ضفائر صبريه

٢٢من الجزء الاول

#قصة_ضفائر_صبرية٢٢ من الجزء الاول
عندما يكون الحب هوسًا ...
بقلم وئام علي..

بس سديتة من خضر محسيت الا خالتي موسعة عيونها وهي كبالي .
- ص...ص... صابرين.. عايشة
- فدوة خالة سر لا تحجين لمرت خالي نجم او اي احد تموت اختي خالة حامل راح يجيج حفيد و..
صخام ... خالة شبيج

ركضت الها واكعة بالكاع ...
رحت جبت ماي ورشيت على وجهها وغسلتها كعدت فاتحة عيونها ..

- شلون عايشة... صخام الصخمج يا سعاد... اشوف الولد مدوهن...

- خالة على كيفج مو مال والله هيج تسوين لازم تفرحين اختي عايشة..

- ولج تدرين شنو يعني ... يعني بس يدري اخوها يقتل حتى ابني لان ضمها عنه ولج خضر وحيدي .. شتدرين بغازي يرحم كلة بالسيف يشتغل.. و يقتل .

انت شايفة تدريباتهم ياكلون بشر.. عفاف انة اخاف على ابني وهذا حقي...

ابني الوحيد .. ابوه مات وهو بقالي .. اختج كلة منها تفتر بالكيعان ما حسبت حساب ولا خافت ولا خذت نصح ... ليش ابني يشيل وزرها اخطبلة احسن البنيات على الاقل يمي يبقة..

- خالة شتحجين ابنج مرتة عليها سابع وينتظر فرصة ويقنعج يجيبها هنا يمج

باوعتلي بمرارة وضحكت ...

- شيجيبها هنا ولج انتم ما عدكم عقل يعني كل عقلكم تبقى سر شلون يفكر ابني حبل الكذب قصير...

- خالة فدوة لا تحجين لاحد فدوة ...

- خابريلة ...
- خالة على بختج لا تكليلة عرفتي يموتني ...

عافتني وراحت غرفتها تبجي ...

وهي تتحسب على اختي شكد تكرهها يا ربي ليش هل حقد...

اتصلت بمجد ماكو الظاهر رجع لخفارتة ما ردت اتصل بمكان شغله ....

------------

اتمشى بين التماثيل ...

واضرب برجلي حجار وصلابيخ ...
و احس روحي مختنكة .. شي كاتم على نفسي...

امشي دون هدف ...

- ااااخ يا رب تعبت يمتى تفرجها علي ... طلبتها منك وما قصرت كدرت احميها وبعدت عني عيون غازي و لهيتة عني ..

يارب نسيني الصار ما اريد ااذيها .. بس تعبت...
يارب احبها ...احس حبها يتغلغل بين كل خلاياي

فتت وشفت ثنين عشاك احتمال ازواج جدد ايد بيد يمشون وعين بعين ولغة العيون تتحد وي لغة الشفايف
تنسج قصة حب ..
كعدت على احد ساند التماثيل..
و عيوني غيمت بحسرة..

- ما تهنيت يصابرين وتعبت حيل يرويحتي...

من حسيت شوي نفسيتي ارتاحت ولو شيريحني و النذل الي دجيتة و شمرتة بنص الصحراء متقرب لمرتي اكثر من مرة لو اعرف الا وربي اشرحة شرح واطعم لحمه للذيابة..

ولو هسة الذيابة اكيد شبقت بيه شمرتة بالصحراء ع الحدود منو يلكاه هسة تعشت بيه الذيابة والغربان...

سر بقيتة وي نفسي و ما حجيته لاي احد لان انعدم ويصير هو الضحية ....

محسيت نفسي الا ابتسم...

مستلذ بقسوتي على النذل ...

مشاعري الي داخلي تستلذ بحب الانتقام ..

جريت نفس... المهم النذل مو عايش ....

و الا ما اتحمل اشوفة وهو اخذ حقي بصبرية ..

حسيت مخنوك مو طايق ارجع للبيت وما اهتميت ما رجعت عفاف ...

رحت مريت بالبصرة القديمة قريب منوبيت شمس وانة اضغط على ستيرن السيارة حيل غمضت عيني وفتحتها شوي ..

و كدامي خيارين الحرام او لا ..

منهار و تعبان والمثل شمس تنسي الرجل اسمه بس هذا النوع اكرهة بالنسوان ..

و هوسي بصبرية منعني اخونها ..

اذا هي المرة الثانية راحت اله تتفق وياهووغدرهة اعتبىتها نوعا ما خيانة دون قصد منها
..

احاول ابرر روحتها ..

ضربت الستيرن جن هورن السيارة ينطلق بازعاج ...

تحسرت وانة اشغل السيارة و اسرع مبتعد رحت للمحل بلغوني لازم اتصل ببيت اهلي ...

كضني كلبي شصاير ياستار ...
اتصلت ولن عفاف تخبرني وهي ترجف بخصوص غازي

- شفتة مرة هدي نفسج..

- شهدي انت مخبل ما حسبت يوم تلاكيه ويشك ..
ما فكرت يوم يلاكيك طالع وياها .. وهنا الطامة الكبرة...
- شبيج شبيج ... ردت اجر غير مكان بس الايجارات غالية ومحمد متساهل وياي بالايجار..
ولج علي ثكل جبال ....

فوك همي انت تحجين علي لسة ما جهزت ابني الجاي بالطريق... شغلي يا الله اللكمة وهاي احنا نفرين...

- اي طبعا اذا صبرية تكول من حبلت لسة الريوكات و العشيات تجيبهن سفري عود بس غدة تطبخون ... خليلك عقل و ابعد عن مكانك لو تحاجي خالتي وجيبها هنا لا تطلع ولا اي شي وغازي ما يجي لهنا ناس غرب عنه ...

واذا رادني ارجع يم امة اشبعها عرايك عود يدزلي امي تاخذني...

- استغفر الله ولج الله كريم هو بس انت ضبي لسانج لا تخليني اتندم حجيتلج
لو ما صبرية احتاجت البقى من اهلها لا والله ولا اكلج...

دربالج تزلينها..

- ها لا .. ما احجي...

- زين شلون رجعتي ليش ما بتي يمنا شلون وحدج تطلعين ولج ليل انت ما تخافين كافي مصيبة صبرية و الصارلها لان ما سمعت كلامي..

- لا يمعود شلون ارجع وحدي رادت خالتي تجي علي و اذا تجي تدري خالتي الا تدخل وشوف صديقتي وتقيم ربيعتي شنو هي و ما ردت انة تجي يعني تكشف كذبتك مكتلها صابرين عايشة ..

- منو وصلج؟
- جودي ؟
- جودي؟
- احم ... ها .. تدري ليل وما لكيت غير مجد.. مو هو حسبة خطيب يعني صح غازي ما وافق بس وربك انة ما اتنازل لازم نلكة خل..

صفنة... فترة ....
- طيح الله حظج ما لكيتي غير هذا المايع...

- شوف خضر حبيت صبرية ومحد كدر يجبرك و موتتها وهي عايشة حتى تحميها ...تستكثر علي مجد شبيه مايع شو زلمة تارس الكاع هيبة لا تخليني ترى اشطح و انطح فهمتني مو؟ ..

- خبلة مو بيدج لا تحجين وياي بهذا الاسلوب وانة كتلج اي واحد يعرف يعني صبرية تروح بيهة خلي هذا ببالج.. و هذا مجد بس لا كتيلة ترة ما اثق بيه حتى يتقرب لغازي هسة يفتن...

- ها... لا هو بقى برة ونزلتله كتلة بيت صديقتي .... بس هو ملاكي غازي جا شلون انة عرفت بغازي غير سولفلي يمة ما اتخيل لو جان شافني يمكن بسيفة وهو واكف جنة ساسوكي يكطعني تكطع.. و الله جنة ساسوكي .. لا جنة ذول اعداء ساسوكي الي يلبسون اسود
..يبووو ولك طخت ببالي ...
عدي و صدام قلدوا ساسوكي اللبس الوضع السيوف شوف الحظ حتى الريس يبوك من الفلام كرتون ..

- اشش طايحة حظ يلة كافي ولج مخبلة وانة مالي خلك روحي والتلفونات مراقبة طايحة الحظ على هل سالفة...
سديت التلفون بوجهها ... هاي تشطح ..
مالي خلك...
التمت عليك...

رحت لبيتي و كالعادة سيارتي اركنها بعيد عن المشتمل للتمويه خاف غازي يشبه عليها ...
كمت اتخيلة حتى حافظ رقم سيارتي ...

تمشيت للبيت وانة اصعد الدرج وي كل درجة كلبي يوكع بين رجلي ...
رجعتلي الخنكة ...

خليت السويج بالباب ... وانة افتحة وادخل...

مدهون والله نسيت المفاتيح بالباب من برة رجعت وشلت المفتاح دخلت وانة اقفل البيبان ...

مارحت للغرفة اكيد نامت ...

كعدت بالهول شغلت التلفزيون ... على قناة الشباب سهرت و جان فلم اجنبي عن حرب بين و دولتين ..

يمكن المسؤول عن حذف مقاطع من الفيديو نايم لان طلع مقطع اغتصاب البنت على علم دولتها وغير الضرب و التعذيب ع العلم لعبت روحي جاي اكوم اطفيه بس الشباب وقفت الفلم مع اعتذار عن المقطع بسبب خلل ..

( اجيال الطيبين منو يعرف يا فلم هذا سولفولي عن الموقف وميذكرون الفلم شسمة او لاي دولة يتبع بس هل حدث صار بالاذاعة خلل و انعرضت مقطع اغتصاب كامل ع علم دولة البنت الي احتلوا بلدها )...

طفيت التلفزيون ...
ورحت خدرت جاي عيني على بخار القوري ..

صافن بيه ...

و حسرة جرها حسرة وبين صابيعي كطف جكارتي اجر النفس واذبه ...

واحاجي روحي تعبت والله تعبت ...

وماكو حل ...
فوك ضيمي .. تكذبين علي ليش لهل درجة بنظرج انة لاشيء ...

اااوف ربي يمتى ارتاح ...

طفيت القوري و انة ادورلي نفاضة اطفي الكطف بصفناتي جواني ...
و الله ولا حسيت بالجوية كد ما داخلي مجمر .. و الالم اقوى ....

صوت مبحوح من البجي وراي كمزني وراد يوكع الكلاص هو والجاي علي ..

- خضر ...

جان همسة مبحوحة منها ...

بلعت غصتي وما باوعت بوجهها ....

ظليت صافن على الكلاص البيدي واكف وظهري لباب المطبخ...

همسة ثاتية ...

- خضر ...

هل مرة همستها مرتجفة ومختلجة بانين .. حسيتها اتأن بلفظ اسمي مثل الي تريد تبجي ... نغبة نحيب بصوتها ...

اشرب جايي و جبت كرسي وخليت ظهري للباب ما اكدر اباوع عليها ... مو بيدي ...
ولا اكدر اتقبل اخذ وانطي وياها ...

تصدكون صدمتي جبيرة من سمعتها تعترف برجليها راحت للنذل..

اكبر من صدمتي بيوم اغتصابها .
احس روحي هنا طلعت من جسمي ورجعت بس من رجعت مو خضر الاولي رجعت خضر الحياة وجعته كلش...

الكلاص ع الكاونتر انة كاعد على كرسي و ظهري للباب وهي وراي ...

اشرب بالجاي و ورثت جكارة ...

يمكن كد ما كمت اشرب جكاير احسهن انطبعن على صابيعي اثر الكطوفة ...

شايفين الانتحار ببطء .. اني اكبر مثال عليه..

حسيت بحرارة بضهري خرب حظك خضر حتى من تتقرب يمك كل خلاياك تنطيك اشعار.. باقترابها ....

جفلة بضهري عمق الأحاسيس جا شكد احبها ...

جرحت كل رجولتي و ارجف بس تتقرب مني واشم عطرها ...

ايدها على جتفي جريت نفس وذبيت الدخان..

- شفت خضر موش كادر تسندني بكسري ...
سودة بوشهي يا خضر ياريت ما صرت ولا امي حبلت بية ...

كمت واول مرة اعوف صبرية وهي تحجي ...

بس مو بيدي مختنك...

سمعت شهكتها ما متعودة مني اجفي ...

دخلت الغرفة و ذبيت روحي على الجرباية بملابسي بس فكيت الدكم و اباوع على السكف و صافن بالمواصيل الي وصلتلها ...

بطت ما اجت ....

جريت نفسي وبدة كلبي يحن ويطرد عقلي الي جفى منها ...

مشيت ادورها لكيتها متمددة بالهول عالقنفة وهي تنحب ..

استغفرت الله وصحتلها .

- كوفي بالغرفة ...
درت وجهي عنها من كامت تباوعلي بعيونها المدمعة ...

مشيت كدامها للغرفة من دخلت وراي سديت الباب و اشرتلها تنام....

دنكت وتمددت غطيتها ...

شوي وشفتها نامت يمكن الحمل كلش متعبها و هي حملها هذا كضته نوم ...

قررت ارجع للمدرسة الواسطة فادت رغم التربية متشددة و تمشي على انظمة و قوانين بس الواسطات الها دور و كلشي بسكتة يصير ...
مدير مدرستي القديمة معتز بيه وهم ساعدني بهاي الشغلة..

قررت اترك المشتمل اجر يم اهلي او افاتح امي واجيب صبرية يمها ...

اذا ما قبلت ااجر البيت الي كبال بيت اهلي ... شفتة معروض للايجار ..
هم قريبة عليهم عفاف تكضي وقتها يم اختها وهم هناك بعيدة عن طريق غازي ما يجي هناك..
بهيج اتخلص من غازي و جياتة لمحمد...

و هم قررت اعوف الموضوع وي محمد بس لازم اسحب نفسي بالتدريج...

--------------

ورى ما خالتي انعزلت تبجي فكرت اخابر خضر انبهة بس خفت من رد فعلة شسوي اذا امه تصنت قابل انه كتلها هي سمعت كل حجينا ....

النوب انة حجيت على زي الفدائي الي ذكرني بربع ساسوكي بس لا تصنت صدك وتروح ركبتي هنا لا جني المنقذ يفيدني لو اجيب العالم السفلي كلة ما يشفعلي ....

خفت اي وربكم نسيت صدام يخلي تصنت واستخبارات على الاتصالات وانة كلت عدي وصدام يباوعون ساسوكي وسوو جيش فدائي بنفس زي جماعة الي تعادي هل مسكين الاقيزم شكصراتة و هذا غازي جنة ساسوكي بس خاضع لعوامل التمدد و التمطط و ماطينة شوي على جثالة وطول والا الجهرة جنها ساسوكي بس على اكرع.. ...

دك التلفون...

شلتة بساع ..

- الو ...
- فديت الالو ..
- مجد .. جفصت الحكني ما عندك عرف من هسة اكلك راح تنكص ركبتي ..
- شصاير ..

- مو مال تلفون باجر اشوفك ونسولف بس حضرلي واسطات و ناس واصلة بالحزب و بكومندوس فدائي صدام و حتى بوزارة الدفاع وياريت اذا عندك عرف وي عدي يتوسطلي يم ابوه ..

- لا اله الا الله ظل بالي شصاير ..؟

- باجر نسولف..

- ضيعتي ابو الغزل بس وربج اذا طلع شي تافه الا ابسطج هل مرة اضربج ضرب مصاير ...

هسة شينومني و بالي يمج صاير شي ع خوالي.

- لا باجر نحجي..

سديتة و خليت السماعة مفتوحة لا يلح ادري بيه يلح هواي ...
ظليت اتكلب و كل ساع اكول هسة يطبون علي الامن القومي واعتبر جاسوسة تهدد الحكومة ..

كعدت اتخيل شلون الباب اندفر ...
- منو .. روحو شتردون عاش القائد نروح بالدم نفديك يا صدام... ترى مو قصدي اكول باك زي ساسوكي مال الننجا...
و تخيلت شلون يسحلوني يعدموني رمي بالرصاص لاني خاينة للبلد ...
- لا .. اليابان هي الي قلدت زي الفدائي و لبستة لربع ساسوكي...

فزيت على دكة باب كمزت عبالك طلقة وصرخت
- يحيااا البعث .

دخلت خالتي و كالت

- شنو ؟ يحيا البعث ولج مخبلة ؟
- ها عبالي راح انعدم و كلت خل اهتف بلكت يطلقون صراحي..

- حرام اذا افهم عليج.. ما علينا... ما اكدر انام .. و هذا خضر اريده يطلك هاي الساقطة منو يكول الي ببطن هاي ال #" هو ابنه ام الريكان و الكيعان كلشي تلم .

ضجت من حجي خالتي
- خالة عيب والله عيب انتبهي تحجين على خيتي شبقالي انة شو وحدة مندري اراضيها وحدة ماتت ..

- اهووو شوف من يدافعلها الله يرحم غيرتج على خضر منها..

- ترى جنت طفلة مراهقة و كل تفكيري محدود بخضر بس الانسان يكبر ما يزغر ..

- تلمحين علي مو .. ؟ مو صوجج صوجي اني الي اجيت احجيلج همي صدك لو كال ربيني وانة ابن ابوي ..
انطمري ام الخوارة و البيوت...
راحت وسدت الباب حيل...

دمعت عيني ..

- يلة خل تروح لو اوكف وياها ع باطل لو تزعل و الله يا الله بس زين سوت اجت خلصتني من حلم يقضة كابوس عشتة ... حتى لو حجيها سمم ليلي

------

بلغ خضر محمد على انو حيترك المشتمل بس محمد كلة على نهاية الشهر بينا اتفاق لا تنس ...

- بس محمد اريد ابعد منا و اريد اخذ مرتي يم اهلي ...

- انت حاجيت اهلك..

- لا
- حاجيهم اول ... و الله كريم....

مرت ايام واني متردد اروح لامي ...

خاصة عفاف خابرتني وكالت جانت تصنت وسمعت وهي كلش ماخذة قرار ...تريدك تطلك صبرية..

- شنو هذا الكلام من كل عقلهة الله لا يعوزني لاحد..

سديتة من عفاف هذا الي يسر عفاف سر يتبهذل .

رحت للبيت كبالنا لكيت قطعة الايجار مشيولة ...
دكيت الباب طلعت ام داود وبيدها طفل ..

- من ايام هذا البيت للايجار شنو بطلتم تاجروه ..

- اي و الله خالة بعد ابني مرتة توفت و جاب ابنة يمنا و اجر بيتة وبقينا هذا النا ..

- ها خير ان شاء الله زين ما تعرفين بيت ايجار قريب منا ..

- لا والله يخالة ...

- شكرا خالة اترخص....

ركبت سيارتي واهبد منا ومنا و ما حصلت بيت ايجار وهذا ياخر خططي بترك محمد و جماعتة .....

رجعت للبيت وكالعادة صبرية كاضة السجادة وصلي ...

وكفت اتاملها .... احس تحيطها هالة الخشوع ...
هي ملتزمة صلاة صوم بس هل ايام تصلي هواي ..

و تصفن هواي و احسها جنها مو بعالمنا ..

ورى برودي منها لايام ... كسرت الحاجز و كتلها..

- تقبل الله...

باوعتلي ودمعت وكالت..
- عبن كلت لمي يمة انة شندعي الله ينطيني على كد نياتي دعيت الله تحاجيني وترضى علي لو الثمن ادفع عمري...

ضجت ... اكو هيج مرة تطلب تموت بس كون رضى زوجها ...

كمبصت يمها و بست راسها ..

و بينا احساس مجهول احس فجأة نقزة بكلبي....

مديت ايدي اكومها وانة اكللها ارتاحي انة اصب غدة ...

شبكتني وشمتني بركبتي ...

- افيشش خل اشبع منك ..

- هههه شبيج حبيبة ...

- خضر احبنك جثير موش بيدي ينظر عيني ...

- عمتي هنا لو راحت...

- نايمة خطية..

- خليها نايمة ... تعالي اكلج تم تأجيل الغدة حتى تكعد عمتي

- يااع شنهي تريد مني

- اسولفلج غزل سوالف ما تكفيها ليل و احجيها وي نجمة ظهر...

دنكت وضحكت ...
- يااا شوف الوعد اليوم نازل بية تصجم..

متت ضحك
- شنو تصجم هههه ولج رجلج انة

- عبن والله تصجمني و ...

ما خليتها تكمل شبكتها وانة احس ذوبان غصن الريف بين ايدي و تنهيدة فرحة تغلغلت بشرايني وي نبضاتي تلاكت نبضاتهة ...

تدنت شفايفي من عسل ريفي اصلي ترشف منها بكل الحاح و انة ابوسها وامشي بيها لغرفتنا دخلتها وسديت الباب قفلتة عمتي معدها دك باب تجفت ههه ....

وانة غيبتها عن الوجود بعالمي الخاص عالم كلة حب وسعادة ...

نعلن اجمل صلح بعد خصامي ..

-----------

من كعدت الصبح خالتي مطنكرة كلش علي .. و كوة تتحاجة ..
بدلت..
- ها وين ان شاء الله..
- خالة للسوك هياتة كبالنا اشتري غراض واجي .
هزت ايدها وما حجت وانة زيبك وجن اطلع ...

لكيت مجد ينتظرني بسيارتة بالركن ركبت واتلفت ...
كبل كلي

- شكو شصاير ..

حجيتلة كلشي ...

- الله يطيح حظج عبالي احد متعرضلج مهددج.. و الله لانعل ابو الحب ..

انطيتها كفخة على متنها بس ع كيف ميهون ااذيها ...

و استمرت لقاءنا شبه يومي ....

------

بيوم اجت امي كالت اروح لصبرية تجين ...

- لا يمة روحي انت خطية ثكلانة امس جنت يمها

- الله يكومها ..
شاورتني
- شو خالتج مدري شبيها يمة شو مثكلة علي
- يمة عوفيها عرفت بصبرية و الله يستر ...

طلعت امي و انة عيني على خالتي ...
- ابن خالج يشرد مني ولا لفة كتيلة اكيد..

- ها اي ..

- ولج راح يموتني اختنكت وين اشكي همي .

كتلها ...

- خالة صبرية فقيرة والله الها حوبة انة مجربتها خطية خالة عوفيها تجي يمنا وراح يصيرلج حفيد..

- ولج الفي وحدة...

- والله عيب عليج لا تقذفوا المحصنات.

عفتها ورحت غرفتيى..

لو رايحة وي امي احسن ....

كعدت اكتب و امارس هواية تقليد الخطوط ...

باوعت ع التلفون .. هسة هو بالمركز عندي رقمهم خل اخابره اشوفة فارغ يطلعني ضوجة ..

رفعت السماعة وجن اسمع خالتي سعاد تحجي وي مرت خالي نجم.. من التلفون بالهول هن بخط واحد....و حجت المقتل كلة .. وتشكي تتحسب
يا قشمروا الولد شنو ذنبة يزوج ملعوب بيها مو هاي عفاف ليش ما يريدها . ..
ومرت خالي نجم تكللها شلون لواتة عايشة وضامينها....

ظليت ارجف شسوي يا رب خالتي ما لكت غير مرت نجم تشكيلها هاي مرتكالو متنقل وهسة كبل تطش ...

ظليت خايفة ...

احاجي خضر بس خالتي خاف تزعل ..

سمعت خالتي تحلف مرت خالي ذيج لاتحجين لا تنكتل وتجي بوجهنا ..

- لا يا خية شنهي صكد جذب شلون احجي كدام وجهج جوة نعالج...بس انت دربالج ع ضغطج شسوين خية هذا حظج.. تحملي النوب الفرخة ابنج محبلها لا تنكتل وندخل خطيتها ..

طمني كلامها وكلت ما يحتاج انبهة هذا مرعوص و بيه جني مخبل يجي يحرك عشيرتي و ينعل سلفاي...

فاتت سلامات همزين...

خابرت امي وصبرية ...

حاجتني صبربة يا الله شكد احبها من تركز و تمد الالف ب آلوو يهو منهو ..

- صبرية عفاف وياج..

- خايبة شنهي بس لا مخابرة على امي و روح ابوي ولا تجيج خليني اشبعن منها شباقي بالعمر

ضحكت .
وقلدتهاة
- خايبة شنهي وين جنت عن سوالفج الحلوة كل هاي السنين و الله انت محبوبة خية بس ردت احاجيجن هههه ...

- يبعد طوايفي عنينا عليج ( اشتاقينا ) .
- اي والله ..

- خايبة جا ما تجينا خلي جودي يجيبج ...

- هههههه لا راح اخابر خضر يمر علي بطريق رجعته و هم لازم يحاجي خالتي ...

جان اجمل يوم مرينا بيه وي صبرية ...

مر علي خضر و اجة باس راس امه و طلب منها تباوع لحالة ومرتة رايدها ..

خالتي سكتت ما انطت اي حجاية بس رفضت صبرية تعتب بابها ...

و مبقى لخضر الا ينتضر يحصله بيت قريب ياجره....

ذبني يم اختي و امي ...

- شغلة ساعة زمان و ارجع صبرية اريدج تبدلين راح اطلعكم اليوم...

و فعلا .. طلعنا وافترينا ...

ايدي بيد اختي مصايبها قربتنا بعد ما جنا ما نطيق بعض الدم يحن و صرنا كلش قريبات ...

خضر وكتها كاعد على مصطبة بمنتزه الخورة و النخل بيه هواي هذا قبل لا يتعمر المنتزه ويصير على صورتة بالوقت الحالي.

شفت بعيون خضر حبه لصبرية صفنته عليها جانت تحجي الف قصة ورواية ..
بكل قواميس العشق..

و الله الكعدة ناقصة جودي.. بوقتها تخيلته يمنا شكد حلو كبلات اني ومجد و خضر و صبرية وامي كاعدة مثل العذول بينا ..
يا شنو عذول طاح حظي والله اكول ع امي عذول بس اخ بوية لو عايش نجيبك وي امي هم كبل تصيرون احلا عشاق..

صفنت وحسيت بغصة داخلي ... ليش هو ابوية يمتة حبها امي شبعها ضرب و فشار وضيم ما حسسها بقيمتها كأمراة عاشت وياه حلوة ومرة ..
الله يرحمك بوية ويغفرلك..

اليوم صبرية هواي تتصفن و خضر هم احس حبهم حلو حتى العيون تتشابك وتتغزل بيه

اشرلي خضر اروح يم امي و كض صبرية من ايدها وهو يتمشى ...

- خضري ...

- يا بعد عيون خضرج
- ليش بس وصلنا المنتزه كتلي انزع بوشيتي يااا شكد استحيت من الله خضر عبن زحمة انة لبستها شلون اتركها موش يصلح ..

ابتسمت ...
- صبرية انة ما بوشيتج انة بس ردت احميج و خفت عليج هناك ... بس هنا محد من الي اخاف عليج منهم ..

ضربت صدرهاة...

- ياااا لا موش مقبولة نزعتها طاعة الك بس والله بعد موش اقبلن انة اريد الله يغفرلي .. خاف تماهلت بطاعة الله..
خضر اريدن الجنة عبن انة انضلمت دنيا و اريدن بآخرتي ربي يكرمني ..

شوصفلكم ..
عيوني لفعتها الدموع .. وانة اسمعها . عجبني تمسكها بالله كثير منا يمكن اقل شي يترك الله لو انة مكانها صار بيه هيج يمكن ما اوصل لطهارة روحها وبرائتها ...

- صبرية سوي اليعجبج ما ردت تصورين اخنكج ترى البوشية مو اجبار جائز اظهار وجه المرأة حتى الحنك يعني يغطى الحنك .

و اعلى الجبين ..

- خضر كتلك انة رغبتي هاي موش يصلح العب ع الدين حتى لو جائز اني مقتنعة وراضية بيها اريد الجنة ..

شهكت من حجت وعصرت ايدي حيل بكل قوتها مثل الي توصيني بشي بس محجت .. بس رجفة شفايفها و عيونها الي غمضتهن شوي و راها كالتلي ....
- تذكر يا خضر ... اعمل لاخرتك..

صفنت بحجايتها لا اعرف توصيني لا اعرف تنصحني و لا اعرف انة كد هاي الكلمات لو لا ....

- تدرين رغم بساطتج حجاياتج حكم ...
- عبن الدنيا علمتني ...

ابتسمت ..
- وانت شعرفج بالدنيا طالعة ماشيا .لو دارس....

كطعت حجايتي لا اجرحها بس هي ردت علي ...

- لا يا خضر موش مرجية منك الفهم موش بالدراسة يبعد طوايفي التجربة الضيم القهر عشت بدار كلة عرايج امي ومنتوبة ابوي يهد على امي... بس جنت عزيزة يا خضر جنت مثل اليكول انة اخو هدلة ...
انة جان بوية يسولفلي حجي الدواوين .. شفت صبريتك جانت بس سيرتها الوادم تستحي تعاينلي و تستحي تكول صبرية ...
بس دهري و مغسوملي ( مقسوملي ) صياح يذبح سيرتي الحلوة ويهضمني ...
انة ادري موش نبهة بس حبك دوهني خلاني انطرك بمجانة بلكت تحس بية ناطرتك وتجي سنين انطرك ..

و انطر شوفتك بس صياح نذل سنين ما صابني شي .. بس هذا موش عندة ناموس و ابن حرام..

- كافي صبرية ... خل نتونس بطلعتنا انسي .. و رجعي صبرية الي جانت تلكفهة وهي طايرة مو صبرية الي احسها صارت ما تعرف تصرف..

- خضر الله ينطيك العافية وفيت وكفيت حبيتني و اخذتني رقم ( رغم) صاحوا بيك هاي عار تنذبح
..
خضر شجازيك .. و الله لو اشعلن صابيعي و اعلكهن شمع ما اجازيك...

وفيتلي بكلشي خضر محلل ومبري الذمة..
- شبيج تحجين هيج...
- خضر ... يبعد طوايفي شغلة وحدة ظلت بنفسي موش اكدر اقرا قرعان ( قرآن .)

- احفظج الايات السهلة وتدللي واذا تردين اعلمج تقرين.

- عبن مو كلش جاهلة انة هم جنت ادرسن اعرفن اتهجا بس خضر الكتابة بالقرعان ( قرآن) موش اعرفن اقرنها
..

- تدللين من باجر بالليل يومية ساعة اعلمج بعد امري ..
كضت ايدي وابتسمت ...
وهاي بقت محفورة بذاكرتي .. بس ما كدرت اوفي كل وعودي ولا وصاياها انة مو مثل صابرين داخلي مو مثلها ابد....

بطريق رجعتنا .. طبعا بالسيارة طلبت تتبوشا رغم عفاف ويانا رغم امها بس وسواس يوسوسلي اغطيها من محمد اغار عليها من شفتة مرة بعينة اعجاب اول ما اجينا ...

و هذا كلما نطلع ندخل نتصادف اوقات وياه .
و ها .. ابن الحلال بذكره...

باوعتلة واشرت الهن يصعدن ...
و هنا ما قصرن صعدن بسرعة ...

- هلو محمد شو هل ايام كاض البيت..

- كلة شغل شخبار الشغل بالمحل.
- زين ..
- و شمس ..

جريت نفس...

- لا تشرد مني ملتهي بمرتك و عايف قضيتنا خضر مجاي تنفذ الأوامر ...

- محمد بصراحة مو طريقي هذا انة صاحب عائلة لا تورطني اعتبرني مستقيل ..

- ها هيج الحجي ..لمن بدت شمس تتعلق بيك...
- اي وربك .. مو مشكلتي دزلها غيري يعلقها بيه ..

- سهلة ...

خلا ودخل وانة صعدت ...

-------
الساعة ب ١١ ونص ليل و جن يجي الامر..

- غازي راضي ...

كمت بكل وقار وي تحية ..
- نعم...
- عليك تلفون... اتصال جايك مهم ..

ورى ما رحت .. رفعت السماعة بغرفة المسؤول عنا..

- الو ...
تفاجات من الاتصال ...
- شلون... وين العنوان..

جسمي يرجف و الغضب الي اكتسحني يمكن يدمر البصرة و ضواحيها ...
سديتة من المتصل ...

و انة اخطط...

- سيدي اجازة اريد..

-------------------------------

عفت عمتي وعفاف يسولفن يضحكن و اخذت صبرية نكمل سهرة حبنا ...

اجمل يوم وي صبرية جنا مثل طيور حب ...

شكد تحسفت من اسدلت ستائر الليل تغطينا و نمنا .. متحاضنين ...

اهديلها نبضات كلبي.. وي كل نبضة تصرخ بحب للجنون حب خضر لصبرية وتلاكي نبضاتي نبضاتها الخجولة ببرائة روحها على استحياء ... تهمس نبضاتها الي شكد تحبني ...

نمنا و حتى اصابيع ايدينا تتشابك..
كعدت الصبح على همستها يم اذني

- خضر .. خضر..

- اممم
- موش اليوم تروح كلت اكعدك تروح للتربية ..

- امممم ..

- يا و الوعد شنهي اليوم اكعد يزلمة موش يصلح نوم الظهاري..
بصوت نعسان كتلها بيش الساعة..

- موش شايفتها ظلمة بس توة اذن..

فتحت نص عين ..
- صبرية اروح للتربية باذان الفجر دخيل بختج؟
- يع عبن بالسلف من يطر الفجر نروح نحلب هوايشنا جا شنهي انتم عجيبون امركم...

يا بوية متت ضحك عود عجيب امرك صبرية تقلد كلامي بس لازم تضيف نون ..
لو تجمع بكيفها...

- صابرين الدوام هنا يبدي بثمانية .. ماكو وي طرة الفجر شعندي يمعودة قابل اروح احلب مدير التربية ..
و اعلفنه حشيش هي مقابلة رتبها مدير مدرستي وراح يجي وياي لان مبدأيا حصلت موافقة . و مناك امر للمحل هذا ابقى بيه رزق وراج طفل يعني حليب يعني هواي امور..

شفتها تضحك..

- ياااا شنهي تتغشمر وياي مدير دايرة تربيتكم شنهي هويشة هو لو خافن عجل لو ثور عبنة زلمة موش مرية و تكول هويشة ..

وربكم طارت النومة .. كعدت اكابلها واضحك لضحكها..- - شو تعاي ولج ههههههه

شردت..
- يزلمة كوم صلي اذكر ربك وتعال قريني قرآن ..
- عفية صح لفضتيه
- اي عبن حفظتة من عفاف .. لكيتها تصلي غلبتك شفت هاي انت زلمة و بنية مثل عفيف تغلبنا لا موش حلوة بحكك يزلمتي..
- عفيف هاي تلكيها تصلي الجماعة وي جنانوتها .... هههههه و الله هسة تلكينها لا صلي لاشي كاعدة تسطرلها جذبة

باوعتلي صفح ...
و كامت تريد تتوضة وهي ثكلانة ..

تركت الكسل وكمت اصلي كدامها و كعدنا نقرا قران اقرا وهي وراي ااشر على الكلمات
- الله ينطيك العافية اموتن على القران ....

بست راسها ....

- الله يستر عليج و ينولج الجنة ...

- امين ..

- فدوة اروحلج ..

كمت الساعة صارت بالستة ما يسوى انام بدلت وهي ريكتني بالسبعة ونص طلعت .... رحت للتربية ...و راها للمحل .. استرزق و بطريقي هم شلت كروة القاسمة الله ما يكطع رزق بني ادم..

وانة كاعد مصفن جن تخابر عفاف وهي تبجي ..

-........ .

من وصل غازي للمنطقة الي شكد اجة ولا توقعها هنا ...
وهو يلتفت للبيت الجوة تحديدا للباب والشر بعيونة ..

يصعد كل سلمة من الدرج و يزيد رغبة غسل العار ..
ايدة على زرف بالباب يغطيه ...

انفاسة لهاثة يحسها بحرارة ما يطفيها الا الدم...

رغبة قوية يرفع راسة بالسلف وكتلتها الا هناك..

دكة على الباب دكة شخص لازم ينفد حكم اعدام بكل حقد الاخوة المفقود بين ثنايا اعراف جهلة و دون حق...

دكة ثانية ماكو ... دك جرس . صوت عجوز منهوو ياا ما تحجي منهووو..

الصمت الداخلة ميعني هدوء جان يعني بركان كاتم الانفجار الى وقته..

بالجانب الثاني ورى ما راح خضر جانت عفاف وصبرية يكضن شغل وامهن يم التلفزيون من اندك الباب صاحت عليهن ما سمعن وهي محد منبهها ما تفتح الا تنتبه منو من زرف الباب.
- منهو ... .يا منهوو ما تحجي يااااا

فتحت الباب هي فتحة هي دفعة ...صرخت المرة ...

تفاجأ ... صدمة ركضت عفاف ومن شافتة الخوف سيطر عليها ركضت هربت بكل خوف شردت بمكان مثل مخزن لبدت بيه...
وهي تسمع صراخ صبرية و امها وهي تبجي الخوف جان جبن جبير و متكدر فضلت روحها و سبطر خوفها على كل رد فعل ...

بجانب صبرية ..

من شافتة تلاكن عيونة وعيونها

- العار ينغسل يصبرية ..

امها تلطم..

- البنت حبلة حرام عليك يغازي وين تروح من ربك خاف الله موش يصلح خيتك ...

دفعها و جر صبرية الي الخوف جمدها ...

بس صرخة الم ببطنها من دفعها ...

وهي تبجي..

- موش عار مظلومة ... بدت من خوفها تحس لسانها يثكل بس ما انخرس ...
حجت امها بلطم و صريخ...

- يمة دخيلك البنية بيت رجلها المن تسوي هيج. يمة سلابة سطتها .
- تعيرت يمرت ابوي وعاري لزمن اغسلنة و العار ما يعيش ..
بعيون صبرية بجي وخوف
- غازي هدني يخوي السطاني منك وبيك ..

ضربة على حلكها بوكسي فلش سنونها وفجها ضل يضرب بحلكها...

- تردين تذبيها بخوي ياما امي كالت تريد تضيع عارهة حتى تبرد نار ثاري اغسل عاري ..

جرها من شعرها و هي تصرخ و تحس شي بين زرورها ينزل حار عرفت تنزف و متكدر تحجي بس تون...

امها طلعت وراه وهي تركض تتبعة و ركبت سيارتةو هي تتوسل بيه ....

-..................

بيد ترجف وهي تضرب وجهها وتلوم بروحها
- كلة مني و الله مني يارب شسوي هسة دخيلك ربي اخابر خضر ..
طلعت من مضمامها وراحت للتلفون...
بيد ترجف وهي تكلب بدفتر التلفون لكت الرقم الي رادته اتصلت ..

مشغول يمكن اكثر من نص ساعة تتصل لو مشغول لو ينكطع لمن حصلتة

- الو

- الحك خضر غازي اخذ صبرية و امي ركضت وراه تبعتهم الحك صبرية ضاعت راحت ...

- شلون شكلتي؟ شلون اندل ولج شلون

- الحك من زمان اخذها اخابرك ماكو ...

سدته بسرعه خايفة . ... تحس بذنب

- اكيد خالتي من حجت لمرت نجم هنا عرف لو خالتي خاف بلغت غازي حتى تتخلص من صبرية هواي ضنون و احس نفسي انة السبب ...

وهي تبجي
- كلة مني انكشف مكانها كلة مني صخام وجهي..

------

سحلها من وصل بسيارة طلبها من صديق فدائي ...

دخلها البيت لكة امة تاكل ذبت اللكمة وهي متفاجاة..

- العار.... ؟ شنهي .. عايشة هاي والله مصكدت ميتة ...

ربطها وهو يتفنن بتعذيبها وهي تتلوى وتنزف وتحس راح يغمى عليها ...

عيون ابوها تبتسم و ايدين نورية تمدهن الها و مثل طير مر بيها شمت ريحة جنة ... و عطر مو من دنيتنا ..

صوت قران اخذها بعيد عن عالم غازي .. متكدر تحجي بس روحها تردد ...

وجن دفرة باب و صوت ورى فترة طويلة ما تعرف شكد كل الي تعرفة هي بردانة و النزف القليل بدا يزيد .. و تلعب روحها.
تقلص بطنها تنبأها هي مو بخير.
صورة عيونها مغوشة وهي تسمع

- صابرين غازي على بختك لا وين صابرين..

صايح و عرك ..
-----

من خابرت عفاف تدوهن كبل اخذ سيارته وعلى طريق مختصر ما همة خطر او بيه تعرجات ...

- لج سرعي سرعي يلة ...

يحجي على سيارتة وكم مرة راد ينكلب من السرعة وهو يبجي ..

تذكر حجي امس تذكر الفرحة الي ما تهنى بيها

- جايج وعدتج انة امانج مدام حي ما يلوحج اي ضر .. ولج انة خضر كل سندج اجيتج لكلب عاليها واطيها واطلعج من حلك السبع...

اجيتج لو نعيش سوى لو نموت سوى ماكو خيارين..

الا بما شاء الله..

بس وصلت الباب مالهم مو كلش مسدود و ناس برة تسمع بس محد يدخل ماكو غيرة

- ولكم همجججح وين شواربكم و غيرتكم ..

عفتهم ودفرت الباب وانة ادور صبريتي وجن ادفع منتوبة الهدت علي

- معلمها اذا تنكض تتهم صياح مو حتى تطلع من عارها و يذابح الاخوى انتهزتم موش موجود صياح مامش خبر عنه ويدافع عن روحة ..

رحت لغازي

- لا غازي على بختك...
عيني بعين غازي تلاكت ورحت اركض للحجر و غازي يعاركني ونتصايح ...

لمن تلاكت عيونا مو ذيج عيونها الصفرة و لا بيهن لمعة حياة شهكات و ونين الم و النزف ماخذها رحت الها و ايد غازي تجرني و......

يتبع الجزء الثاني من قصة تلك الضفائر ...
هي ضفاىر بنت من الريف ...
قصة ضفائر صبرية نلتقي بالجزء الثاني قريبا

ونشر الجزء حيكون نفس المكان هنا و تسلسل البارت الاول من ج٢ راح يكون ٢٣ .. حتى ما تتخربط عليكم

لا تنسوا التفاعل ع الجزء الاول ع كل بارت اضغط النجمة الي ما مصوت يرجع يصوت لطفا حتى يسارع بنشر ج ٢ ..

ننتضر ارتفاع مستوى القصة بمساعيكم الجميلة ...

تصبحون على ما تتمنون

اختكم وئام علي