ضفائر صبريه

١٧...

#قصة_ضفائر_صبرية ١٧

بقلم وئام علي

--------------------------

بعد انتهاء عملية المداهمة على موقع العصابة
بالفشل .. بسبب هروبهم ...
و الخساير قتيلين ...

بنت مخطوفة و احد افراد العصابة عدموه جماعته حتى ما يعترف عليهم...

لكينا اسلحة نعتقد ذول يبيعونها على المعارضة و الحكومة دخلت انذار انو هناك محاولة انقلاب جديدة ..

زاد تفتيش البيوت المشبوهة بانضمام افرادهم لحزب *** المعارض ...

بعد ما فشلت المهمة وما عرفنه افراد العصابة ولا لزمناهم ...

احس نفسي شبه غيبوبة و جماعتي جانوا شايليني ...

للعمليات ...

نزفت دم هواي ....

بس انة واعي .. و اميز الي يمي ...

الدكتور يصيح..

-نزف هواي نحتاج دم .. نحتاج دم...

بدت الدنيا تصير ظلمة ...
همست لصاحبي...
رقم بيت خوالي .

- خالي... اتصل بيهم....

و اغمى علي ..

من فتحت عيوني لكيت يمي خوالي ..

حتى خالي سهيل بس درت وجهي عنه وهم جنه جاي على اعصابة ولابس زيتوني زيه الحزبي حتى يكدر يوفر الخوالي دخولية بوقت ممنوع للزوار...

يومين و اخذوني خوالي عدهم لان بيتي فارغ ما عندي احد ....

يداريني ويهتم بيه..

لازم بطني ومحني كوة امشي حتى تكرمون للتواليت خالي نجم و فرقد متكفليني ...

الدوام مجاز الى ان استرد عافيتي ..

خالي يرتب المخاد وراي ..

و ام خوالي هي بمثابة بيبيتي ربت امي تجي تطل علي مرة جبيرة ....
همست بتعب

- حجية لا تعبين نامي انة اكل ..

- لا يمة اشلفلك البرتقال اشيل البزر عبنه مر لا تاكلة وي الشلوفة ..
وليدي ايد العجوز الكدامك كلها خير وبركة . اخذ مني يمة اخذ ...

وانة اكل وهي تشلف جان ارفع عيوني واشوفها بباب الحجرة ...
بلعت الشلف بكبرة سهوا دون ما الوجة وجن اغص اكح و كاض بطني كوة اتنفس احس مكان الرصاصة انفتح من كحتي ..

- يمة اسم الله سودة بوجهج ام سهيل الولد شرك يمة كح على كيفك عندك خياط..

صاحت بعفاف
- روحي واكفة مصفنة شبيج شجاني منجن بنات ام حمدية غير المصايب فزي ولي جيبيلة ماي يبل ريجة هسة بلعومة تحشرف من الغصة ...

********
عفاف.. .

كاعده اكنس كدام البيت متحزمة بالعباية و انضف طلعة بيتنا جان تمر .. بيه وحدة من رفيجات صبرية تتلفت و من ما شافت احد تكربت و سألتني بسرعه

- صكد شخبار صبرية؟
- ما اعرف بس شبيج تتلفتين ترى ما نعض ولا نعدي ..

- ها .. مامش شي بس اخوتي موش راضين احاجي بناتكم...

دنكت مستحيه ..

-وانة يخيتي بالي على صبرية وربج ولا اصكدن الصار الله لا ينطي ابن الحرام الحبلها ..

رجعت اكنس و متجاهلتها الباعنه نبيعه على شنو عشتو ناقص اتوسل بهاي المعيدية تحاجينا وترافجنا

- روحي عيني لا اخوتج يلمحوج ويكسروج.

- رايحة هو اخوي يم بيت جدج ينطي واجب لخوالج على ابن اختهم الضابط ..متصوب

- شنووو
شمرت المكناسة ودخلت البيت ذبيت هاي العباية تتربت ..و صحت امي

- يمة.. يمة كعدي مجد متصوب
سكتت من شفتها متمددة بالحجرة و عيونها مغمضة بس تارسة وجهها دموع ..
حست بية يمها ...

فتحت عينها وتنكبت تغطي وجهها بشيلتها عني

- اعرفن يمة امس جنت يمهم بس هاي مرت نجم منجلبة سمعتني حجي و حلفت ما اروحن بعد

- انة رايحة

- تعاي خايبة هلا وين مولية يمة موش النا عين نصد بالناس العار ركبنا

- ما كو عار صبرية مغتصبة و العار من السلف يظلم بنت مو مذنبة فوك ظليمتها يظلمونها اصلا وربج امشي ورافعة راسي

- يارب ما اتحملن بعد اريدن تاخذ عمري ..

بوست امي مسحت دموعها واخذت عبايتها لان نظيفة كرصت خدودي ...

طلعت و منتوبة تهز ايدها .

- خوش خوش .. هم عدهم هذا الضابط و الله ما تنحزرن بنات راضي

- ها شكو شبيج شدردمتي بلة ما سمعتج؟ يا عجوز البين ترى رايحة بمهمة وطنية اخدم الوطن و اتجسس لان سمعت بت كاطع يم خوالي و وصاني غازي بسالفة اصير جاسوس وانة هسة مشغلة جني التجسس يلة باي ....

- يع .. شنهي باي ولج تغلطين ايا بت الفكورة شلون تكلي عجوز البين وترد تغلط تكلي باي من الله ينتقم منج يام حمظية على هذن الطراكيع الي مخلفتهن.

صوت امي تكلها ..

- مثل ولدج و طراكيعهم الزغير جنه اهبل و الوسطاني صاير مجاهد و الجبير بواك ومدري وين سف ....

.... عفتهن يتعاركن و عفت منتوبة تهد على حجرة امي طليت على ابوية جان نايم خليت ايدي على كلبه ..
حمدت الله ..

- عايش الحمد لله يارب خليه لو بس نفس يبقى اسمه ابو .

اخذت شيلتي ما اعرف البسها لفيتها مثل حجاب و لبست عباتي وكبل لا اطلع صحت على امي

- يمة حقريها انت مريضة لفي راسج ونامي وخليها تحجي تحجي لمن تلصم و تنجب .

خليت وطلعت من تدمرت كل احلامي كمت ما احترمها هي حية اذتنا وابوي طردها و ابنها رجعها علينا .. تامر وتنهي ..
هسة عرفت ليش صبرية جانت تراددها و تلاسنها . هاي المرة مينعاش وياها .
امشي و افكر بامي بس لا تظل تعاركها و كنتوبة قوية تحط امي وتضربها .......

اهف بعباتي وانة شبه اركض .. يمة حبيب الكلب مصوب شو ما حجو لا كالوا يومين مشمور بالمستشفى ...
دخيلك ربي بجاه كل ولي عندك يا رب كون ما بيه شي

اركض كلبي يدك و يركض وراي ...

دخلت ملهوفة ادور المضيف بعيني مامش .. رحت ادور لا كتني خالتي مرت نجم ...
- ها عفاف اليوم افراج.. لا تفترين يمعودة راح تموتن امجن استجن ...
عوجت حلكي هاي انجلبت بس صبرية كسرتنا ..

- عود من اجيبلج الفضيحة احجي

- يا يمة وانة شنهي وجيبيلي فضيحة ...حي الله مرت خالج و الوسطاني موش الجبير.

هزيت ايدي واتلفت منا ومنا .

بسمرتني

- ملهوفة عليه مو .. ؟ جنج عاشكة يعفيف سبحان الله نفس لهفة صبرية على خضر.. و تالي بس عقد عليها رافجت غيره وحبلت ..
- شنوو ولج انت طلعتي مو خوش وحدة تسكتين لا بمصارينج والله ... ديربالج تجيبين سيرتنا لو تقهرين بامي ...

تركت كل رزايلي الها وجلبت بكلمة عاشكة ....

-والله لهفتج هاي و عيونج تدوره اي عاشكته هههههه و الله يا ام حمدية خوش خلفت ...

جان انطط عيوني بوجهها وارفع ايدية يم راسي و احرك صابيعي مثل ذانات الارنب و ابرز سنوني اقلد الجني جني " الجني المرعب ارنوب"

و رديتها

- اي عاشكة جنيج ابو شفايف جنه شفايف ارنب يشبهج كلش و راح اتفق وياه يجيج بالليل يلعب عليج ويخليج فرجة للرايح والجاي ...

- ايا بت ال....

رفعت حاجبي

- عيني ابن خالتي مصوب واجيت اطمن لا تخلين بيها ان و اخواتها لا والنبي اكول لخالي نجم يكسرج شو ولج مات جدي و انكسرنا بختي و طلع معدنج جنتي جني ابو خنيس

- شنهي ..
عليت صوتي
- هييي ابو خنيس شنو ما سمعين .. يالسكوتية هسة طلعلج لسان اي مو جني ابو خنيس الابسج هسة راح واجة مكانة جني منافق ..

هزت ايدها وراحت المطبخ تدردم

- احمدنك و شكرنك ربي على نعمة العكل هاي ترللي كلش سويج ...

عفتها ادور الغرف صاحتني مرت خالوا فرقد وهي اصلها دارسة و مثقفة
- تعاي حبيبتي مالج غرض بيها هاي تنتهز فرصة عمتي مكسورة وتريد تسيطر عالبيت عود....

- على روحها اخلي ابو كرك يكرفها ..

ضحكت مرت خالي فرقد...

رحت وكفت بباب الحجرة الي اشرتلي عليه مرت خالي وهي تكول الضابط بغرفة بيبيتج ..

بس شفته ردت عافيتي و الله وداعة ابوي احبه ..
عيوني هسة نورت بوجهة ..
يمة فدوة هم شايفين مريض و هيج منور اللهم اجعلني مرضا يصيبه حتى احتله و اشبك جسمه بجراثيمي ..
ردت اضحك على روحي خوش اشعر شعر بس الحظ مدبس ...

...

سارحة بيه وبيبي توكلة ما منتبهلي من اروح فدوة لمصقولتي يمة الحلك يمة هم شايفين حلك هيج كلة رجولة و لتسقط كل الرجال و يعيش مجد حبيبي البطل ..

ظليت سارحة بيه مرة اتغزل بيه بسري بالفصحى ومرة بالجلفي ...

شو اسم الله على شبابة بس رفع وجهة شافني غص و شرك بشلف برتقالة و صاح
- ااخ بطني ... من كح لجم جرحة ...

ترزلت من بيبي وركضت اجيبلة ماي وانة ادردم بروحي بس لا حسدته تف تف على عيوني شلون خليته يشرگ..

انطيتة ماي وايدي تتراجف..
اخذ الماي وتلاكت عيونا ابتسم .. رديتلة الابتسامة و تنهدت ...
اخذ الكلاص وتلاكت اطراف صابيعنة بشبكة لثواتي وهمس ...
- على كيفج ... ذوبتني همستة .. حسدت الكلاص الي بيده حسدت الكلاص الامس شفايفة وحتى الماي حسدتة لان توحد وي جسمة ..‌
و چن عجبني اتغزل بيه بسري و الله لو يدري شلون اعرف اغازل يمة استحي لو يدري شحجي عنه بكلبي

ياليتني كنت شربة ماء فتشربني ... و تندمج ارواحنا بسر الوجود ايقال الماء هو منه تتكون الخلق فيا رب امسخني ماءًا فتتغلغل جزيئاتي مع خلاياه و تتحد .
وأرافقه اينما كان و اموت معه حين تجف الخلايا و تندفن....

صافنة بيه و لمن بيبي خزرتني

- هي ولج جنج ماصول شضعفاتج لزكتي لو تطلعين لو تكعدين ...

- ها اي اكعد اكعد ..بس بيبي مو كدام مجد عفية شنو ماصول
- يمة بتي جابت كل بت شكبرها و شحلاتها بس انت طلعتي جنج سلوكي لافاد بيج خرز شحم لحم لا فاد حتى لميتلج من العطار دوة يسويلج لحيمة هاي انت هاي عودج ...

دنكت مستحية ...

- شربت دكسن وما سمني بيبي مجد يضحك علي سكتي عفية ..

حاجة مجد بيبي
- جسمها اجنبي هههه بس ماصول وسلوكي حلوة منج هاي حجية .

باوعتلة وبوزت طبعا الناس قبل تحب السمن و يدكسنن حتى شوي يتفحن مو مثل هسة اني المسيطرة والنسوان تتمنى مثل جسمي ....
كدام ابتسامات مجد .
انسطرت جان يتلصلص الي نضراتة لو يغمز بعينة لو يرسم كلب بين صابيعة .
وهو يباوع بيبي ملتهية عنا ينتخز هاي الفرصة تباوع بتلفزيون خلوه بغرفتها غمزلي و حرك شفايفة بحروف

- احبج..

عضيت شفتي مستحية ودنكت حسيت خدودي شبت نار و جريت نفس وطلعتة موجر بركان والنبي من لهيب حبي ..

رجفت شفايفي ورفعت راسي و برجيف الشفايف الخجلانة همست احبك ما انتبهت حجيتها بصوت .

رفع ايده وغم كصتة وضحك

بيبي باوعتلي

- ها يمة شنهي تحاجيني شنهي كلتي

- يمة الحجية على المسلسل هاي تكلة احبك ما تستحي...
رد مجد

- لا غلطانة كلش خجلانة من كلتلة احبك و جفصتها بصوتها اليرجف لعد نياله البطل على هيج وحدة تحبة ..
غمضت عيوني ودنكت . بيبي تباوعلنا وصفنت

- بس يمة مامش ما حجوا شو كضوها علينا بس بوكسيات يمة عفيف كومي دوريه هذا ابليس البيت سحر علينا طلعيلنا قرعان ( قرآن ) خل يطلع الشيطان لا يدش بينكم ...

حسيت بيبي حست بينا و تلمح..

و رجعت تدردم

- ماكو خجل الحجي مصارلة سنة وناس تباوع مسلسلات حبيات ...
- بيبي انت شغلتيه ودرتيه ع مسلسل جان مجودر اسود...
ما حسيت الا ضربة على ضهري

- فزي روحي جذابة ولج شنهي انة اعاينن مسلسلات من ورى الحجي ...
ضحك مجد و كال
- عفاف شتكولين منو الي شغل التلفزيون بيبي تكول مو انة ولا اباوع مسلسلات ..
- اي يمة بس على القرعان ( قرآن )
بس مدري منهو الي يدوره هذول ولد خالك ما يخجلون خاف عفيف من طبتلنا دارتة ...

- يا بيبي توني اجيت .. بس اكيد الجني الي راكب راس مرت خالي نجم

جان يرزلني مجد...
- خرب يومج انت كلما شي تحسين يتهموج بيه لو تخافين ذبيه براس الجني . .
- انت موجود واكيد تعرف منو الداره يلة باي ..

كمت وبوزت خفت لا يرجع يحقق وياي منو حرك البستان وارجع اكلة ابو عيون جني ..

صاحلي و عض شفة عود لا ترحين ينبهني
- ولج وين رايحة ما احتر مكانج

باوعتلة و ضجت منه ..
- باجر اجي رايحة لا مرت ابوي تسويلي مشكلة . . ...

استمريت اروح و اجي و اوكات محد نسولف انة ومجد ويوم على يوم صار حبنا عشك و لحد الجنون ...
صرت مجنونة مجد و هو مجنون عفاف مثل مجنون ليلة لا يا فال الله ولا فالي شنو هل فال .. اكيد حبنا ينتهي بزواج ونعيش سوى واخلفله ولد وبنية وارجع ادرس ..
------------------------

بسمايا ... و صوت وحوش كاسرة تدرب على كسر كل ممنوع و كل رأفة بالقلب
و تتحول من البشرية الى الحيونة لذئاب تتلقف ضحاياها بانياب من الحقد تفترسها

جيش ممهد لكل العمليات ..
الي تحمي عرش القائد ..
و العائلة ....
اصبح عدي يستخدم تنظيمة لمبتغاه الخاص ...
و اصبحت لحوم بشرية تصطادها تلك الغربان السوداء فتلقيها بين يديه ليطعم بها نمورًا و اسودًا يربيها ..
اصبحت تلك الاشاعات حقيفة تتسرب بين البيوت العراقية .. لتلقفهم رعبًا و تزيدهم صمتًا بجبروت طاغية ...

-----

نرجع لليوم الي خضر و محمد طلعوا من بيت شمس ..

بطريق رجعتنا باوعلي محمد و احنا نبتعد باوع بالمراية شاف سيارة صياح ورانة
- هذا جنه يتبعنا

بس لاف صوب شارع الكواز ...
رجع يباوع محمد لمرايتة

- زين من طلعنا الظاهر الحزب يفتش البيوت اكيد يدور فرارية يا اخي ذول افة على المجتمع وخونة ..

- محمد الناس ملت خلي الحجي بيني وبينك من حرب لحرب شحصلنا ما تكلي اخاف يجي يوم جيشنا يستهلك وما يكدر بعد يواجه عدو .. ويسلم الراية من اول مواجهة
- لا يابة لا اذا مو جيش الرسمي اكو جيش القدس احنا شعب كلنا حامل السلاح و غير فدائي صدام يمعود ناكلهم اكل الامريكان بس يفكرون مجرد تفكير يندكون بشعبنا ..

هزيت ايدي وسكتت اخاف احجي واتعارك وياه ليش هم امريكا شبقت بينا راح يصير ١٠ سنين حصار والله ملينا الفرج ربي ...
رجعني محمد لموضوع صياح

- شناوي خضر هذا خطر ما تعرفه ابعد عنه لا يضيعك

- محمد مكسراتك هواي وين الي طايح حظة الك عرف بيه ...

- شوف ما عندي وياهم شي انة تاجر مواد غذائية و عندي محلات كهربائية ..خليها ببالك اروح للونسة هناك

- بتاع كلو و الله يمحمد مدري اخذني للبيت هسة مريتي وحدها وتخاف ...

ايام مرت وخضر يطلع بهمة خطية سودة بوشهي ( بوجهي ) يركض على العيشة ويرجع مثل المدوهن ..

و حسبة توديه حسبة تجيبه ..

اخ ربي اريدن كون صياح بمرض مامنه شفه دوهنلي زلمتي لا يكدر يكتلة يفكر بية شلون ولا يكدر يسكت عنه يموت بقهره ....
ويجيني معصب و بس يخوزر هم طاحت براسي عصبيتك خضر جا شنهي فوك ظليمتي انت هم علي ...

دكيت قماش جادر جوة البردة حتة من اوكفن يم الشباك ما يبين خيالي عبن البرده خفيفة جانت..

اسويلي فتحة كد عيني كلشي ما يبين مني ..

وانة اعاين من الشباك اشوفن المنطقة وحشة ولا طير الطاير وين هنانة وين السلف الي يروج بالناس حركة دايمة بس هنانة مامش.

كملت شغل البيت ...

ورحت اكوي هدوم خضر شفت علاكة بكنتوره اخذني فضولي فجيتها ضربت خدي شنهي هاي صخام.

جان نفنوف نوم ما مستور بس هذا لمنهي جايبة .

غرت وجاد ( اكيد) مزوج علي و جايبلها هذا اكولن يطلع يتأخر يمها عبن يحبها اكثر مني انة موش افيده بعد .

تذكرت روحتي لصياح ثاني مرة وشلون استغلني واستغل ضعفي.
نزلت دموعي..

ما حجيت لخضر عن روحتي ثاني مرة زين من تلطف بحالي و كال مغصوبة وبقاني عايشة اكيد من يعرف رحت اتفقن وياه يسترني واستغل ضعف حيلتي يمة ما اريدن اتنوع شيسوي بيه خضر يجسرني ويموتني.

لا هل مرة يذبحني وكاد....

كلما اذكرن شلون ثاني مرة دناني وجبرني اكرهن نفسي و تلعب روحي شلون سكتت و صكد دافعت عن نفسي بس وعده يزوجني خلاني ارضخن.

رجعت اعاين على نفنوف النوم جان ابيض مال عرايس.

دمعت عيوني و دعيت على صياح لو ما صخمني ما تزوج خضر علي .

ظليت اتانيه(انتظره) على نار زين اعارجة من يجي بس عود هم الي حك (حق) احجي و اعارجن و اكلة طلكني تزوج علي موش برضاتي تزوج غيري ما اقبلن عبن اريدنك الي وحدي لا مالي حك بيه بعد شيسوي اسكتن .

بلعت غصتي شحجي هو زين من سترني اظلن ضامه قهري بداخلي..

كعدت بالكاع و بجيت بجي و نحت على روحي

- ااااخ يمة وينج يمة ريلي ( رجلي ) اخذ علي موش اكدر اعارجة ولا حتى اعتبن عليه ... نورية خيتي شتاكيت سوالفنا خية خيتج انهضمت ...

احجي واعاتبن هلي ..
الي سخوا بيه.

بوية شحالك بوية طيحت عكالك بوية شوف خضر حتى ما يشتهي يعايني جنه تورط بيه و سكت موش يكدر يكولي تورطت بيج.. ...

شكد عنت علي .. (اشتاقيت) امي و ابوي و حمدية و نورية وحتى عفيف ولو هاي موش دوم نشوفها ولا عندي بيها صلة قوية ...

بس اخ يا نورية من وراي تطلكتي
انة الي تصخمني..
صياح
ليش وكعتي بيها . .. و خربت حياتج ....

الساعة ب ٢ ظهر و خضر مامش ضميت مركة بامية هو كال اذا ما اجي ب ١٢ او الوحدة يعني عندي شغل جثير و ابقى للعشا اجي ..
طلعت عندي كراعين مشتهيتهن و وصيت جيرانا من تروح للسوك تجيبلي هي كالت موجودات بسوك البصرة بالمكصب ...

خضر اويلي لو يعرف مصاحبة الدلالة بس شسوي هي تجي وجيب علاليكها وصارت صويحبتي تمر علي خطية و حتى تكلي انت حلوة نيال رجلج...

ااخ ما تدري بالبية وتحسد رجلي علي ..

غسلتهن و عركتهن و حمستهن و خليت الكراعين على الجولة منا للمغرب يستون ....

- حرامات مامش دهن حر .. اسوي تمن مفركع ورويبة والكراعين باجر نتريك بيهن عبن دوة ذن يرمن العظم .. و يقويه...
بويااه مال دواب بعد و بيهن كل الدسم الي يقوي الجسم...

رحت اشغلن التلفزيون درسني خضر عليه ..

من اجينة هنانة درسني شلون اشغلنة وادورن الغنوات ..(القنوات)

اكضي وكت شسوي ...بس هاي الشباب كلة مسک‌يك مدري مكسي اهووو نسيت شسموهن ..

بس والله مامش مستحة مصاليخ و كدام الزلم لا يخجلن هو انة كدام رجلي استحي اذب شيلتي ..

يااا شلون اذبنها شيكول علي ذبت المستحة كلش ..

ها بس هو يلمح ليش مشيلة

وجنه يريدني اصيرن مثل عفيف مفرعة ...

انا بت ابوي لا شلون عيب ولا اقبلن ..اصيرن انكريزية مثل عفيف الشعر مفرع ومكرطف هو حلاة المرة بكصايبها ( ضفايرها) من تدك جوة الظهر ..
...

ضجت كلش اعاين للساعة واحسب هذا الرغم يعني اربعة يااع عاين الوكت يركض بينه يمة هلا ...

طفيت التلفزيون و كسرت حجي خضر و نهوتة علي ما اوكفن يم الشباج ...
هو انة ما ابين بعد جادر ودكيت جوة البرده ...

اضوجن وين اولي لا سالفة لا ضحكة وين كبل اسرسح يم رفيجاتي ..

برطمت اكيد هسة موش يحبني عبن عبالهن انة صرت موخوش صبرية ومو راحة ..

ميلت البردة مستورة بالجادر الي زرفتلي بيه زرف على كد العين ...

كمت اشوفن من الشباك جن اثنين يردون يفتحون بيت محمد ..

لابسين كابوي بس جهامه وجوهم موش مبينة عبن يغطي وجهم هذا العسكري الي بس عيونهم تبين منه يسمونه يمكن مقنع .. ...

ضربت صدري
- شنهي ذول خافن يبوكون الولد وهو موش موجود...

باوعت للتلفون و للدفتر ...

صح انة موش متعلمة بس اتهجة و خضر هم رغم الشرطة كتبة الي بالاحمر كال كلشي يصير

و علمني ادوس شنو رغم باليشبهة بالدكم...

طلعت الدفتر وانة اتهجة د ..... هذا الحرف موش شين جا غير الشين بيها نقاط خضر ما يعرف يكتب شنهي
كتبت ٣ نقاط فوك .. د اي هسة من صكد صارت شين ..

رحت ادك الرغم . مامش احد يرد بس طووط شنهي عود ليش ما يحاجوني اني صبرية خوش بنية و موش غبرة مثل عفيف ..

رجعت اعيدن ادوسن الرغم (/ادوس الرقم )

يااا بوية راضي ولكم شنهي مايشتغل طوط طوط مكطع يعني شنهي عود.

رجعت ادوسن الرغم ...

شوي طلع صوت

يااا هذا يكول الدفاع المدني قسم الاطفائي شنهي عود جا هو خضر كال الي مكتوب باحمر شرطة شوف الوعد ذول ما يفتهمون ...غربال وعده اي والله ...

- آلوو خوية الضابط شنهي دفاع مدني خوش قشمر انة عبالك ما اعرفن انت داخل بالنص ...
.. خضر كلي المكتوب بالاحمر هو شرطة وانة يبعد خيتك خابرت الشرطة شجابك بالنص وانت اطفائي

- ابني شتحجي ما افهم عليك وين ابوك صيح ابوك...

-يااا شيجيب ابوي بوية الحجي بالسلف عبن خطية ...
سكتت لا احجي سالفتي للدفاعي و خافن خضر موش يرضى ..

- تعالوا حرامي يبوك بيت محمد عبن محمد موش راحة اشوفن تجيه ناس موش راحة و هسة هم اجتة ناس موش راحة فجو الباب و هو موش هنانة خافن يبوكونة وهو خوش ولد اجرلنا مشتمل فوك بيتة ..و النوب بس انة فوك بمشتمل خاف عبالة انة جيت بكت بيتة وابتلي تعالوا لحكوا لا ينباك و يبليني ...

- بنتي وين العنوان واحنا نتصل بالشرطة هاي مبينه جاهل تتصل ...

- ياع شنهي جاهل ولك من هسة بشحاطتي الجابها الي خضر على صماخك وصماخ الخلفوك ولك انة مرة موش جاهل و رجلي خضر ...

- اختي العنوان واحنا نتكفل كلشي و الله يساعد رجلج عليج..

- يااا لا والله وداعت الحجي بوية ولا اقبلن .. تخابرون هم انة الي خابرت الرغم المكتوب بالاحمر وانتم اجيتم نصنا جا انت عود ليش ما تسده وانة اخابرن الشرطة بالي مكتوب احمر انت موش راحة تريد الشرطة تكول موش صبرية الي شافت الحرامية تريدهم عبالهم انت الشفتهم و خابرتهم و الله ولا اقبلن الا انة اكللهم يلة روح سدة خل اخابرن

سمعت الي مدري شيسمونة يستغفر ...

سده رجعت ادوسن الرغم اردود هو خضر كال الي مكتوب حمر شرطة و هذا موش شرطي طلعلي دفاعي
زين الشرطة يعني الزلم بيها يسمونهم شرطي والدفاع مدني يسمونهم دفاعي المدني

دك وطلع نفسه

- يااع شجابك

اندك الباب
- اوكف لا تروح غادي اشوفن منهو جاني عليك العباس لا تسده اليوم اعارجك شلون اخابر شرطة و انت تطلعلي انت صكد دفاعي موش راحة ..

- انطيني غيرج اتفاهم وياه لا اقدم بيكم ازعاج دائرة حكومية

- يااع ايا ما تستحي تكولن علي كلامون ازعاج شوف ولك الا اكولن لرجلي عليك يجسرك تجسر

الدك على الباب مستمر

- اروحن وارجعنلك مو تسده ...

رحت و بس لا سده ذول الدوائر حكومة مامش صبر يطبكون التلفون بوجه الواحد.

صحت منهووو منهووو ترى ما افتح الباب رجلي ما يقبل عبن موش يرضى يخاف علية احجي منهو انت ..

صوت خضر مبين معصب
- اني خضر فتحي ..

يمة شلون هذا معصب يااع شجابه هسة موش كال يجي المغرب اذا ما اجة ب ١٢ عاينت للساعة هذا واحد وراها ٢ و ٣ى و هذا العودة الزغيرة على الاربعة و العود الجبير علة ٣ يعني اربعة و ربع يااع كل هذا وكت احجي وي دفاعي عبن هو موش راحة ....

همزين علمني خضر على شلون تمشي العوادين مال الساعة و على الارغام وانة هم جنت بالمدرسة كبل لا يبطلوني موش كلش غبرة بالدراسة ..

يا يا صخام الزلمة كام يصيح وانة صافنة على عوادين الساعة ..
بس ليش هيجية معصب علية

- من امداني اريدن اغمن روحي مثل ما زماني غماني بالعشرة كلهن...عفت الرجال برة بالحر

صوته اجاني ..
- خضري جيت جيتك ... عبن احسب بيش الساعة رجعت...
- ترى حارة فتحي الباب شبيج انة خضر فتحي نسيت ما اخذت مفاتيح البيت وياي

فتحت الباب دخل وهو يعدل بشعرة عركان وجهة ومسومر من الشغل يمة من اروحن ستين فدوة الك .. يا بعد طوايفي يمدللني و متحملني و تشتغل وتشتريلي شحاطة وحذاء طلع ضيك على رجلي يمة بيده علاكة شجايبلي كون دراعة ( دشداشة )

باوعلي وصفن بوجهي دنكت كلما يركز بوجهي ادنك لحد هسة مامش ما اكدر اصد لعينه ..
- شكو مصفنة علي اليوم .

- ها لا مامش ...  اخذت العلاكة

جر نفس و كال جوعان شطابخة

- موش كتلي ضمي الغدة عبن من عوادين الساعة تمشي عن النص الفوكاني هاي ١٢ اضم الغدة وتجي من يطر غروب بعده موش غروب شجابك.

فتح عيونة ...

- شنو ضايجة من جيتي يا صابرين ؟

- موش صابرين صبرية موش ضايجة بس قشمرتني وضميت الغدة وطبخت كراعين على الجولة يستوي من يطر الغروب ونتعشا بيهن

- دسم ما اكدر صابرين معدتي ... رحميني .. العشا كتلج خفايف ..

رمشت حيل الزم دمعتي ... و ضحكت عبن امي جانت تكول السنعة اذا رجلها معصب منها لازم تهديه ...

- يلة زين خوش كلامون بس يستون نضمهن ريوك

- شنوو .؟ اكلج شنو كلامون ههههه

شفت جنه انفرد وجهة وميت ضحك يا شنهي ميت عسى يومي كبل يومه..

- جا موش انتة كتلي اقلد كلامون مالك من تحجي احفظ مثلك حتى اصيرن مثغفة .

كعد و صفن بوجهي وسد حلكة من شافني ضجت لان ضحك علية بس ما كدر و ظل يضحك اخر شي ...

- شلون حبي كولي كلام يعني "خوش كلامون" لا هاي غلط كولي خوش كلام..ههههههه
الله ينطيج على فقاريتج و نياتج تعاي تعاي ...

ظليت مدنجة خجلت يا بوية الحجي . انة بت راضي يريد اروحنله اكيد يريد شي موش راحة ... مثل المسلسل مدب.. مدب يا نسيت شيسمونها بس هم كللها تعالي جان يشبكها و جرها للغرفة عبن هم مو راحة ....

نعم صوتة و سبل عيونة وهو منتجي على الكرويته ( قنفة )
- وينج لا تظلي تلصلصي للعلاكة شوفي شجبتلج اليوم ...
فتحتها جانت دراعة كبل ما بيها زخمة ابو كسرات .. وشكلها مال مثغفين كلش .. مثل خالة سعاد هيجية تلبس ..

صاح...
- تعاي ولج تعبان تعاي يمي ..

رحت ورجلي طك رجل برجل خجلانة و مدري شلفاني ..
وكفت يمه جرني بحضنه ..وانة اريدن اوخرنة عبن عيب والله يااا شلفاه خضر عبنة اليوم مرة معصب مرة يضحك هسة موش راحة

جان يفج شيلتي فج الجنكال وشمره على الطبلة ( طاولة )

وبدة يفج كصايبي ...
- يمي ماكو شيلة تلبسين اللبس الاجيبة الج و شعرج اريده محلول ..
و رتبي روحج اجي تعبان اريدج تنتظريني حلوة مرتبة و تخلين مكياج .

- يااع عيب شنهي هذا الحجي موش عوايدنا النوب شنهي اخلي زواكه لا تعلمني دروب موش عوايدنا اخلي ديرم وكحلة عبنها عوايدنا ما اريدن اصيرن مثل نسوان خالي مزوكات دومهن لو بنات التزوج تصير موش راحة و تزوك و تخلي اول ديرم وفوكة الحمر زواكة لا خضر امي تكول عيب شنهي زواكة

- استغفر الله تعلمي بابا تعلمي اريدنج مرتي طولت الخطوبة و شنو الحمر جايبلج علبة تخبل الوان حلوة فاتحة ما احب مكياج مخربط.

ضربت صدري
- جا شنهي انة موش مريتك ...شنهي خطوبة وياا جا انة وين اعرف ازوك...
- مرتي بس عاقدين اريد نزوج و نستقر .. تركتج كل هل اشهر تستردين وتتعايشين وضعج وانة هم فكرت ما يصير هيج تاركج معلكة و الصار صار لازم ارضى بالواقع و انة السبب بالصار صوجي انة علمتج على ذاك المكان و الذنب ذنبي ما جنتي ترحين بس جنت من زغرنا اخذج هناك ونسولف ..

سرح شعري و مد ايده لوجهي وصافن بملامحي ..
صابيعة على خدي ...
- و المكياج سهلة اعلمج عليه.. هو قلم وطوخي شفايفج شوية وكحلة وببطن عينج كافي علي ما احب الشي مبهرج زايد.. وانت بيضة كلش حمرة ما تحتاجين شي طوخ..

شوي و وكفت ايده .. وهو عكد حواجبة ... جن تذكر شي
- اكول صدك منيلنا كراعين انة ممسوك.. منو جابهن الج ؟

دنكت وافرك ايد بيد..

- انطيني الامان صح هيج كلامون مو؟

- لا .. تحجين زايد منو جابلنا كراعين وبغيابي عن البيت ...

- ها .. مو .. مو هاي ام حنان جيرانا خطية تسترزق و تجي تسولفلي اضوجن وحدي عبن انة متعودة على رفيجات هناك بالسلف اطلعن واطبن و افترن بالكيعان هنا مامش بس حيطان ...

- هسة كل هذا الشرح على شنو جاوبي كد السؤال وهاي شلون تدخلينها بيتنا ولج طلعتج من حلك الموت ما اريدنج تختلطي بأحد وهاي هي جابتلج الكراعين

- اي والعباس شلون كراعين جابتهن بوياااي بس يستون يموعن بالحلك...

- لا اله الا الله يمعودة ممنوع بعد تطلعين او تدخلين احد غيري ممنوع تفتحيلة باب فاهمة سويتلج زرف ابد متحجين من يندك الباب باوعي من الزرف مو اني ما تحجين سكتة ولا تفتحينه مفهوم ...

.
قهرتني
موتتني غبية ما تطيعني ...
لو طايعتني من نهيت تطلع ما وصلتنا لهذا الحال

وهسة مصادقتلي دلالة .. يعني هاي فقيرة تحجي هسة كلشي وباجر المنطقة كلها تعرف من الدلالة شاردين ..

طلعتلي جكارة ورثتها وانسدت نفسي عن الاكل راح تموتني قهر ..

- ما اريد اكل بس اسبح وانام...

- ها خوش .. بس بس

اشرت للتلفون
- شكو
- دفاعي يغلط علي كتلة لا تسدة عبن رجلي يجي يجسرك..
وسطرتة لسة رافعة السماعة لمن تجي تغثة مثل ما غثني

- من يمته هاي و شنو دفاعي صبرية ترى ما يصير اجي تعبان وانت تتلكيني بس كال وكلت وما فهمت منج شي لو مدخلتلي الدلالة ببيتنا...
ظليت انفخ و

عكدت حواجبي ورحت خليت السماعة على ذاني ....
- محد وي منو حجيتي .. ماكو ؟

رجفت من خزرتة ركضت وانة اسولفلة عن بيت محمد ينباك موش احد غيري يبتلي وشلون دكيت الشرطة طلع دفاعي ..

حجيتلة كلشي و انطيتة الدفتر ااشر على الرغم الدكيته
.
باوعلي و هو ضايج
- وانت شلج غرض لو يطب عزرائيل ياخذ روح محمد مالج غرض يمعودة بعدينا عن المشاكل انة ضامج ضم عن الناس حتى محد يندلج وانت تخربطين ..

ضربت صدري زعلانة ليش يحجي علي شمسوية

- ياع شنهي شمسوية بايكة ناهبة ...

ظل يستغفر

- بنظر السلف خطيبج نهبج و بنظر اخوج نهبتج وشردتج من حكم غسل عار حتى لو انت مرتي بعد هاي عقولهم مجيمة شنسوي ...

- و الله عبالي تفشل دفاعي وتاخذ حكي غلط علي يكلي ازعاج ...
- لا العفو ولا ازعجتي دائرة الله يعلم شحجيتي بعد..

- كتلة ممخابرتلك اخابر الشرطة وخضر كتبلي الاحمر شرطة انت تدخل بالنص صكد صوجة ليش يدخل بنصنا انة والشرطة ..

جريت نفس مالي خلك اشرح واناقش ولازم افهم والنقاش عقيم ...
- اي صدك ما يخجل انت والشرطة هو شكو وبعد لو تحترك المنطقة وبيت محمد مالج غرض مفهوم عليج بس اذا احد اندك ببيتج تتصلين فورا .. و هذا مو رقم الشرطة مليون مرة الكتابة بالاحمر الدفاع مدني و الشرطة بالازرك..

- هااا صكد نسيت

عافني وهو يدردم

شفتها تباوعلي وهي تنصي ومرة تباوعلي كالت
- نسيت ما كتلك الله يساعدك

ضحكت
- ويساعدج بعد وكت ...

راحت للمطبخ و هي تحاجيني دخلت للغرفة وانة انزع قميصي ...

بالغرفة ورجعت عادت السالفة هي بالمطبخ وتعلي تصوتها تسولف

- اكول خضر جا ما دريت دفاعي يدخل بالنص موش شرطة ادوس الاحمر موش شرطة مامش فهم عدهم . اكلله شجابك بالنص و خضر كتبلي رغم شرطة بالاحمر..

شوية وجنها نست جاي ابدل اجت مثل الهادة

- ماتجسرلي هذا دفاعي يكول اسويج ازعاج ...و كتلة لا سدة رجلي يجسرك تجسر

سايرتها حتى اخلص نكها
-نسيتي شنو مو شفته و لكيتة سادة

سكتت وهي فاكة حلكها تلاكت عيني بعينها مهموم انة صبرية وانت ترطنين ما فهمت شي ..
رجعت اوجهها و اعلمها ..

- مو السالفة سديناها شكو تعيدينها
- ها عبالي ما كتلك كلشي متنطي مجال الله يسلمك هواي تهذي
- اي هم صح الله يساعدج هواي احجي انة اعوض الشهرين الجنت اخرس بيهن ...

.....

يحاجيني كلامون يكول جان اخرس شو ما اذكرن يمته هو انخرس عبن انة الي انخرست من ورى صياح ومرت ابوي تعارضت ...
رجعت اعاين عليه خجلت ياااا ما يستحي مامش مستحى بطرك البجامة و عريان صدره و كدامي جا كلت عيب ما يصلح تطب علي صبرية و انة هيجية ....

ظليت فاجة حلكي وجان بسرعة من شفت اجت عيني بعينة دنجت وشردت ادردم ..

- جا هو القفل ابو مفتاح لشنهي سوه ...

سمعتة يصيحني

ضربت خدي صخام خضر موش راحة مامش زلمة يخاف الله ..

ما حسيت الا جرني و ايديه تعصر متوني وعيونة الكبار فاجهن على حيلهن و ردت ابجي من الخوف ...

- شنهي .. موش ردت غدة .. تعال تغده...
- كتلج ما اريد نسدت نفسي لا تشردين ...

جر نفس وشبكني ...

صخام صخام هذا هم حظج صبرية عداه صياح بالهول يتلمس وجهي يحل شعري يتشبك بيه وهاي شي ما وكفته عند حده رجع يشبك لا ولا اقبلن هذا يمتحني يشوفني هم اقبلن بس لا عرف رحت لصياح مرة ثانية اتوسل يزوجني واستغلني . و اجة يمتحني هم اقبلن لا ولا اريدن ولا اقبلن ..

من راد يرفع نفنوفي .. دفعتة و صحت اغلط عليه

- صخام صخمك يا نكس وخر عني شنهي تريد انت مثل صياح موش راحة

ماحسيت الا راشدي و ايده ظلت تضربني شهكت و شردت منه للمطبخ لبدت ورى الباب و ابجي

وهو يصيح

- دربالج تجيبين اسمه على لسانج او تقارنيني بيه ذاك الساقط...

ظليت ورى الباب ارجف و لسة الم ايديه على جسمي عبن ايده مال زلمة تعور ...
...

دخل المطبخ غمضت عيوني صريت جفوني حيل وانة اكولن وي روحي هسة يطكني بس اسمعه يتحسر

فتحت نص عين اعاينلة شنهي يسوي شفته .....

مد ايده اخذ جكاير سومر الازرك و اوكات بغداد يشرب كل يوم يخلص باكيت اكله صار موش مثل كبل من يجينة شهيته مفتوحة نحلان ضعفان اكثر شربة جكاير و جاي .

نسيت وجع ايده بجسمي و صكد اشهك من كد ما بجيت جانت كلامون الي حجيته اله كل حجاية وياها شهكة و بجية انحب متوجعة من طكني واحاجيه خايفة على صحتة موش بيدي احبنه حتى لو طكني هو زلمة وانة وكفت بوجهة ارادده ينكطع لساتي عبن راددتك يبعد طوايفي .

مديت ايدي بخوف اريدن اجر منه الجكارة رفع ايده بعيد فوك ...

- خضر ما يصلح يومية باكيت جكاير موش زين عليك لا والنوب يومية شكل اثبت على سومر لو بغداد ما يصلح تشبش .( تخلط)

خلا جكارتة بحلكة وسحب نفس حيل وذب الدخان وهو يرفع كوب الجاي يشرب

- برأيج المثلي يشوف الي ذبح روحة و ما ياخذ ثاره شنو يسوي ..و فوك التعب و العيشة و انت تخليني امد ايدي عليج ليش صبرية مقتنعة بالكلتيه ؟..

عاينلي وجرني حظني وهو يكلب بية بزندي و وجهي خاف واجعني
و يسال اذا بيه شي هزيت راسي لاع و اشهك ببجية

وهو يتعوذ من الشيطان على ساعة العصبية ....

رجع يشتكيلي...
- مهموم صبرية مهموم حقج بركبتي بس لازم امامي خيارين اقتله واصير مطارد او اوكعه ...و مجاي الكة اي منفذ اوكعة بيها ..

- لا اريد حكي ولا شي موش كلامون هاذ ما اريدن تتلاكه وياه يولي الله ياخذ حكي اريدنك سالم منهو الي بعدك خضر لا تبهذلني فكر بيه .

.
- راح ادخل بدوامة الله يستر منها.

كمت و رحت يمه

- خضر عليك بداعة اهلك لا تبهذلني ما اريدن اعيشن مثل الشاردة منا ومنا ولا اريدن اموت اخافن اموتن بسجين غازي ..
امي مشتاكتلها بوية هم و ما اعرفن شنو صار عليهم .

اندك الباب اشرلي ابقى بالمطبخ ...

راح طلعلة تشيرت ولبسة و فج الباب ...

بس انة نعست نصيت الجولة كلش و رحت تمددت وتغطيت منعسة عبن طلعت مثل امي من بوية يطكها بعكالة لو بيديه تنعس وتنام هسة عرفت طكة الزلمة تنوم موش مثر طك الاخو والابو لو امي لو مرت ابوي .

بديت افج عيني واسدها من النعاس و جن اغمض عيني ومدري بالدنية وشيصير بيها ...

----

فتحت الباب شفت محمد .

- شفت الله ما يقصر تفضل اعرف ناس و كدرت اطلعلك بيان وفاة بس هيج كلاوات..

استغربت

- شلون سويتة والله عجيب امرك.

- عوفك مني شوفة ورقة كلاوات يعني ما مسجل بسجلات النفوس ولا المستشفى بس ورقة وتوقيع وختم و المستشفى ما تملك نسخة هاي توديهة لاهل المرة تدعم كذبتك..

فرحت بالورقة واخذتها والله محمد خوش محمظ
و الله ما قصر ...

- وبتاريخ ورى جيتك للبصرة باسبوع ...

شوي و صوت جوا صاح لمحمد

- سيدي وصلوا الخلية ..

باوعلي محمد مرتبك و بضحكة كال ...

- شفت هيج صحبان يمجدون الونسة هههه سيدهم بالعرك و المزة ...

نزل مستعجل .. جان درج بيتي ع الشارع بس الي بالحديقة يكدر يحاجي الي اعلى درج بيتي ...

وكفت و صفنت ضيكت عيني المح جماعة دخلو هيج ٣ نفرات واحد رفع راسة وسعت عيوني و دك كلبي و رجفت ايدي و بيدي ورقة وفاة صبرية ..
وجهة فوك يركز صوبي و.....

يتبع .....
************
٥١٨٩ كلمة

اكثر الاحداث عن حياة صبرية باامدينة و معاناة خضر وياها .. وهو يحاول يثقف من ذوقها و يعلمها عليه وعلى اليحبة
و ايضا عن عفاف .. و حياتها بالسلف وحبها وي مجد..

لا تنسون دوسوا النجمة صوتوا
و اليكدر يعلق

تفاعلوا رجاءا ...