مساء الورد
ومتباركين بحلول شهر رجب
وذكرى كتابة هذا البارت بأول خميس في رجب
١٤ مارس ، ٢٠١٩
ملاحظة مهمة جدا
هذا الجزء فقط ابطالة اثنين الي همه ادم وانسام .. اعيد باسم وسارة نزلو من دور البطولة وصارت ادوارهم ثانوية بس هم مهمة لكن عادي اذا مر بارت من غير ذكرهم هم مو ابطال مثل الجزء الاول النشر بين يوم ويوم واذا ما نشرت المعنى عندي ظرف او متعبة لكن بعدها يجيكم تعويض
.
لمحة وتذكير لأحداث الجزء الاول
ادم الاخ المسؤول عن عائلته هو مو الاكبر اخته رؤيا اكبر منه متزوجه و عنده غيرها باسم الاخ الاصغر منه انسان انفعالي يحب بت عمه وتزوجها ، و عنده فاطمه تزوجت و اخوته الصغار سمرقند و مقداد مشترك مع عمه فايز ببيت كبير بعد وفاة عمه الي متزوج اثنين نسوان ، اجت زوجة العم انسام الزوجه الثانية للبيت ودخلت عليهم وانكلبت حياتهم بعد ما ورثت من زوجها الي هو عم ادم ،
شاركت ادم بالبيت طلع من ضمن ورثها نصف البيت وصارت شريكه مع البطل ادم كونها عندها ولد من عمه وكون العم فايز ماعنده غير اثنين بنات من زوجته الأولى الي هي خالة ادم ،
سارة الي تزوجت باسم هي بنت العم فايز الي عنده املاك يعني بت عمه وبت خالته بنفس الوقت ، سارة كانت مخطوبة واتحب خطيبها بس تركها خطيبها و تزوج صديقتها وسارة رضت بباسم ابن عمها الي يحبها حب من طرف واحد بالنسبة الها زواجها تقليدي منه وبالنسبة اله اخذها عن حب سنوات .لكن اكو برود قوي من جهه سارة
اما ادم ماعنده غير نص البيت باسمه وغركان بالديون هو مدرس فيزياء و مزوج رضوى ، عمر ادم بأحداث الجزء الأول وصل لل٣٤ وزوجته من عمرة
اما انسام تزوجت العم فايز متعه وهي قبل العم متزوجه مرة دائمي وتطلقت ومرة ايضا متعه مؤقت وتفرقت عنه، واخر واحد تزوجها هو فايز عم ادم متعه وبعدها وثق زواجه دائمي بعدها واتوفى فايز بحادث وهي حامل ، بعد الولادة والعده اجت سكنت مع ادم وشاركته
وكعت بحبه رغم كره للبيئة الي اجت منها و استعارته منها بس اندمجت وياه وباخلاقه الكريمه و عروق شهامته العميقة حبته انسام بنهاية الجزء الاول
بس هو يحب زوجته اهواي
انسام عمرها بأول احداث الجزء الثاني
٣٠ ،باسم ٣٠ عام ، سارة ٢٣ ، مقداد ٢٠
سلوى ، ١٧ ،
اني ذاكرتهم بالقصه لكن للتنبيه
اعوفكم اتعيشون معاناة انسام بعد الحب
،
ليس على الحب أن يكسر الظهر، لكنه يفعل!
نفضت السجادات و دخلت للداخل واني بروحي زهك من كلشي لكيت سلوى تقرا كتاب و ابني يمها مطيته اوراق يشكك بيهم ويلعب
كلت
- لا ياكلهم
تذمرت عليهم وهمه سكتو كالعاده
سلوى من اشوفني هليام هيج تعوفلي المكان ، راحت
واني كعدت يم ابني مخنوكه ، من عزلت لليوم الغصة واكفه بصدري موس يجرح بيه كل ما ومضت ذاكرتي بوكفتي ذيج بالمطبخ مرت ايام و عزلنا البيت واني ما زلت واكفه عند ذاك اليوم ،
الماضي
تدفق الدم بين ثنايا روحي و ضاقت بيه الارض ونفسي تزاحم بالخروج والي يدخل مثل سهام تذبح ريتي يطلع على صفنة عليه و خزرة اعيونه تمنيت لو الكلمات ترجع للگلب جنت سترتها وما طلعتها ، وكعت بحبال الشيطان وز الكلمه بداخلي و طلعها وتركني اواجه الخطيئة الي حسيت نفسي سويتها على منظرة و عروقة الي تدفق الدم بيها ضاهره غضب داخلي خارج عن ارادته وضح على معالمه ، وجه على الميز ونظرة على ايده الي يفرك بطراف اصابيعه وصارت حركه اديه اقوي وسرع ، منا من توقف ونطق لسانه ،
- اعقد عليج !
- !
ياريت لو يتغاضى عن الكلمه ويسوي نفسه ما سمعها
رجف جفني يرعد يريد يمطر دموع
وخرت من كدامه ودرت ضهري عليه رجعت اشغل نفسي بأي صحن ع السلة اخذته نظيف من شدهتي وحطيته جوة الحنفية فتحتها عليه
حسيت بجرة كرسي كانه وكف
- فهمتج ماكو داعي للارتباك
حتى لو كان فقط عقد على الورق مثل مافهمت هسة ، لكن شي مو منطقي حياتي الزوجية تخرب ، الحل الافضل هو التقسيم
كالها بسهولة كأنه مو عرض زواج وانما موضوع سهل عليه تفهمه واخذه ببساطه خففت من شدة إحراجي منه
.
سولفت لسلوى معندي غيرها وانصدمت بالاول بس بعدين كالت الي شفكرتي بذيج الحظة ، احتاريت شرد عليها ، هي بذيج اللحظه اجتني حالة اندفاع قوية ابوح الي بداخلي ولحظة شجاعه بسيطه خلتني انطق هالكلمه بعدها انسحب لساني ومكدرت انطق شي ،
واتندمت مرة لخ من كلت لسلوى صارت مثل الي استصغرني ،غلط من كلت الها بس شسوي معندي احد قريب عليه غيرها !
نرجع للحاضر بعد شهر
القسمة صارت حسب المساحة الارضية الي هي ٢٥٠ متر الي و ٢٥٠ اله
يعني مساحه بيت كامل مو صغيرة حجمها ، الحمدلله لكن كونه مبني كبيت واحد صارت الخريطه مو عدله
بالمستقبل سمعتهم يكولون تغير تصميم بيتنا نعدله يقصدون بيتهم زين اني منو الي يعدل الي بيتي ! صفيت اني واختي وابني بس بالبيت محد ويانه
بالتقسيم
الهول الكبير والاستقبال الأكبر والمطبخ والدرج الي بيه غرف فوك الهم لأن الطابق الفوك والكراج الهم
واني الي الغرف و الحديقه الخلفية الكبيرة والحمام والتواليت الداخليات
الغرف عددهن مو قليل بالمقابل سطح غرفي ماخذيه غرفهم لأن اخذت غرفة زياده منهم حتى يكون التقسيم لأن غرفة البنات لازم اخذها لان الحمام بصفها ما يكدرون يسدوها عليه
هذا التقسيم ما وثقنا و فكينا الشراكه وكلمن سوة عقد لبيته وحد لا عفناه لأن مو عادل بسبب احنه ماعدنا وقت للهدم واعادة تدوير الخريطه
المهم انفصلنا !، و صرنا جوارين ،
وسمعت بادم راح يجي ولد مدري ليش كل ما ينذكر طاريه ينغزني كلبي وتوجعني معدتي !
بالعصريات دوم سمر تجينا واسمع منها الاخبار ، سلوى ارتاحت على هذي العزلة كانت تكره مقداد واذا هو بالبيت جانت تنحبس بغرفتها بعد فعلته ذيج المرة صارت تخاف منه حيل وتكره واني هم ، اكره دوم جنت من افوت من يمه يفصلني بنظراته الجريئة هذا الولد ذنب الله رسلة على هيئة بشر لهلة ،
وكفت جوة الدوش و مايه يمطر على جسمي و قطراته انتشرت على جسدي كله صارت كدامي بالمراية الكبيرة الي يم تعلاكه المناشف
كلشي حلو بيه ومتناسق صار حظيت بجسد ممشوق وخصر منحوت صرت مثل الساعه الرملية مخفية ترهلات الحمل والجلد مشدود يا جمال شكلي من خارج بس من داخل شنو اخباري !؟
هم يجي يوم احس نفسي نقية من داخل ! وحلوة بعيون الناس !
بيومها لبست وطلعت تاركه ابني يم اختي صعدت تكسي ونزلت يم الكورنيش ، امشي من غير مكان معين ولا مخططه لهاي الطلعه بس اريد اعرف ليش بداخلي شي مختنك ومهمش ،
شريد اني ؟
ليش ما مرتاحه ؟
شريد
افلوس ؟
طفل ؟
جمال ؟
كلهن عندي شريد ليش مجاي اتهنى بيهم
اتمشيت اهواي وحسيت بقيمه شبابي من مشيت غير تعب و ارهاق ، دخلت لمحل اشتريت لنفسي ثوب ولاختي قميص ،
و اللعبه لابني ، صعدت تكسي ومناك وكفته يم مطعم اخذت اكل جاهز ورجعت لبيتي ، ذكر موقفي هذا لسبب هو اني دحاول اطلع من الكأبه الي بيه وشنو يعني حياتي من غير رجل ، وشنو يعني ادم ياخذ عني نظرة لخ من عرضت نفسي ،بالجحيم الناس كلها واولهم ادم ! اهم شي نفسي غلطه ما راح تتكرر خلي اعيش بعدها رويحتي شباب الله يرزقني بالاحسن منه !
التفتت لبيتي غيرت الميز الحديد وجبت طباخ وكاونتر جاهز و سويت غرفة البنات سارة اخذتها سويتها مطبخ ،
هي مو بس التفاته مني لكن احاول اشغل نفسي
بيوم التوصيل اجاني بكية حمل الكاونتر كبير داير حبل وقطع يراد الها تعليك وشد
كان من الألمنيوم ، طلع من بيتهم باسم و حمل ويه العامل الكانتور دخله
و وكف وياهم من علكو ودخلني اني جوة هم كثر الله خيرة اعاني من وكفتي بين العاملين ،
راحو طلعت اشوف المطبخ بعد التجديد شفت باسم بعده يعدل الي الطباخ ويحطه بمكانه
-تعبتك وياي
التفت وبشفته ابتسامه طيبه مثله
- جا بس اني مدوخج بقصصي
ضحكت البارحه مسهرني وياه اخذتنا السوالف من سارة الى امورة ومواقفه بالجيش كلها اضحك وحلوة ،
من راح ، بالليل ذكرته على العشا رنيت عليه يجي ياخذ عشاه
-هاي شنو الدلال
-دتعال اخذه هذا كدام مساعدتك الي اليوم
مو عبالك ببلاش
ضحك واجه من الباب اخذ الصينية وراح
علاقته بمرته مو خوش هليام هو من نهد ما سقطت هالبت ومعذبته
نسوان بطرانه من شغلات تافهه تخلق مشاكل
شعلي بيها الله يعقل باسم و يعوفها وياخذ وحده تريحه هاي شنو فد نمونه شايفه نفسها عليه ،
____________________
سارة
هذا الرجال صعب يفهمني اقل شي يصيح ويكبر الامور حيل تعبني ومفضوح ابسرعه البيت كله يدري بينا متعاركين بسبب اصياحه وياي من نتخالف على فد شي ، وبعد الاسقاط احسة صار ما يتحمل مني تصرف واقل شي يحسبه تكبر عليه و دوم يعريني اني مستغله حبه ،هذا مختصر لعلاقتنا الان التفصيل ممل جدا هي صارت عبارة عن مناكرة وحتى بصلحنا ما مرتاحه وياه مواضيعه مملة كلها على جماعته ماعنده ابد موضوع خارجي جديد ينعش روحي ويجدد الطاقة الايجابيه اتجاهه
تفكيره محدود جدا بسبب هو عالمه كلش بسيط واني افكر اسافر ما قبل ، سالفه السياقه هم ما قبل ، تعين انفه بيه عن نفسي حتى بالحكومي متأكده ما يخليني واحد غوار و كلش متملك لدرجه الاختناق لا طلعه لا طبه بس لامي وهم بعد التوسل الكبير الا يخليني اروح يوم وارجع اكابل رضوى من هو بالدوام
بصراحه صرت اني اكول هنيالها على ادم انسان متفهم متطلع مريحها
،
كام من يمي وهو يتنفس بسرعه قوية و هو يكول
-قطعه ثلج انت ؟!
-شجاج ما تكولين الي مو بشر انت
كمت ضايجه من تركه الي هيج و ذب كلام قوي عليه ينعتني بالبرود
لبست روبي و كعدت على طرف السرير
عفته يحجي ساكته واباوع على الحايط ،
واسمع كلامه الجارح اخاف لا احجي وهم يكوم يصيح ،
- لو مزوج حجارة هم جانت اتحركت كلش جامده اشك بيج انت بنية
مكدر اكظم غيضي منه واني على دارية السبب هم منه
- حباب كلف نفسك واقرا اشويه عن العلاقه الزوجية
ترة مليت تاخذ ما تنطي واتريدني اتفاع...
قاعطني هم يصيح كالعاده كام سكتت لا يعلي صوته اكثر وبلكت ما طلع صوته وهم فضحني
انطيته ضهري وغمضت
على صوته يصيح عليه
-كومي ما صدكت اتروح اتنام
كمت منتفضه
-شتريد هااا شتريد
ها يا سيدي
كمت بعصبيه قوية احجي
- اتفضل شتريد بعد مو خلصنا
-احجي عدل وياي ولا اصكين اسنونج لا اكسرهن
- شو دروح
جرني بقوة
- انت اشبيج ولج احجي عدل احترمي اني زوجج
- نصي صوتك رجائا لا تفضحنا كالعاده
الاحترام يكتسب ما بنطلب
-ما انصيييه ولج شنو قصدج !
بعلو بصوته
خبلني
حطيت ايدي على اذني ما اريد اسمع اصياحه القوي
اندك الباب ،
ادم
-باسم اطلع اريدك ،
طلع وسد الباب وراه واني ابجي على سريري اسمع صوت ادم الهادئ
وباسم طغى على صوته بصياحه وهو يكول
- هاي اني عصبي من يومي قابل ما تعرفني
-مو هيج التعامل باسم اهدا
رجائا اموركم لا تطلع عن حدها منا جيران
رجع دخلي وجه ما يتفسر
- من يومك مفضوح
-اسكتي
نتر بيه و اخذ خاولي وراح للحمام ،
؛؛
امي رادت اتروح لأيران ، و فكرت اروح وياها ، وكالعادة باسم عارض
واشكد حاولت اقنعه قافل يابه اخذني انت لعد روح ويانا ما قبل ، خليت وخابرت امي اتخليه يقبل كالت لخالي وهو الي خابره طبعا هو كان بالدوام وبيومها خابرني وصاير اعصاب
-عود تردين تمشين رأيج عليه ، وحك العين واللام والياء اذا ظليتي مشتغله اعناد بيه الا ادمرج يا سارة اركزي واصرفي عدل
جان نار ما راددت
ورة اشوية اتصل وهم يغلط و يكولي بعد ماكو روحه لبيت خالج فاهمه
يربي شكايل اله خالي قابل امره
من اجاوز عليه طلعت روحي
- كافي عاد تغلط وبعدين اتكول عصبي مو بيدي والله بعد متحمل
سديت الخط بوجهه والغضب تملكني حطيت كم غيار و نزلت محد ماكو من الولد ، طلعت اخذت تكسي ورحت لبيت امي
فتحت الي الباب واتباوع وراية
- وينه زوجج
- سوي الي مجال
جنت ابجي ومبرطمه
دخلت وهي و حاطه ايدها على صدرها مخروعه
- شكو يوم ليش جايتني المغربية و وحدج هاا
كعدت على قنفه بالصاله وابجي
وامي تسأل و تستفسر واني الي بيه كافيني
عاتبتها واني اشهك
-انتي ورطتني بيه ، اني كلت الج ما توالم وياه
-لج شصار ضربج شنو سوة الج
- اتعاركنه
- اي وشصار
- عفتله البيت ما اريده بعد تعبت حيل منه بس يالله خصام و ملامه
- غير اتكول سبب العركه وشسوة الج وطلعتي
جنت منتهية مبيه احجي حجيت مختصر وامي ما اقتنعت وكعدت اتلوم بيه
-ما يصير اطلعين لج من غير علمه ما يصير
خل ارجعج مدامه بالدوام وقبل لا يحس لا تخبلين الولد اكثر وتعصبيه
ظليت ابجي وهي كعدت يمي تفهم بيه
-يوم الولد يحبج ، وإذا عصبي ماكو رجال كامل والكمال لله لا تخربين زواجج
يلا يروحي اغسلي وجهج خل ارجعج هسة قبل لا تكبر
اهنا دك تلفون امي
اني جان تلفوني مغلق غالقته ،
رغم امي ما فاتحه مايك بس صوت اصياحه وصلني وهو يكول
-جاي جاي اربيها
سدت الخط امي وكالت
- رضوى السوسة مخابرته كايله اله طلعتج لج جايج كبرت اوووف
اهنا عظامي كامت ترجف اي خفت خوف محتضر من الموت وكانه بطريقه الي ياخذني لعالم مجهول
متوقعت ابد هيج اخاف منه اكثر من ما احبه !
من سوء حظي وصل ابسرعه اضاهر جان بمركز المدينه بواجب مو بالسرية
وعرفته هو لأن دكه للباب بخبال خليت و طفرت لغرفه امي قفلتها عليه
اسمع صوته بوسط المشتمل
- وينهاااااااااا
صياحه خله اضلوعي ترجف
واهتزت اوصالي
صوت امي ماكو صوته مغطي عليه
- اطلعي سارة اطلعي
وصار يدك على باب الغرفه وامي تتوسله يهدأ
وتكلي يوم افتحي الباب لا تعصبيه افتحي
والله ولا افتح بذيج اللحظه اتمنيت الحايط ينفتح واطلع منه شارده من هالغضب الي ورة الباب !
شسوي ياربي شسوي كام يضرب بالباب حيل ،
اهنا سمعت صوت الامان ! رجع گلبي ارتوة بدمه و ركدت دگاته المهتزة من ادم وصل وسحبه من الباب امي خابرته من سمعت عياط باسم بالتلفون و اجانه سحب اخوه الي ما زال يصيح بس ابتعد عن الباب
- ما اكتلها بس خل تطلع
ولج اطلعي
سارة اطلعي
جان صوته يلهث ومتحول لنبرة ثانيه منهارة كلش
امي
-من احتركت ايران والله يخاله كلت لخالك بس يكلك ابنه يروح ويانه امان
يقنعك
لو ادري هيج يصير ولا حجيت
باسم
- خل بتج تطلع
ادم
- جيبي اله ماي
لك كافي نفسك انكطع
- خل تطلع
- تطلع بس اهدأ
اندك الباب برفق
ادم
-افتحي بابا دفتحي شسويتي
فتحت واني مخلوسه لا ورة اخوه واكفلي
لازمه الباب وبس راسي مطلعته
وجهي مغسول دموع
- هاي سواية اطلعين من البيت وحدج بهذا الوقت الاغبر
خل ادخل
اهنا اجه باسم وشافني
ردت اسد الباب ملحكت اجاوز اخوه ودفع الباب موكعني حيل على ضهري
ادخل ادم لازمه عني واني كعدت مقرفصه خايفه من الضربه الي متيقنه احصلها من عاصفته
لكنه
كال
- شايفتني هيج ! ولج كلبه يا يوم اني ماد ايدي عليج ؟ مكسر اديه بالحايط من افقد حتى ما اكسرج بيها !
جان صوته بيه بحه قوية كانه يريد يبجي
- مو رجال حاسبتني اطلعين وحدج
انت هدني الثاني
وخر ادم عنه جان حاط اديه جوة ابط
باسم ولازمه عني ،
اشرلي واعيونه تلمع وتلالي كانها على حافة الغرك !
-حمضي اهنا
كالها وهو يرفع راسه مكابر
- سفي وديحي وين ما تردين ما اريدج بعد !
طلع من الغرفه وادم باوع عليه وهو عاض شفته السفليه بقلة صبر وطلع وراه
-وين رايح بسومي اوليدي يخاله تعال يبنيي
لك ادم كله سارة طايشه تعالو يخاله
طلع باسم
ادم
- خاله عود بغير وقت النا تفاهم ثاني هسة خل تهدأ النفوس
من رخصتج اروح وراه اسوق اني لا يسوي النا قدر
سيارتي راح اظل يمكم
كالها واني جنت واكفه يم باب الصاله وحاطه ايدي على حلكي
__________________________
ادم
بعد الزعل دائما الرضى بين المحبين اكيد مدام بالقلب معزة وحب للشخص ،
وهي حامل مني رجعت هي من وحدها وهذا زادها تقدير داخلي لكن ظلت فجوة بينا حتى بعد التصافي ،
بعد التقسيم ارتاحيت من ملحة عم انسام ،
جنت بالدرس اليوم وجبت باسم
من بيت خالتي ، بالي هم نص وياه ونص ويه سمر ،
من البارحه لليوم ماخذه فكري كله جانت ، والبارحه سمعتها واني بالتواليت الخارجي قبل لا تودع سلوى كانت مسيرة يمنا اتكول الها
- احبه حيل بس كون الامور تطور
بينا ويتقدم الي !
هاي الكلمة ربكتني مشت بعروقي شرقيتي واجيت اطلع الزمها من ركبتها وانحرها على الي سمعته ،
طلعت لكنها كانت داخله ، تأخرت بردة فعلي بين المستوعب والا
سمر هالراكزة تراهق وتحلم لو الشغله اكبر من حلم وتعلقها بفد شخص وتتمنى يخطبها وعدها علاقة !
راح باسم لدوامه بس وصلته للبيت كال لازم اروح ، نزلت وهو صعد يسوق وراح ، شفته هدأ وطول الطريق ساكت
دخلت وشفتها كدامي بالهول
اتقربت سحبت تلفونها
-افتحي
-ها شنو ؟
-افتحي
فتحته وعلى وجها علامات الاستغراب
قلبت بيه مبيه بس مراسلات صديقات
شمرته عليها ورحت لرضوى تحجي وياها اشوفها شضامه رضوى اقترحت تراقبها ، عز عليه اطلع اسرار اختي وحتى ان كان كدام مرتي لكن هالسارة زعلت بوقت غير مناسب جنت اريدها هي الي اشوفها شسوي
مر اسبوع وسارة باسم معاند يتواصل وياها ،
وعرفت من رضوى سمر ما عدها شي بس سوالف مراهقه معجبة بصديق باسم اظن مهدي ، هم ازعجني هذا الشي هاي اشوكت كبرت وتعجب !
جنت راجع من المدرسه وصار البيت قفاه كدامي وشفت شجر الزينه طالع من الحايط و قادني شوكي لنص بيتي الثاني واجمل مكان بيه حديقتي !
قادتني رجليه للباب الرفيع الخلفي للبيت
دكيته واني بيدي ملزمتي و القلم بوسطها عدلت نظارتي واني اباوع لاعلى على نخلتي الشامخه فوك
-منو
- اني ادم
عجبتني من سمعت صوت قفل قافله الباب عليها تصرف جيد
فتحته وهي وراه واكفه
-مساء الخير
-هلا هلاخوية
- بلا زحمه ممكن طلب ولا تأخذيني عليه
- امرني
كلمتها مريحه شجعتني اكول الها
-ممكن ادخل من رخصتج بس اشوف الحديقه
مشتاق
سكتت
-اقصد حيل مفقتدها مو قصدي الترقب ولا التدخل
-يا صدك تحجي اتفضل البيت بيتك خوية
دخلت و اتعديتها المكان نساني الي بيه
اعيوني على كل شتلة زرعتها ، ورة وقت الا حسيت عليها ، جانت مطيتني ضهرها واتحط شي على الطاولة ،
-هذي هي ؟
شو رفعانه اتخيلها كانت اسمن
مو مهم هسة بس شو شكيت مو هي
لانها مهتلفه دومها وهسة هندامها مرتب
جانت اتحط عصير وكليجه على الميز
-ماكو داعي لهل زحمه
- اتفضل يا زحمه هاي
كان وجه شاحب و مدنكه ما تباوع الي
غضيت نظري عنها مستغرب فضولي بشوفه لقاء بيه بعد ذاك اليوم وهي غابت عن انظاري ما شفتها تقريبا !
ورة ايام سمعت اختها اتريد اسوي عمليه لخشمها باسم كال الي وهو بالدوام ، دكيت عليهم الباب و من ورة الباب كلت الها شنو تحتاج وبيوم العمليه رافقتهم وما تركتهم ابد
يكسرون خاطري حيل وحدهم
بعد طلعت انسام ، اني ما انقطعت عنهم وجنت دوم اوصل الهم مسواك بس ما ادخل خوفا عليهم ،
وبيوم دكت عليه سلوى، اتكلي اختها مدري اشبيها تهذي ، جان الجو حيل بارد ، حطيت قبوط عليه ودكيت عليهم الباب برفقة رضوى و سمر اني دخلت وياهن وهنه راحن لغرفتها ،
دخلن وطلعن سمر كالت مصخنه كلش شو تخوف صخونتها تهذي
احتاريت شسوي ،طلبت منهن يخلني ادخل اشوفها تستوجب طبيب لو لا
دخلت جانت متلحفه و ذابين على راسها شيلة ،
كلت
- انسام اسمعيني ذ؟
- گلبي ادم وينك !!
يتبع