مساء الفل
بارت اليوم برعاية المتابعة المشجعة
h92seh🌹
العشق مرضٌ ليس فيه أجرٌ ولا عوضٌ
علي بن أبي طالب (عليه السلام )
أنسام
ماكو سيارة ظل خطية ادم حاير تاليها طلع ورجعلي مكعد جيرانه و اخذنا بسيارته علي للمستشفى ،
كان مريض واخذته للطبيب العصر وانطاني علاج ، اشو نص الليل مدري اشبيه حلكة انعوج و الصخونه ما نزلت ، اخترعت عبالي انشل ، خابرت ادم ، طلع منطيه ابرة لحالة التقيئ الي عنده وطلع عنده حساسية بنسلين فنشمر الولد وانطوه اهناك المضادة
لامني اهواي ادم المفروض اسال الطبيب بس انه شعرفني ، اكل گلبي اكل
من نزلنا من السيارة هو شايله دخله للبيت
طبعا كان فارغ البيت لانه وده اخته و سلوى يم رضوى
وكف بالحديقه وكال اخذيه مني
واني اخذه منه
خزرني من العيون تلاكت
- لو ظال مشلول كان انعدمت حياته بعدم خبرتج ، صارلج كم سنة ام ما اتعرفين ؟
اخذته
وبصوت باكي
-كافي الله يخليك شعرفني انه بيه هاي الحساسية وشعرفني ما يصير ياخذ ابرة
حطيت راس ابني دنيته حيل على صدري وكلت
-تعبتك وياي مشكورة
-ابني هذا
خله وراح ما دخل
وظليت بليلتها وحدي ما رجع الي سلوى
الصبح كعدت اريد اتصل بهاي سليوان ترجع
شفت مسج منه
فتحته
- ضوجتج البارحه بس كنت قلقان على الولد وانت بصراحه مستفزة دوم تستفزيني بفطاريتج هاي
هذا مديح لو ذم
كلت عود ما رد عليه اعوفه دا يرزل بيه من البارحه واليوم وهذا طبعه احسه يتعامل وياي مثل الطالبة عنده
واني اتريك اعيوني على تلفوني
-يوه شو تعال خل اغلقك
غلقته
و ورة دقيقة فتحته !
واني اغسل مواعين وبالي اروح ارد عليه
-خل اثكل
يوه مابيها شي الثكل شنو دخله بالنص
خل ارد مثل الهبلة مشيت ورة ادماني و دخلت ع المراسلة
-بس رسالة وحده
احم شكتب ؟
دزيت اله
-مشكورة
واسمول باكي
رجعت سلوى و فات يوم وهو ما شايف الرسالة وظليت اغم بروحي
ندم
جيس الروبة عود مريضه سحبت سمر يمها اظنها اتريد تقطع رجل ادم عني
الغروب الا تمت الرؤيا بس ما رد
هيج وقت يتعشة ويروح للمعهد ينطي محاضرات
خل اخبث على هالجيس
رحت سويت صينية و توسلت
لسلوى اتوديها
-ما ما امشي واني وصينيتي
بعدين تصرفج هذا اكيد يزعج رضوى
- لا ليش جا هي اكيد توها جايه من الطبيب وتعبانه
- ممم يجيب جاهز واصلا باسم يمهم
-هو ومرته
-لا بس وحده وابو رضوى هم
توها راسلتي سمر وكالت تريد تاخذ ملابسها باسم مقابل يريدها يمه
-اها ميخالف انسوي الواجب وديها
هسة
-يووه وابنج مريض وين بيه حيل يمشي
-الوح الوح
لزك الها
اخذته وراحت اخذته بسفرطاس مقبلت اشيل صينية
ومن اهنا ابتدأ سعيي يزيد قبل لا يروح كربلاء يستقر اهناك كون اني مستقرة بگلبة
__________________________
ادم
لمت سلوى اشلون تطلع هيج وقت
كالت بعد وقت
ما لمتها زياده اللوم على أختها الي ابد ما تعرف تصرف بالله شافها هالمعاذ الحقير ! اخ لو اختي والي سلطة عليها ،
،
صبوا العشة رضوى يمنا فقط من النساء
-بابا اكلي ليش صافنه
اتباوع لصحون اكل انسام
-امنين هذا البورك والكبة ؟
همست
-من ام علي
صار وجها احمر
باسم
- بلا زحمه عمي من يمك الصحن
طلب من ابوها من اكل انسام و ترك الجاهز
رضوى كالت الكباب اطيب ليش عفته
رد عليها
-مليت من الجاهز خالتي مريضه وظال اني بالجاهز متورط
حقدت علينا رضوى اني هم ضعفت يم كبتها
والدها كال
-والله هالكبة تشبه الي جانت اسويها المرحومه امي
-بابا انت هم !
اووه
ضاجت وكامت
-وين بوية
-اروح اسطح بابا افضلي وانت ظل اكل كبة
الف عافيه
همست وهمسها قريب عليه لان يمي واكفه
- حتى بأكلها سحر
ناقصني تاخذ بابا !!
،
كنت تعبان لفيت راسي ونمت بيومها مرتاح لان باسم كال الي مترصد اله انسجن بقضية مخدرات
كلت انروح نزور لسمر بعطلتها الجمعة ونزور اهلنا نطلع من الصبح لكربلاء
وافقت ورة اشوية كالت كلت لسلوى
اني و و
-و شنو
-انسام كالت اريد اروح وياكم يمعود اتورطنا
-شنو كلتي الها ؟
دنكت مبتسمة
-هسة الا ادكين اعلان يمعوده وين ناخذهم هاي ورطه خابري كولي بطلنا
-واجذب !؟
والله ما اعرف
-حليها ما ادري ما اخذهم هذا الشي يستفز رضوى
-ليش ؟
واذا ترة مبيها شي والله مرت عمنا وناخذها ويانه اتزور ، الناس غربة اتروح حملات سوة عادي ترة
اف شكول الها هاي
- حليها ما اخذ انسام ويانه
راحت ضايجه سمر
كال اخذ انسام وياي اني عايز مشاكل ويه رضوى المرة حاطه انسام ببالها
كعدت ورجعت اباوع بالتلفون محاضرة الي قديمه
اباوع للهمة والنشاط والواهس الي كان عندي قبل سنتين وينه ؟ وين راحت روح الشباب بيه
ضاعت بوسط ملامح هم المصائب
بهاي السنتين كم عزيز فقدت وكم غالي ودعت وكم حلم انهدم ،
طفيته متضايق حيل ، اباوع لحياطين البيت وين الاهل راحو لمتنا وينها بقيت وحدي
بس هالاسبوع قررت سمر يمي على ما رضوى تشد حيلها وتستقر يم خالتها استقرار تام لانها اعلنت بعدم راحتها وية رضوى
كنت شاب بأول عمري رحت لامي وبخاطري توسل الها
كانت كاعده بغرفتها ببيت جدي العتيق ، يم شباك غرفتها القديم
رافعه البرده على ضوة شمس العصرية
كدامها المصحف مسدود وتسبح ، واتباوع الي بنظرات حانية
-ها يمة ترحين ؟
- ادم ،
ادم
هزيت راسي بها مفهت ليش عادت اسمي واني كاعد كداما محتضن كفها
- يا ثاني فرحة الي من اجيت جنك(كأنك) انت بچري (بكري) من كد الفرحه الي ملت البيت
اني اريد افرح گلبك بس
-لا تكولين ما موافقه
- على عيني يا يمه موافقه بس على عيني والله لخاطر عينك تفرح راح تنكسر عيني
-ما عاش الي يكسرج يوم ، لا ترحين
كلتها بخاطر مكسور حست بيه
-مو من گلبك يا يمه واني مراح اكسر واهسك بس تذكر يا يمة راح اروح للناس الي رحت الهم و رفضوني
وياريت بذوق امها كلش متكبرة هالرضوى
كانو طبقين حيل خاصه احنه نسكن بمنطقه شعبيه وهمه بالمنصور ،رضوى عاندت اهلها و مرتين خطبتها الا صارت من نصيبي بشروط ، كنت توني متعين و تزوجنا عازلها وحدها ببيت
شكوك امي بأن زواجنا ما ينجح كانت قوية وانولدت بينهم مواقف شاحنة مكانو اهلي راغبين بيها ، هي كتلة من الطموح والطاقة الايجابية المتحركه بنسبة الي بشموخها ودلالها و انوثتها ،
حتى بعد الانفصال متمني ارجع الها بيوم ، طلاقها مني كان حافز لتغير وضعي و وضع اهلي ، مابيها اي عيب بس انسجامها مع اهلي ضعيف جدا لهذا سمر ما تحملت وتريد تتركها
،
راسلتني انسام ،
كلت لسمر انروح وياكم اريد ازور علي مدري اشبيه اوليدي محسود
بالله اشلون اخلص من هاي السالفه
وديت رضوى لاهلها واحنه نطلع من الصبح متحجج ملحك اوديها الصبح
و طلعنا بتكسي اجرة لكربلاء
وسوت سمر موقف محرج
امشي كدامهم بعد ما فرضو عليها بكربلاء تلبس عباية ، والتفت اشوفها واكعه ورايه و انسام واختها كومنها
يضحكن والناس تباوع
اجيت عليهن
-سمر لا اضحكين وامشي
رجعت امشي كدامهن واسمع سلوى
-الله ادم سبورت
سمرقند
-لج لو باسم دفني اهنا يم بابا مدامه قريب
التفتت
-الله يرحمه
يلا امشن وصلنا للتفتيش الاخير
اطلعن اوكفلي يم الباب خوش
دخلت لضريح ابا عبد الله حسين
مهموم و مخنوك متعني يفرج همي
خلصنا زيارة
دخلتهم لمطعم قريب على شارع السناتر
بين المهموم والي حاس بالتأنيب مكان الاولى مرتي اتكون ويانه ؟
بس يلا يا ادم بسبب صحتها عفتها قابل متقصد تاخذ انسام بدل عنها
انسام اكثر الفه بهذي المحافظه من بناتنا
والشي الازعجني اكثر اني بديت اتآلف على وجودها وكأنها وحده منا من سنوات طويلة
اظل اباوع لوجها طول ما هي كاعده كدامي وبعد ما اتروح اكره تصرفي الي ما لاكي اله مبرر صارت مختلفه بالنسبة الي ، تطورها وتحضرها صار ملفت للنظر ، ناهيك عن الحب الي بعيونها يلمع ما منطفي لهفتها بكل مرة اشوفني وكاني حبيب غايب سنوات صرت احب اشوفها بعيونها ! تحسسني بعدني كبير بنظرها عكس الي انطوني ضهرهم ،
مهما دارت الايام باقي شي كبير الها ، بنفس الوقت الي اشوف انكساري بنظرات رضوى
رغم هي ما تحجي
بحاجة ماسة لهلشي و حيل مستعضف نفسي اذا تحليلي لحالتي صح اشكد ضعيف اني !
.قطعت حبل افكاري انسام من كالت خير ابو هابيل اكو شي
كنت اباوع الها بصفنتي نبهتني ان الي حولي انتبهو عليه
سمر
- حنتأخر ادم
-يلا كومن اذا خلصتن
زرنا المقبرة ومناك طلعنا لكراج الاحياء صعدنا لبغداد نفرات ،
سابقا وموصي سمر ما اجيب طاري لرضوى عن وجود انسام ويانه
من وصلنا ما رحت وصلتهن دخلت لبيتي وسمر وراية
-ما وصلتهن للبيت
- عوفيني بحالي كله منج بالاساس
سكتت وراحت من صيحت بوجها
ممرتاح لنفسي ابد اني مو بطبيعتي
رحت رجعت رضوى
كنت بالمطبخ ودخلت رضوى
فتحت الثلاجة
-شسوين ب ١٠ ونص بالليل
- اريد اكل جوعانه متعشيت عدل
سوت لفة جبن وعسل
واكفين كدام الكاونتر اخذت لكمه منها ومدت اللفة كدام حلكي ،
اخذت قضمه رغم عدم شهيتي الها
- حبيبي اريد
- تم
-هههه انت عرفت شريد بالاول
- اي شي ترديه مجاب
حضنتني و ظليت ابوس برقبتها ندمان و مشتاق مثل مذنب يطلب السماح بس هي مكانت تدري ! بيه ولا حاسة بعيوني ندم و هم
اجتني رسالة
كان على الكاونتر تلفوني بالاصل جنت واكف اخابر قبل لا تجي رضوى
-منو ست انسام
اتحول صوتها لحاد
-شنو !
-ترى ادري بيها تراسلك !
- رجعنا لهاي السالفه
اي تراسل من تحتاج شي
- امممم وهسة هي افتحها
-بطلي هاي الطريقة
دك التلفون
شلته جرتخ من ايدي بطريقه ازعجتني
ومدته الي جان باسم
رفضته و فتحت الرسالة من رؤيا
-اخوتي ، شفتي لو ما شفتي
حطيته بعصبيه على اعيونها
رجعت لورة خايفه من عصبيتي
-كلت الج مابينا شي و لا مفكر بيها ما افكر بيها ، سمعتي ما افكر
خبلتيني
صياحي ارعبها خلت وراحت لغرفتها
-يوه زعلت . ازعلي ظلي دوم زعلانه زين هيج ارتاحيتي
،
كعدت بالصالة على فراش
هي اشويه من الوقت ورجعت ثائرة رضوى ثورة اقوى من ثورة المصرية
واعيونها ترعد شرر
- انسام وياكم بالزيارة !
ادم هاي المومس وياكم !
وياك احجي
على اصياحها اجت سمر
كمت وكفت واشرت الها اتروح
-رد عليه ليش ساكت
لك لا تحك بشعرك وجاوبني ليش داير وجهك هاي ام المتع وياكم هااا رد
رد
اتقربت عليه ولزمتني من رقبة تيشرتي
- كول حبيبي سارة كذابه ، كول حبيبي مرحت وياها بس ويه اختك
بلعت ريكي
-اي بس عاد
-عاااااادي
ضربتني !!!!!!!
على رقبتي
جفلت و ظليت صافن بوجها
- لك ليش هيج اسوي بيه
اه يا نار گلبي ااه
تبجي وتكح
جرتني من فانيلتي و تمرعد بيها
- هم اتكول ماكو شي لك كلشي ولا اكذب
لا اكذب ، كول الي من حقي اعرف نوع علاقتك
وخرتها عني ورحت للمطبخ وكعدت على كرسي كدام الميز
ساند ايدي من عكسها على الميز و جبيني محني مسنود بكفي
عفتها اصيح ورحت
رجعت الها بعد ما فات وقت لكيتها على السرير مطروحه وتبجي
ظلت اتباوع الي بملامة
-باجر اوديج لهلج
- يكون احسن حتى اسوي عرسك اهنا
اخذت مخده من يمها
- تعال احجي وياي
-مراح نوصل لنتيجة وصلنا للضرب انتهى الاحترام يعني خلص الود و ضاع الحب
كامت الي
- والروح الي ساكنة داخل احشائي احبك اكثر من روحي ، اول ما خلق الله الي طفل من نسلك صرت اغلى من انفاسي عليه
انت حبي وتعب عمري.......... اشوف كلامك غير وتصرفاتك شي
شتريدني ابقى بوعيي ..........
اني من صديقك كنت اغار اتريدني من وحده اعرف نواياها يظل عندي ذرة عقل وهي لازكه الك .....مدا اشوف تصرفاتها الاستفزازية
هذا كوله اشوفه كدامي ومكدر حتى اشكي لامي لقرب شخص الي اخاف لا تكول الي شفتي كلامي الصح ، مريد احد يمسك بكلمة
سكتت تضائل الكلام عدها ونفذ و انتهى
- باوعي شوفي عدل اني شنو ضروفي
رجعت لنقطة الصفر فجأة ومن غير سابق إنذار ، افكر بيج وبحملج بمستقبل ابني خواتي حتى المزوجات مالي مكان يحويهم ، اخواني علي الي ما اعرف اشلون راح تربي مرة وحدها
اصياح وانوب وصلت للضرب بعد يومين تاخذيلج كفين
رحت بالصالة ما اتحملت الحر ، اجيت اروح يم سمر بس كلت لا احرج رضوى واجرحها كدام اختي ، فرحت الها لكيتها مطفيه الضوة نمت على طرف السرير ، والصبح رحت للمدرسة ،
،،
دخلت واتلكتني سمر
-راجعه من وكت
- بس محاضرتين اليوم
همست وهي تتلفت
-رضوى استلمتني أستجواب و الله مدري هيج القضية ولهلدرجة اتغار ، اسفة كله مني ،
هزيت بيدي
-مليوصة مليوصه اليوم
ضحكت
-اضحكي على حظي
رحت للغرفة
لكيتها كاعده بثوب وردي والشعر مفتوح ، والوجه مبتسم
بدلع
- الي يدخل يكول السلام عليكم
- وعليكم
كامت بحركة سريعه
وكفت يم التعلاكه اخذ غيارات
ولزمتني من خصري
-هدي رمل كلياتي هايج عليه
طرف ذقنها على متني
وشدت اكثر بتحويطها الي
-اعتذر أدم ،
باست خدي
- يلا خلصتي وخري
شاورتني
-أحبك
-اي ديلا كافي
كافي اكره هاي الحركات
ظلت تكزبر بجسمي من اتبوس اذني واتكول احبك
-حبيبي احبك موت
لك عيني لك حباب .....كافي يعمري غياب لك عيني لك حباب و باجر وراك حساب تررن
نادم بكَد شعر راسي على اللي سويته بيك
كون مكسوره ايديه قبل ما امدها عليك
صدك عمرنا يفوت
وكل احنه راح انموت
الله شتكَله هناك
باجر وراك حساب
ظلت تغني وتلحن
-كافي رضوى والله تعبان
وخرت اديها عن رقبتي
-اها الاعتذرات كولها ما تفيد وياك
اوك
اخذت الولد وراحت ،،،رجعت فارغه
جنت دريد البس فانيلة ربع ردن
و خلعت الثوب ذبته
واشرت بأصبعها لعطشان حضنها تركت البيدي و التعب انزال و الذاكرة نست مشوف بس الي كدامها
بسبب الفراق بسبب مرضها وحملها ،
،
شفتها تتوجع
- رضوى اشبيج
- مابيه بس احس نفسي محتاجه نومه على صدرك
شكلها ما يوحي انها بخير ،
- دكومي اسبحي و اتغدي ونامي
كومي
- اوي ليش رجعت تنتر وتزمخ بيه مو على اساس انتهى الزعل
-بعد ما تأكدتي سمر الي كايله الهم و سويتي أستجواب
-اي كالت حتى انت من عرفت مردتها اتروح وياكم
عضت شفتها ولزمت خاصرتها
- بس انت تحتاجين زوجة مسانده حضن واحد تعبج
ضربتني بالكوشة
-ثكيل بشقاك ترة
-دكومي كومي
-مممم مبيه حيل
دللني انت
اوووي صارلك اهواي ما مدلل ترة
رحت طلعت اشوف سمر وين ، كانت بغرفتها وساده الباب عليها ، البيت غرفتين وصالة وملحقات ،
رحت لرضوى
- الحمام مو قريب مثل قبل وانت صايرة بطة مال اشيلج حلم
تعالي
كومتها و اخذتها للحمام
دخلت وعبست وجهي
-وماكو بانيو احطج بيه واسبحج راح نرجع للطشت
-هههه عسمى ما اعيش وياك ع الحصيرة يا ابو العيال
طلعنا وكنا نضحك على سوالفها .
-زين اشبيج بس حضن ثاني
-وخر كافي احضان حولد اليوم
نمت على ايدها
-مممم زين سولف الي نكته
سولفت الها نكته متزوجين قديمه هي من باسم افندي و كنت اسولف وابوس برقبتها ، وهي لازمه الفون
__________________________
سارة
تذكرت مرة اشلون جرحتني رضوى امي كالت كدامها محسوده بتي حملها متعب دوم
كالت رضوى على شنو شو هو عبالنا باسم ميت عليها طلع يريد يثني قبل لا ادور سنتهم
فد حقدت عليها ، و من كالت سمر الي رحنا زرنا وعرفت ويامن واعرف غيره رضوى من الكل من جانت ويانه بالبيت اتريد ادم بس الها وسمر كالت شو مايريد مرته تعرف
ما قصرت و خابرت عود اسال عن صحتها وكلت الها المفاجئة
ومدري شصار ،المهم حملي ما يحتاج اراجع بس لخاطر الي بالي حجزت يم طبيبة فلانيه مخابرة وما عرفت سكرتيرتها صوتي !
باسم مجاز وتعمدت باجزاته حتى هو ياخذني
اول ما وصلنا للعيادة العصر لزمت ايده
-شسوين ولج
راد يهدني
-اوك اذا ما تلزم ايدي انزع العباء
استغفر وخر ايدي الي لازمته وحط ايده فوكها وهو لزمني هالمخبلني
-لعد كدامج رجال شنو انت تگوديني
مبتسم وطكها ضحكه
-هو اني اكدرلج وكحه
خزرته
-بس حلوة
-اي امشي عدل
دخلنا وكنت حيل متقربة منه لنية بداخلي
باوعت الها بشموخ وعزة
وباسم الي اتكلم وياها مجان مركز بشكلها
- حجز بسم سارة فايز
نصه صوته من كال اسمي خاف واحد يسمعة
ظلت هي اتباوع الي مصدومة نرجس الصديقة الغادرة ، مثل الي اكهرب
باوع الها باسم واعتقد توه ركز وعرفها
جنت مبتسمة
ولازمه ايد باسم
-عيني وصلنا السرة لو لا اشبيج
اجت وحده ثانية الا ركزت نرجس وكالت ماكو حجز باسمج
- حجزت بسم رغده فايز هههه شوفيه يمج
باوعت للسجل وكال كدامج اثنين ، رحت كعدت كدامها وباسم
سوالي حركة اصبري الي وطلع
نرجس مطلقة حاليا و عدها ولد و عرفت من الصديقات تشتغل اهنا
اجيت اشمت بيها واراويها الي عافته وعيرتني لان اخذت عسكري اشلون يعاملني وما زال وياي وحاير بيه
مرات الشمات يحثوك تمشي صح و تخاف من اقل زلة بطريقك لا تعثر و يضحكون عليك ، من ضمن الشمات الي خفت منهم يشمتون بيه وقت تدهور علاقتنا اني وباسم هي نرجس
رجعنا للبيت وزفني ذيج الزفة لان عرف بسوالفي
فما لكيت طريقه اطلع منها غير اني ابين اله اني اغار عليه هو يحب مني الغيره !
بعد ما دخلت للغرفة اتخصرت
-اي وشنو عيني اشوفك ضايج لا يكون حنيت
-شحنيت اني بس حركاتج دقتني
- مبين ضايج عليها
مبين اعيوني مبين مشتاق الها ابو العلاقات
-وج يا علاكه هاي تعالي
لان وابتسم عرفته ارتاح حيل من غرت اووف من الروميو مالتي
_______________________
انسام
اجاني تسجيل صوت من رضوى
هذا الصوت لو ويه ميت صوت انبعث اكدر اميزه واعرفه
ادم
اي هو ديسولف
انوب اجاني صوت كانه واحد جاي يبوس بواحد !
كلامه خلاني انسطر حتى انشلت ايدي
وانصبغ وجهي حمار بسبب حرارة دمي
بس اسمع صوت ادم الهادي و ضحك مرة وياه و اصوات بوس و ونكته جريئة و غزل كله بصوت ادم
خله الدم يغلي بعروقي ، وصل التسجيل للاخر وصلني اني لاخري
من كال احبج حيل و خل ننام هسة
بعدها وصلني كلام منها كتابه
- سمعتي لو لا هذا زوجي مثل ما توقحتي وكلتي كدامي احبه ، دزيت
الج مسج وبصوته حتى اجوزين
عنا كافي هاي الاساليب الرخيصه
وخري عنه عيب ترى هو يعرف بيج ومغلس !!!!!
بس شافتني شفت حذفتهم من يمها
يتبع
خففو السب والدعاوي الغوها
لخاطر تكمل القصة