ضفائر صبريه

٥..

#قصة_ضفائر_صبرية٥

الجزء الثاني ..
بقلم وئام علي

اسفة البارت ما بيه احداث قوية والله جاي انشر الوات طير ١٥٠٠ كلمة من اصل  ٤٠٠٠ كلمة اقل شوي

و ما الحك اعيد نهيت البارت بحدث مشوق بس راح انمسح حاولت بالتعديلات استعيده مصار سامحوني و هذا بارت ناقص باجر بقى نت انشر التكملة و اضيف عليهة ما بقى انتظروني ..
ما ردت ما انشر خاف  باجر يسدون النت ولا الحك اعيد ١٥٠٠ كلمة لذا انشرلكم هذا و اعوضكم باذن الله

دك تلفون غرفتي رفعت السماعة..

- الو .... الو... ما تحجون  ...

سديت التلفون حيل ..
و شلتة وركعتة بالكاع و تكسر

رحت لزمت عفاف من حنجها..
حيل

- تخونيني مو ؟ تتخابرون ؟ من وراي ولج؟ اعدمج انت وياه .. خاف عبالج تخليلي كرون مو زوج انة

ظلت ترجف خايفة بين ايدي

- لا والله خضر و النبي مو هو مو مجد ما يسويها خاف رقم خطأ ...

سمع تلفون الصالة دك تخبل جرني حيل كلت اخوفة حتى ما ياذيني

- انت تخاف على علاوي لا يوكع لا تاذيني عفية .. ما مسوية شي

يسحبني و رفع سماعة التلفون بيده ترجف عيونة منططة  وحمره  وجهة كلة انكلب كلاب همس بين سنونة بصوت ناصي

-ردي اشوف

صبعة الثاني على المايك..

بصوتي اليرجف همست
- ألو...
فتح المايك ....

اجاني صوت والله ردت من الخوف اركض للحمام احس احتصرت كلش

- الو هلو عفاف ممكن نحجي ..ضروري ...

  جان خضر فتح المايك و سمعه
عينة نار و خشمة ينفخ هو وحلكة مثل ثور هائج تلاكت عيوني وياه حسيت هاي هي نهايتي من شفت ايده على ركبتي ...

السماعة انشمرت من ايدي
و الصوت

- الو .. الو شبيج ادري اليوم رجعتم وردت اسمع صوتج مشتاقلج ...  بس اسمع صوتج خلاص بعد ما اكدر ..

شنو ذنبنا بالصار ...

ردت نفس اجر خنكتني العبره عين على خضر عين على التلفون

- الو ... الووو..   شنو  صار يمج.. اعرف تفاجأتي .. اتصل وتجرأت .  بعد ما جنت ارفض تلفوناتج رفضت ارجع اسمعلج مثل قبل ..
لان تزوجتي بس اليوم اكلب بالصور الي بينا و حنين اخذني ما رايد شي بس افضفض .  بس سمعيني حتى لو ما تحجين... مساع رد علي خضر   تعجبت بهذا الوقت بالبيت اكيد طلع  كلت اجرب اتصل مرة ثانية اسمع صوتج واريد اكلج صح افترقنا واتعذب بس باقي  حبج بكلبي كل هذا الردت اكولة الج ...

بلعت ريكي و عيني على خضر الي عيونة انكلبت حمرة وهو بس يتنفس سريع و ساكت مخلي مجد يحجي براحته....

من شافه سكت وصمت ....

صاح خضر
- ولك نذل تدري موجود تعمدت تتصل تسوي مشكلة حتى اطلكها مو ؟ اي ادري بيك تريد اطلكها وتزوجها .. و ابني يضل منا ومنا

شوف حتى لو جانت نيتي تجيب اطلك هسة عناد بيك الا احرمك منها

صوت يرجف

- خضر؟ انت اخذت شي مو الك ...

بس خضر تسودن .. خفت والله هسة انة بيها عليها ..
من جنت اتصل بيه اشكي همي يرفضني بس هسة شخلاه يتصل مو تزوجت وبديت حياة ااقلم نفسي

حسيت بجرة بزندي ...

و خضر يصيح

- شوف مجد عميت عليها

حسيت بضربة على وجهي ....
صحت

- اااخ عوفني مالي غرض

- ولج مكالمات وصور بينكم ..  شوف مجد تجيب شكو صورة يمك لا والنبي اجنزها وطز توكع الطفل لو لا اهم شي الصور تجيبهن ..

يا ما عندك ناموس ..  تدفعها تخون رجلها

صوت مجد

- لا تضربها و  انت تعرف احنا نحب بعض بس انت تدخلت و دمرتنا اعرف تصرفي خطا لحظة شيطان وضعف بس لا تاذيها لا تضربهة انة جايكم نتفاهم ..

صوت صريخي من راشديات خضر يتعمد يضرب وجهي ..
لو جتفي حسيت ببوكسي بزندي ..

كعدت ع القنفة وانة اهددة
- لا تاذيني ابنك لا يوكع ...
بس هو جر شعري و رفع راسي ويحاجي مجد الي يتوسل و حس بلحظة ضعفه سوت مشكلة بين زوجين..

- اسمع جايكم و انة غلطان ...

اختفى صوت مجد وبس صوت التون ( صوت الخط من ينقطع)

دخلت خالتي ودفعته

- اجيت ع الصريخ... جنت انظف الحديقة الورى ولك عوفها .. شبيك فد مرة تسودنت ...

وكفت خاتي بينا ..

صاح بيها بعدم احترام صفنا

- انت مالج غرض  ... حمدي ربج انت امي والا اراويج نجوم الظهر على وشايتج بيه...

رفعت خالتي ايدها و انطتة راشدي ...
باوع لامه و هو معصب

- تضربيني وكدام مرتي

خالتي بصوت مهموم و حزين
- و اكسر راسك...

زكط خضر الطبلة الزغيرة الجام الي الطشت بالحايط وتكسرت بقت بس سيقانها الخشب دليل تشهد على  اعصاب خضر

فات من يمنا و اخذ السويج من الطبلة الثانية وطلع ...

شوي ورجع وعينه على .. امه

- هذا جليل الحياء مجد اذا اجه تطرديه ..

خلا وطلع ...

و البيبان ترفس و تهتز من شدة الرفسة ...

باوعتلي خالتي ..

- عفتكم سمنة وعسل اشوفه مرتاح وياج اكول متفاهمين والحياة بالتفاهم تولد الحب انت تلائمييه

عكس اختج الماتت

رديت بحسره
- الله يرحمها ...

- احجي اعتقد يخص مجد ولج جم مرة انبهج انسي بعد كل مشاعرج لازم لزوجج ....

سولفتلها الصار ...
هزت ايدها
- ابن  منو بعد ... يلة الله يرحمها امه ماتت بس معلمتة الاصول مرة تزوجت شكو تتصل عليها و تخرب حياتها

زين شلون يسوي هيج خاف ولج منطته عين...

دنكت ادري الصوج مني اول ما تزوجت جنت ما متقبلة الوضع اخابر اشكيلة وهو  يصدني يمكن هذا الخلاه يتصل تصور بباله انو افرح و اخذ وانطي وياه..
لاني وقتها نسيت الله نسيت الحلال و الحرام واتصلت بيه اشكي همي ...
بس هسة لازم اخلي حد .. خلاص تزوجت و حامل هاي مسؤولية لازم اكون اكثر نضج ما ادمر ابني على مود نفسي و اهواىها....

حجيت لخالتي الي خزرتني  وكعدت ترزل بيه ادري من تزوجت خضر احسها تنحازله بس حتى ترضيه..

دكة على الباب ورى ربع ساهة من طلعة خضر ..

طلعت خالتي ومن سمعتها تعاتب مجد و ما كلتلة اتفضل ... قررت ادخل انهي الموضوع

- ليش خاله مو عيب... اذا يوم مشت وياك من ورانة احسبها مراهقة وانت الجبير الفاهم جان لازم ما تشجعها  و زوجت هي .. شدكو تخابرلها وغزل والله خضر كسرها تكسر بالصوندة

وسعت عيوني يا صوندة هي ملشة شعر و جم راشدي و بزندي بوكسي

بس مو صوندة شبيها خالتي تستعرض عضلات ابنها كدام خضر والله فشلت صعبة ع المرة يكولون انكتلت و يحجون بهل شي احس الكرامة تنمس...

ظليت واكفة وراها ورى الباب ما يشوفني لان خالتي فاتحة فتحة زغيرة بالباب وتحاجيه... لان ما لابسة جبتها ولا عباية  ...

- خالة فدوة الطولك راح يجيهم طفل بعد ما ترهم تخرب عليها ترى هي تتاذى و الله يموتها ضرب و ما اضمنلك يجرم بيها ابني واعرفه حمش من يعصب

هزيت ايدي ...

و اسمع مجد

- اجيت اعتذر والله ساعة شيطان شتردون حاضر بس خل احاجيه
- شتحاجي خضر طلع و انة بعد اريد الموضوع ينسد...

هنا تدخلت.
- مجد انة الغلطت وانة الي قبلت بهيج وضع وزواج ع حساب رغبتي و ارادتي انة اتحمل اخطائي انت شوف حالك وتزوج لا تتأمل علي ولا تتصل بيه واذا اتصلت بيك .. كم مرة ثق اعتبرها غلطة .. و صارت ومن هل لحظة انت اخوي حالك من حال محسن وولد خوالي البقية ...

ما سمعت رده شوي وسدت خالتي الباب وهي تباوعلي دموعي تارسة عيوني ..

هزت ايدها وعيبت علي ...

- ليلى مجنونج قيس بن الملوح حتى ما ترخص بس حجيتي دار وراح بسرعة عبالك نكرص احنا وجنه مضروب بهامته لو شايفته الما يستحي بعراض العالم عود مصدوم ومجروح...

بقيت مكاني مستغربة خالتي بس صرت جنتها كامت تسوي سوالف العمة وي الجنه...

رحت اكمل غسل وتنظيف وبالي مو يمي يم مجد...

"""""""""

الكلام الي سمعته من لسانها دمرني اكثر مما مدمر جرحني حيل واذاني...

رحت للمركز لدوامي ... تاخرت اجازتي زمنية خلصت..

كعدت ورى مكتبي وصحت ع الشرطي

و انة انطيه اسماء العصابة الي لزمناهم.. بفساد الكمرك...وطليت يجيبلي ناصر احقق وياه

كمت افتر داىر ما دايرهم...

طاقتي السلبية فول واعصابي تلفانة طلعت حركتي بالمجرم الكدامي

كل بوكسي وكل ضربة ولا الثانية

- اعترف ولك اعترف نذل خاين للدولة تبوك الشعب على كم فلس ..

خليت خشمة يصب صحت ع الشرطي

- اخذة ودزلي ايسر ..

ظليت واحد واحد  دميتهم بالتحقيق...

واحد بغرفة التعذيب رحتله .. هذا ملفة تحول للامن  ...

بس ردت اشفي غليلي اول ..

و هم تناوشتة ابطش و اضرب هذول المجرمين و داخلي ما انطفت نار

جرحي جبير تخلت عني ... شكد نصحتها عوفي كلشي وتعاي وياي ...

اخر شي خلص الدوام ... اخذت سيارتي كبل .. للشط احنا بالبصرة المهموم هنا مكانة و العشاق هنا مكانهم كلمن يحجي همة وعشكة للشط عود وي امواجة تروح كل الاسرار و التخلجات والانكسارات تندفن وتنمحي وي الشط ...
الي افضل صديق يسمع اسرارنا وما يكشفهة...

بس هنا اجيت هاد كل طابوكة ولا الثانية اشمرها و تكون دوائر وروجة عالية وطشار الماي ويرجع يسكن ..
ادنك واخذ حجارة بكد ايدي واشمرها ونفس الحالة ..

صحت بوجع روحي...

- لااااااااااااااااا لااااااااااااااااااااااااااا  مجروووووووووح و الله مجروووووح

شفت ثنين عشاق مجنت منتبهلهم بختلة الشجر كاعدين يضحكون.. بس شافوني ظلوا يراقبوني بصمت    ....

اكيد كالوا مخبل هذا ...

ما يوم طلعت بيج عفاف لا بختلة ولا مكان سري ...

ما يوم دنستج ... ولا حرضتج على غلط...

جنت اخاف عليج من نفسي ...

نزلت دموعي و اكتافي تهتز  من نحيبي الصامت . 

مشيت بعيد بمكان معزول كعدت اباوع للسفن ...

سفينة اسمها سلتم ووحدة يمكن هيالة اسمها بطوطة ....

ناس تصيد سمج وناس تتمشى ...

وانة بازمة هاي الحياة وسط الناس احس وحيد...
و مهموم ومجروح...

تعال وشوفني شبية
لغيرك ما اريد ابجي
تعال وطفي نيراني
موش انتة الكلت وجي
تعال اسمع نواخيي
تطر الكلب وتبجي ...

تعال الفركة كتلتني
حجاية وياك اريد احجي
عود حاسبت روحي

...........🌷🌷...........

طلعت من البيت وانة بس اسب واشتم..
مركبتلي كرون ست عفاف     .....

وانة امشي ما حسيت الا صوت  ...

درت ...
- هلا محمد هنا اليوم..

بداخلي خفت لا يكلي المهمة مستمرة وانة توني بديت ارتب وضعي ...

- اخذتلي محل هنا شوف كبالكم كلش بداية السوك...

امور خاصة بالنساء ...

- اكلك و محلك ذاك...
- يابة زيادة خير صلي على محمد سوكم خوش يشتغل مو ميت..

- الله يرزقك زين انت كض محلك القديم الي بيه اني اشتغل واني هنا عيني على بيتي و قريب عنهم اوفي احتياجاتهم..

رفض..

- لا يابة هذا محلي يحتاج شغل وتعب و انت ما فارغ ..
داومت بعدك.

- باجر   اباشر ...

- يلة اروح ردت اسلم عليك وشيحتاجون الاهل اني حاضر المحل محلهم...
- مشكور الله يوفقك...

عفتة ورحت  ما ادري وين اريد اروح امشي بلا سبيل ..

و كلبي محترك..
مرة مزوجة شكو تخابريلة وتشجعيه    ...

امشي وادردم..
صح مو حبا بيها بس مكرن الما يغار على عرضه وهي مرتي صعبة على رجولتي

ظليت افتر لمن هدأت ..

رجعت للبيت ..  كالب وجهي ..

لكيت الشغل كاضي و مبين التعب بوجه امي كلش .. يمكن لان تخفف الشغل عن عفاف

صوتها اجاني

- يمة ما تاكلك لكمه

بصوت منتور..
- ما اريد..

بداخلي مستنكف ..
تضربني كدام مرتي شبقتلي من هيبتي ...

دخلت الغرفة مظلمة بس من ضوة لطيف ..

باهت... شعلت الكلوب . 
و رحت للكنتور اخذتلي ملابس   
و سبحت و رحت  للثلاجة طلعت طماطة ولكيت علبة سردين..

سويتلي حميسة سردين يمكن اخترعت بيها اختراعات    ..

جبت الصاص و ذبيته عليها و انة احمس مردت السردينات مرد...
بالي مشغول افكر ولسة احس اندريالين عالي بدمي و اتمنى اروح اكسرها تكسر ...

الخانم اول ما تزوجنا تخابر عليه ..  وهي بذمتي تتصل برجال غيري

اااخ يا ناري ... كون  هسة اترك  بيها اثر يذكرها طول عمرها ما تندك بيه ....

الايام المرت اروح اداوم  بالمدرسة و العصر بالمحل..

اوقات يتصلون علي البيت يردون امور..
و مرة يمي محمد كال انت عليك بشغلك اني ادزلهم صبياني يلبون طلبات البيت ..

و بهيج اخلصك من روحة وجية ع الفاضي ....

الولد ما قصر...

التهيت بالحياة افكر بمستقبل ابني الجاي بالطريق....

اني وعفاف نحجي ع الهامش كد الحاجة ...

و بالليل غصبن عليها اخذ حقوقي .. مو صايرة تدور حبجيات و ي حبيب الكلب وناسية هي بذمتي ولازم تصوني ....

كمت ادور حجج اداهرها مثل قبل ... او اضربها ..  مثل ...لا ازوجها ...

وهي مرة ترادد و او تصير المنصح الي..

بس اكلكم شغلة .. من اقارن حياتي وي حبيبة روحي صابرين اشوف حياتي وي عفاف اكثر راحة تعرف ادق تفاصيلي واحتياجاتي ...

اني من زمان متعود عليها رغم اقسو وياها بس جنت احجي يمها بعض الامور من اتهمتني باطل ابوس صبرية شوي ابتعدت ..

اليوم من طلعت الصبح كالت هي رايحة للسوك  كتلها روحي بس اخذي امي وياج ...

كمت اشدد عليها ما اقبل تطلع بحدها مثل قبل اخاف من شيطاني يوسوسلي ويوحيلي تتلاقى وي مجد...

صوت الجرس طلعني من افكاري رحت للصف انطي محاضرتي للطلاب ...

-------

شلون ما احاول وي خضر ابني حياة صحيحة لخاطر الي ببطني .. بس هو ع اقل تصرف يسودن علينا...

اليوم كلت اصبغ شعري اجيب صبغ شعر ...مشتهية شقارات ..

خالتي تكول اخذي اوكسجين وبلوندر و صابون ركي يطلع يخبل...

بس جاي صبغ جديد اريد استخدمه ...

اخذتها ونفتر بسوكنا الجمهورية ...

اخذتلي كم غرض عجبوني ...

خالتي اخذت حنة هاي الاكياس حنة هندية اسمها ...

و اني اخذت صبغ..
اشقر ... اريد شعري مثل  ميس كمر...

و اذا سمرة يعني شنو.. ميس احسن مني صح هي شحم ... بس ميخالف اريد تغيرات اسوي ...

رجعت للبيت و خالتي صبغت شعري بس هي كالت ما اصبغ  تراجعت..

- يمة مالي واهس .. و خالج جوة الكاع...

شمرت الكيس  و خلت علاكة ع شعري وهي جابت الفير نسميه شسوار و توجه الهوا الساخن على شعري...

ورى اقل ساعة انة غسلت شعري وانة ظليت الطم...

منا اللون طلعني صدك صفرة ومنا خالتي ما موزعة الصبغ زين

- خالة شلون تعرفين خضر اذا شافلة شي يظل يعيب علي

صفنت بوجهي واشوفها حابسة الضحكة ...

دارت وجهها وهي كوة بالعة الضحكة باوعت بالمراية واكلب بشعري ..
برطمت كلبت شفايفي لجوة و اباوع وجهي
د- صدك جذب خالة هسة لا اني اشقر شعري ولا احمر جني  بطانية ام النمر مرقطة بسود واحمر

باوعت لخالتي وطكيتها هي صرخة هي بجية

- لااا حبابة هسة ينطبق علي لقب الصخلة صدك وصخلة مرقطة  دبريني كبل لا يرجع...

ضحكت علي

- اخذج لام الكوافير .   ( تقصد صالون ) وهي تعالج الموضوع

- هاي يمتة هسة ما يفتحن يعني يجي يشوف هاي نقشة  البطانية الي بشعري

- اخليلج حنة مؤقتا لمن نروح ...

- اي بلكت يرجع شعري احمر حتى لو حني قابلة...

المرحلة الثانية الحنة ....  عيني ع الساعة خاف يجي و يشوف هاي المصايب بشعري ...

اجت خالتي ..

- هاي حنة فورية مو حنة عرب يعني كافي هل كد ساعة ع راسج يلة اغسل شعرج..

يبووو هو انة غسلتة واشوف الاصفر لونة برتقالي  مدري زنجاري ولون شعري البقع الي بلون شعري صارت اطوخ بلون كريه

هذا غير شعري السبل صار نكرو اشعث

لطمت

- يمااه لحكيني احترك شعري .... شلون بية ...

هنا  و دكة ع الباب راحت خالتي جان خضر...

دخل من غير ما يتحاجون   هذا هو طابعهم الجدية

لبست الشال و انة اتختل جوة الفراش

استغرب حسيتة جر حسرة عبالة بعدني زعلانة
خرب حتى من ردت تمشي الامور و اعلن السلام والصلح ... يحترك شعري خرب حضج عفاف

شال اللحاف و استغرب لابسة حجاب

- ها شكو ...

- لا بس بردانة ..

راح للهيتر و علاه و اجة يريد يشيل الحجاب

- مو زين انت حامل ... لازم تنامين بكل راحة ....

هو يجر وانة كاضة الحجاب بقوة و متمسكة بيه

حسيتة شك.

- شو بلة خل اشوف ..

رفع الحجاب ...

و صاح

- شنو هذا

بلعت ريكي

- موديل جديد والله ...

ما حسيت الا ضرب كصتي براحة ايده وكال

- اخذيلج ربع ...

غمة انت شمسوية بشعرج جنج صخيلة ابو داود من تمرضت ...

ظل يصنف ويعيب وانة بس ابجي صوجي ردت اسوي اغراء عود ..

امدة حظج يا عفاف طلع و هو يضحك

- دروحي .... هههههه جنج  الطلي من ينيشنوه يحطولة بقع بضهرة بلون مميز...
يلة يابة جوعان وتعبان....

فات هذا اليوم وكصيت شعري فرنسي ولادي كلش و صبغتة اسود بس هذا اللون ينفع يعالج الخراب الصار 
طبعا مجان اكو قصر مثل ايامكم هذي انتم اجيال هل وكت ...

جنا نخرب الشعر لو بحنة عرب نعالجة لو نصبغ اسود ...

بطني كبرت و خضر عطل خلصت السنة الدراسية .. 

و ظل طول وقتة يشتغل بمحل صاحبه

و هنا بدت مرحلة من حياتي