#قصة_ضفائر_صبرية
نور القمر (وئام)
الحلقة ٩
بقت كاعدة يم دجلة بيدها شيلتها لفتها وهي قررت تحجي كلشي لامها ...
وهي تكوم صوت ملهوف ..
لزمت عبايتها ولبستها تضم روحها وهي تباوعله .. نزلت دموعها وهي تريد تحجي الجرالها ...
- صبرية ! انة جيت شبيج يا رويحة خضر شو وجهج اصفر وليش احسج بيج شي.
- خضر الحكني انة بشاربك انة ....
صوت غازي قاطع كلامها:
- صبرية؟!
التفتت لأخوها وبجت بخوف مو طبيعي وهي تتلفت، لبست شيلتها و عدلت عبايتها لبستها على راسها وأخوها جرها من زندها.
- شعندج هنانة ها ولج؟ عايفة الكيعان والحوي وكاعدة هنانة.
باوع على خضر بعصبية:
- خليلك ناموس.
بس خضر بكل هدوء كلة وهو يأشر لسيارته.
- مريت وشفتها ترجف هنا وظل بالي ترى توني هسة حاجيتها و مو انة الي ما عندي ناموس.
أخذ أخته دفع للبيت وهو متحلف بيها
- شعندج هنا مو هذا الطريج الي يودي للجول! بنات راضي ما تجوزن اختج انضرب عقلها من سالفة الجول وهسة انت.
بصوت مبحوح ووجع جبير ببطنها وهي كوة تمشي
- خوية على كيفك وياي، خل افهمك.
- اشش ولا كلمة.
دخلها للبيت ومعصب صياح وامه بالحوش من شافت صياح صرخت ورجعت ورى.
بس صياح كام وكض غازي الي راد يضرب أخته
- عوفهة عيب عليك تضربها.
- لكيتها هناك يم النهر قريبة على الجول بلة لكفها سلاب ابن كلب.
بلع صياح ريكة وعينه على صبرية يخوفها و بسكتة صبعه على حلكة ياشرلها بالسكوت.
الجهل و التخلف احيانا يخلي البنت ببؤرة من الضياع و الصمت وعدم تحليل الامر انو هي بالصمت تخسر وهي الي يضيع حقها.
- غازي و الله اكثر من مرة المحها من بعيد كم مرة انصحها تعاند.
بس منتوبة تركز بوجه البنت وتفتر يمها اخر شي صاحت
- ام حمدية تعاي شوفي بتج شو جنها بردي يتراجف
اجت ام حمدية وهي تضرب صدرها
- شمالج يمه وشجاريلج
غازي بحدية
- علمي بتج لا تروح يم الجول لا يتلبسها جني مثل عفاف خلونة بوحدة مو ثنين خبالات لو خل تخاف لا سلابة تسطيها ترى وربكم ذباحها انة.
كمزت صبرية وعينها على صياح الي خلا كلامة كنصح بس هو بيه ابعاد ثانية بيه تهديد نوعا ما وهذا قتل رغبة صبرية بالحجي و فضح صياح.
- صبرية يخوج بطلي من سالفة الفرة بالمكطوعة ترى سلابة تمر مناك و خافي على عكال ابوج لا تطيحيه بالطين.
و تلفت كلهم عينهم على صبرية فانتهز صياح الفرصة و رفع ايده بأشارة ذبح على ركبته يهددها.
الخوف خلاها تتراجف و بصرخة زغيرة منها تكومت بالكاع وهي ترافس وجنها طير مذبوح مثل الي بيه صرع و ميطلع منها بس ونين.
عيونهم توسعت ام حمدية ضربت صدرها.
- يمة بنيتي انضرت بس لا لابسها جني.
دنك غازي و امه يكضونهة.
بقى صياح واكف يباوع لامه و لضرتها يدخلنها لحجرتها.
باوع غازي لصياح
- تعال خوية هاي صبرية دايسة شي نكس بس لا مثل عفاف اروح اصيح لسيد عبد الواحد يجي يقرا عليها امش وياي.
بس صياح كض ايد غازي.
- ما بيها شي يخوي خافت من كلنا صحنا بيها .
باوع غازي لاخوه وخلا ايده على جتفة
- خل تخاف حتى تبطل من الجول مليون مرة محذرها هي ونورية همزين ذيج تزوجت خلصت منها هاي كون تاخذ وافتك.
- احم .. هو لو منطيني ياها اخليها بعيوني بس ماكو نصيب افكر اسافر للأردن خوش لكمة شغل هناك شرايك تجي وياي.
- و امي نعوفها لو خواتي اطمن على صبرية تزوج اول
- لا يا خوي صبرية من نصيب خضر صارت وقروا فاتحتها بس يعقد عليها وهي مو عد غرب.
- انت شعجب تسافر؟
- مامش شغل هنانة العراق حصار و الاشغال بس اهل الشهايد.
- خوية هسة عوفك من هذا الموضوع تعال اكعد نسولف ايام انت مامش
- و الله رحت لعلي الشرقي وما حصلت صوغات زينة جبتلكم ذن من الولاية خوية حتى خواتك حسبت حسابهن بعد هن بحسبة خياتي .
- و النعم منك ، و الله لو بيدي ازفلك صبرية
رفع صياح ايده..
- اشش عيب ولك صارت بحكم مملوجة لغيري عيب اتنوعلها بنظرة غير نظرة اخو،عمي وينه مامش؟
- خوية بوية تلكاه بالمضيف مال شيخ رحيم.
كام صياح
- يا الله خوية اروح اجيت اشوفكم اسلم عليكم..
علا صوته.
- خوية صبرية سلامتج بعد خيج شنو محتاحة من عيني و دربالج خوية على نفسج لا ترحين بعيد عن كاعكم خاصة الجول ناس ما تخاف من الله لا سلابة تسطي عليج شنكول لالله.
شبكه غازي
- خوية عضيدي تدري محسن زغير وكل اعتمادي عليك تساندني ما قصرت يخوي.
******
حجرة صبرية
انتفاضة و رجفات
اخذتني من عاينته بكل كباحية و صلافة، الخوف اخذني من تهديد اخوي ما يدري السطة على شرفي عضيده، الخوف من تهديد صياح خلتني اسكت ما اعرف ليش خفت لا احجي و غازي يموتني و هسة خايفة من سكتي لا صياح ما ينفذ وعده و يتركني بعاري و مصيري اهلي تكتلني..
ظليت بين حانة ومانة .. و كلما يطري بعقلي الصار ارجف امي غطتني بلحف وما فاد هذا جونا قريب صيف بس البرد اخذني و منتوبة تكللها
- عمي عرمات بناتج والله يابة شموديها للجول هاي بتج الله يستر منها هاي دايسة على نكاسة و مضرورة .
ما اجاوبها بس بجي و ايدي تعصر جف امي..
وينج يمة شبكيني يمة خايفة دبريني شسوي ..
كلما اريد احجي لامي بس ادري منهو يصدكني مامش حل عندي بس اسكت حتى يسترني صياح.
يا ليل القهر شطولة على ناسه
اتراجف وحدي الليلة ابوي الحجي يم امي الليلة.
عيوني على مكان خيتي نورية شكد محتاجتها .
- يارب شنهي مسوية ما اصلي ما اصومن ما اعبدنك يارب خايفة بس لا يغدرني صياح.
الليل كلة ما كدرن انامنه بس اتراجف اريد اكومن ما اكدرن.
فتحت منتوبة الباب وهي تدردم
- كومي يلة كطلينا ماي من الشط هاي البيوت وصللها ماي بس هل مكموع دارنا باخر السلف لسة ما مدولة كومي يلة ورانة شغل اليوم اختج تجي من الولاية وهاي وحدها تريد خدم .
كعدت و انة بعيني نظرة حقد وعلى طرف لساني اريد اهجم عليها.
- انة مريضة ما بية اكومن.
رجعت نمت والبجية بنبرة صوتي.
اجتني وهي تركز بية
- مو خالية سالفتج يا بت ابو غازي؟ امس شجنتي تسوين بالجول والله تكسرن ظهر الشايب وترتاحن الحمد لله موش عندي بنات جا شلت الهم همين.
نترت بيها
- عندج ابنج ال@#$%
حسيت لطمتني بحلكي ..
- شنهاي بنية وتحجي هيج عمي هم جنا بنات صوتنا ما ينسمع الله يساعد الياخذج
سكتت و عاينتلها لازم صياح يستعجل يسترني اريدن احاجيه بس اخاف اروحن للجول و يعيد السواه لازم اشوفنه .
ورى الغدة وصلت عفاف بوستني وهي تباركلي
- يوم الالي ولج فرحانتلج باجر عقدج.
باوعتلها وكتلها
- عفاف ساعديني انت دارسة وفاهمة ما اريدن ازوج شو كعدت تنوعت وي روحي و شفت خضر وانة ما متوالمين يعني يخيتي اريدن احاجي خضر اليوم ضروري كليلة ناطرتك يم البستان .
- ها شتحجين ؟ ترى خضر يحبج تدرين جنت اتمنى الله ينسيني ياه و صدك كمت ما افكر بيه مدري جانت مراهقة و هسة بديت مرحلة نضج.
كضيت ايد اختي و بكلب مجروح حاجيتها
- عفاف انت تناسبيه اكثر انة موش من ثوبه.
نترت عفاف ايدينها من بين ايديه وهي تخزرني
- شنو هذا التغير جنتي ملهوفة عليه، شصاير هسة يا صبرية ؟ تحجين صدك الولد طالبج و متفقين على كلشي شنو من اهانة هاي كليلي حتى ترفضيه.
باوعت لعفاف الي صوتها شوي علا .. كمت خليت ايدي على حلكها
- اششش اليوم منتوبة راصدتني لا تسمعج.
- عشتو لشنو راصدتج؟ ليش انت شمسويه ؟ صبرية شبيج وبعدين ذبي هاي الشيلة لعبت روحي منو يمنا
جرت الشيلة مني و وسعت عيونها
- ركبتج؟ شبيها
ظليت انتر بيها من بين سنوني وانة افتر بالغرفة مدوهنة اروح واجي
- مامش ما مش ما ساعديني روحي امش من يمي، تمنيت نوريه جن ما تكصر.
باوعتلي وهي مصدومة من حجيي جرت نفس و نفخت وكالت:
- ما اعرف شبيج بس راح اكلة اوف الله يصلح حالكم بس اكلج شغلة على خضر انت متعرفيه تربيت عدهم انة و اعرفة شغلتين بيه اليدوسلة بطرف يدمره والي يريده لازم ياخذه و انت فهميها بعد..
خلتني وطلعت ...
وانة محتارة شسوي خايفة هواي يا ربي كلما اريد احجي الصار اخافن اهلي عدهم الذبح حتى لو تعدى واحد على بتهم وموش برضاتها ..
خل اشوفن صياح بلكت ياخذني و ما انفضح، بس كون الله يخلصني من خضر ، اخ يا خضر شكد جنت اتمناك بس موش نصيبك.
مر بعقلي الصار ورجعتلي الرجفة ظليت بين خوفي و بين حيرتي
سمعت عفاف تكول تشاقي امي
- عيني من طرف العريس انة اروح هناك نجيكم باجر.
لكيتها فرصة ليش ما بحجة اراوي عفاف الزرع اشوف خضر.
طلعت ولافة شيلتي وعباتي بيدي ..
و منتوبة اليوم عينها ما نزلت مني تباوع لو تهز ايدها لو تغمني .
خاصة ما كضيت شغل
- يمة اروحن وي عفاف
صاحت منتوبة
- وين تمشين شوفي ام حمدية بناتج ولا يخجلن شوفي زمنا من حجة بية الحجي والله ما تشاوفنا الا بليلة العرس ما يوم شفتة وشافني.
اني كلتلها .
- والله يا حبوبة زمنا يختلف .
بس امي اشرتلي اكعد و اسكت ضجت وكعدت و عفاف عينها علي.
- خوش كاعدة ردت اراوي عفاف الزرعات الزرعناهن طلعن شحلاتهن.
احجي ومن الصار رجفة بحلكي صارت من طبيعة وجهي ما اعرف اسيطر عليها.
صاحت عفاف
- الله صدك عود اي عفية يمة خل تراويني الزرعات هي ترجع وانة اروح لبيت جدو بعدين.
باوعت امي لمنتوبة حيل ضجت تبقى امي بيد هاي السعلاية.
- يمة صبرية موش تتأخرين.
- لا يمة اراويها زرعاتنا
هزت امي راسها
- عفية بالمعدلة يبت بيتي..لا ترحين بيت جدج عيب خضر هناك وباجر عدادج راويها الزرعات ورجعي
غمضت عيوني حيل امنع دموعي و فتحتهن لبست عباتي وطلعت.
عفاف تمشي بصفي و مرة تباوعلي مرة للطريج
- اكول صبرية منو عاضج بركبتج ما ردت الح بالبيت لحد يسمع صبرية شبيج اجيت هاي المرة وانت مو صبرية القوية الي محد سالم من لسانها
نزلت دموعي مكدر احجي لازم اسكت حتى صياح يزوجني.
- صبرية انتضريه على الجرف جرف العشاك الي تتواعدين بيه وراح اصيحة يجيج والله يعين كلبك يا خضر من جفى الحبيب.
كمزت و فزيت بمكاني مثل الكرصتهة حية ركطة لا ما اروحن هناك لا اخافن .
- لا ما اروحن عفاف اشوفنة يم بداية البستان هسة الفلح ببيوتها وهو بحجة المار بطريجة هي كلمتين اكلله واروح.
باوعتلي عركت و اتنفس بسرعة وبين خوف بعيوني
- شبيج ؟ راح توكعين ثبتي تتراعشين شمالج
- مامش مامش روحي صيحيلة خل افضها وياه.
يمكن اكثر من ربع ساعة و خضر اجة ملهوف ...
- صبرية من كلتلي عفاف اجيت ركض ولج شنو ما تتحملين لباجر و الله مثلي مشتاك يبت راضي
نظرتها ..
و رجفة شفايف
و شحوب وجهها خلاني اسكت ..
ما اكمل كلامي ...
صفنت بيها ..
من اجت عفاف بعيونها نظرات وهي تتلكا بحجيها و مرتبكة كلت اكو شي بس عبالي لان عفاف عينها علي وباجر خطبتي ..
بس هسة من اجيت ملهوف للحبيبة كاعدة و حاضنة روحها ترجف و حتى صوت سنونها يصطك سن بسن .
عيونها متوسعة تباوع بعيد و جها اصفر البنية مو طبيعيه ...
سكتت ما كملت كلامي و كنبصت يمها
خليت ايدي على جتفهة وانة متعجب حالها
- صبرية شبيج احد مضوجج
ظلت تتنفس و صرخت بية وهي توخر ايدي
- روح ... روح ما اريدنك ان ... ان.
انتهينا
شوي وكامت وهي تنتفض حسيتها تريد تسيطر على خوفها الي مجهول ما اعرفة لشنو .
و كفت وهي ثابتة و حاجتني بس بتوسل...
عاينتلة ...
و بعيني كل خوفي اكلة شصار وياي لو اسكت و اشوفن صياح يسترني لالة
انة لازم اصيرن جوية و اطردن خضر من حياتي مامش حل عندي غير ٠هذا
عاينتله و بعيني نظرة توسل
- مالي راي و بوية الحجي بس ارفض ما يسمعلي خضر ما اريدن تجي تعقد
- ليش مو خطبت و اتفقنا على كلشي ليش و الحب البينا لعب جهال
غمضت عيني وكتلة
- مامش حب اعذرني رايحة بس لا تجي تعقد عفاف تلائمك متعلمة انة موش استاهل واحد مثلك
- صبرية ما انتهت قصتنا العقد ماشي.
- موش نصيبك يمعود عوفني
- احرك الاخضر واليابس اذا ما اخذج انت مهرتي وانة خيالج .
التفتت اله و خنكتني عبرتي
- لا تجبرني هدني ما احبنك.
امشي واردد
- موش نصيبك يمعود هدني و شوف عفاف تصلحلك .
صاح يسمعني
- و الله احق اهلج و افصلهم مو لعب جهال انطوني مرة خليها ببالج اشيوخ انطتج الي خل اشوف شلون ترفضيني .
خوفني حجية عصب كلش امشي واتلفت شارده صخام بوجهج صبرية ما يعوفني ..
رجعت للبيت و انة مسويتها عزة وبجي مسحت دموعي .
و رحت الهي نفسي بالشغل حتى لحد يشك بيه .
ومن اجة الليل صارت عدي خوفة اليوم امي يمي لان ابوي يم منتوبة حضنت امي
- يمة زين جيتي يمي اخا... اخافن .
- صبرية شعلومج يبنيتي شدايسة وهيج حالج.
- يمه حاجي ابوي يرد خبر لبيت خالي مامش نسوان ما ننطي .
كعدت امي على حيلها.
- صبرية شتحجين انت. تردين تعزينا كعدت زلم وانطتج لا تكصرين ركبة ابوج.
اخذتني رجفة.. و امي تكض كصتي مصخنة..
- يمة البنية شبيج.
- يمة غطيني بر.... بر....برد علي.
بحضن امي دافنة وجهي و اشم ريحة حنانها عصرتها الي حيل و جسمي يختض خض من الخوف و امي ما خذت مني لا حك ولا باطل.
ظل خضر الليل كلة يلوب و ما عاقل حجي صبرية لازم صاير شي .
البنية مو طبيعيه ..
حسرة ..
مثل جمر الجكاير تجوي الصابيع من توصل حدها.
هذا حالي وانة مرة اتكلب مرة اكوم اباوع من الشباك.
طلعت من غرفتي لكيت عفاف يم تلفون من جديد وصل خط تلفون لبيت جدي.
جانت صافنة على التلفون و تبتسم من شافتني كمزت وكفت وهي تعدل بشعرها.
- شسوين نصاص اليالي هنا؟
- لا هيج شوف تلفون
باوعتلها وضيكت نضرتي
- اي وشنو يعني شكو متعجبة
- تلفون ابو القرص شوفه ..
جانت مرتبكة و هي تبلعم...
- انت بيج شي لو خبالاتج هاي.
هزيت ايدي وردت اطلع بالحديقة مختنك من دكة صبرية الناقصة وياي .
بس رجعت لعفاف و عيني بعينها.
- شبيها صبرية
شفت بعين عفاف تتهرب جنها شايفة او شاكة بشي
- ماكو شبيها يعني
- رفضتني وهاي الزلم الي حشمتهم شكلهم.
- يكولون انضرت مثلي رايحة للجول وضالة تهذي حتى امي اجت امس العصر هنا كالت جنت" بضيم سوادي جتني حبارة جمالة "
يمكن تقصدني امي سألت خالتي شتقصد تكلي جانت بوحدة خبلة عود هسة صارن ثنين.
بربك خضر كل هذا العقل وتنظرولي خبلة حتى الجني الي حرك بستان جدي شفته انة علي نظر قوي اشوف كلشي يا خضر.
باوعتلها مستهزيء بيها دفعتها من طريقي
- وخري عاد ناقص مخابيل بس ها باجر ترحين توصين اختج ترى الخطوبة و العقد ماشين
- خضر لو تاجلها البنية مريضة
- هواي اجلت
طلعت وانة كلش عقلي مو الي احساس الرفض مرافقني .
مثل كل صباح ريفي يبدأ وي الاذان الناس تصلي و كلمن على مشاغلة يروح .
كعدت صبرية لكت امها نايمة وهي جلوس ايدها على خدها ويمها طاسة ماي و قماش.
برجفات
و حسرة على نفسي ...
تدنيت اشبك امي الي كعدت وهي تتمغط
- يمة شلون صرتي
- على الله يمه
- لو بس تكليلي شبيج يبعد رويحة هلي
- يمه ماكو شي بس مخنوكة..
اندك الباب حيل
- ولج لسة ما كعدتي خافن مصدكة عروس الله يرحم كبل جنا كبل لا ننزف بساعة لرجالنا كافين كل شغلنا حتى الهوايش حالبيهن و الكيعان حاصديهن ..
بنات هاي الوكت ...
خلت حجايتها معلكة و راحت...
عاينتلي امي ..
- عيوني موش مثل كبل امس ظلمة على ضوة الالة كهرباء مامش و الغرفة احترت موش شته اكعدج نطلع للحوش نفرش انت مامش انزعج شيلتج مجلبه بيها حتى وانت تسربتين ( تهذين) من الصخونة .
يمة كفيني شر مرت ابوج كلها شر و مابيه حيل طلايب كومي يبعد كليبي لشغلج و كبل الظهر ردي حتى تسبحين شوفي خيطتلج ثوب عد ام عصفور تلبسيه اليوم روحي يمة وردي على وكت وراج خطابة و عقد سيد.
شهكت بخوف..
- ليش خضر ما ردلكم خبر مامش عقد .
ضربت امي صدرها
- يمة اسم الله تردين الناس تكول بت راضي بيها شي و الولد رفضها لا يمة راس ابوج عالي و خضر ابن اجاويد ما يسوي دكة ناقصة بينا ..
بلعت ريكي وكمت شسوي شسوي الله لا ينطيك صياح يوم صخمتني..
لازم اشوفنه زين وين اروحن للجول هو مثل الجلب دومنه هناك خافن ما الكاه بس يدري اليوم العقد اكيد ناطرني.
امشي واتلفت الي تسلم علي لو ارد عليها لو ما انتبه تفكيري موش الي.
عيني لذاك الصوب و كلبي حيل يدك اخافن اروحن .
ظليت واكفة ما حسيت الا ..
- بز شسوين ؟ ههههه
درت وجهي ورجعت ورى
- ص... صياح
- تؤ تؤ تؤ ... وين اللسان ..
تحول وجهة الى نذل وملامح مجرم.
- ش.. شتريد ...
سكتت ورجعت اتنوعله بعيوني واتوسل بيه
- صياح اليوم خضر يملج علي دبرني انت ورطتني لازم تدبرني.
ضحك وكال
- موش هنا نتحجة امش وراي ..
بطريق الضياع بدت اول خطوة لصبرية ..
تبعتة رغم الخوف تبعتة مجبرة لان الكلام ببيئة منغلقة تعني الموت الها ببيئة سابقا كانت التخلف راية ترفع يمكن صبرية جانت مثال لهيج فئة من بنات وهذا ما يعني التعميم.
و كلنا نعرف حاليا اختلف الريف و الثقافه دخلت لاغلب بيوته عكس الماضي كان الجهل هو طابع الغالب و قلة متعلمه.
مشت تتبعه و هي بداخلها البريء مخلت اي امام انو يلكالها حل .
جرت حسرة وهي عينها على البيت المهدم الي شهد خسارتها لطهرها ..
وكفت ما دخلت وراه...
- دخلي شتنتظرين...
- صياح تزوجني و استر علي..
- برئيج ينطونج الي فكري زين صبرية و خضر ما يعوفج.
- شنهي انت سودت وجهي وتريد تفلت منها .
- امممم عايني زين حل واحد تشردين وياي هناك اخليج ببيت بنية تدبرلج شغل.
- ليش ما تزوجني
- ازوجج بس خل ارتب الوضع ..
دكة الكلب
توجع
انفاس محسرة
شرف مسلوب
و خوف من لا احجي انكتل اسكت انكشف وهم انكتل
وحجي صياح انهب وياه واشرد صافنه افكر تخيلي ابوي عكالة واكع لان البنية عكال ابوها وانة وكعته لعكاله.
نزلت دمعتي من عيوني و شهكة شهكتها ...
من حسيت بيده تدنيني اله ...
- وخر شتريد .
ضحك وكال
- شبيج ترى انت هسة بحكم مرتي ..
هناك عفاف برجعتها شافت صبرية و رادت تلحكها تحاجيها على خضر بس من شافت صياح و صبرية تمشي وراه تبعتهم.
تتختل بالنخل و هم اصلا ولا منتبهين ..
ضربت صدرها وهي تشوف صدرية تدخل وياه للبيت..
- صبرية ؟ لا ما اصدك ولج يا خاينة ...
ربطت كلشي تصرف صبرية و الي بركبتها و رفضها لخضر ..
الخوف وعقدة الجول تجاوزتها وركضت وهي تتجسس تريد تفهم شنو بينهم .
ترددها تدخل عليهم بقت محيرة ...
يمكن ربع ساعة او نص ساعة طلعت صبرية تعدل بملابسها و تواجهت وي عفاف وشهكت ورجعت ورى ...
تعبت كافي لهنا ..
يتبع
------------🌷🌷🌷🌷🌷-----
السلام عليكم موعدنا ١٤ بس قبلة ابني مسوي حادث الي بالفيس يعرف الموضوع و حتى نازك مكملت وياها دققت ٨ او ٧ بارتات فقط لان التهيت بضروفي الي للان ما تخلص بس لازم اكمل القصة لذا رجعت اكملها
شكرا لصبركم ولكل