجف ..
بس اكو ناس يا يمة تكول كل الصار بينا حوبة ظليمتهة ...

شهكت ...
- شنو النتيجة ... احسها شؤوم حل علينا ..

جنت بلا وعيي و ادردم ولاح نار كلبي لذكرى صبرية اي اعترف مسيتها وهي ميتة مسيتها وهي مظلومة ...

صرت مثلهم أؤمن بجرفة الشؤم ( كصة ) و صبرية جرفتها شؤم وحل علينا ..

واحد واحد... استمر ويانا....

رجعت التفتت لامي من ورى جتفي . شفتها بطلت تسبح و عينها مغوركة دموع واكفة يم الحايط يم البسمار الي معلكة بيه ضفيرة اختي ...
رجفت ملامحي و نحبت من كل كلبي كلهم مهوسين بذكراها حتى امي ..
وين متروح مخلية بسمار لضفيرة صبرية تعلكها كدام عينها.. .

انطت الضفيرة نرجعها لصاحبتها.

ليش ياربي رجعت اخذتها ... مثل منجرحت كمت اجرحهم...

- يمة انت مثل خضر لا تنسين ولا تنسين ولا راح تنسين تعيشون للممات بحركة موت صبرية ... بس انة شنو ذنبي ... احس الدنيا كلهة تخربطت على راسي...

صوت امي المتحشرج ببجية و حركة كلب ام....

- تعاتبيني يمة ....

دنكت و من رفعت راسي شفتها كاضة ضفيرة صبرية بكل قوة تعصرها حتى حسيت راح تنقطع الضفيرة نصين بين ايديها .

رجعت تكز بسنونها و تحجي ببحة كلب موجوع

- تلوميني يعفيف عبن موش باقيلي منها بس هذن الكصايب ولج هنااا يعفيف نار ما تنطفي

صرختها خجلتني من نفسي . و دكها بجف ايدها على كلبها

مردني مرد..

- هاااا شايفة هنا بنياتي الي ربيت وكبرت وتعبت مامش بيتي انطفى راح راعيه راحت بنياتي وكلبي نارة ما تنطفي تشوفيني ساكتة ولج حسي حسي بناري .. تفكرين بروحج بس موش بس انتي انظلمتي امش... امش طلعي من يمي لا بارك الله بالساعة الجبتج بيها ...

نزلت دموعي وانة احبس بجيتي بيدي على حلكي ركضت ... وانة اصيح

- انت ما ربيتيني ما ربيتيني ما تحنين علي ما تهتميلي مثلهن ...

صوت صريخها العالي هز حيطان البيت

- عفيف يبت بطني موش افرق ابد همج كاسر ظهري بس خياتج جوة الكاع مهضومات راحن وهذا كسر كلبي حمدية مامش اراضيها ولج حسي بية تهاتبيني وانة ام حالج احسن منهن ومن الجرالهن... يكفي يمي و اشوفج واشم عطرج يكفي يبت بطني ..

( الكصايب /قبل اغلب البصاروة يسموهن هيج تقصد ضفائر )

امشي وارجف ... عفت بناتي يلعبن يم امي واخذت عباتي احس اختنكت ... كلش اختنكت ...

كل يوم يفوت احسب تنازلي لتاريخ ترملي ...

يم الباب بالممر مراية معلكة باوعت لوجهي الاصفر شكد عمري وصارلي هذا كلي مواليد ٨١ بعدني يارب زغيرة واترمل وبركبتي توم بنات..

زاد شحوبي و ايدي على بطني وصفنت موسعة عيوني ...

- ياربي .. لا يا ربي ....

طلعت اهبد بطريقي وامسح دموعي ..

و انة احسب يمتة اخر مرة ...

- لا يجوز خربطة هرموناتي .. لان ارضع بناتي من صدري ..

ما معقولة ...

بس هي تجيني كل شهر صار اكثر من شهر ماكو وانة الفاهية ما انتبهت ...
مشيت مقررة امر على المستوصف ...

فاتت بنات من شافني نظرتهن الي عبالك شي بلا قيمة ...

و يتهامسن

- اخت الفدائي رجلها طلع بحزب المعارضة و خاين راح يعدموه

ابتسمت بحركة وفتت...

اخت الفدائي
مرت الخاين ..
الكلام صدى صار باذني وانة امشي...

متماسكة لا ابجي ..

رافعة راسي بعنفوان و مرامة وكبرياء ...

افوت على جروحي وادوس على ملح همومي و ما هامني شي هذا ظاهري كدام الناس حتى صارت سمعتي متكبرة شايلة خشمها بعد الله شيسوي بيهم .

بس داخلي مكسور والله مكسور هواي هواي داخلي مهموم و مهمش داخلي ينزف .

ورى نص ساعة من تحاليل ادرار بذاك الوقت جان هذي تحاليلنا .

جريت نفس و اخذت تحاليلي للدكتورة جان الوقت قارب غروب ...

- حامل مبروك..

رديت بلا تفكير
- يا شلون بناتي توهن سنة عمرهن .. يا يرضعن وزغار ..

رفعت حاجبها ...

بلعت ريكي وكمت فشلانة

- شكرا

طلعت وانة الدنيا مدري شمالها وياي احاجي الي ببطني
- هسة وقتك يعني تنولد يتيم لا واذا هم توم احترك شيب ابوج عفاف ...

استغفرت الله شلت راس الزلمة بهل غروب...

اخذت بطريقي عشا من محلات مثل سوك زغير

يم بابنا هم شفت غراب البين..
نفخت .. و زاد قهري على محسن يطرد بجهال تشمر على امه حجار.
واكف وهو يحاجز الها يحميها هاي الظالمة

- محسن تعال تعشا

دمعت عيونة
- طرديهم ترى بشر هي خطية

باوعت لاخوي و همست ودخلت بالي يم بناتي
- بشر ؟

سمعتة ينحب و يدفع بصبيان جاية تضرب بامه ...

- يمة ردي لعكلج يعيروني يمة .. امشوا روحوا لا انعل ابهاتكم عوفوها خطية تضربوها ..

وكفت اراقبة من بعيد بالباب ..

و بحسرة عليت صوتي اسمع امي

- هذا محسن وفي لامه ايه راح تعبج يم حمدية ربيني وانة لهلي ...

شوي وفات محسن من يمي وهو يخوزني
هزيت ايدي
و رفعت حاجب لامي
- هذا بسنتين صار شطولة وخط شاربه و هم راح يصير علينا زلمة بذر شر يمة شفتي شلون يخزرني باجر يعيد تاريخ اخوه....

رجع وبيده صينية اكل .. روبة بزبدها و تمر وخبز

شفتة كمبص يم النخلة الي منتوبة متفاركها
وهو يشهك يبجي و يخلي لكم خبز بالروبة مغمسة وهو يوكل امه

غصة داخلي بس الحق ينقال تبقى امه ....

شفت امي تمسح دموعها وتباوعله

- عايني يمه ... هذا بزر خير يمة موش مثل اخوتة يمة ربيتة على الحلال والحرام من جان بالكماط امة ملتهية عنه ... بس شوفي رباي يمة فرحانة شلون يباري امه هاي وهي عاصية مذنبة يمة هذا حنين وهو سندي وسندج يرب ارزقة كل خير يارب بجاه كلمن جاه عندك تنورلة طريقة و تحسن خاتمتة و تعطر ذكره...

باوعت لامي متعجبة

- تحجين صدك ؟ فرحانة لهاي الحيزبونة شلون بخت *** ٠ج حتى ابنها يخدمها وهي شسوتلة شو شامرته عليج . و من رحتي لخوانج تبعج بزرها ورجعج لهذا البيت البيه كل ذكرى سيئة الج عفتي خوتج ع مود هذا

- هذا التكولين عليه هيج رباي ووليدي و سند الج خلي ذن ترجية بذانج..

جريت نفس ورحت لبناتي لكيت صبا نايمة وصابرين تلعب ..

و جارة شكالاتها و الكفشة شكبرها ...

ضحكت على شكلها ..

صفنت بوجهي و مدت ايدها تفتح وسد صابيعها و تصيح بلثغة طفولية ماما تعاي ..

اخذت الشكالة ..
و الملم بشعرها ..
وانة ارزلها عسى تفهم قصدي

- ولج جنج شويبة ام شعثة بشعرج هذا والله لو ما بيبياتج ما يقبلن الا ازينج كرعة ولادي وافتك..
جان شعر صابرين اثخن من شعري كلش ..
ملمسة ذكرني بضفاير صبرية

صح لونة متوهج مثل شعري بس احسها هي وصبا هواي ماخذات من خالاتهن..

كمت للمطبخ احضر العشا الجبتة ..
و سويت جاي جبت الصينية لامي

- صليتي يمة
- اي يمة كبل لا احضر العشا جا وين محسن.

ابتسمت بدمعة
- يعدل مجان لامه ما تقبل تفوت
- احسن يمة المن تعيش ويانا ما ترهم والله ...
هزت راسها هل مرة توافقني بس ادري بامي ضامة كسرتها من منتوبة ومتحملتها تكابل بابنا لخاطر ما تكسر بخاطر محسن والا تكدر تجيب خوالي يرحون لاخوة منتوبة يخلون حد..
- يمة رحت حللت طلعت حامل .. هم دمرني و خربطلي حياتي خلالي مسؤولية بنات لا هو مشى عدل وكال متزوح صاحب بنات راح صايرلي ينتقم و كتل بالعالم و غير صايرلي منقذ زمانة ياخذ حق بنات لا عرف لا ولف من عصابات..

سلب نهب قتل باسم الانتقام لعب وجهين وجه وي حكومة وجه وي عصابة و ادري بيه بضياعة و تشتته هو نفسة ما يعرف شيريد

ضيعني كلشي سواه نتائجة على راسة افوت الناس تتبسبس اخر شي زرع بذرة طفل ببطني وراح لحكم اعدام...

فرحت امي ووسعت عيونها وهي تحضني
- يا بعد كلبي حبلة يمة و الله الله ما قصر اندعيتلج بكل صلاة تطلعين حبلة جنت شاكة بيج ويارب يكون وليد..

هزيت ايدي شحجي بلة شقنعها اكلها ينولد يتيم و مسؤولية فوك الحمل العلي يارب شسوي ...

يمة شتحجين انت
- يمة تعرفين قيمة الولد مو هاي انة ظليت بلا ولد يسند كبرتي ..

ظليت اكرر شيقنعها بلة هي ام الولد شحصلت من ولدها ..
- يمة بنية او ولد نفس الشي وربج كلما تمشي سنين الدنيا تتقدم و الكلوب تتحجر .. نفس المسؤولية وربج و الولد يتعب تربيته اكثر من البنت
ادري ما تقتنع
- و الله عفاف الولد ولد لو شما يسوي موش مثل البنية عيبة

استغفرت ربي هواي هيج والله ينظرون للموضوع بسطحية
لو منا لباجر اقنعها متقتنع مو هذا صباح وغازي مو لامهم صاروا عار .
شنو الولد شما يسوي ولد لا غلط اي تصرف سواء ولد لو بنت معكوسة ع اهلة ...

ثاني يوم دكة على الباب ..

- منو منو على كيفكم هو هيج اليدك الباب ...

فتحت الباب ...

عيونا تلاكت وشفافنا تحجي تسولف بصمتها ... ... غمض عينه و فتحهن دار وجهه و دنك..

انتبهت لوكفتي و عيوني الي خانت ارادة عقلي و شفايفي الي مفتوحة كوة جر نفس ..
كلبي ورجفتة وظعي تخردل جم دوب يبقى كل ما اشوفة هيج يصيرلي جم دوب ...
..
- اااا هذا ... اااا انت .. احم .. شعجب هنا جاي مو ببيت خوالي ...

جر نفس ونزع بيريتة ..

عيوني على ايديه الي عكست توتر داخله ...

وهي تعصر بيريته بين صابيعه..

دنكت بقينة واكفين ثواني بصمت ...

ما اعرف صدقة لو قدر لو مدري شنو بلحظة رفعت راسي رفع راسة وهم تلاكت عيونا عيوني المشتاكة الكاتمة عشكي و عيونه الي بيها عتاب وحزن و بريقهن الزيتوني احسة انطفه..

رجفة شفايفي..

- فوت مجد جاي على امي اكيد فوت خوي.....

ما كملتها ما كتلة خوية من خزرتة و رفعة حاجبة الي صارت طبيعة لقائاتنا ما كملتها ...

رمشت سريع اشرد من عتاب عيونه من لمعة حزن من رجفة شفايفة و حسراته

تهربت بوجهي من هيج مواجهة من انعل الساعة الي صباح اغتصب صبرية .. و حرمني منك يرويحتي .

انتبهت لصفنتي بيه و حركة شفايفي انتبهتلة شلون رجع ورى و تحمحم.

خليت ايدية على حلكي ما اعرف شحجيت بس لا حجيت الي بكلبي صخام وجهج عفاف اشوف الولد يذب الوان والله فشلة هسة شيكول علي تبيع ثكل ومرة تتحارش بيه..

هرولت شاردة من كدامة وصحت

- يمة هذا مجد، مجد فوت امي بذيج الحجرة

همس بصوت حسيتة متلبك.

- هااا اي .. احم جيبيلي مي وتعاي هم عندي حجي ع مود الاستأناف ..

- اي خوية ....

يمة كلبي يرجف شلون بية يا ربي . ابعد عني نظرة الحرام واحساس الحرام يارب مو بيدي احبه مو بيدي و روح ابوي وابو فاضل مو بيدي شسوي يربي ...

رحت جبتلة مي وبيدي هل مرة سبحة امي اتلهى و اسبح بكلبي ابعد عني تفكير الحرام الي لا عاداتنا تقبلها ولا الله يقبل انظر لاعزب او اي رجل غير زوجي بنظرة مو اخوية .. بس شسوي والله يارب مو صوجي والله كلبي مو بيدي كلبي ...

- عمة شخبارك ما لكيت مرة
عينة علي وكال برفعة خشم ضوجني منه ونعل ابو الساعة الي بعقلي خنت خضر و رجف كلبي وفكرت بيه بحبي الضميتة بقعر روحي ...

- لا ما لكيت اجلت الموضوع شوي تدرين احنا مو بحال عرس ...

امي وهي تلومة
- جا يمة شنهي تبقى هيجية بلا عرس يمة ما يصلح انت كبرت عمرك يمكن راح يصير ٢٨ ...

يرادلك مرة تسترك و تخلفلك ...

عينة علي ويحجي
- ما مستعجل البنات هواي ظالة يمتة ما اريد انكي احسنهن..

لحظة لحظة مو جنه يبسمرني ...

شنو قصده اكيد يريد يوصلي فكرة اخذ الاحلى والافضل منج ما باقي عليج..

بوزت و حسيت عيوني حركتني ..

رفعت راسي شفتة كاض كلاص المي يم حلكة بكل برود يلمس حواف الكلاص بشفايفة ويشرب على كيف و عيونة علي

وترني والله ...

بس بعد ايدي امي صح خجلتني من حجت بس والله خذت حيقي ومسحت ملامح الغرور من وجهة
،- اااخ يمجد هاي عفاف طلعت حبلة و منا رجلها ينعدم والله كاسرة ظهري هاي البن..

ما كملت امي حتى غص بالماي و ايده رجفت انجفة الباقي على ملابسة وهو يكح

كامت امي تضرب ضهرة

- اسم الله اسم الله يمة شمالك ما تعرف تشرب ماي .. و الله شباب هذا الوكت مايعين ااااخ وين ايام كبل وشباب كبل عود انتم جيل السبعينات والثمانينات و الله يا الله باردين و يستر الله منكم.. وين ايام ابوي جيل الاربعينات

والثلاثينات الزلمة منهم شاربة تارس وجهة و اذا زمخ نظل نطك راس براس من الخوف مو انتم جيل الجورجي مدري شيسمونها

ضحك مجد اااااخ يا ضحكتة مشتاقتلهة من اروحلك فدوة يبعد جلاوية ..

اي اضحك اضحك ...

صوته يحاجي امي و يشاقيها
- شنو جورجي جورجيه اسمهة ...

رجع عبس بس تلاكت عيونه بعيوني
اهووو عبس وجهة عبسي ..

رد ببحة
- مبارك الحمل .. عمة بخصوص الاستأناف رحت لبغداد حاجيت سكرتير الاستاذ عدي بلكت يتوسط بس ما اوعدكم...

اكو خبر بس مو اكيد انو الحكومة تعدم كل الي مسجونين سياسي اعدام جماعي خبر سمعتة من رفيق صديقي يكول يومية ياخذون مجموعة ما ملتزمين بتواريخ الاعدام خصوصا الي تبعية لحزب معارض.. اكو بيهم دون محاكمة انعدموا

همس بصوت ناصي
- الموضوع ميطلع يكول حتى بيهم دفنوهم وهم بالحياة

ضربت ايدي على صدري

- زين خضر؟ هو محكوم اكيد مو وياهم..

فهم سؤالي جر حسرة
- بعده و الا وصلنا خبر...

- نكدر نزوره
- والله الي مثل وضع رجلج صعب كلش بس راح اشوفلكم يوم ترحون لابو غريب زيارة ..

- اي عفية

كامت امي وهي تتفكد محسن ضجت تركض على بزر غيرها و هو ملتهي بامه..

- يمة مجد شوي واجي محسن تاخر

- شفتة يلم خشب و يبني مثل سوباط قمرية ..

صفنت علي امي خايفة ردة فعلي اكيد يسوي فياي لهاي المشعوذة شلون بخت لو ولد لامي هو لو امي مخلفتة والله جا مكعد بختها وياه هيج..

من طلعت امي باوعلي و رد يريد يجرحني مثل ما هو مجروح
- متونسة يومية حابلتله شنو هيج تحبين عشرته وانة الغبي اكول دمروها و جبروها ترضخ وتقبل بيه وانت متونسة وانة الزمال الي ...
سكت و ما كمل .....

كام يرجف معصب.. هاي من سمع حبلت بالبنات هم من تلاكينا هم رزلني جا شيتوقع غير مزوجة واكيد الرجال اله احتياجات يم المرة و ما اكدر ارفض مو بيدي شيريد مجد شيريد مني بعد

- مجد اني مزوجة لا تنسى ما حابلة بحرام

- اشش اصص ولا كلمة انت متونسة وانة مسلوك ليلي وي نهاري ما انام افكر ها حضنها ها ضربها لان ما تقبل يتقربلهة عجيب شلون تخلين واحد متحبيه يتقرب منج حتى لو جان زوجج

خجلت من صراحتة وبقيت ساكته لو يدري بيه شلون تعلمت الجرءة و المشلتح واغريه
حتى استمر بحياة مستقرة ويكفني خضر شره يمكن لو عرف بهاي الخصوصيات يعدمني ...

- عموما حبلة و ام لتوم بنات و ضعج ممستقر رجلج ينعدم اكليها بتبنها كل هذول مسؤوليتج لا شهادة تعينج ع العيشة ...

مشى وعافني وبس صوت دردمته
- نسوان صدك ما تتأمن و لا تكض روحها لا وفرحانة حامل ورجلها ينعدم .. و الله يا الله خوش الج نفس تحبلين وتعاشرينه كذابة تكول ما تحبه و الله جنج ميتة عليه اني القشمر الوحيد بلعبتج ...

يدردم واني وراه امشي و اسمع ساكته .. مصدك اني نفس المراهقة الحبت خضر .. عبالة تجدد حبي لخضر ااخ لو تدري .. ولك مزوجة يعني مترهم ارفض عشرتة مترهم مو بيدي ...
بس عيب عليه يحاسبني على علاقتي بزوجي صدك لا استحى لا خجل خبل مو عاقل اكيد...

وكفت اباوعلة امي تعلم بمحسن ع سوباط جاي يبنيه من كصب وسعف

هزيت ايدي شتريد منتوبة حتى سوباط عن الشمس بنالها ابنها اااخ يبختج كون اخذلي منه شوية مو هواي ...

- عفية الله يبارك بيك لانك بار بامك..

غثني مجد من كل عقلة هيج يشجعه ..
دخلت وركعت الباب وراي حيل .

حضنت نفسي و انتجيت على الباب الرديتة وعيني على الحوش و صوت بناتي يتنعوصن جنهن كعدن...

رفعت راسي لفوك وانة اريد اضم قهري ونحبتي ...

وي اطلالة تشرين اول كدر مجد يدبر زيارة خالتي منتهية كلش على ابنها .

بالبداية ما قبل مجد اروح وياهم بس من تعاركت وياه اريد بناتي يشوفن ابوهن كبل لا ينعدم نهاية الشهر ...

كل هذا الازدحام والتعب تالي بس كدرنا ربع ساعة شبك امه و هو يبوس بيها و سلم على مجد ببرود ..
و حسيتة تعمد من جرني و حضني وخرت مدنكة مستحية منا الناس شبيه تخبل

بس انة اكثر شي ضجت لان مجد خزرني و طلع

- اخذو راحتكم انتظركم برة

اجة خالي فرقد ويانا
- والله يا خضر شلون نوفي مجد لو ما هو ما يقبلون بزيارة كلنا ..

- اليسمعك يكول خلصني من الاعدام .

- استغفر ربك و لا تنسى هاي ايامك تقرب من الله .

شفتة وهو شلون يشم بناتة ..

خالتي كلتلة على حملي .. غوركت عيونه وجر حسره...

و دنك

لقاء بسيط بخضر .
وراها بيومين اجة مجد ...

ودزوا علي بيت خوالي امي بلهفة تركض كدامي مدري شكللها محسن من اجة الطارش
صحت محسن

- شنو شصاير ......
وكع كلبي بس لا خضر كرفوه وي الي دفنوهم مخترقين قرار تاريخ اعدامهم .. يمة ترملت بنياتي تيتمن ....

- لج ركضي بسرعة تعاي يلة عفاف مجد يكول ....

يتبع

❣❣❣❣❣❣السلام عليكم الحمد لله على سلامتكم
بالنسبة للنت معرف راح يستمر او هم ينقطع

القصة مستمرة باذن الله نكملها 👌
ونكتب قصة رجل من بلد اخر طابعها رومانسي ❤❤ غلسوا ع السحك و ع لبكة التواريخ متابعيني القدماء يعرفوني انة والتواريخ منتلاكة 🥺

٥٢٣٢ كلمة