ضفائر صبريه

٧ جزء ثاني ...

#قصة_ضفائر_صبرية٧...

الجزء الثاني

وئام علي ( ام مصطفى)
البارت طويييل اكثر من ست الاف كلمة ونص اذا يتعبكم قسموا قرائته لايام لساعات كيفكم ....

ما اكول صوج الغيمة طاح المطر من ضيمة
عاصفة ومرت بينا فتحت احبال الغيمة

انة ما محتاج تبجي كبالي لا تعتذر مني
ما تفرحني دموعك لا بجيت  يزيد حزني
بالعكس خليك انتة الجرحني
كلبي مينطيني اجرحك رغم كل الصار بيه
عيش وتونس بيومك عوفني اني الضحية
-------منقول ❤❤❤

اندك الباب ..
رحت و انة اصيح

- منو .. منو
- هلوو خضر طلب مني اصلح المكيفات ..

هزيت ايدي ما فتحت الباب
- وهيج خضر يدزك و هو مو بالبيت دروح عيني روح دروبك هاي مو علي..

- وربي ناار تدرين المثلج ما تستاهل خضر الفاهي تريد فارس يروضها .. بهاي طباعج و اذكر شعرج الاحمر ناري من جنتي تبينين كذلتج.. اذكر كل لبسج و تفاصيلج .. كلت هاي اريدهة ..

- رادتك ريده بس كول امين.. ولك ما كو غيرة ناموس روح ما افتحلك باب ولي...

دخلت و متحلفة بخضر هسة بلكت بالمحل خابرت ارزلة بس العامل كال ...

طالع..

سديتة وكعدت افير شعري و تمكيجت ولبست ملابس يحبها خضر حتى من يجي يلكاني مرتبة ..

صوت حجارة كسرت الجامة ..مال المطبخ

ركضت لبست حجاب وعباية الا انعل والديه هذا ابن ام كريم دومة ما يبطل سالفة هاي الحجار على الحمام من ساعة السودة الجابتك امك و جاورتنا...

حجارة ثانية جا اجت بكصتي
فتحت الباب هل مرة اريد الزمة متلبس و اوديه لامه حتى ما تنكر و اخسرها الجام التكسر ..
بس دفعة و كعتني بالطارمة و دخل محمد

و هو يبتسم

- اخيرا يا حلوة  ساعة كاملة انت الي على ما يجي رجلج من المخازن ...

كمت ركضت عثرت من الخوف كمت وانة اريد اسد الباب جنه هجم و دفعني حسيتة بانفاسة الكريهة شارب ..

صرخت بلكت احد يفزعلي ..

فوكي و هو يحاول يدنالي اطوح براسي بعيد عنه ...

من حسيت ايده يم زيك دشداشتي ...

رغبة بالتقيوء رغبة بالاغماء لعبان نفس من هذا الحقيرر

بس فجأة حسيت بفراغ و حسيت انو الثكل العلي انزاح و صياح ما مفهوم لاني غبت عن وعيي....

*************

وانة اسوق السيارة...

احس انغمت كلبي  وضيق بصدري ...

وكفت بسيارتي رجعت جريت نفس  .. رجعت اسوق بس وصلت للمحل كلي زوجتك اتصلت ومبين عليها اكو شي صاير يمكم ...

- اها .. دربالك على المحل ..

رحت ركض ركبت السيارة وانة ارجف اتخيل بنتي اكيد احتركت ما توب عفاف من سالفة تشتغل يم الطباخ والبنات وحدة جواها يم رجليها تزحف ووحدة ع ايدها .

نبهتها بس لا يرب بتي صارلها شي ...

اسوق بسرعة .. طبعي وهواسي جدا...

وصلت لبيتنا اسمع صوت بابنا الهوى يدفعة ويرده و المح بناتي بالطارمة يتباجن . 
وصوت صياح ....
و الجيران ولا يمهم ... و لا فزع احد امنت بناتي مبيهن شي بس صراخ عفاف زاد من خوفي 

زاد خوفي فركضت حتى بناتي عفتهن من تدوهني خطية جانن يزحفن وراي و فارات من البجي ..

دخلت  البيت واشوف صدمتي ...

عفاف ترافس وتدفع برجال شوي شفتها ونت و  فقدت  وعيها وانة اجر منها النذل جان يطلع محمد وسعت عيوني واني اضرب بيه تضاربنا

- ولك انت صديقي شلون هيج تسوي بس كلي شلون ...

ظليت اضرب بيه بوكسيات وصار بينا شتم فشار  وسب  وصراخنا تعالى ...

صوت عفاف وهي تبجي نبهني هي رجعت لوعيها .

ما مستوعب الي ديصير...

ولا فاهمه.. بس اضرب بمحمد..

الي دفعني وانتفض

- تضربني ولك كلك تابع الي لاوامري بليلة ضلمة بتسجيلات اكدر اضيعك بيها ورى الشمس اوديك ...
ولك انت كلك خلك اداة حتى احركك لاهدافي..

خاف عبالك انة محمد ذاك الصديق الوفي الي جان تابع الك بالاعدادية كلما تضوج من صباح تدفعة عليه يضربه..
الي يسمعلك تتغزل بحبك لريفية الي جان يروح بعالم خيالي لاشعار تحجيها عن حبك ..
اصحى ذاك مات مو صديقك انة متت

لو خاف تصورني نفس ذاك الي جان بس يريد رضاك الادوار انقلبت حبيبي وصاحبك ذاك مات ..

ضربتة وانة اكلة ...

- كوامة وي عمامك الا ابهذلك .

- اي تصرف منك يضيعك .. عندي عليك تسجيلات.....

حجالي امور حجيتها يمه استهزيء واشاقى وياه كصديق يعني لا اني من الدعوة ولا اني معارض ولا شي ..

كل الحجيته جان مجرد  شقى صفيق مني .. و استهزاء بمهمته الي اجبرني عليها...

- جان استهزاء بالمهمة الي اجبرتني عليها ...

- هو انة حتى اخليك واجهة لمهماتي السرية ... سويت المستحيل حتى طيرتلك ركبة مرتك صبرية ...البنت الي جنت تهرينا هري بالعدادية عن حبك الي تسميه حب مستحيل ...تدري شسويت
ضحك....... و هو ينطيني ياها بالوجه
- اتصلت باخوها ...

و رجعتك تصير لعبة شلون ما امشيك تمشي ...

بس طولت اللعبة ويا خضر عد ايامك خليك متونس وي عائلتك كم يوم...
لاني ناوي اسجنك بتهمة خيانة البلد .. يعني مؤبد لو اعدام ....

راد يطلع بس رحت ركضت عليه اجر النفس كوة ولحظة ابشع لحظات حياتي وصبرية تطبر وذر بسيف ..

قاطعت امي نسوان عمامي عفاف خليتها ع هامش و دمرت حياتها للاشيء

دون ذنب و المذنب كدامي وركبتي بين ايديه ...

صحت بعفاف التبجي

- رووووحححححي منااااا شعندج واكفة روووحي ....

رفعت بناتها بين ايديها ثنينهن وهن يصارخن من الصايح والضوضاء

ركضت تبجي للغرفة وانة لازم محمد من خناكة ...

- ليش محمد مو انتة صديقي ليش ولك ... تذكر محمد يوم جنا بالخامس اعدادي تذكر لو نسيت ...

رحنا للشط سبحنا ويومها كتلك كون اعزمك ع السلف ونسبح بدجلة ...
و يومها كتلك احبها مو بيدي ... كتلي ركبتي سدادة اجيب عمامي واصلين بالحكومة و اذا اهلها رفضوا غصب عليهم يقبلون ...

نزلت دموعي وانة اخنك بيه و هو يدفعني

- زفيتها الي للكبر يا محمد شردتها واول واحد ببالي الجألة انت .... وعدتني يا محمد ركبتك سدادة ... حرمتني منها ... و عينك النكسة على عرضي ....

دفعني وكعت على الكاع وطك راسي بخشبة القنفة ...

باوعلي ...

- انت تمشي بحلم غبي ردت اسويك ادمي بجاه الثورة والبعث بس مو وجه خير انت ... اسمع لك اذا مصدك تعال لبيتي و اسمعك التسجيلات ... و اعتبر المهمة بدت لان حازم رجع تلتقي بيه دون علمي عبالك ما اعرف...

خلا وطلع وانة بين دوخة كمت اريد الزمة ...

جان بالشارع اكو كم نفر واكف يستطلع شصاير خاصة محمد جاي بزي البعث الزيتوني ...

سمعتة يكلهم...

- شكو مجمهرين عملية القاء قبض و طلعت اشتباه..

وكفت بالباب   و تلاكت عيونا صريت ايدي حيل و ضيكت صابيعي على راحة ايدي كاض نفسي من ان اجرم بيه...

الحنكة الي املكها خلتني اضبط نفسي و ما اغلط غلطة نتيجتها الخسران....
الا اخططلك عبالك اعوفك ردت تدوس بيتي واسكت...

سهلة محمد..

رفع ايدة اشارة سلام و هو يمشي يتبختر كدامي

طلع صوت من حلكي مثل زئير وضربت رفست الباب

رجعت اباوع للناس الي تسمع الصراخ و محد تدخل ...

رجال جبير اجة صار ناصوح
- ابني  اكرام الزوجة رأفة بيها مو الضرب و الترهيب ابني راجع نفسك  التسويه حرام عليك..

اجة ببالي ذول كل الي ببالهم مرتي تصرخ من الضرب يمكن تعودوا على هاي الفضايح .. لان صح كلما اعصب دائما اطلع قهري بعفاف الي ما تعرف تسكت ترادد و تصرخ ..

حتى امي شكد نبهتني  نسوان المنطقة تبسمرها ع الفضايح ....

تايه و مصدوم ... و بالي  الف شيطان يطبل ....

رحت للبيت ... مالي عين اباوع بوجه عفاف ...

حملتها ذنب مو هي سببه حملتها سبب موت صابرين...

دمرتها ... و دمرت مجد... ضيعت حبهم..

رجعت ابرر ... هو الزواج قسمة ونصيب هي مكتوبتلي صار كل هذا حتى تصير مرتي ..
اي لازم اقر بالواقع ... هي مرتي بعد وخلاص..

و كفت يم الباب و اسمعهة تهدي بالبنات تسكتهن بس هي تشهك ببجية ...
مصدومة بالصار ...

مدري ممصدكة  بجيتي الله سبحانه خلصهة من محمد النذل بس وربج ياخذ عقوبتة الا اخذ ثاري وثار ج وثار صبرية ... سهلة محمد....

بس يراد ذكاء...

مو عصبية ....

دنكت خجلان منها..

همست بسمها بخجل -عفاف
رفعت راسها الي عيون ندية .. عتاب وي الم وي جرح مكتوم..

عرفت نظراتها ... تريد تكلي ضيعتني وياك مو كتلك مو انة سبب موت صابرين حرمتني جرحتني ... و طلع صاحبك الطعنك اعترف بلسانه .....

تحالفت السنتنا على السكوت والصمت وجانت عيونا تتكفل الكلام....

عيوني على خضر و عيوني تبينلة  شكد ظلمني ....

حرمني...

عاقبني...

ضيع حبي ....

و النتيجة ... لا شيء ....

كل السواه على لاشيء المجرم الواشي طلع صاحبة لا اني لا خالتي لا مرت خالي نجم...

رجعت دنكت على بناتي..  الرابط الوحيد بيني وبينه...

الرابط الي يلزمني استمر اضحي بمشاعري و حبي لخاطرهن....

استمر بزواج ظلم بظلم لاجل عيونهن....

كدام نظراتي .. مرة
و تشرد  صفناتي من عليه لبناتي ... مرة

شفتة نزل على ركبة منهار هاي المرة ...

و يبجي ...

بس ما هز بية اي مشاعر ..  حتى الشفقة ما اهتزت...

عينه على مجر بالتسريحة وينحب

.. على التعويذة عبالة ما ادري  بسكته يطلع ضفيرتهة و هو يحن   و يون انين موجوع من كل كلبه

اني غلست هواي و حاولت ابني حياة وياه صنته ما خنته الله اليشهد...

اكول الحب مو اهم من بناتي وضحيت بمجد و بكلبي .. و حبي....

رجعن بناتي يتباجن ... شكد ضوجني متعلقات بأبوهن.. 

يبجن على بجيه.. هة ميدرن يبجي و سوى الهوايل ظلم قتل و طلع منها شعرة من عجينة كل هذا لخاطر حبه الروحي ..  _صابرين_.

وانة عكسه كل السويتة كسرت كلب مجد...

ما طاوعتة ورفضت قرار العشيرتين حقن الدم واكون تعويض.. 

ما شردت وياه لان عيون ابوي المنكسرة بصبرية ما ردت تنكسر بيه....

اخذت البنات وكمت عفته ....

بس اسمع نحيبه .... و توجعة على الفقدها ...

اجذب عليكم اذا اكول اغار ..
لا ما اغار بس كل الي اريده احترام واعيش بناتي ببيت مستقر ميأثر بيهم مثل هيج اجواء..

بربك خضر تهد كل البنيتة لتربية بناتي انهيارك كدامهن غلط اني كاتمة حزني مو كدام البنات ..
ابجي ولا كدامهن انوح ع مجد...

اسمعة والبنات فارات بجي ع بجية عود طلعنا من يمه...

- ولج صبر..  يا يابة يا بوية انغدرت وانلعب علي .. من رفيجي يا صبر...

اخذت بناتي برة ورى البيت ..

كعدت الاعبهن تناسيت ما نسيت الصار اليوم...

شرفي راد يضيع وكاعد حاضن ضفاير صبرية وهو ينوح على الماتت ...

نساني .... بسببه جا راح شرفي مثل ما دمر حياتي بزواجي منه..

كتمت كلشي بكلبي وانة اصفك للبنات و الهيهن لمن سكتن....

تحولت الدموع بعيونهن للمعة مفرحة والوجه العبوس للبشاشة وانطلقت ضحكاتهن....

شوي وسمعت الباب البرة يركع حيل وصوت شحطة تايرات سيارته عرفته طلع....

رحت قفلت الباب و بداخلي قهر طلع عافني وحدي مكال خاف هذا النذل يرجع يكمل الصار...

بدلت لبناتي حضرت جنطنا و قررت ارجع لامي ...

هنا مالي امان لمن يصفي من حساباتة وي محمد ....

ادري بيه ما يسكت ادري ناوي هل مرة ضياعنا كلنا ....

وانة اطلع احس سيارة رجعت بك  باوعت زين سيارة خضر رجع فتح البيبان وكال..بصوتة الصار عميق لان صوتة بسبب السكين الي اثرت باوتاره صار كانما يطلع من حنجرتة

- صعدي ... رجعت اخذكم لعمامي  انة ابقى هنا عود امر عليكم ...

بسكوتي ... صعدت بناتي وصعدت...

ظل بالسيارة يسولف ما كأنما هو نفسة الي انهار ....

شفت ع الدشبول ضفيرة صبرية ... الي صرت كلما اشوفها اختنك...

لحظة لحظة من فظلكم قبل لا تستغابوني مو شغلة غيرة بس مثل ما سديت باب ماضيي وي مجد...

لازم يقابلني بالمثل مو لخاطري والله ولا يهمني حبني او ما يحبني ..

كل همي جان الاحترام للعشرة الزوجية ولتربية بناتنا ... لخاطرهم على الاقل .. 

استغرب سكوتي... و كعادتة يبرر اخطائه بغروره

- يمكن ظلمتج بس الصار صار ..  عدنا بنات نريد نربيهم بعد شنسوي ...

عكدت حواجبي...

- يمكن ظلمتني ؟ بعد شنسوي؟

هزيت ايدي ورجعت اباوع من شباك صفحتي ..

اختصر الطريق ع طريق ترابي متعرج و مزارع بين  الفيحاء صعودا للمزارع الي توصل لما بعد مجنون ....

باوع علي ورجع للطريق يركز وكل كلمة يكولها خنحر مملي غروره...

- شنو لازم ما عاجبج ؟ خاف طلعتي بريئة المفروض تبوسين ايدج وجه وكفى .. لاني جنت ناوي بيج الهوايل بس تجيبين الولد...  بس ربج انقذج...

- شكد مغرور يا الله ....
اذا احمد الله فقط لان بينلك اني بريئة وانت ظالم مغرور الك يوم يا خضر حوبة المظلوم متروح ...

خزرني وقاطعني

- بس ولا كلمة شوفي عفاف خاف ببالج اطلكج .. حتى ترحين لحبيب الكلب لا يابة لا ... و بناتي .. ترديهن يربن بحضن مجد.. مستحيل ... تنجبين وتكعدين على بناتج

وسعت عيوني صدك الختشو ماتو الما يخجل فوك الوضع الخلاني بيه ...

يتبجح .. منو كلة طالبة اطلك اصلا عندي بناتي فوق حتى نفسي ورغباتي ...

- عمي على كيفك لا تنكلب الدنيا بيك شنو هل غرور والتبجح الشايلة ...

بس كلي .. شنو هذا ..

شفتني كتلك اشمر عليك البنات وطلكني .. اكعد راحة خضر كافي هواي شايف نفسك...

نفخ و ثنينا فضلنا السكتة احسن من عركة متوصلنا لحل...

مر ببستان ابوي .. هبت عليه اوجاع حنين . 
لابو شكد ما جان متخاذل جان سند...

نفس العطر  الي يميز الريف عن المدينة خصوبة الارض ... ريحة الزرع .  خليط غريب من ارياح الحيوانات.   ...

حتى عطر دجلة شميته ....

جانت هناك علوة ....  من صعد عليها شلون تل زغير مسطح من جهتنا ومن جهة بيت اهلي منحدر ...

اعترضت..

- لو رايح على بستان خوالي مثل كل مرة واجي مشي لبيت امي...

هسة شلون تعلكنا لا تنزل ارجع بك ( ورى ) و لوف ع بستان خوالي الله يخليك .. 

لا السيارة بينا تنكلب....

رجع يتفيك ... مو بيده بعد مغرور.....

- نسيتي انة جوكي...

- ثبرتني بجوكي .. من الله ياخذ عمر جوكي ونخلص...

باوع لوجهي وطفى السيارة و ضلينة اعلى العلوة.....

بصوت مبحوح متردد

- سؤال... ظل ياكل بكلبي بس انة اذيتج هواي و مردت اسألج لا عبالج  غير شي قصدي ...

من طلعنا اول مرة اركز من صدك بملامحة ...
اثر ضربات محمد على وجهة زادت من وحشية اثر الجرح ....
الي بخدة نزولا لركبته...

عيونة بياضهن خابط مبين معصب بس هو اعرفه اذا يخطط لشي يكتم اكبر غضبه .. 
حتى تخطيطة ينجح ما يمشي ورى اعصابه ولا يستعجل.. هذا خوفني لا يقتل محمد وهنا هاي مستحيل يطلع منها مثل ما فاتت السواه بغازي وصياح و غير سوالف التسليب ... بس هنا ما تفود اكيد محمد مو غشيم اكيد حاسب كل خطوات خضر....

رجفة بشفتة التحتانية بينت شكد كاتم دواخله

صابيع ايديه تشد على الاستيرن بينت عكس هدوء صوتة العميق ....

جريت نفس وذبيت حسرة...

- لا تكول ننزل مشي منا و بيدنا التوأم ترى اني وبناتي ندهرب دعبالة من السيارة لبيت اهلي....

- يا اهل ذول وينهم؟....

عفويًا
و دون تفكير...
لا حساب جرح مشاعر

ولا حساب الكلمة الف مرة قبل لا انطقها ...

اوقات تبدر منا كلمات تنطلق مثل صاروخ من  بين شفايفنا من غير قصد تجريح

بس بعد صارت....

شفتها شلون دنكت ... و حسيت بحشرجة كتمها لنحيب اجباري ...

حسيت بيها منكسرة لا سند يسند و لا ظهر يشد عودها....

ردت اصحح الموقف بس ما رهمت ابد شكللهة كو قصدي ...

ما ترهم فقررت السكتة افظل...

شغلت السيارة وسميت باسم ربي وانة انزل بيها على كيفي ..
شوي شوي ....

و عفاف حاضنة البنات حيل ...

وحدة من بناتي عرفتها صبا ...
تأشر على انحدارنا بالسيارة وهي تصيح برطين الطفولة وتضحك و صفك..

الثانية ساكتة بس تباوع و بعيونها مرسوم فضول استطلاع....

وصلت لسطح ارض مستوي ونجحت بالنزول

حسيت بيها تجر نفس .. كضيت ايدها رفعت صابيعها لشفايفي.. ابوس ايدها الترجف .. و اهمس

- اعتذر سامحيني لا تحقدين علي بيوم سواء جنت عايش لو ميت تذكري ابو بناتج اني...

اعتذر سلبتج حق الاختيار اعتذر على كل لقب كلته بحقج وكل تعلوقة اطلقتها استهزاء 
اعتذر على طفولتج الهمشتها وخليت الكل يهمشج.. اعاذر على محمد الي كنت سبب مباشر و كان  الصار نتيجة لسوء تقديري وثقتي العميا بيه..

عفاف اتردد اسألج ما سواليج شي..؟  اخاف من الجواب مو قلة اهتمام او غيرة عليج بس اخاف الاجابة تصدمني....

بسرعة اجة ردها ..

- شحده غير  لو ما تجي جاي يهجم  عليه ملك الملوك .. اشوربنيبال .. ملك العالم المبجل...صاحب اول مكتبة بالعالم...

صحت

- اشش كافي هاي احد الاسباب خلتني ما اسألج ... صارلنة سنة مرتاحين من فيالتج..  شو رجعنا تذكري بناتج تقلدج..  انتبهي

باوعتلي وكالت

- تعمدت احجي هيج لسة داخلي مخضوضه من الموقف و لعبانة روحي من كمية الحقارة بصاحبك

بس لازم اصلب عودي مو ما عندي سند وظهر محسن طفل امي مرة جبيرة لا اب ولا اخ يوكفك عد حدك اخوي راح لجهنم الله يحركة ..

نزلت من السيارة ووكفت مصفنة على مرة ذابة شيلتها و شعرها ... منكوش الذبان يفتر عليها
الوسخ كاتلها ...

بيدها علاكة ..  بحضنها طلع منها شي و ترجعه بالعلاكة اكيد عرفتوها مرت ابوي الي تخبلت ...

و ساكنة الدروب  و البساتين ... و حدها لباب البيت ما تدخل للباب . 

تكابل النخلة الي تعلك عليها غازي ....

وكفت اباوعلها مشاعر مختلطة ماكو شفقة ابد.. .
مشاعر تشفي وكره عذروني هاي الانسانة سبب دمارنا كلنا هجمان بيت ابوي ....

ما اكدر ارأف بيها ولو بذرة من مشاعر شفقة

كل مشاعري تشفي وحقد وكره و شماته تجاهها

رفعت عيونها شافتني واكفة اباوع .  

- يهي هاي ...تكربي يبنت تكربي . 

طلعت من العلاكة شي اسطواني روث وطين و مسوية منه شكل ممفهوم طولاني...

رجعت طلعت بعد اثنين مثل الاول

- عبن اني ام وليدات عايني يبنت هاذ  صباح نظر عيني ... فدوة لطولة وهاذ غويزي البطل عبن ابني فدائي و بطل موش ايش كانش ..

وهذا الزغيرون هاذ باجر يكبر و يصير دختور كد الدنيا و يطيب عكلي يردلي العكل و ما اشوف صبرية تسير علي بليل اي ولج بالليل تجيني  تحجي و تكول .. مامش وليداتج كلهم تدفنيهم وانت بحسرتج باقية

بكلبي خفت و تعوذت من الشيطان يارب احرس محسن بس هذا الباكيلي

يمكن توارد الي بداخلي باوعتلي بعيونها الصايرات عمص.. و مذكنه ( بيهن مثل الرمد )

- ولدي كلهم ابطال عايني يبنت هذا محسن كالتلي صبرية يجيج لابس علم..

صاح بية خضر

- ظلين واكفة هنا ... دخلي البيت و عوفج من هاي الخبلة ام الوسخ...

شفتة برجلة شلون ضرب التراب و طشره على حضنها ...

و رجع ضرب الكاع ركله و شمر تربه اجة بوجهة و ضحك

نهرته
- اذا هي شر الله عاقبها دنيا  و الاخرى الله يعلم .. مصيرها شنو ..  اوكات عقاب الدنيا تكفير ذنوب ...
بس انت تصرفك هذا صح؟ عوفها خضر الله انتقم منها بالسوتة لا تكسبلك اثم السويته تتحاسب عليه مهما كانت هي مذنبة ...

انطاني بتي العنده و كال

- دخلي دخلي بلا فلسفة ..

عفته ودخلت و عيني على مرت ابوي و خضر الي مصفن بيها و استغفرت الله من هذا الرجال وحدة مخبلة شلزكتلها ...

شفتها كامت وهي تريد تهد عليه

- امش ... امش شيطان موش بشر امش ولك تريد تاخذ مني ولدي  امش روح....

خليتة يركب سيارتة وهاي المرة راح كبل لبستان خوالي   ....

امشي بين ربوعج يا دارنا اشوفج موحشة ..  جنت اجي باجايز .. البيت يروش ( مزدحم بضحكات و شغل وسوالف اهلة )

الي تشتغل الي تصنف علي والي تستهزيء و الله راضية بس ردلي يا رب خياتي كلهن و ابوي

هناك على  ذاك المكان  دومه الوالد يكعد يكوم من يشوفني ويصيح
- هلا باليايتنه ( هلا بالجايتنه) هلا ببنيتي الدختورة...

ابتسمت بجرح واحد من احلامي التبعثرت واطشرت  و زجت قربان  الاحقاد ...

بذيج الحجرة مو جني المح طيف .. عيون وسيعة طولانية بلون ماي الذهب الخالطة عسل صافي تلمع بنظرة وكحة مبينة عزيزة البيت و مدلله ابوها ..  ضفايرها حمرة من شيلتها متحررة  ...

و حجلها وي مشيتها يعزف قوتها بنت الريف الما تهاب احد...

جني اشوفها مثل كل مرة و راها نورية وهي تهمسلها بشي ويتضاحكن علي ...

و ترد صبرية تسمعني
- هاي المثغفة لفتنا .. شوفي شعرها مكرطف و مسويتله من فوك ذيل حصان ...
تردها نورية ...

- اي ولج رحت بيت كاطع جايبين هذا الفزيون ...
تشبه ونبي هذا ابو العكاريك عبسي هههههه

و يجرنها ضحكة عمي قابلة بس ردن وردن للبيت ضحكته البيت انطفا يربي الله لا ينطي كلمن هجم بيتك بوية ...

حتى صوت حمدية وهي تصيح اول مطب هي و دعاديعها و جوالاتها
..
- يهل البيت ياينكم ( جاينكم ) خطار بوية شنهي مامش تهلي بية .. 

ااااخ يخيتي وين رحتي وين خذاج المصيوب الي حرمج و حرمنا منج و ين كاعج مذلولة يخيتي لو عايشة بكرامه

صوت امي طلعني من كل هذا ...

- هلا بالجايتني .. هب الهوا و و طك  الباب كلت اكيد الهوا جذاب اثاري جايتني الاحباب...

( يمكن عكست المثل مدري اغنية )

تبوسني تشمني ..  وورها محسن نظيف و مبين جانت تسبحة شافني عريان جان لبد ورى امي و استحة ..

ضحكت

- ها ولك ههههه يمة كبر شنو تسبحيه وين الج حيل..

- الحيل موجود يبنتي مدام ربج مسهل امرنا و منور وجهنا بصلاتنا وصيامنا ...

طبعا ما فهمت شجاب الصلتة والصيام على القوة البدنية بس اكيد تقصد الدعاء واجابته بالصحة والعافية ...

- شنو اليوم شعجب .. لازم خضر مسويلج افراج...

ضحكت  وانة اضم نظراتي عنها خاف تقرا بيهن همي وقهري .. ما اريد اكللها عز محمد و السواه ...
خليني هيج ضامة همي بكلبي بس فرحتها

- اي يمة افراج عرف منو الواشي..

بصابرين وسبب كل الصار

ضربت صدرها
- سترك يا رب .. بس لا يكتل المرة هاي مرت نجم ما تنجرع بس صاحبة وليدات وبنيات...

- لا يمة واحد صاحبة دك بيه ناقصة واتصل بغازي و .. تعاي خل نكعد واحجيلج  ....

مثل كل مرة اجي هنا انيستي هنا كاتمة اسراري ...
كبرها البقيتة هنا يشهد شكد انظلمت ...

نمت على  تربتها وانة حاضن طابوكات صبيتهن داير مداير كبرها .  
اشم بترابها .. لكيت العطر مفقود...

- شكلج ... ماتت الكلمات انتحرت هنا يا صبرية..
كلشي سويت لثارج.. تدرين رجلج اكبر نذل ؟
اكبر حقير مجرم قاتل ؟
لعب وجهين وجه وي حكومة وجه ضدها
و اخر شي رجلج غبي .. 

وثق بصديق خاين... وفوكها انطة لزمه على روحه حجي بلا معنى تسجل باسمه....

ااااااااااخ صابرين تعبت شسوي كليلي تعبت....

اني الك محمد ... كربت نهايتك....

لازم اخذ منه التسجيلات لازم اتخلص منه....

دنكت بست الكبر
- خليج هنا مرتاحة حبيبة وعد مني ما انساج ... تبقين حبي الاول..  شكد ما الحياة تاخذنا شكد ما نعيشها بحلوة ومرة شكد ما كلوبنا تتفتح و تزهر تبقين انت الحبيبة انت فوق كل الناس ....

مشيت مبتعد لمصير مجهول....

يومين عد حازم بلغتة عن محمد بس مكتلة شنو دوري وياه جان

- نقتله و ناخذ منه التسجيلات حالة حال جلب بعثي نجس..

- ما اريد ننكشف ...

اجت رحيق سكتت انطتني ببسي

- من الاردن اجمل ببسي لحلكك ههههههيييي

خزرها حازم اشرلها تعوفنا

كتلة ونفسي ضاكت من هاي...
- ولا ارتاحلها ... شلون مبقيها يمك

- يمعود ... سواية عدي صدام بشمس وربعها  خلتنا مطشرين ...

على الاقل هاي تسد  حاجتي للمرة ..

- تزوج و فضها....

ضحك...

- من عقلك المثلي يزوج .. يابا حياتنا كلها خطر بين حد النار  احنا يا ساعة انقتل ارملي مرة لو ايتم جهال  

زين باجر عكبة ينخطفلي ولد لو يغتصبولي بنت. 

شوف يا خضر كون صباح هنا خالي من مشاعر  يشرحلك محمد تشرح...

الله يعلم وين ما وين حاله..  باك الفليسات وفلت...

تدري اكثر شغلة كرهت نفسي بيها هي من طاوعت صباح بشغلة ....

جر حسرة وعيونه هامت بعيد وما حجة شي...

حددنا اليوم والتاريخ لعملية اغتيال محمد...

و جانت هاي بمثابة ساعة الصفر ...

تسالمت وياه وطلعت ...

مريت بمحمد انطيه الامان مثل الاتفاق

تلكاني بحذر و بيده مسدس

- اكيد فكرت ترى خلصت المهلة بس انة كلت خليه يفكر بعد... انت ويانا مو يول هذا الوطن اليوم يريد وكفتنا المثل حازم مكانة السجن اعدام لو مؤبد...

- محمد انة وياك بس مو مال تهددني .. اكيد شقى

ضحك وجرني وهو يفتح مسجل يخلي كاسيت جان كل كبر المسجل كد الكاسيت .. زغير

سمعت اعترافاتي الواهية التوديني ورى الشمس ...

بلعت ريكي ...

- انطيني الكاسيت محمد ...

- مو بس هذا حتى تخطيطك وي العصابة

- شلون .. محاجي هذا يمك...

احتاريت بامري..

- اسمع يا خضر تكمل وياي و تخلص المهمة انطيك الكاسكيتات.. و تدلل ...

و سالفتي وي مرتك لو ما هي تنطي وجه ما ادخل بيتك جنت شارب شوي ووحدة قدمتلي نفسها خو ما ارفض..

باوعتلة وبكلبي احجي شكد حقير انت وتافه تصور اصدك بيك .. اعرف عفاف شنو خوب تخوني وي مجد ..  و تشرد وياه مو وي هتلي مثلك...

- ربيتها الك ... بس انت نسيت صداقتنا..

ورى سوالف هو بقى متحذر من واني متربص بيه..

تعبان حيل رحت لبيت اهل عفاف ماكو عرفت هم ببيت عماني رحتلهم...

بس الشفتة ما عجبني عفاف كاعدة بطرف الحوش تلاعب البنات وعمامي بيبي وعمتي نسوانهم كاعدين يسولفون كبل جذب نظري نظرات مجد...

الي بس شافني دار وجهة وترخص..

جانت عفاف وجهها ع الباب صوبي ضهرها للعائلة ومجد... الي ياكلها بنظراته...

شفت عيونها مغرغرة بدمع مكتوم ووجها مرسوم بيه صدمة و حزن جبير ....

من شافتني زاد الالم بعيونها و اخذتها رجفة بشفتها الجوة ...

دنكت تتهرب ... و العائلة تضحك تسولف ...

- اي و الله احسن خطوة تزوج المن ظال بلا مرة ...ندورلك من بنات السلف..

تعمد يباوعلي وهو يحجي معلك قصدة يبسمرني

- تسلم خالي بس لازم تكافيء بالزواج اختار وحدة  افكارنا مشتركة اكو بنية بمنطقتي بلكت نسوانكم تروح لاهلها يخطبولي ..
اني سائل عنهم وهم ناس مستورين ..

عمي فرقد كلة ..

- تبشر و اذا ما صارت ندورلك احنا التناسبك عدنا بالسلف مثغفات ودارسات و يشتغلن معلمات ومدرسات.. حتى طبيبات عدنا الدنيا تطور كل ما تمر سنين...

- يا الله اترخص هسة ...

مشى خطوات ومن تكرب يم عفاف وكف موازي الها وهمس بصوت متحشرج و عينة بعيني نضرته حيل حسستني بذنب انة سبب فراقهم...

- شوي بلة ام صابرين انطينا طريق..

كمزت عفاف وهي تخربط وضعها
- اي خوية تدلل ..

وخرت وفات ...

شفت عينها عليه.. فصرت كبالها اطع عنها مدى شوفته وهو يروح اعرف حقرت بس ابقى زوج ميقبل مرته عينها على غيره...

ركزت بعيني وذبت حسره ...

بقيت هذا اليوم وي عائلتي ...

بقت امي ما صالحتها .. اتصلت بيها ...

- يوم مشتاقلج يمتة تجين

- خضر؟ ..

صوت مهموس و رد فعل متفاجأ و ارتجفت الكلمات بشفافنا و احتارت شتحجي من عتب..

- ها يمة بيكم شي؟

كل الكدرت اكولة لخضر هاي .

فاجأني اتصاله..  هو نبذني ومن هجيت و بقيت يم اخوتي ورى الفاتحة .

فجأة يتصل بية و احس ندم بصوتة...

تحسرت و رجعت كتلة

- يمة بيك شي ...

- يمة مهموم وندمان الواشي مو من بيتنا صديقي يا يمة ..

صمت
حيرة
تفاجأ
هذا حالي وانة اسمعلة يشكيني الغدر .. شعاتبة على السواه حتى العتاب  رفض ينتفض بوجه ابن عقني و ظلمني...

كلب ام ..  لو شما يسوي ..  ردي اله يمة اسم الله عليك.

- يمة اسم الله عليك من الغدر يمة صديقك اليوفيلك مو الي يهجملك بيتك.. هذا عدو يوليدي و الغيرة تسوي كلشي تهجم بيوت
ياما اصدقاء بسبب الغيرة ضيعت اصدقائها ..

ياما وياما يوليدي الله يهديك ويستر عليك بجاه نبيه محمد...

ارتاحيت شوي من راضيت امي بس بقى بداخلي الغل بقى بداخلي الكره والحقد..

بعد ما تاكدت عندة بالبيت كل الكاسيتات اللازمهن علي..

افكر منو جان ينطيه معلومات اكو امور مذكرتها عن العصابة يمه شلون وصلتلة اكيد هذا بكل مكان زارع مخبر مثل ما زرعني ....

ساعة الصفر...

جان يوم خميس انطلقنا انة وحازم وويانة ثنين من رجاله..

راقبنا زين المنطقة... و الساعة جانت بثنتين بالليل ..

طفرنا  من السياج..
واحد من رجالنا يعرف يفتح بيبان يبجها.

فتنا داخل بيت محمد...

دخلنا غرفته جان نايم ما اكتفيت اغتالة وهو نايم...

جريتة و دك بوكسيات ...
صاح مفزوع

- منو ... شتريد .. منو انت

من وضحتلة الصورة
- خضر؟

- اجيت اخذ روحك بس اول كبل لا تموت اراويك نجوم الظهر ...

ظل يضارب وياي و يصيح باعلا صوته...

اجو وياي كممناه ربطناه وخطفناه . .

طبعا اني كلبت البيت كلة واخذت شكو كاسيت حتى اشرطة فيديو خاف بيهن الي تصوير او شي ...

و طلعنا ...

اسوق و حازم يحاجيني..

- خل نطلع من المدينة منريد نجلب اهتمام ...

- اتمنى اصفي حسابي وياه ....

هناك يم كبرها ... بس ..

قاطعني بحدة

- تخبلت حتى هاي هي التخمة عليك تبين ...
لو قاتليه ببيتة و هاي هية ..

- ما يكفيني قتله ...

- لا اله الا الله ..  يابة ناوي ننلزم فضها ...

جان هناك قريب معمل دواجن .. مكان شبه مهجور لمواقع جانت يوم من الايام شاهدة على حروب ايران....

هناك نفذت عمليتي بمحمد الصديق العدو..

رغم حذرني تقتلني يعني تنسجن لان اكو نسخ يم ولد بس اختفي كلشي يسلم لا ضيع نفسك...

ضحكت ما صدكتة ..  كل ظني يريد  يقشمرني..

لان محمد مستحيل يثق ينطي امور خطيرة لشخص...

بيدي سجينة و عيني بوجهه...

- شنو الشي الي اذا ضاع  يصير عار يتعير بيه الرجل

عيونة صارت تتراجف وهو يهمس

- شناوي تسوي بيه ...

-  كم بنية هديتوها لعدي كم بنية دمرتوها ..
ناوي اخذ منك حقهن قبل لا اقتلك

- خضر لا تصير مخبل احنا اصدقاء شتريد تسوي كلشي ولا رجولتي  ...

شوي و انطلقت صرخته.. 

رفعت مسدسي يم راسة المتوجع وملامحة المتوسعة وهو يلهث من المه و يتوسل الموت بيه
- يا صديقي موتني ولا اعيش مذلول.

يم رجلي واكع مربوط الايدين يتلوى من المه وانة احس روحة تطلع وهو يرافس برجليه الم والنزف اخذه و جنه وصل يغمى عليه همس بصوت ضعيف
- موتني شتنتظر

ذكريات الصداقة سفرات هوساتنا بالخليج و بالاندلس

صورنا بيوم ببلم اخذنا صورة جان يضحك
- يول اموت على شط العرب خضر .. لو عندي اخت انطيك ياها ولو عندك اخت اخذها  ما نفترق نبقى اصدقاء

- خايب دروح  ربي يحبني ما عندك اخت ولا عندي اخت .. هههه اظلم اختي بجهرتك يمحمد...
و انظلم اخذ وحدة تشبهك احس مزوج زلمة خشن..

ضحكنا و هوساتنا و صداقتنا كلها انباعت بعتني يمحمد...

ذكرى ورى ذكرى و عيني عليه و هو يغيب عن وعية انطلقت رصاصتي براسه...
تنهي صديق خاين .  و مصير مجهول ينتظرني..

- حازم يلة كبل لا يطر الصبح...

بقيت هل يومين يم حازم استطلع الوضع..

اتصل بعفاف يم امها حطت تلفون ببيتها  و امي فضلت تكعد يم ام حمدية متتلاكة وي عديلاتها نسوان عمامي

بيوم اتصلت  و جاوبت امي خايفة

- خضر وين انت صدك قاتل واحد جبير بالامن ...
ولك استدعوا عمامك..  يمة شنو سالفتك وي معارضة

- شنوو يمة شصاير..

- مجد راح وي عمك و شرحولهم شمسوي

سديتة خفت لا الخط متراقب .. باوعت لحازم

- طلع صح منطي نسخ  .. حازم لازم نترك المكان .. ضروري خاف خطوط اهلي وقرابتي مراقبة هسة مكانة اندلوه...

- رحيق عدها بيت من تعاركت وياي راحتله نروحلها ...

- متعارك وياها تريد من وحدة سا#$ نأمن بيها

- تحبني يولد شبيك ؟ هسة تفرح بجيتنا .

نفخت و انة ما مطمن

- يلة نستعجل لازم نطلع من العراق ...

رحنا لرحيق و طبعا راضاها حازم بمبلغ مالي ...

تعجبت وجهها مورم ضاربها ..  هزيت ايدي

بس بعيونها جانت صلافة ..  بس راح حازم لغرفتها ...

باوعتلي وغمزتلي
- نورتنا خليلك نصيب بينا

تفاجأت من عرضها بس شترجة منها وحده مثل هاي .. 

الليل جان طويل علي اتكلب....

اذا اغفى انام .. اشوف صابرين تبجي و تكول مختنكة والنبي خضر خنكتني  رجعهن و كافي خضر كامي موش خضري انته...

يتكرر حلمي وما افهم  تعاتب لو تطلب مني شي ...

شنو ارجع يا صابرين ..  شتردين مني بعد سويت لعيونج الما سواه بشر صرت حيوان متوحش ...

لاجل عين عيون تكسر اي كسرت عفاف مجد حتى امي ظلمتها...

قتلت نهبت..

اتكلب و حسيت بالباب انفتح و جسم مرة اجة فوكي بوسات مقرفة منحطة و لمسات حقيرة ..

دفعتها داخلي موجر .. منها

- شتردين ولج انت صاحبة حازم خليلج وفاء .

ضحكت

- يا وفاء هاي اندفنت وي شمس ههه خوش تهز وسطها .. شوف عيني ابو ياس. 

خل اكلك شغلة .. اريدك ولك مولعة بيك من جنت تروح لشمس شنو من رجال انت يسولك نصب و تمثال كدامك شمس اجمل الجميلات عذبتها تعذب و ما خذت منك حاصل فاصل . 
شنو من امكانية عندك عجيبة .. ما نغريك احنة
.

حسيت بصدرها تحاول تحتك بيه بجسمي دفعتها وكمت

-  انة ميت  مو من الي متعودات عليهم انة اختلف. 
- ميت ومزوج و بنات منين اجن بالبريد السريع مثلا

ضربتها راشدي
- انجبي خوش مدورة عن عائلتي عوفج منهن من بناتي ومرتي ما تلفضيهن بلسانج مريد تنكسيهن يا قذرة

- اها..  انت مستحيل اذا تحب صابرين شكو تنام وي اختها

رجعت ضربتها ...

- منيلج هاي المعلومات

ضحكت
- ههههههههههييي ليش اكو واحد ما يعرف خضر و شغلك بالمحل سألت عنك و شوي شوي بمنطقتك وعرفت

-  و الله معلوماتج اكبر من سؤال بمنطقة..

المهم ما احب الحرام...

مرتي حلالي .. اما كلبي مات وي مرتي الاولى الله يرحمها شبعت فضولج روحي طلعي منا الله يبعد الزنا عنا..

ما ناقص ذنوب...

طلعت وبعيونها تهديد
- سهلة ... يصير خير...

 

ثاني يوم الصبح كعدت على حازم يندهني

- اكعد اكعد شرطة لازم نطلع ...

كمزت لفيت الغطرة و اخذت سلاحي وركضنا بكل قوتنا ...

بين السطوح... للشارع الثاني...

ركض
اسرع
لهثة
وانة اجر نفس ...
مرة التفت ورى ومرة لطريقنا

فجأة طلع ضابط 

 وراه عسكر وهم يرمون...

- خضر الماهود حازم  سلمموا  نفسكم انتم والي وياكم ... ...

التفانة  خاتلنا  بين بنايات خرابة  حسيت بنفسي ضاك...و رياتي  تريد تنفجر   دكات كلبي  مسموعه ...

وفجأة صار رمي بكل مكان ...

و شخطة سيارة باب انفتح 

- خضر  اصعد  ... حازم بسرعة .. مازن

جان رابعنا من جماعة حازم بسيارة اجانة مثل الانقاذ السريع...

تلفتت  لجهة الضابط  ورميت صوبتة برجليه

جان بالكاع وجماعتة من بعيد تركض تريد تنقذه

حسيت بشي حار اخترق ايدي ...
رمى حازم جهة

جهة الشرطة  و شخط  مؤيد  السيارة مبتعدين ...

-  شلون عرفوا مكانا

- عترس اكيد هي منو غيرها البلغ ..

عرفت تلميحة على رحيق....

صارت مطاردة بينا وبين الشرطة .. لمن تطوقنا بالسيارات وجانت نهاية المطارده انلزمنا

ايام مرت على خضر معتقليه ... ما خلينا احد يعتب خوالي كلفوا مجد رغم مجد ماخذ موقف بس يبقى الدم يحن...

و لخاطر خوالي .. بس شيسوي اوراق خضر صاعدة بغداد لديوان الرئاسي.. وعود عند مجد واسطة متأملين عليها ...

كاعدة ارجف و خالتي تروح وتجي اكو واسطة عن طريق مجد ..

بلكت تشفع لخضر ولو موضوعة صعب عليه تهم تسليب و تقارير كاتبها محمد ضده و ضامهن يم مسؤول حزبي صاحب لمحمد على ما يبدو محمد منطي ايعاز للرجل من يختفي او اي شي يصير عليه الاوراق و الكاسيت نسخ  يسلم...

اما  خضر بعترافاتة يتهم محمد سوى هيج حتى يهددة و يبقيه الة يستخدمه يمتة ما يريد...
بس محمد طلع اذكى من زوجي و خوش
موكعة وكعة    .. 

حتى مسجلة اعترافاتة بقتل صباح و غازي..

و فوكها  انختمت  باغتيال ..  محمد
خضر نكر .. كل جرائم القتل و الاغتيالات وبقى يتظاهر انو مجرد كلام غيض من محمد واستغلاله الي ....

حتى نكر  موضوع اغتيال محمد ... رغم اكو شاهد شايفهم من يسحلوا للموقع و مراقبهم بخفية من مثل خضر بجسم محمد بسكين قبل لا يقتله....

بداخلي اكول شلون تحمل التعليك والتعذيب حتى يوقع اعترافة و ما وقع ولا اعترف . 
رغم قضيتة انرفعت لان اكو ادلة بلسانة    ..  الغبي حجاها ساعة طيش وشقى او مثل مكال استهزاء   وغيض.

تحولت قضية خضر الى قضية سياسية خيانة دولة و تخريب و ايضا تسليب تابع لشبكات هدفها تستهدف الحزب .. اذا بتسجيل هو معترف منتمي لحزب المعارض

كعدت بالكاع  مبهوتة من الحجي الكالة خالي نجم

وهو مدنك و مخلي راسة بين ايديه محتار بزمانة و بخضر الي شحططنا وراه .
ردت بس احد يقنعني ولو ولو بكلمة كذب انو اكو امل ابو بناتي يطلع او حتى لو ينسجن .. 
بس كون ما ينعدم..

- كلولي شسوي و الله تعبت خالة ليش ششفت من عمري ...

دكة  على الباب ... دكتين ...

راح خالي نجم فتحة وهو يسلم
-ها خالو  بشر..

دخل مجد و هو عينة علي ابجي بس شافني دار وجهة وبلع ريكة و حسيتة ضاج ...

و انقهر  و ملامحة تضايكت و حسيته ذب حسرة ونسى  الموجودين...

رجع خزرني و عينة علي ويحاجي  خالي.

- موضوعه متأزم رغم التحقيق  و اعترافة انو مخبر لصالح الامن القومي بكشف شبكة تجسس لصالح دولة ***

اضافة  انو معترف مو بالعصابة جان بمهمة وطنية ..  بس التسجيلات  مثبتة عليه تهمة تجسس لحزب معارض و انو معترف بعمليات

اغتيالات و محاولات اغتيال..

المحقق صاحبي يكول من سمعناه التسجيل كال شقى و لان محمد غاظني حاجيتة باستهزاء بس وين هذا يمشي عدهم القانون لا يحمي المغفلين و خضر مغفل ولو عندي شك جبير يكذب و مشارك باغتيالات ...

خالي نجم ما قبل..
- لا بوية حنا ناس مسالمين مو مال سياسة ولا مال احزاب يكفيك الشر بوية شنو هذا الحجي انت ويانا علينا   زين  بوية والواسطة ..  نبيع كلشي ونطلعة بس لا القضية توصل للرئيس القايد     .....

دنك

- الواسطة ما نفعت .. موضوعة دخل بخيانة كبرى
تجسس اكللكم واغتيالات ...
و انتماءة لحزب معارض
قتل تخريب سرقة ...
كل هاي تهمه..  واوراقة صاعدة   لبغداد من اسبوع ...

رفع وجهة علي و انة مخلية ايدي على بطني ..

و احس بمغص صابني ...

- شبيج..

همس و دنك من خزرة خالي  الي اشرلي اطلع ...

- كمل بوية ليش ما نفعت..

- اوراقه صاعدة لبغداد مثل ما كتلك ... يعني توصل للرئاسة قضيتة مو عادية ...
و خاصة قتل فدائي سابق و ضابط بامن  قومي   و اغتيالات فدائين بسرية تامة و محاولة اغتيال امين سر شعبة الجمهورية .

يعني التهم لابستة ...
اشرت الهم اي

تلفون دك على خالي و ترخص

- هذا بيتك خابرلي فرقد اروحلة سيارتة عطلت بالطريق ..

- غالي خال .
...

شوي و شفت عفاف تحوم وهي محتارة ببناتها مبينات منحسات ...

سمان و كوة شايلتهن كل وحدة بايد يمكن عمرهن قريب سنة اقل

بيبي جنها صدعت تمددت ونامت

كمت شي خلاني اروح يمها ...

شكد جرحني اهتمامها لخضر ..  و قهرتها عليه ...

نست حبنا نست كلشي لعد  شكد جنت زوج ..

ما حبتني ... جنت اداة تنساه لان تزوج اختها ..

تروح وتجي بالممر وهي شايلة بناتها بيديها ثنينهن ...

اباوعلها جسمها الناعم و جه طفولي جذاب

و كوة شايلتهن يبجن و هي محتارة بيهن

كمت شلت وحدة منهن

باوعتلي  الطفلة وبرطمت شوي بس مدت ايدها تلعب بشاربي و تكرص بيه لو مدت ايدها الثانية زغيرة بيضة
تجر بشعري البني و صافنة بعيوني عافت شاربي واجت على عيوني تريد تخمشهن جذبها لونهن الاخضر ...

تلاكت عيوني بعفاف الي  شفتها صدت عن وجهي وبين بوجهها مشاعر تريد ما تبينها .. 
- ها خوية خاف تشلع كلبك هاي سولتها بالشعر والشوارب و من انسجن ابوها لسة متنحسة البنات متعلقات بخضر كلش.

ما حجيت وياها بس التهيت بهاي الوكحة

- ولج ااخ شعري ... برطمت وهي  تمص بصابيعها و تريد تبجي

رجعت لعفاف و زجرتها بنترة ...

- انة مو اخوج خليها ببالج...

رفعت عيون مغرغرة بالدمع و تغيرت ملامحها وهي  مرة تهمس

- من تزوجت بعد حرام علي افكر بيك مو بيدي بس لازم بعد اعتبرك اخوي ما ترهم مجد ...

انة ذبيت الماضي وتغيرت اصلي اصوم ملتزمة مو مثل قبل و اقرا كتب دين واحاديث حرام انظر لغير خضر بغير نظرة الحب احنا نصنعة
واحنا ندفنة وحبك دفنته ما اريد اتحاسب و اكسب اثم.

شفته يباوعلي  و ضاج مني ومن حجيي رغم هو الصح
المرة اذا حبت و ما خذت حبيبها لازم ما تمشي ورى اهوائها لازم ما تنسى دينها وشوصاها ..

الحب والدنيا زايلة بس الله باقي واريد مرضاته

كتمت حبي ودفنته و صنت خضر رغم هو دمرني صنتة كزوج وكرجل .. و كل هذا اجري عند الله

جرحني بحجاية ..

- شيخة عفاف .. ياما نصحتج بالدين ومهدتج تتغيرين الي وببيتي رحتي لغيري وجنج مقهورة عليه مو ؟ شوفي ولج مو انة الي اباوع لعراض العالم بنظرة فسق
بس مال اخوج و اختي دنكذب احنا على روحنا . 

رديت بكل اهة من كل كلبي
- مجد افهمني   و لا توكع بخطأ و توكعني  و بالنسبة لخضر  اتمنى يطلع لان ما اريد ايتم بناته مو بيدي لازم اضحي عندي عائلة بنات عندي و يردن ابوهن ..
الحب مو كلشي بالحياة انت هم شوف حياتك  
شفت بتي على ايدة نعست وشمرت راسها على جتفة و نامت ...

رغم الالتزام
رغم هي رادت تكون مثالية
بس العيون اكبر خاينة واكبر غدارة
انزاحت تتلاكة عيونهم عيونه بعتاب و جرح والم و عيونها منكسرة و تتمنى مستحيل

من حجيها رفعت ايدي ردت انطيها راشدي شتلمح اتحارش بيها ؟ لو احرضها على زنة ؟ طول عمرها ثولة غبية

بس وكفت ايدي بالهوى ...

رجعت ايدي وهي كمزت ورى بعيون المها الي سحرتني شكد والي صارن لغيري ...

مديت ايدي  على شعر بتها  اربت   من كمزت البت فازة من حركتي الفجائية ...
كبل لا تبجي ظليت اربت واحجي وي عفاف من بين اسنوني لمن رجعت الطفلة امنت و تثاوب متناعسة و هي بسكرات نوم...

- ما باقي عليج .. اصلا راح ازوج و اعيشها بدلال
و اصلا انت ما تهميني..

شفت بتها نامت رحت دخلت الغرفة و خليت البنية يم بيبي  وغطيتها وياها رفعت قامتي و عيني على الباب . ...
.و عين عفاف من الممر تباوعلي وهي اجت وكفت بالباب    ...

شوي و اجت خالتي سعاد..

- شعندج هنا بدل ما تصلين تندعين لرجلج ابو بيتج وبناتج كاضة بيبان ...

خزرت خالتي على حجايتها  الحجتها على عفاف ...  و ترخصت

- الظاهر خوالي يتأخرون مالي لزوم ابقى ..
وصلت للباب جانت عفاف جامدة مبرطمة جنها ما منتبهة لحجي ام زوجها ..
بمرارة لويت شفايفي و من ورى خشمي كلت

- بلة  شوي افوت ..  طريق ...

جرتها خالتي سعاد وهي ترزل

- شبيج جمدتي مكانج .. الولد يكلج اريد افوت شلون قهر هذا احنا وين و هل دروب وين ...

قهر
لا مو  بس قهر
الروح ميتة و الكلب ينبضلة و صراع بين الاخلاص لزوج وبين كلبي الي كل ما يشوفه مثل طير بلا جناح يريد يروحله بس  صعب يخون صعب  يغضب الله

رجفة بشفافي كشفت مشاعري خالتي تجرني بعيد..
حظنت بتي  الي على ايدي

وشردت لغرفتي ...

اشم ببتي مثل حرز لا يوكعني بشي حرام وخطأ
كعدت استغفر الله ..
و اطلب العفو
- يا رب انت حرمت ان انظر لغير ما حلل الي هلا عطفت علي بنعمة النسيان و انقذتني من حديث النفس و الاهواء
اللهم استغفرك و اتوب اليك   اللهم استغفرك و اتوب اليك ...

طبعا مجد خطب وحدة شو ثاني يوم فسخ مطولت خطوبتة يومين .. لان عرف البنت مجبورة عليه

و بعدة يدورلة مرة...بس التهوا بموضوع خضر فأجل سالفة زواجة ....

كل يوم يمر علينا نموت بيه الف موتة خالتي كاطعة الاكل ... و بعالمها الي بس تنحب وهي تلوم بروحها مرة شنو الخلل بتربيته .. .
ما قصرت لا هي لا ابوه ..

ترجع تهمس و تتلفت خاف احد يسمعها بس يمي حجت

- خايبة هلا . ... هاي حوبة ام مجد يمكن اي والله حوبة يتيم شما تطول سنين تطلع .. 

اااخ يسهيل شحصلنا من ورى الطمع انت رحت مكتول غركان بدمك و هسة ابنك بشدة ما ضنيت يطلع منها...

ظليت احوم والوج... وين انطي وجهي تبهذلت رجال مسجون صاحبة بنيات..  شيسوي بية الزمن بعد اذا ابوهن ينعدم..

هم يكبرن وهم الناس تعيرهن بابوهن.. لو اليخطب يسأل من يعرف بنات معدوم يبطل منهن..

حسبة تجر حسبة وحسرة ورى حسرة.. هيج كضينا شهر كامل و هسة بالثامن بناتي قبطن سنة ...

التحقيقات طولت لان حازم الي انلزم وياه معترف قضايا ثانية وجرت ناس القوا القبض عليهم...

والعرفتة الي بلغ على مكان خضر مرة من ذن الموزينات
شكد حسيت نفسي مهمشة  ... صح زواجنا تقليدي بس اكو احترام.. مدام هم ببيت هاي جان... اكيد هم جان وياها استغفر الله.  

اليوم محكمة خضر  ... راح مجد و خوالي ثنينهم....

رحت انة وامي لبيت خوالي هناك انتظر على نار

كامت امي تتوضى وهي تباوعلنا
- خية سعاد انت و عفاف عاينلي كومن صلن احسن من البجي على فاضي عبنة موش ينفع خل نذكر الله بلكت برحمته يعطف على خضر و معجزة تطلعة من شدته..

كمت توضيت و قررت اصلي ركعتين لوجه الله صليت صلاة الحاجة بضمانة الصادق( ع) ....

سلمت و انة ابجي   اندعيت ربي ..

(اللَّهُمَّ أَنْتَ السَّلَامُ ومِنْكَ السَّلَامُ وإِلَيْكَ يَرْجِعُ السَّلَامُ. اللَّهُمَّ صَلِّ عَلَى مُحَمَّدٍ وآلِ مُحَمَّدٍ، وبَلِّغْ رُوحَ مُحَمَّدٍ مِنِّي السَّلَامَ، وأَرْوَاحَ الأَئِمَّةِ الصَّادِقِينَ سَلَامِي، وارْدُدْ عَلَيَّ مِنْهُمُ السَّلَامَ، والسَّلَامُ عَلَيْهِمْ ورَحْمَةُ اللهِ وبَرَكَاتُه.
اللَّهُمَّ إِنَّ هَاتَيْنِ الرَّكْعَتَيْنِ هَدِيَّةٌ مِنِّي إِلَى رَسُولِ اللهِ صَلّى اللهُ عَلَيهِ وَآلِهِ وَسَلَّم، فَأَثِبْنِي عَلَيْهِمَا مَا أَمَّلْتُ ورَجَوْتُ فِيكَ وفِي رَسُولِكَ يَا وَلِيَّ الْمُؤْمِنِينَ).

سجدت انحب من كل كلبي وانة اختنك بعبرتي

(يَا حَيُّ يَا قَيُّومُ، يَا حَيُّ (حَيَّاً) لَا يَمُوتُ، يَا حَيُّ لَا إِلَه إِلَّا أَنْتَ، يَا ذَا الْجَلَالِ والإِكْرَامِ، يَا أَرْحَمَ الرَّاحِمِينَ)

كررتها اربعين مرة و استمريت اكررها اربعين مرة عن كل جهة من خدي .. على التربة

و كملت طقوس صلاة الحاجة بضمان الصادق ع ...

اخذت القرآن اقرأ و انا ابجي .. 
صدقت على صوت صريخ.....

يتبع ......

💔💔💔💔💔💔💔

بارت طويل امس جان ٣٠٠٠ كلمة كلت اطولة الكم بعد
بارت ٦٥٢٥ كلمة استحق تكافؤون تعبي برفع تصويت القصة

بارت طويل ما الحك اراجعة اتمنى مبيه هفوات ببنية البارت .......

لا تنسوا التصويت