مساء الورد
ليس الذي يجري من العين ماؤها
وَلَكِنَّهَا روحٌ تَذُوبُ وَتَقْطُرُ
قيس بن الملوح
أنسام
انسابت رجلية و انحنى ضهري لدرجة نزلت على ركبي على الارض
-هاي شكو كومي !
حاطه اديه على وجهي كله وابجي مثل المكبوت صارله قرن ولكه فاتحه يبجي بيها عالن تحطيمه
لزم عچسي وظل يحاول يكوم بيه
-استقيمي انسام
مو مال طلعه بعدج
كل ظنه بعدني مريضه !
مشاني مثل الطفله الي يقودها ابوها
طيف دافي وهبت أنسامه بضهرية ربيعية تخللت للروح وصارت هي سلوتي و جبرت بخاطري أنسامه القريبة طابت النفس و انكتمت العبرات ما ظل منها غير شهكات هادئة ،
عكس طريقنا رجعني للماركت فتح باب سيارته و كعدت و هو ساق
واني بس اناشغ ومدنكه منتبهت للطريق الي طول! واعيوني ما انرفعت على الطريق مثل القاصر وخجلانه من والدها ، انوب ظليت الوم بروحي شجاني وبجيت هيج كدامه من غير سبب شيكول عليه جاهلة لو ممثله !يوه لا عباله امثل
مطاطية راسي لا انصدم بنظرته عليه هي مزايده نظراته عليه كثرت ، رخيصة لعوب انوب حيالة ممثلة
الصوت الخاين طلع باكي
-هو احنه وين رايحين
كمت اباوع للطريق !
- للكاظمية !
التفت عليه اني كاعده وراه
كان مبتسم بشوش
- ازورج شكلج محتاجه زيارة
-يا رجعني عفيه ابني واختي وحدهم
-شعليهم
- لا عفية رجعني
سكت و ما وكف
اني هم سكتت ما طالبته نرجع مكتفية بهاي اللحظات الي ادريها تخلص اسرع من الرعد ، كمت املي نظري من قفا ،نظرات وابوكها بوك مثل الحرامي، اصعب شي من تتمنى شي مو الك
لابس قميص بيجي و بنطرون كابوي مبين راجع من الدوام و جاي يشتري لابنه
وصلنا لساحة عدن ،
-وصلنا انزلي
نزلت راح حط سيارته بالكراج ورجع الي اني بس جزدلاني بأيدي حتنقطع يدته من لعبي بيها الي يعكس توتري
- شسنوي اهنا !؟
- اتفضلي
اشرلي امشي وهو مشى ابصفي
لا خلفي ولا كدامي ، ابصفي حارص يترك مسافه وهاب عطرة الطفيف يم انفاسي مدخل العبق لروحي المتيمة
- حار الجو اليوم حيل
مجاوبت احنه بالربيع توه الشتا ودع
كمية التوتر لا توصف هم امشي ويه رجال وهم هو ادم ،والثانية مصيبة اعظم على قلبي
دخلنا توضينا بالماغسل وطلعنا جانت الساعه ورة الضهر يعني مأذن الضهر ورايح قبل ساعه
وصلنا للحضرة الشريفه هو من تفتيش الرجال واني من النساء طلعت وكفت يم باب التفتيش شفته جايني من غير باب صعدلي واني تدودهت المفروض اني انزله بس شافني ملكوفه وبس صافنه على شبوبيته واناقته و طلعتي وياه الي ممصدكتها لهسة ولا اعرف غايتها
هيج ذاب نفسي وراه عساه ما ياخذني لجهنم !
- تعالي ، يلا
دخلت زرت ولا دعيت لابني ولا لاختي مثل العاده ، دعيت بس لا يجرحني هسة من اطلع لان كال عنده كلام وياي داخل الحضره من اخلص زيارة وصلاة
طلعت ولكيته مخلص و واكف ينتظرني
كعدنا متاقبلين مع بعض وسط الحضرة
كانت مملية فرش سجاد اخضر واكو احمر وبيها الي يتلو قران والي يسولف ويه اهله والي يصلي
والي صافن مثلي على الي گدامه
هو كان لازم سبحة الإلكترونية ويسبح بيها
رفع راسه
- صليتي
-اي
- شكرا على الزيارة صارلي اهواي مجاية يمكن ست اشهر !
-تقبل الله منج
- منك ومنك ااا اقصد منا ومنك
- انسام ، اااه يا انسام شمسوي بيه !
اضنتني هاي الكلمة و خليت الف خط احمر جواها
كلت ملكوفه
- اني
- تدرين من اليوم الي الشيطان ادخل واتهجمت عليج
-انت هجمت عليه ؟
-اتهجمت مو هجمت ! المهم من ذاك اليوم واني منغص بحياتي
سكتت
- البركة لا تحل على الظالم واني ظلمتج
اهواي ظلمتج اهواي
- ادم انه
- ممكن اتخليني بس اتكلم
سمر كالت الي اوت البارحه من كنت بالدوام وهي محتارة بوالدي انت الي اجيتي ودخلتي للحمام
سكتت محبيته يذكر هذا الشي اصلا نسيته ولا اريد اذكره جميل، ما اذل عاجز لاني جربت العجز
جنته تلعب نفسها منه وتستحي وبنته صغيره تخجل
حط ايده على خده
- انت اول شخص احكم عليه غلط
ولو مو دوم النظرة على الشخص تطلع صح
- انت دومك ظالمني مدري ليش تكرهني
- ما اكرهج !
بس بسبب الماضي
-ماضي !
ليش انه شنو مسوية
زواجي جان حلال
- بالسر و التخفي و المؤقت هذا عندي ما تحذو بهيج مجال الا المستبيعه
شر..
سكت مكملها
بكسرة روح رديت
-رحم الله والديك شكول شكول يعني
ابتسمت بسمه تخفي وراها فيض من الدموع المتماسك
- الضروف تضعف ويمكن لو توفرت ضروف افضل من الي مريتها بيها مكان صار الي صارلك
الخلاصه اكتشفت اني غلط وباسم الصح
-باسم!
شكال عني بعد
ارتعدت من جاب طاريه
-باسم كال الي بيوم انت ابسط من اتكوني كيادة لعوب واني ما صدكته
شيكول هذا يمدح لو يذم مفهمت ؟
- انت ابسط و مثل ما يكولون اهلنا فطيره
الي تكعد بنص الشارع تبجي شكول عنها بس
انهمرت دموعي مدري ليش حسيته يضحك عليه
-انه ام دميعه
-اش منا ناس
اكلج شغله يمكن ترأفي بيه و ترحميني من ذنبج الي شلته
باوعت اله مطالبته يكمل كلامه يريح هو اوكسجين يدفي الرية
- اني عمي ما فارك احلامي
مثل الي وكعت على وجهي و نكسرلي خشمي من جاب طاري فايز
- فاركني من اليوم الي دخلتج للبيت وظليتي ويانه ومن يوم خلافي ويه باسم وهاي الشغله الي سويتها هو ملازمني أحلامي
- الله يرحمة
- الله يخليج كافي كره وضغينه
-شنو يعني ضغينه؟
- يعني لا اشيلين عليه حقد وعن نفسي ف والله صرت اشوفج شي ثاني
-ششوفني
كلتها بندفاع مثل الطالب الي يريد يعرف نتيجه امتحانه النهائية
- شفت بيج الشهامة و الطيبة طيبة اهلنا اهل قبل ،،، حسيت عباتج مثل عباة امي !
مفهمت كلامه امه مجانت تلبس عباية !
شنو قصده يربي
- اريد تعتبريتي اخ او عم للطفل
وتنسين الي صار ونرجع اهل مثل قبل
-ما اكدر
صدك ما اكدر انسى تشهيرة بيه
- ما اكدر ارجع اتواصل وياكم مثل قبل بعد ما انشهرت بينكم ، اي والله من شفت ابوك قبل يومين جنت مستحية منه ما ادري اشلون هيج سويت وفضحت روحي من كلت الك نعقد
حطيت ايدي على جبيني
تنهد اظنه هو هم ضاج
- على اقلها علي لا تمنعيه عنا وخليج بعيده والج كل الاحترام منا
باوعت اله
-اها لخاطر علي يعني هالكعدة
سحبت نفسي
- من يكبر هو يلفي يمكم هسة بعده طفل
- هذي الكعدة مو لخاطر علي
كان يرفع بحاجبة من يحجي واني كالعاده منتبه لاقل تفصيلة بيه
- هاي الكعده حتى اعتذر منج واحلف الج ندمان اهواي على بعض التصرفات
مرات الواحد يغلب يثمن الناس
احتاريت شرد عليه
- اي والله انه مو مو خوش مرة بس بعد الدنيا فرت بيه
- ربج كريم ، دعيتي اهنا
كان يباوع لباب الصحن الشريف
ابتسمت . انوب ضحكت
لان ابو الكرامات كاظم الغيظ ما نخاه احد. وما بجاه عند ربه حصل مراده بالايد دعيت ما يجرحني، هو خلاه يداويني بكلامه العذب
انوب ضحكت على غبائي ناسيه ادعي اي شي ثاني الي !
يكولون دعوة المريض مستجابة
كلت اله
-اروح ادعي نسيت
عدلت عباتي و مشيت ابسرعه التفتت عليه
شفته يضحك
انتبهت لروحي لازمه عباتي شايله ذيولها وامشي
يا اتخبلت انه انت دودهتني يالنعماني
____________________
أدم
لاحظت شي بهذي المرة هو هي تشبهني!
رغم كل الخدوش الداخلية البيها مازالت تضحك وتُضحِك ، تواسي
تساعد ، تهتم واتسوي وتبذل اهواي مجهود للي حواليها مراعية مشاعر الكل وتحوي العائلة مالتها
الفرق بينا اني حذر حيل لا احد ينتبه بالي داخلي
هي تنفجر بدموعها وقت الشكوى والاحتياج اعتقد هي الصح!
زورتها وريحت بالها اتوقع هي حيل تتأثر برأيي ، حسيت انهيارها السابق كنت وحدي المسبب اله
رجعنا بالطريق واني مرتاح نفسيا ،
نرجع للصدك مواقفها الي غيرتني لأن الانسان موقف !
"رفضها لباسم (خلاها اهواي تكبر بعيني )
"مساعدتها لوالدي وهي عازله مقاطعتنا كبرتها اكبر بنظري
عدها رأفه بالناس
ذكرتني بمدح امي الها من كالت هاي المرة معدنها اصيل
امي باخر فترة اتمرضت
،
، اخ تذكرت هالمقداد الزعلان وتارك البيت هو جان بتفرة دوامي اخليه بالبيت يم الوالد لأنه ترك الدراسه بعد فشل بيها وفاشل من كل النواحي ، مجرد ردته يشتغل اتعارك وياي وترك البيت قلد اخوه وراح كعد يم باسم
واتفرقنا وصرنا كل واحد بمكان واشتت شملنا هذا حيل يحز بنفسي وعزة عليه حيل روحي اخواني الصغار
ثاروة عليه لاني بس اريد اصلح تصرفاتهم
رجعت للبيت ، نزلت هي
شفتها اتباوع عليه وابتسمت واكفه يم باب بيتها
-قفلي الباب عدل عليكم
- في امان الله
-الله وياج
اول ما دخلت اتلكتني رضوى بالهول
- تقبل الله استاذ
-منا ومنج !؟
غمزت الها متسأل بعيوني اشمدريها ؟
جاوبت بسؤال
- اي واذنك بأذنها اتسولف وياها بالله منيه هاي لا تكون ست اسراء !
(مدرسة رياضيات ومو وياي بغير دوام ومع هذا تغار منها رضوى)
- لا
بلعت ريكي وسألت
-شنو حاطه مراقبين عليه ؟!
كلتها بشقة واني اصعد وهي ورايه
دخلت للغرفة الا ردت
-فراس شافك ويه وحده ادم لا اجنني
-اها هيج يعني كولي من البداية
ابتسمت ولأول مرة احاول اراوغ الموقف كله ضدي اشلون اقنعها الي وياها جنت ماعندي شي وياها !
سألت
-منيه ادم
اذا كلت الها انسام ! الموقف راح يزداد سوء مو بعيد اليوم يحترك البيت علينا
جاوبت واني اخلع قميصي
-خلي الرقيب يكول الج
-ادم لا اجنني اكثر تعرف بفراس يشتغل بالحضره ، منيه الي كاعده وياك اهناك
غمضت اعيوني مستأة على هذا الحظ ناسي تماما زوج اختها اهناك يشتغل
شكول الها هسة
- وحده اقاربي وسلمت عليها و كعدنا اشوية
-ومنو هي هذي قريبتك
-رضوى جوعان
راح اسبح اطلع الكه الغده جاهز
شردت من يمها متهرب من الاجابة دخلت جوة الدوش
فتحت عليه الباب
-ادم لا تخبلني رجائا اعترف ويامن جنت وليش هيج دا تتهرب انت عندك شي
اشرت عليه
تحت الماي و جهي جاي ينغسل مع بقية اجزاء جسدي
-ما اسمع صوت الماي
انطيتها ضهري كاتم الضحكه اني بورطه كبيرة هذي الغيورة مراح اخلص منها اليوم الا تقررني
اجتي يمي ولزمت الكاك حركني من شغلت الحار طلعت من جواه ملتسع
- ايا مجنونه
-احجي
- رضوى اطلعي برة اكمل حمامي واطلع احجي هسة تعبان
صاحت
-ادم احجي
حضنتها وبللتها وصامد اتراوغ وياها
- هدني
-نسبح سوة تعالي
-هدني ادم
اضرب بصدري
ما استسلمت بستها على رقبتها خليتها تخضع وتهدأ
،
طلعنا من الحمام سويا
لافه نفسها بالبرنص واني كملت لبس بسيت بيتي
-اي منيه قريبتك هاي
ادم انت وعدتني بالحمام
ذكرتني قبل كم دقيقه وعدتها من كانت بين احضاني
- انسام
شفتها صدفه و .......
انصدمت بردة فعلها العنيفه بايدها جرت ميز المراية مالتها كله و دفعته لكدام كله وكع هو ومحتواه واتناثرت زجاجات المراية حوالنا !
صحت
- شنو هذا الخبال
ليش هيج كسرتيها خربتي الغرفه كلها
- شعندك ويه انسام شنو جنتو اتعقدون ،
وكفت كدامي وحطت وجها كدام وجهي
-متعة لو دائمي
عكفت اديها على صدرها
دفعتها مرجعها للخلف
- ثمني كلامج
خزرتها ورحت يم الميز رفعته واني احجي عليها
- مرة مو صاحية همزين الولد يم عمته (سمر) كان اخترع
-احجي شسوي وياها
- انزل اخلي سمر اصبلي غده ، اصعد الكه الغرفه مابيها ولا قطعه زجاج
حرامات الغرفه خربت الميز خرب من جنانك ، وهذا مكياجج الي دافع بيه نص راتبي والله خسارة بيج دينار
- ادم
نزلت اتغده بالهول ونزلت رضوى كدامي حاطه ربطه على راسها
-وين طالعه
- اربي هالخرابه البيوت
رحت الها لزمتها من ايدها مرجعها
-عوفني ادم
جريتها جر كدام سمر مصعدها لفوك ادفع وازجر بيها
-امشي كدامي
صحت بيها خافت وكملت الدرج
دخلتها للغرفة
- قسما بالله اذا رحتي لأنسام ليلة ما تبقين يمي ترحين يم اهلج
شهكت
-اي اي المرة هاي ما اتلوفين عليها عراكه لا والي خلقج ما اباوع لوجهج مرة ثانيه
- ادم ؟هذا الي الكلام ، جننتي شسوي وياها !
شفتها لانت بالكلام
- اخذتها للكاظم اني ، شفتها صدفه وزورتها
المرة مريضه واحنه اذيناها اهواي
اني
الي اتهجمت عليه من غير ادنى ذنب لا تعيدين الي صار وياها رجائا
- عادي تطلع وحدك وياها؟
-كدامج طفل لو ولد مراهق !
ردت اكعد تعبان منها على كرسي المراية
وحطيت ايدي سند مدري اكو جزء من المرايا واكع ايدي صار يجري الدم منها من باطن كفي نبتت بيه
شهكت رضوى واجتني راكعه طلعتها وتبجي هي اصلا اول ما صحت عليها بجت
-دم حبيبي
دم يروحي
بهدوء
- اعصابج حبيبي ماكو شي
-دم دم شماكو
بست جبينها
-كومي جيبي كطن وديتول
حطيت كفي جوة كفي المدمي لا يعدم الارض ورحت اغسل وهي جابت ضماد ورجعت ، ضمدتها
اثنينا كعدنا على الارض
رضوى
- ما شفتها من نضفت الغرفه
باست ايدي بعد ما لفتها باحكام بالفاف
وحطتها على قلبها
- جعلها بيه ولا بيك
اباوع للميز
- بالله الغرفه خربت
- شوف هسة نغير الميز ما اريده اجيب مرايا كبيرة
-حقج ما دافعه بيها
باستني تراضي
- دوخري وخري خل انام تعبان اليوم جدولي مملي جان
وقبل لا انام الا اسولف الها وسولفت الها مقابلتي ويه انسام
واني اريد اغفي
- اذا رحتي الها
افك التقسيم واجيبها يمج
هددتها وغفيت بعد ما حسيت بالدنيا
،
لاحظت اختي ما مرتاحه ودومها ضايجه أسالها اتكول الي مابيه شي !
وسويت لوالدتي ثوابي واصريت على ام بيتي تعزم البيت الي ابصفنا
رسلت سمر عزمتهم واصرت عليها.
دخلت علينا المغرب ويه الاذان هي و ابنها الي حسه ملى البيت
يصيح الي عمو
ولعمه بابا
امه كاعده على صفحه وساكته ومدنكه على تليفونها
واختها اسولف ويه سمر
-بنات روحن عاونن رضوى
كامن من كلت الهن
ودخلت علينا رضوى توها وسلمت على انسام واني متحذر منها
- تقبل الله انسام
مثل التفأجات انسام وباوعت الي
رضوى
-ادم كالي رحتو زرتو
دعيتي الي مو ؟
ردت انسام ببتسامه
- بكل خير
ابوية همس الي
-يبعد ابوك اشبيهن هالنسوان وحده اتريد تاكل الثانية
ابتسمت متخوف من مرتي
بس اني اريد اكسر الحاجز لخاطر ننسى الفات و الولد ما تأثر بيه الخلافات ويبتعد عنا فعزمتهم
كعدت يمي رضوى والقنفه مكفت حطيت رجل على رجل حتى اسوي الها مجال
انسام
- بعد اذنك ادم اريد اخذ صورة فايز الي بالاستقبال ،
ماعندي اله صورة واريد ابنه يعرفه
- الله يرحمه
انشالله بس هاي غاليه عليه حسوي الج كوبي
منها
- مشكورة ما تقصر
رضوى بس تتنهد
وهمست الي
- معيدية لابسه حجاب رصاصي وهي سمرة
- لايك الها لا ترة
خزرتني ما كملت
رضوى
- ما لايك الها اي شي تلبس يكلب
لان سمرة
ابوية شاركنا
-السمر حلوين ومن الله بيهم ملوحه
اثاري سمعنا لان كاعد يمي
وانسام كدامنا باوعت علينا ما تدري لب موضوعنا عليها
انسام
- اي عمي هذا علاوي ينكرط كرط
ابوي
- بس لو ماخذ ملامحج جان صار احلى
خجلت المرة وابوي داس بيها علن محاسنها
رصعت حنجها اسنونها وصعد لعيونها
خله اعيونها بالارض
ورضوى كالت معترضة
-عمي اشوفك منحاز للسمر
- فاهين مابيكم ملح
ابوية ما يطيق رضوى عرفته اشتغل شغل العمه والجنه !
فزت رضوى ضجرة
- اروح للبنات اشوفهن كملن مقبلات
____________________________
انسام
تكررت نفس القصه جنت اسمع اصياح الاب
يا اهل الرحم تعالو
باسم
ادم
مقداد
ام ادم
وبعدين تحول ندائة الى صياح واني مستحية اندار ذيج المرة حيل خجلت منه
حجيت ويه رضوى من بالارضي
طلعت
تتصل بولده باسم ومقداد واحد بالدوام والثاني مقداد ما يرد منا طكت روحي واني اسمع صوت ابو ادم من بيتهم جاي لأنا بالاصل بيت واحد ، كام يبجي بصوت لان صارلة ساعه واني اخجل ذيج المرة كعدته وفلتت و احتاريت بيه بس هسة مرد گلبي
طلعت واني اكول اشوكت يكبر علي ويخلصني
دكيت الباب كومه الا طلعت رضوى اتباوع الي من فوك لجوة
- ها
- جاي لبو ادم مو الج
دخلت ، سمر بالدوام اضاهر بس رضوى بالبيت
ابني راح يركض يلعب وشفت العم ابو ادم يبجي والريحه تعط ! لابت روحي عرفته ليش يبجي
نزعت عباتي واني اتعذر واواسي
- عمي لا تبجي هسة اجي
رحت للحمام حضرت ماي دافي وجبت الكرسي المتحرك
واني اشاهد الا كدرت انقله من فراشه الى الكرسي والمنذر يلعي النفس
واخذته ورحت للحمام
واني متحرجه وهو هم مدنك وما زال يبجي
يالله ينسام مثل ابوج الرجال جبير
اتعوفيه هيج كله نجاسة منا من يجي ابنه ادم الضهر بعد اربع ساعات
عتبي على هالمقداد الي ماعنده شغل وعمل
اكيد ادم عنده حصص ومخلي تلفونه صامت
سبحته و طلعته حطيته بالهول
واني الهث وحاسه معدتي اتريد تكلب اني لهسة صحتي مو الاوليه
رحت للغرفه الي همه قسموها من الاستقبال صغيره اله
ينام بيها شلت الفراش من السرير
ونزعته وجه و اغسل كاني اغسل فراش طفل
عقمت الغرفة و هويتها وشريت السفنجه ،
وظليت انضف بالغرفه خلصت وردت اطلع من الغرفه ودخل ادم عليه وجه ما يكصه طبر يصيح لرضوى
ظل يحجي عليها ليش عايفه ابوه واصل لهيج حاله
وعرفت هي ما تتقرب اله وكالت اله ماعليها غير باكله وشربه ذيج الشغله ماعليها بيها
- ليش ما خابرتي مقداد اي واحد يجيه
- مايرد اخوك وانت هم ماترد كلت الك جيب اله حفاظات عجزة ما قبلت
اضاهر سمعها ابو ادم هو بعده بالهول ظل بصيح ويكول
-ما اريد مو طفل اني اتحفظ ، ليش يربي لهسة معيشني ليش يربي
ادم
-كلمة منج ثانية ابتلي بيج
راح اله ابنه وكعد على ركبته يتعذر منه
- حقك عليه اني قصرت لان عدنا اشراف اليوم عفت تلفوني
صامت
كسرو الي گلبي اني اخذت عباتي وطلعت وصلت للكراج واسمع ادم يصيح ورايه
التفتت لكيته يمشي الي ومرته وراه وكفت من وكف كدامي
- الي سويتي بته ما اسويه سولف الي هسة
- ما سويت شي
- شنو ما سويتي هي الي عايشه وياه ما قدرت معاناته ورحمته وانت كل يوم مكلفيج ومتعبيج و فوكاها رجال مهما يكون زحمة عليج والله خجلان منج
يربي كميه هالكلام كافي وزايد هم والله هونت عليه التعب وكسران ضهري وكلشي سويته
لخاطر هالكلمتين منك مستعده اجي يوميه اخدم ابوك بعيوني
همس گلبي طلع لبرة وكلت اله بنبرة هايمه و ناعسة
- بعيوني
رضوى خزرتني صحتني على زماني
-بعيوني عمي ابو ادم صدك جذب
لفلفت عباتي وشردت
بعد كم يوم سمعنا من سمر رجع مقداد لان باسم شال
من الايجار وراح يم خالته مرته مريضه حيل لدرجة ملازمه الفراش حملها صعب كله يم امها وهو الايام الي يقضيها بالدوام اكثر من البيت
يعني كعد يم خالته
وسمعت خالته و مرته ورطنه دخلنه بسلفه كلش كبيرة مليون بالشهر يدفع الها من راتبه
حتى يسوي بيها بيت
يعني بس الاضافه ال ٤٥٠ الف اله صارت
هاي كل اشهر وتمر من العمر
واني حافظه حبي بگلبي وقافله عليه كافي عليه مجاورته اي والله كافي عليه من اطلع ارش الباب الصبح الكاه طالع للدوام لو من يجي يرتب الحديقه كافي عليه اباوع اله من الشباك خلسه
لا رايده اخرب بيته ولا اندهه وهو مو يمي ولا شايفني يحب مرته وبيته
انه ما الوح للي ما شايفني بعد واريد احافظ على نظرته الي
بس اذا شفت خيط امل منه اكضه باثنين اديه !
يحفظه الرحمن ، لكن مو كل الي نريده يبقى كما هو عليه
كاعده بحالي لا اني داريه بالي راح يصير
دكت عليه رضوى على الارضي كالت ادم طالع وناسي تلفونه تعالي بس كعدي اني حامل مكدر اكومه
اتعجبت من عرفت بحملها مصار الها ثلاث اشهر من ولدت
بس حقها الي تعاشر ادم تنفتح نفسها للحياة وهم هي كبيرة اتخلفهم هسة وتكعد عليهم
رحت الهم كعدت الرجال ورحت اشرب ماي من برادهم
غسلت ايدي موت حر وكفت جو الدرج اباوع للترتيب ماله ياخذ العقل حيل رفوف و نشرة اضويه نازكه
نفضت ايدي بعدها بيها ماي
سمعت هرولة سريعه لانها رضوى
طبعا جانت ضهرية والبنات بالدوام
بس على وصول خاصه سلوى
- شسوين شذبيتي الله عليج
شفتج من فوك المحجر
صفنت هاي عليه؟ تحجي
- ذبيتي سحرج ؟
كلمه منها ومني وتلاغينا
انوب لزمتيني
-خل افتشج
- وخري عني
الرجال يصيح خلص شغلته
دفعتها و ضربتها بغل على وجه كف
شالت تحفيه من رف جوة الدرج وشمرته عليه
-ايا همجية ويكولون مثقفه يا سحر هذا تبليه بيه
دارت عليه واتكافشنا وهي اتكول انت مشهورة شهر بين اقارب زوجج سحارة
حتى حمواتج محد تجيج
ما جذبت ام ابرار من كالت سحارة
دخل علينا ادم وشافني اضارب ويه مرته
وكف وسطنا و فرقنا ومرته من شافته
-اه بطني بطني
انوب صياح ابوه لواحد يطلعه من التواليت فجعه
صاح برضوى اتروح لغرفتها
موتت نفسها سوت نفسها متكدر تمشي اخذها للهول كعدها وراح لبوه
طلعه اني ظليت بس اريد ابرر اله
من طلع
- ترة مرتك اتهمت....
صاح بيه اروح
-روحي هسة الله يخليج
ومرته تبجي وبس صياحات طلعت مهظومه ما صدكني
وطردني
واستاهل حيل غبيه جنت مقطوعه عنهم ومرتاحه
حتى سلام ما اسلم عليه كمت ورجعت للقطع وهو ولا اجه اتعذر مني على سوالف مرته ولو هاي جيس الروبه اكيد ملت اذنه عليه
،
بليلة ظلمه
سمعت الباب يكسر حيل يندك
عبالي بابي كعدنا مفزوعين
رحت للبرة طلعت باب بيت ادم
اسمع دك قوي واتحول رمي على الباب واصياح زلم يفجع و يهلع الروح اخذت اختي ودخلنا خايفين
الهدوء الذي يسبق العاصفة
البارحة كنت ضايجه على اهل الموصل وكلت ما اكتب بس بالليل واليوم الصبح كدرت اكتب الحمدلله
بالنسبة لليكولون وعدتينا الرومانسية وماكو
العاطفه موجوده بالاحاسيس الداخلية مو التصرفات لاني ما اخلي الحب غير شرعي بقصصي والعاطفة مو بس حضني وقبلني ! انتبهو للسطور العاطفية حب من طرف واحد وصفه اصعب الف مرة من مشهد حميمي فرقوا بين القصة العاطفية والحميمية !
والي يسألون هالجزء كم بارت ما اعرف بس هو قصير يمكن ١٠ او ١٥ او اكثر المشكله الاحداث من تترتب الا تنعرف
احبكم يا ورود الصفحة ❤❤
يتبع
ارائكم