ضفائر صبريه

١١

#قصة_ضفائر_صبرية_١١
بقلم وئام علي ....

سحبتها حيل من ايدها و اجر بيها لمكانة وهي تبجي ما اهتميت اريد اعرف شلون ما تحبني اني الها ...

دفعتها ورى التركتر ...

و كل شياطيني طلعتها

- ما تحبيني مو ها احجي ...

هزت راسها ب اي
انطيتها راشدي

- ولج رديلي سنيني الي احلم بيج و كولي ما احبك
ولج رديلي كلشي ردي كل ليلة اتكلب بيها ردي كل شعر كتبتة بسمج ردي مواجهتي لاهلي املتيني وهسة تكولين ما احبك...
علا نحيبها وانة اهز بيها وهي تشهك ...
توسلت بيها لا ما اصدك شنو ما تحبني جذب

- جذابة تحبيني ولج فرحي يصبرية خضرج انة فرحي صرت رجلج الا البسج احلا بدلة عرس واحلى عرس تسولف بيه البصرة من العشاير للمدينة ..

تهز راسها بلا ..وانة اتوسل

- ما اريدنك اكرهن....
ما خليتها تكمل لاني  خليت ايدي على حلكها اسكتها
- ولا اصدكج ما تقشمريني كليلي ليش هيج تعذبيني ولج انة خضرج...

ظلت ترجف مدري شبيها و تأتأ  ...

ايديها بين ايدي اشنجت وحسيت عوجبن ( تيبست )

حضنتها اهديها

- اشششش كافي .. لا تنهارين هيج شبيج ولج موتيني عفتج ورحت واحنا فرحانين ننخطب و نزوج ليش بس اجيت اعقد انكلبتي علي .. شغيرج.

نظرات ...
تتلاكة
عيونها وي عيونه
ايديه تفتح بصابيعها المتشنجه

شهكاتها و صوت ما مفهوم

ئاااااااااا  ....وووو  ...جججج  ععععة   ....گگگ ل.....

الخوف الداخلي جبير ... چلماتی ما کملت

ظل يضغط علي الأ يعرف شخيري .

مثل الگلبه حاس بيه شي ومرة يتوسل بيه ....

مرة يضربني من حرگة گلبة ومرة يحضني و يعاتب ....

عيوني موسعتها بوجهة واجتني رجفة وانة اتنوعله تخيلته يذبحني لأن صرت عار عليه تخيلت نفسي اكلله و هو يكضني يخنكني الخنكة الي بخيالي حسيتها صدك ضليت كوة اجر النفس .

و اريدن  بس اكلة اختنكت احسن بوجعة بكلبي ما كدرت انطگ  ولا جلمة صحيحة حجيت  حسيت بحلكي  مربط (مشنج) و يبرغ غصب مني ( خروج زبد لعاب)..

شفته كضني من جتافاتي و باوع لوهي وانخبص

- شبيج صبرية حبيبتي شبيج ...

حجة مهامس

- صرع شو جنه صرع يارب شسوي

خلى ايدة بحلكي يفصل اسنوني لا اعض لساني ...

عيوني ما اكدر اسيطر عليهن  طحت يم رجليه وهو جريتة وياي لان جان كاضني.....

دكايك (دقائق) وانة هيج جان مخلي راسي بحضني وبيد يفرج ايدي المعوجبة ....(مشنجة)

الي ان فتحت عيوني ...

من حالتي الشافهة سكت ما سألني بعد على شي كعدني وركض لشاخة ( فرع ضيك من دجلة الفلاليح حافرتة لسكي الكيعان ) بلل جفيتة واجة مسح وجهي شفت عيونة محومرة مثل الي يضم بدمعاته ...

جريت نفس وصافنة لشي ما موجود ...

لزم ايدي يكعدني وهو يحجي ومدنك مصدوم من وضعي .

- صبرية ما اسألج هاي هي يمكن صدك مثل ما كالو مضرورة اليوم دوامي عصري و اتاخرت على المدرسة لازم اروح يلة اوصلج لبيتكم ....

ورى هذا الموقف لزمت صبرية البيت ..

منتوبة تزن بس راضي يرد عليها رغبة رجلها و سكتي عوفي البت ...

خضر يجي خميسيات يرجع جمعة بالليل يمر بيهم بس كلها تكعد يمه من يتواجد ..

و يكضيها بس بنظرات متقيد ..

--------------

بيوم عفاف تمشي ...

صوت هورن ...

سمعت صوت هورن وي دكة الهورن كلبي هم ظل يدك بوقية ...

درت و لازمة  كتابي اروح اضافيات للمدرسة و الله مو ع الدراسة بس ادريه يفوت منا ..

وكف و مد راسة من الشباك

- هلو

ابتسمت
- هلو

الله اليوم لابس خاكي وعيونة صايرة لمعتهن بلون بدلتة يمة فدوة لبو بيرية ...

و ابو عيون سلابة  ....

سمعتة كال عاكد حواجبة وبشفتة ابتسامة

- ابو عيون سلابة امممم

يمكن صخنت لا خدودي احتركت لا والله احلفلكم عركت ايدي و ردت من المستحة اخرب بالكاع ( يغمى )

بررت اي جا شلون خوما اخليه يكول علي مو راحة تمشي وتتغزل بالوادم
..

- هلو مجد و الله فلم يبووو شكلك  من فلم شفتة امس يمة يمة تايتنك ولا امل منه ...

جر نفس و كللها ...

- فوتي لمدرستج من تخلصين اضافي اريدج بموضوع...

صفنت و رحت درت و فتحت باب السيارة وكعدت

- شتريد شيصبرني اصلا ما اركز بالاضافي يلة المادة فاهمتها ...

صفن علي وضحك و هو يكول

- انت مصيبة...

مشة بسيارتة على السعدي مناك دخل فرع سكني وراها لشارع رأيسي يروح لطريق منتزه الخورة  وصل جسر عريض كمدخل للمنتزه حسيت السيارة تزل من اعلى لاسفل .. ( الوصف للمنتزه بعام ١٩٩٩)

جان هناك رفاق بزيتوني لازمين واجب على ما يبدو هورنلهم رفعو ايدهم كسلام...

ركن السيارة جانب و دار وجهة علي ..

- عفاف ...

يمة كلبي اسمي توني حسيتة بيه  حلاوة بحروفة لان طلعن من هذي الشفايف..

ظليت اباوع على شفايفة كل بالي جايبني موعد ...

وانة بكلبي احمد الله اخيرا حبني واحد عبالي اعنس ومحد يكلبني .

شو سكت بس كال عفاف و سكت ... ظل صافن علي ورجع يباوع للمنتزه وقت الضحى شبه فارغ بس من عشاق الي شاردين من جامعة لو من مدارسهم ويتلاكون هنا بالختلات ...

رديت عليه

- اليوم اضافي واجتماع حزبي همزين شردت منه يبوو هاي ست  ايمان تلغي هواي .

- انت مؤيد لو نصيرة

- يابا شسوي بهل سياسة هو اجباري شنسوي ما تكلي مؤيد و كافي علي بس حتى اكمل دراستي .. وانت شنو ..

- نصير بس احتمال اترفع لرفيق ... تدرين انة بجهاز داخلية و هاي درجات وظيفية بس انت لزمي لسانج جنج تحجين باستهزاء ...

رفعت ايدي .....

- لا يا عمي ... امة عربية واحدة ذات رسالة خالدة ...
و عاش القائد صدام .

خزرني

- تردين تحبسينا تصيحين بعلو صوتج ومنا رفاق    واكفين ...

رديت بضحكة

- وشكلت ... جاي اردد ....

سكتت كلنا نخاف جنا و نستمر ونصعد مناصب بالحزب بس حتى نرتفع بالمجتمع ...

بيهم بس ع الوظيفة مو عقيدة بالحزب وناس لا تطبع بداخلهم .... و ناس تشتغل و تسلم معارضين صدام و تاخذ مبالغ

منريد نعمم ان كل البعثين حقراء لان اكثر المجتمع جان ما يتوظف ولا يكمل دراستة الا اذا ينتمي بس اكو تمايشا للوضع و اكو عن عقيده.

جريت نفس ونصيت صوتي ..

- عوفك من الحزب وكلي المن جبتني هنا ... خاف ببالك تواعدني ترا ها شوف اكلك انة مو من ذن امهات العلاقات و المنتزهات بالظهاري..

اوف حالك يذكرني بفلم نسيت اسمة باقي ببالي من جابها بموعد و كعدو يسولفون و يريد يعترف بحبه الها بس حرامات ما لحك يكمل لان اجة ابو.....

سكتت ووسعت عيوني و ختلت جوة  نزلت راسي...

- صخام صخام مجد هذا شجابة هنا هذا  خالي ...

باوعلي مجد واستغفر الله وحرك بسيارتة سريع و طلع من المنتزه ...

- طلعي راسج خالج  احتمال جاي هنا عده اجتماع بالفرقة القريبة للمنتزه و راد يمر منا ...

- همزين ما شافني يمة ...

- عفاف عوفج من حجي الافلام انت سادس لازم تشدين حيلج مو ما مخلية فلم يعتب عليج...

كعدت و انة ضايجة المحلة اشجعة يصارحني و هو يكلي مدمنة افلام ... هسة لو ما عيب واستحي جا طكيتها حجايتي بوجهة جا كتلة اكيد تحبني ...

من بدة يحجي ...

- انة على اتصال بخالي فرقد و نجم شكد ردت اتهرب منهم بس يجوني ويواصلوني لمن قوت علاقتي بيهم   

اففف شجاب خوالي يا رب شلون بيه هسة تعترف لو شلون .

- مثل ما تدرين سولفولي على البستان و عليج شلون تكذبين هواي ...

عيوني رادت تطلع من وجهي و الشفايف انمدت بوز يا خوالي يا فاضحيني شلون فشلة ..

هو يحجي وانة ارد بس ها بكلبي لان خو ما اكلة هيج غير يشمرني من الشباج بشط العرب..

- اي عفاف .. انة جنت ادرس طب نفس بس ما حبيت اكمل فقدمت على كلية شرطة ...

ما اتصور موضوعج تلبس جن مثل ما شائع ...

رديت خجلانة و بسكتة وهو يباوع من جهتة بشباك سيارتة على الشط و سفينة جاية يمكن من ام قصر و شلون الجسر انفتح حتى تمر منظر حلو جان .  بس بالي مو يمه و لا يم الطبيعة ولا على تماثيل الريس و جنود الشهداء بايران كل بالي جان يم حجيه..

الخجل والفشلة صعب الي تحبة يكلوله فلان كذاب .  او بيه تماس عقلي ...

- انة مو خبلة خاف تقصد بس هيج اسولف واشطح انفصل عن الواقع و اشوف الخيال بعيني فاحجيه..

دار وجهة الي وابتسملي وسألني  

- عفاف منو حرك البستان؟

وسعت عيوني و انة اتنفس و غمضت عيوني و رجعت فتحتهن وسعتهن ...

بين واقع داخلي مدفون ردت انطق بس رجعت غمضت وكتلة

- ابو عيون

- منو هذا ابو عيون
- يكلك هذا فد واحد من جماعة تحت السواهي دواهي بعد جني  ما عليه عتب ...

ضرب الاستيرن وصاح

- عفاف !

كمزت مكاني وكتلة ...

- ها شنو شكو مو كمزتني اي شبيك جان جني الملثم ذو عيون انت هم شايفلك عيون بكرون مركبة هذا الجني عيونة بكرونه و كرونة دوارة مو ثابتة اي يا مجودي الورد ابو انتصار مستقبلا كرونة شكلهن مثل مجسات الحلزون اففف و الله و ما ينكض يزحلك باليد..

- كافي كافي شنو هذا اشش ساعة السودة السألتج ارجعج بيتكم احسن.
دار علي وعيونة اباااه من تخوزر مو عيون والله جنهن خرز يلالن ....

- لا تباوع هيج ترى عيونك  يبوكهن جني

ما حسيت الا ضربة على حلكي ...

- لا تصدكين الكالوه عليج بيج جني مدري ممسوسة مدري خبلة انت صدكتي كذبة ووضع مريتي بيه بطفولة واستمريتي تماشين كلامهم ...

خليج صادقة وي نفسج قبل غيرج .. و يا عفاف ماكو جني حرك بستان الحركة شخص وانت اما تخافين منه او تتسترين على افعاله بس الى متى ...

بصوت انبح فجأة كتله

- ردني بيتنا ..

استغفر ربه وسألني ..

- خالي يكول اختج مريضة و توكع بنوبات صرع ما تكللي شجاهن بنات عمتي ...

مر ببالي صياح فتحت حلكي احجي بس حجي امي  تفضحين اختج و من هذا الحجي الكالته .

يمكن صياح مخوفها ما معقولة يسوي شي جبير اكيد هددها ياذي خضر

رجعت افكر ومنظر صبرية على ركبها وهي حالها غريب ...

و صياح راح ها وحجاية صياح نحب انة وصبرية ....

يارب دخت اي هاي العوبة تحب صياح هاي شافت خضر مستوى عقله مو كد عقلها وخافت تعيش وي خالتي سعاد رادت تشرد وي صياح ...

اهوو خل اسكت احسن و الله دوختني صبرية هو الحجيت كالو كذب سكتت يا خوفي ..

- وين صافنة

اشر كبال وجهي مجد..

- بصياح ها اقصد ...
شفتة عصب وهو يكض الستيرن قوي

- انت متعلمة مثقفة ما يلائمج ابن مرت ابوج صح اعرفة بالزغر بس مو خوش ولد التفتي دراستج افضل

بكلبي ضحكت شوف هذا وين راح باله هو خضر الكضيت عمري احبه هسة ما كام يملي عيني مو بعد صياح....

------------❤❤

كمت على حيلي و احسن جسمي مجسر تجسر ..

يمكن كعدة البيت حتى احسن بسمنه...

شهر الخامس بداية صيف بس بالبصرة صيفنة من نهاية رابع ...

دخل محسن و هو يكول ..

- صبرية غسلي هاي ...

انطاني قميصة اخذت صابون افركنة  قميص مدرسة ابيض ...
ووكت امتحانات هو ...

اجتني حالتي هاي ما ادري شبيه .. هاي الايام معدتي ...

اجت منتوبة لكتني ازوع ( اتقيأ الريف ميلفظوها مثلنا)

- شنو هاي صارلج جم يوم وضعج موش عاجبني يصبرية ...

رفعت راسي عن الطرمبة ( حنفية )

زعم وصللنا الماي وانمدت البواري لدورنا ...

- جهزي نفسج اريدنج بشغلة ترحين وياي ....

- خضر موش يرضى  اطلعن ..

- امش كلت يلة اريدن اعرف سالفتج...

بس دارت على ام حمدية ...

- شرايدة من بنيتي هج هذا مرسول من ابنج ووياه هاي الفلوس دزهن الج...

ضحكت وهي فرحانة ...

- شفتي يم حمدية الولد موش مثل البنية هذا صوغة امه.

الله يستر على وليدي وبلكن صياح يلحكة للاردن..

امي ما بنت ضوجة بس كالت ..

- الله يحفظهم يا ام غازي..

عاينتلي  منتوبة ... و  عاينت لامي ..

- جهزي بتج ترى مو خالية بتج حبلة يا حمدية ...

صاحت امي

- شلون .. عفا عليج طالعة طابة بتي ..

- سمعي يم حمدية من سالفة الجول ما عبرت علي ترى و متنوعتها ...

و اكو ناس كلتلي شايفين بتج بالجول سطتها سلابة مسلحين وخافوا منهم ...

ترى  كلولي ...

ظليت ارجف و كلت موش .. موش سلابة محد سطاني كفي شرج...

جنت كوة انطق وحسيت راح انصرع كعدت بالكاع ...

و عيون امي ومنتوبة علي...

- زين ناخذج مرة تشوفج و نعرف صح لو لا ...

- منهو متهم بتي منهو مشيع عليها ..

- و الله ناس اليوم  الصبح نبهتني . 

- لا اله الا الله انت رحتي تشوفين ولدج صياح جليبلج فليسات بس لا هو يذب على بتي حجايات والله اخلي الحجي يجسره الج و يكص لسانج.

- شوفي شايفها برجعتها وشايف سيارتهم شحطت من مشوا يعني ما لحك على الصار بس صدفة سولفت بت راضي مريضة وتصرع كلي شاك سلابة سالبتها هو عاينها بطريج رجعتها من الجول وجانت تكض الشيلة بيدها و حالها  مبين متعرضيلها ...

خل نطمن على بنيتج ورانا عرسها و فضايح البنات الله يستر منهن ما تعرفين تربين يا ام حمدية ...

امي باوعتلي و انة رجعتلي تشنجت و مدري شلفاني ...

- صياح  سلابة موش موش ....

طحت بالكاع مصروعة ..

لطمت امي خدها

- صبرية يمة صبر يمة صابرين بنيتي يمة حجي مرت ابوج صاير ...

- بتج حامل يا ام حمدية وهذا عار .. 

ظلت امي تلطم مرة ومرة تضربني لمن مرت دكايق انفك مني التعوجب....

بس مكدرت احجي هو من الصار حجيي ثكيل كوة اطلع الجلمة ...

و من كشفتني مرت ابوي احس حلكي انعكت من الخوف و جن انشل لساني ...

- بتي تكول صياح شو ما فهمت ...

جرت منتوبة امي

- تكلج صياح شاف السلابة و لا تنعثلين حجي. 

لازم راضي يعرف عار لازم يندفن يا ام حمدية لا تزوج و حتى لو ابن اخوج سترها باجر يعير بينا سترت عاركم ...

بس اتأكد بتج بيها شي ادز على غازي ...

كعدت بس ا اشر ...

بلكن لساني يخف كل مرة ينشل و ارجع احجي ورى دقايق هاي المرة بخت مرت ابوي انربط لساني ...

- لاع ما اصدكنج نشوف  جدة عرب تشوفها تردين تبلين بتي ولج من ظيمج يومية بتي مصروعة ..

كشفتلها كلولي جن و وحدة تكول عليها سحر اسود...

دنكت منتوبة وجرتني من شعري وهي تكول
- بتج حبلة يا ام حمدية جنت اجيب نسوان كبل اكدر افحصها بس ادري تشكين بذمتي .  

تلفتت علي تعاي ولج يلة وانت امش وياي اليوم اكشف عارجن يا عرمات امهات الزلم امهات ال @$^^ يا بنات ال @$%% 

راضي ملفيلنا @$%%

ظلت تفشر وانة حسيت موتي كرب و خاف ناكصني مصيبة ربي عكدت لساني ربي  استرني ..

مرت ببالي اليوم الي ابنها ضيع شرفي ..

مرت ببالي يوم رحت احاجيه يسترني شلون دناني اله يطلب مني بشرط انطيه برضاتي بالبداية  ردت اطيع بس من بدة يتكرب ظليت ارفسة ايده على حلكي يسد صوتي و هو ياخذني للمرة الثانية ....

ظليت لحد اليوم كلما اصلي اخجل من ربي صكد هو جبرني مرتين بس الثانية تندمت لو ما رحت ما لاحني    .

من رادت نطلع دخل بوية دنجت مكدر اعاينلة صعب اعاين بوية ...
- شنهي شبيجن ...

باوعت منتوبة لبوي و كالتلة ....

يتبع لا تنسوا

تصويت
تعليق
مشاركة القصة
اضافتها للقوائم العامة
حتى توصل لباقي المتابعين وشكرا لكل من يساهم بنشر قصصي او نقلها بصفحاتة او بيجاته

.........................
السلام عليكم 
حاليا احاول قدر الامكان نشر يومي شكد ما اكتب توقعوا انشر يومي حتى لو ب ١٢ بالليل انشر
في ضروفي الطبيعية طبعا و البات ما الحك اراجع الاحداث عذرا اذا سحكة منا منا او اذا ناسية ومخلية صبرية تحجي حضري 😂 او لخبطات ....
جائز البارت بيه احداث قليلة او ع حدث واحد او بارت تكملة احداث لما قبلة لان اذا يومي مكدر اركز احداث كثيرة ببارت واحد ولا اكدر اطولة
كتبتلكم اكثر من ٢٠٠٠ كلمة

****موضوع البعث طرحته حسب نظرة الناس بذاك الوقت

يعني حاولت قدر الامكان ما اخلي نظرتي و رأيي و مشاعري تسيطر على هذا الموضوع ردت انفصل تماما عن مشاعري الخاصة لان اكثر الناس تنتمي دون عقيدة ومبدا و مضطرين و شكد ناس بالحزب انقتلت وهم مجانو عن عقيدة ولا قتلو مجرد حزبي بالاسم لاجل معيشتة هل مرة  خليت ذيج الفترة هي تحجي وتعكس الصورة مو مشاعر كاتب  . .

****شغلة ثانية
تعريف الصرع النفسي هو خلل بشحنات الدماغ تسبب تشنج و تؤثر بوضائف الجسم يصاحبها زبد لعاب و ايضا  تشنج الاطراف اما يكون تام فيقع المصروع ارضا لدقائق او جزئي و يكون باماكن معينة بالدماغ تصاب بخلل شحنات كهربائية و يكون واعي  مع تشنج ملامح الوجه فقط.

اغلب الناس عامة  متميز انو الصرع مرض او ٣ انواع صرع عضوي و غالبا وراثي او ناتج عن سقوط من اماكن عالية ..
يكون المصروع عضويا غير واعي ..تماما

الصرع الروحي هو ناتج عن جن وتلبس اما جزئي يكون واعي المصروع او تام يفقد الوعي والادراك ..

الصرع النفسي و هذا موضوع صبرية او صابرين ناتج عن صدمة نفسية عنيفة مصاحبة لحالة رعب عنيف و هذا النوع تصاب به النساء او الاطفال فقط خصوصا الطبقة الغير متعلمة و التي تعيش ببيئة جهل تام.. و تخلف و يسود الاسرة طابع التعنيف ...

المصروع نفسيا غالبا ما يصاب بنوبة  بالصرع كهروب من مواجهة بسبب خوف عنيف  او بسبب ضغوطات نفسية .
احيانا  يستطيع اجتياز الموضوع دون نوبة حسب الشخص المواجه له وحسب شعور المريض بالامان معه او خوف

تصبحون على ❤ خير