محد يوگف بدربي ؤلاناس الترد بيه
اليمشـي ؤياي بس ذنبي
أنسام
أدم
الله يجازي والدي خير من طلعت ريحه والدتي من البيت لليوم ما ضاحك هاي الضحكة من كل دواخلي
حتى دمعت من جدية الكلام بموضوع مو من المنطق يصير
دخلت أنسام خلت الصينية
انسام
-ضحكة الخير انشالله
مسحت دمعه ضحك و اني افرك ابهامي بخنصري
صدك جذب بوية
طلعت
رتبت كعدته و حطيت التخت الخاص بيه وحطيت عليه الصينية و شلت الصحن اوكله
-ها بوية شو ضحكت !
- بوية راح أسأل وانت جاوبني غض النظر عن الحلال والحرام الك نفس بمرت ابوك !
صفن بعيوني و استوعب الهامه الي اريد اكوله اله
كملت كلامي
- هي مستورة بمالها و بجال ابنها باجر يكبر و يظلل عليها بس كون هي تعرف تحافظ على نفسها
- غلبتني يا بعد ابوك ، اذا انت اشوف فايز الله يرحمه بمقام ابوك شكدر احجي بعد
-يابة مقامك محفوظ انت وعمي فايز اعتبركم واحد
اكل خاشوكتين وكال
-بس اكلها طيب هالمرة ردتك تاخذها حتى اظل تطبخ النا مجبرة
حطيت خاشوكه بحلكه وكال وهو يبلع التمن
-مرتك نفسها مو طيب
واشر بأيده
ضحكني
-ترة اخلي سارة تطبخ الك
-خلينا على مرتك اهون
ذاك الهتلي مرته مثله رعنه
-لا ظالمها هههههه
،
طلعت من المطبخ واسمع صياحات
بالمطبخ دخلت شفت سارة
-اي اي اديناتي
-هاي عود جاي اگلين ؟
شفت سمر تثرم زلاطه کالت
- عود تبرعت اتكلي الدجاج هي
اشمر بيه ومخليه الطاوة كابه نار صاعده
-خو اتقربي
-ما اخاف على اديناتي
-كلت لبويه ظلمتها مو رعنه
-ها عمو دوم يكول عليه هيج شمسويه اني بس انت تعرفني وتقدر مواهبي
ذبت الفخذ وختلت ورايه و گببتها
- مو رعنه خبنة حيل
هاي الصينية صفنها
والدي وكلته قبلنا واحنه وراه لانه ينعس من وكت
كعدت كدام الطاولة بالهول جبناها لأن اعدادنا قلت فتكفي الكراسي اذا نكعد كلنا بس طبعا الطاولة تختلف عن مال المطبخ ذيج ثابته
اباوع لأصناف الاكل تختلف احنه نواشف
وهمه دجاج وتشريب
سألت
- ليش ما تتوحدن
سارة
- هيج احسن لان رضوى ما اساعدنا
رضوى
-انتم الي عزلتوني
سارة
- اي لان تاخذ بس الغده والباقي علينا
رضوى اجت تحجي حجيت اني
-كافي كافي مراح تتفقن ظلن هيج
انمد كدامي صحن وبيه قطعه دجاج كنت بالفعل مشتهي
اخذته من انسام وابتسمت ممتن الها
رضوى
اخذت الصحن من غير ما تسالني وكالت عني
- ادم ياكل خفيف بالليل شكرا
بعدته عني واني اخذته ما اريد ارد المرة ما رد الكريم الا البخيل
-لا شكله مشهي
توالي الليل بعد ما رحت للمعهد ورجعت ب١١ لكيت رضوى كالعاده عروس بيوم خميس
تتلكاني بوجه مبتسم يجلي همومي
وهي تنزعني القميص
- حبيبي ترست الك الجاكوزي ماي دافي
ادخل اليف الك بايدي
بستها من جبينها
-الله يرضى عليج دائما مريحتني
الحلو برضوى دومها متجددة عدة شخصيات عدها يوم جريئة يوم بريئة يوم هادية يوم جامحه مثيره ،
مكفيتني وموفيتني بس لو ترتاح هي وما تحس بالنقص أطمان عليها حتى لو تضهر الي هي واثقه من نفسها بعض التصرفات تثبتلي العكس الغيرة الزايده و التحرج مني !
رضوى عدها تشوه بفخذها الايمن هذا الشي عرفته بعد ما حبيتها وعزمت على خطبتها ، اكذب اذا اكول ما أثر بيه و احزني ومريت بفترة تضارب بالافكار احبها وبنفس الوقت ما اتخيل الي اخذها بيها تشوه ولو بسيط ،
فترة وعدت وتعودت صار جزء مألوف واعتاديت عليه كأنه جزء منها
،
مع نزول باسم تبدأ الموسيقى والاغاني من غرفتهم لغرفتنا تتنقل
رضوى
-حلوة هيج ادم
كنا انريد نغفى
-نامي رضوى
-شنام وهاي المزعجه ما اتكول اكو ناس نايمه
- خليهم عرسان
- اوه لا لاه وامك ما دارت سنتها
-رضوى محد مصبر باسم على وفاة امي غير زواجه عوفيه يتهنى
ورجائا بطلي معارك وياها ملينا
-ما اتعارك
-البارحه سمعت مشاده بينكم
- هي وكحه
- سايسيها هي صغير وانت
-واني شنو ادم !
-انت الحكيمه كبري عقلك
،
سارة حملت ، فرحت حيل ودخلت أشعه السعاده للبيت من جديد مخترقه الحزن و شاعه خيوطها بينا
جنت متوسد يم مرتي و نباوع فلم كل اشويه ابوسها لان بالفلم البطله مريضه
دك عليه باسم يريد اجيب لمرته فراولة
- وين ولك الكه
هسة اشوفلك
اي اي تأمر سارة
وكفت الفلم و رحت لبست
- وين ادم
- اجيب لسارة فراولة
- لا والله بنساوتي ما طلعت من طلبت منك ليمون
-يوه لهسة اذكريني
كلتها واني البس بنطروني
- اي حتى اذكرك بالتفرقه ست سارة مالتكم مدللة حيل ترة
رحت افتريت بالسيارة و رحت ادور على فراولة ، كان بالحي المجاورة بقال ، اشتريت منه علبتين فراولة
وحده للغيورة مالتي والثانية لسارة
_________________________
باسم
انطرحت وكانت انفاسي سريعه
- سارة انت مرتاحه وياي
كانت ابصفي مطروحه
- اي لعد اذا ما مرتاحه اردحلك هيج
هلكتني هلك
جريت خصله من شعرها وظليت اطوي بيها بأصبعي واني ملتفت عليها بكاملي ،
- يعني اقصد العلاقه مو تمثيل!
-ها شنو لا عيني اني مو باردة
تأملتها عدل واني حاس عكس الي ضاهرته ، هي ما يوم التحقت وكالت أشتاقيت لك ؟ اخابرها صوتها مرتاح بغيابي ، اذا نزاعل اذا اني ما ابادر نظل الى ما لانهاية والى وقت غير معلوم اني او هي غلطانه لازم اني الي أبادر !، بالعلاقه اول يومين زينه من انزل و باقي الايام تجيني بضجر
وهسة انطتني ضهرها و عافتني واني صارلي ١٥ يوم غايب
-اي اي باسم بطوني يوجعني
- نامي
ادري بيها اقل نغزه بجسمها تدلل
- اي شو خواصري هم
تعالي نامي على ايدي
-ما ما ارتاح !
؛
ثاني يوم العصر اجت خالتي النا ، واخذت سارة للطبيبة مع ان سارة زينه !
انتظرتهن بالسيارة طلعن من العياده وخالتي بس تحجي على سارة
- ما اتحسبين ما اتكولين اني مرة مزوجه
-شكو خاله
- هي اتكلك
كعدت يمي ومبتسمه وعاضه اصبعها
ام ابرار
-تتمركص و ماذيه نفسها
-سارة اشبيج ؟
-ممممم حامل اكو انوني اهنا طلع
واشرت على بطنها
وكفت السيارة منشده البال والهورنات ورايه صارت تدك ، رجعت مشيت واباوع للطريق بفكر شارد
اني راح اصير اب ويصير عندي من ضهري طفل ، طفل من صلبي يشيل اسمي واشيلة على متني !،
-لك باسم فرجت
كلتها واني اباوع لسارة واضحك وهي تضحك وصلتها للبيت
-على كيفج ولج
-لا تكول ولج
نزلت وهي معترضه
خالتي
- الحمدلله ما تأخرت
دخلنا و رحت بشرت والدي
ورجعت الهن بالهول
امرتها
-اصعدي سارة ارتاحي يلا
-ما بيه باسم بعدين اتخيلت ردة فعلك غير ، اشيلني و اتوديني للغرفه واتكول مش حتتحركي مرة تانيه يا مراتي مثل المصريين
كعدت على القنفه و عندت اتكوم
امها
كالت
-الله يكون بعون ابنج ، دكومي كومي بدلي
-ماما لا ترحين حبابا
- لا ما اروح اليوم
- اي
وراحت تصعد واني يم خالتي بعدني و
سمعناها تهرول بالدرج
رحت وراها
-على كيف ام سلعوم
-اسكت عضوم
،
بالليل كاعده وتدلل عليه
- شنو راح اجيب هدية الي
- شتردين
- اريد مممم اريد اروح ل
-ماكو طلعه منا من اصيرين شهرين ما اريد حملج يتأثر
-ممم انزين حبيبي شتريده يطلع بنوته لو ولد
-اكيد ولد
-ياا
فزت وكعدتلي مربعه
- انت صدمتني بردة فعلك عبالي راح من ابشرك تحضني بالسيارة
-شحضن بالشارع !
-عبالي راح اجيب الي هدية وهم ماكو
-قابل اشتغلتي وحدج وحبلتي ماليش الهدية
-وعبالي اتكول اريد بنوته اشبهج مثل الافلام وهم ماكو
- ههههه اريد ولد واربي اطلعه سبع
-قصدك شقاوة مثلك ، عاد شكله شبهني لو لا
-بيد الله
-ويكول اني حب عمره
انطرحت النومه مال الزعلانين
مطيتني ضهرها
حاوطت خصرها وحطيت ايدي على بطنها
-اني ابو ابنج !
بست علابيتها
- أجزائنا مختلطه ببعض وراح تنتج كائن
سبحان الله اشلون هيج يصير ما ادري
-باسم اذا اجه الطفل راح اتحبه اكثر مني مو
- احبه من محبتي الج !
التحقت ومرن ١٠ ايام على غيابي
خابرتني الساعه ب ١٠ ونص بالليل بصوتها المدلل المطلي بذهب الأنوثة
-حبيبي اريد فراولة
- ههههه حبيبج واكف بالسيطرة
-ما ما راح احوك ترا
- انعل ابو المشتهى مالتج ريتج تشتهيني هيج مثل الفراولة هاى!
ضحكت الخبيثه شعلت جدي بشوگي الها
- وحك العين واللام والياء اذا ضحكتي مرة ثانية اقدم استقاله هسة واجيج اشبعج فراولة
- بسومتي حب عمري اريد فراولة والله بنفسي
- شنو ولج شنووو حب عمرج وكولي وعلي اني حب عمرچ !
كولي و محمد و الصحابة ولج احجي
كانها سكتت ندم لو شنو
- حبيبي انت من جنت طفلة بس اني ما ادري ههههه هسة اشلون اتحلي مشكلتي مثل ما جنت اتحل الي كل شي وتتعارك ويه اولاد عمامي
لو لا
- ابشري
خابرتني ورة ساعه
-ياي انت احلى زوج شفته بحياتي
-ليش ولج جم مرة ازوجتي
- هههههههههه عشرة وكلهم انت
نزلت مجاز و
التحقت ورة فترة ، واتخابرني انسام اتكلي خبر يسطرني سطر !
________________________
أنسام
ما فادت شكاويي لعمي ابو ادم دوم المح اله اني مضغوطه بسبب عمي الي ياخذ مني اختي
وهم خايفه على مال علي من الطماعين وخايفه على نفسي من الناس وحجيهم لان كاعده يمهم ، اصلا ما اختلط بناس ولا اسمع حجي ناس بس هي كلها تلميحات لشي وهو محتاجه سند ، حاولت المح اله باكثر من مرة وما اعتقد فهمني وفكر يزوجني لابنه ويحافظ عليه
خالتي خابرت تتوسل اتكول كمت اجدي الله عليج ساعديني اضاهر خالص وقت زواجها ومسربته بالشوارع
سديت الخط بوجهه
سلوى اكو شي تخفيه عني ولازم اعرفه مرة سمعتها تحجي بالصدفه واني اريد ادخل لغرفتها ويه صديقتها اتكول ، الحب يأذي حيل اذا من طرف واحد
من دخلت ابسرعه غيرت السالفه !
،،
بيوم سمعنا خبر حمل سارة اذا كانت دلوعه قراط هسة صارت ٢٤ قراط من راح اول اجازة اله بعد الحمل وداها لأمها ورجعها من نزل مجاز و من التحق اجت امها يمها لان سمر اعترضت اتريد هم لو اتروح ويه سارة لو خالتها تجي حيل تحبها وشافت هوستنا و تعاينا على الطبخ كامت تطبخ هي وهي تأمر البنات يشتغلن بصورة عامه ما يظلن يعاينن بعض وامرت رضوى تساعد ومكدر تفتح حلكها لان ادم حيل فرحان بجيه خالته يمه وهي ابد الصراحه ما اسوي شي يغضب رجلها
بيوم جنت ابدل لأبني واسمع عياط واحترمي نفسج ما احترمي نفسج طلعت اشوف واروي فضولي لكيت رضوى وسارة
سارة
-انت غيرانه مني ترة عيب عليج
- احترمي نفسج اني محترمتج لخاطر امج
ام سارة جانت طالعه لبيت الجيران صديقتها
ام ابرار طبعا ابد ما عليها بيه بس على مود بتها وسمر اجت ، سارة الفقر الدم لازمها واتحولت ضعيفه رجعت و وجه اصفر تحتاج احد يعتني مثل الزبده اقل شي تموع
ما عرفت على شنو العركه الي انتهت بتوعد من الطرفين وحده اتكول للثانيه اني اعلمج دخلت ام ابرار على وعيدهن سكتت بتها
- لج كافي لو رجلج اهنا جان نحرج نحر ليش معليه صوتج امشي
اخذتها لغرفتها واني بس أسال بسلوى و بسمر اريد افهم ليش گبن ،
اثاري جاي مندوب لسارة وبس طالعه مستلمه منه و رضوى كالت الها ما يصير يمكن زوجج ما يقبل هذي بداية العركه تدخل من قبل رضوى .
اما
اني حيل غرت من ام ابرار مرة بعمر امي اتبين بنهاية الثلاثين من السويات الي مسويتهن سألت ابرار مراسلات اني على تواصل وياها بس مو دائم
اخذت منها اسم الطبيب الي سوة شفط دهون لامها ،
وبعد يومين رحت اله ، كالي شغلتج سهله من شاف مناطق سمنتي ، جوانبي وبطني و حتى راح يسوي الي نحت لخصري و كله بواسطه أنابيب يثقب بطني و يسحب ويشد ببطني ،
انطاني موعد الاسبوع الجاي اسوي عنده الاجرات ،
رجعت للبيت ، طلعت من غرفتي الدرج كدامي و سارة دتنزل هي سريعه بالنزلة و رضوى
واكفه على المحجر
رضوى
- الطابق يظل اذا ما رضوى تنظفه
سارة ما دارت بال جانت تقريبا بالدرجة السابعه والدرج معلق فقدت توازنها فجأة وخلفها رضوى بدرجتين واكفه و حاولت تلزم المحجر ما كدرت سارة و رضوى اتقربت راكضه اتريد تلزمها حتى لا توكع ما لحكت سارة ادربت بحركه سريعه وامها ويه هذا المشهد على الربكه لاني صحت دربالج سارة الدرج الدرج
انوب من اول درجة ما اتلاحكت نفسها لا ظلت تتدربى صارت جوه رجليه واني مخلوسه على الموقف من شفتها كدامي صارت الا انفتح جمودي و دنكت عليها ،شفت ام ابرار بس مدنكه رافعه راسها واصيح على رضوى
- دفعتيها دفعتي البنية شفتج
-لا لا اني شعليه
ظلت اصيح الام من شافت البنت تنزف و روحها مفرفرة مفتحه بس تتوجع بوهن عبالها رضوى نفذت تهديدها
خابرنا ادم بالمعهد ينطي محاضرات
رضوى
-اشبيج والله جنت اريد اساعدها
ام ابرار بس تبجي كامت
اني وخرت الام عن البنت و شلتها شيل و وديتها بالهول على الارض نيمتها وكفي صار كله دم !
على ما اجانه ادم من المعهد لأنها سارة مغمى عليها من النزف ،
اتلكته الام مفزوعه واتكول اله شفت مرتك اتوكعها
ماكو عداوة مسبقه بين الام و رضوى
حتى تتبلى عليها
سالني وهو بقمه غضبه
جاوبت
- جوتني ومحد صدكني اشمدريني
اجته
رضوى
- خالتك كذابه
ضربها على خدها واتهسترحيل اخذ سارة الي مغمى عليها هو وامها واني خابرت باسم ،
كلت اله ظل يكفر و يصيح وسده بوجهي من عرف ابنه صار بيه شي ، طلعت لبرة شفت رضوى بالهول كاعده وتبجي
اتقربت عليها واني لازمه خاصرة وحده وكلت
بتشفي و شماته
-شفتي يا رضوى اشلون الله جازاج
باوعت الي من بين ادموعها المغمورة
-والله يا انسام مالي علاقه والمصحف ما اجهضتها
- هذا الكلام اقنعي بيه باسم هسة بطريقه من المعسكر للبيت
-منو كله
-انه كلت اله !
ظلت تشهك و اتلمست خدها الاحمر وحسيت بشهكاتها زادت من اتلمست علامات ضربه ادم الها
- شفتي الافترى شنو سوى بيج
ضحكت واني اذكر خالتي ونهايتها وهسة رضوى الله ياخذلي بحوبتي من غير ما اسعى
صاحت وراية
- بس انت شاهده وشفتي ما سويت شي اني
-انه ما شفت شي هههههه
وادعي الله بس نزيف مو اجهاض شخلصج من امها
-حرام عليج هيج اتبليتي عليه
ما تخافين من ربج
اتقربت عليها
-وانت ما خفتي من ربج من حركتيني
صيحت بحركه وفاقده كل خيط عصبي براسي
-ضوكي نار الغبن والظلم وجربيها ليوم مو اني عشت عمري كله مصكعه و مغبونه و انام ليلي
بحركه كبرتني الف سنة وانت مثل الخ ....ة
عايشه عيشه احلم جنت بربعها و ما راضية
نصيت صوتي وحاولت انطق واكمل كلامي واخفف من حركه گلبي لان تعبت وكمت الهث
-جذب الي سماج رضوى
نتصل بيهم محد يردعلينا
باسم ما اجه ، لليل الا سمعنا صوت سيارات دخلت وحده ورة اللخ للبيت
طلعنا للحديقه عدا رضوى ما طلعت ،
نزل ادم و باسم و طلع سارة منها شالها شيل باسم وبيدها كانونه و مغمضه بوجه شاحب كانها جثة ، نيموها بغرفة سمر
باسم عاف مرته وصعد فوك لغرفته وامها يمها انه جنت مسوية شوربة صبيت الهم عشى دزيته بيد سمر للام وسارة ،
ورحت اريد اخذ تلفوني من الهول وبيدي صحن زبيب وادخل لغرفتي واشوفلك ادم حاضن وجه مرته بأثنين اديه
- سامحيني ،
وابسرعه حط راسها على صدرة
الصحن اجه يوكع من ايدي و استنزف طاقتي هالمشهد شافني ادم ما وخر راسها ، خلاها ومشى بيها من يمي خطفو و صعدو لغرفتهم هي كانت بس تبكي بصمت كانها راضيه
ثاني يوم فهمت سارة كايله الهم وهمه اهناك رضوى رادت تلزمني مو توكعني
وباسم مخابرهم ورايح الهم للدكتورة مالتها والنزيف كان اسقاط خسرت طفلها سارة والله يعوضهم خير
من شفت الباب انفتح من دخل عليها رجلها
اني دخلت اتحمد الها ع السلامه من
لكيته هو واكف ويلوم بيها
- اتركضين ركض ولاجن ببطنج طفل طيحتيه
اخذي راحتج هسة واركضي وما اوصيج
-انت كلشي اتلومني
كالتها وبجت امها غمزت لباسم يسكت
سكت و طلع واني اتحمدت الها
-حمدلله على سلامتج ساره
لا تبجين بعدج صغيره الله يعوضج بغيره يمعوده
جاوبتني بحركة أشفايفها صوتها مخنوك من البجي بسبب الملامه
رحت للحديقه ورة باسم اواسيه
-خوية شجاك گبيت على المرة قابل بيدها هذا امر ربك
- هي كلش ما مهتمه تركض دومها كلت الها انزلج جوة ما قبلت لازكه بالغرفه الفوك
جان يلبس ببسطاله ويحجي
- لا والله امر ربك خلاها تزلك وتوكع لان ماقاسم الكم هذا الطفل لا هي الها علاقه ولا صعدت الدرج لو يريد يدوم والله يجي لو هسة الدنيا تنكلب نسيت اني اشلون جانت ولادتي وجبت وجبت واجه للدنيا
لا تضوجها خطية
رفع نفسه من خلص و ظل يتأفأف طالعه روحه
- هسة اني اريد الي يواسيني ، خليني من ابرد واراضيها .
نار بيه هسة اذا اشوفها ارجع اعصب
- هاي عين وصابتك
-على شنو بالله
-يا وشنو الي بيك ما تنحسد عليه شاب وجمال واخلاق واجه يجيك طفل صابتك عين
- لا والله الفكر لازك بيه
- هو انت الا تزوج سلعوم جان اخذتلك وحده مجنه
- شنو هي سيارة ومجنه هههههههه
ضحك بذبول
ودعته وراح لدوامه رجع ،
ظليت دوم اخابره بهاي الفترة احسه حيل جازع ، و مرته راحت ويه امها
و بعدله بس اسبوع ويرجع خابرني كالي متعاركين اني الشاهد الله ابد ما احيله عليها لانها يتيمه و بس السان ما عليه بيها بالعكس اهديه عليها هو عصبي وهي ند اله مو تعدي لا حالها من حاله اترادد ما فاهمه الدنيا صح ،
بيوم جنت انظف الصبح صاحلي ادم !
عفت المطبخ ورحت اله للهول جان علي يلعب وابوه يمنا كعدت واني گلبي كل دگه بيه تعادل عشر دكات بقوتها غزال ما يركض هيج مثل نبضي
راح يخطبني ؟،
هو راح لعلي اخذ منه قلمه لا يشخبط
،
شرايد الافكار تضاربت ويه بعضها و بودي ادخل بعقله هسة و اعرف مقدما
كعد كدامي وكال
-أنسام اريد اسالج سؤال بس أترجاج اتجاوبي وياي هاي مسألة حرام وحلال
- اي موافقه !!
صفن بوجهي وسأل
-نعم !
- نعم ؟؟
اقصد هو انت شرايد تسأل
الاب تكلم
- بنيتي فايز الله يرحمه يطلب ابني افلوس ولازم حقكم يجيكم ابني ما يريد ياكل حرام ،
وكعت من الغيمه على ارض الواقع بس كانت حيل صلبه لدرجة هشمت اضلعي و نبتت عضامي بقلبي من كثر الخيبات ، حسيت وجهي صار يتقلب الوان وشفتي وحدها عبست ووكفت على حافه البكاء .
هذا كله وادم يباوع لوجهي و يحك بشعره بحيرة
- انسام الكمبيالات يمج ؟
لو عمي متخلص منهن
سكتت مكدرت ارد صوتي احسه راح يطلع بيه بحه
هم خيب ظني وهم عباله ضامتهن عليه ،
تماسكت شجني وكلت
- لا مو عندي جان طالبت بحقي منك
كلتها بنتر ظامه بيه لهجة البكي
الاب كال اعصابج ابنيتي مو هيج
الحجي ينكال
وكفت وجاوبتهم
- الي اعرفه عمك جان يريد يتلفهم
وخالتك ما تقبل جانت ، مرة سمعت مكالمه بينه وبين احد خوالك ، هيج فهمت خالك امك موصيته يخابر ابوك يأثر عليه وما يخليه يتنازل الك هذا الحجي قبل لا تعرف خالتك بزواجنا.
ادم وكف يمي وسأل
-خالتي ام ابرار !
- اي باخر مرة شفته كال شي
- راح ازوج ادم لابرار وما اتروح لغريب و اتنازل لادم وافكله كل ديونه والم هالعائلة ما اخليهم يجرون طول وعرض وجان يريد يرجع مرته ، بس ما لحك
- لعد وينهن !
- ما اعرف والله أسال صديقه المقرب ترة هو الي خلاه يزوجني هذا كلشي يعرف عنه
عفتهم ورحت واني مطمورة بتراب الحسرة ضيق القبر ولا ضيق القلب
والله عشكته ومو بيدي ، يربي اخذ امانتك وخلصني والله تعبت تعبت حيل
كعدت ابجي وحدي وربي شاهد عليه ،
اعاني واني وياه بنفس البيت واخاف حيل من گربه بس والله مو شهوة ولا حبا بالزواج محبتي اله هو
وسمعت منهم يمكن الكمبيالات مبيوكه منه لان من سوة حادث جان بسيارته جنطه صغيره صحيح شتيفتها عنده الصديق كال عنها هو قبل ما يسوي حادث مخابره وكايل اله
حطيت افلوس لفلان شغله يريد يسويها ويه صديقه وتخمين من الصديق الكمبيالات بالجنطه يمكن
الصديق عباله الاهل لاكين الجنطه وناسي اصلا امرها الا من سألوه ، الافلوس الي جانن بالخزنه طلع ماخذهم واكيد وياهم كمبيالات ادم ربطا بكلامه قبل لا يتوفة من جان يريد يكعد ويه اهله كلهم ويفرض زواج ادم و ابرار
يمكن احد من الي تجمهرو عليه ضعيف النفس وباكها قبل لا تجي الشرطه ، .
المهم سويت عمليه الشفط و بس سلوى وياي برة تنتظر ماعندي غيرها ،
بالعياده عند الطبيب ، ومن خلصت لكيت ادم وياها !!
رجعوني للبيت بعد الاستراحه واني مدري شصاير لجسمي
اثاري هو من تأخرنا لرجوعنا للبيت مخابر سلوى و جايني ،
ظليت ايام بفترة نقاهه من اسبوع الأثنين الا خف الورم ،
تقريبا شهر الا حسيت بشفاء تام وتغير كبير
بهاي الفترة شفت كرم كبير من قبل ادم بأهتمامه بس من خلال سلوى دوم يوصيها شنو اسوي وشنو لا طلع على دارية و معرفه ،
لكنه القريب البعيد ، اقرب شخص لگلبي و ابعد شخص عليه ما اتلوحه ايدي ابد ،
__________________________
ادم
بعد الحوار الحاد المطول
اخذت رضوى كم قطعه غيار وراحت لهلهة لحتى تهدأ الامور بينا
نرجع للسبب قبلها بليلة وحده الا عرفت بخطبة ابن خالتها من فلتها كدامي اخوها من كنا معزومين يمهم ، من رجعنا كعدت احقق وياها واعترفت الي انخطبت وعقدت بفترة طلاقنا
هذا الشي ما ينظم ابد لكن ما اثر بيه كد سفرها وياه هو وامه مسافرين سوة للبنان هذا الشي حيل ثار جنوني فترة خطوبتهم سبع اشهر !
صارت بينا مو ثغرة وانما شي اكبر
انولد بداخلي عدم ثقه او تخوف منها
اشلون كانت اتكول كنت انتظرك وعندي امل نرجع وهي انخطبت !
حتى اني دوم ارسل كنت تلميحات بيد صديقتنا المشتركه او زميلة الدراسة على اني بس أهيئ ضروفي احاول ارجع الها وكنت ظان هي تنتظرني !
زين ليش ما صارحتني يابة اني ترة انخطبت وماصارت قسمه مو اضم عليه هيج شي مهم
بهاي الفترة ما خابرتها ارجعها حيل مجروح منها
خاف اني ناقص هم وهذا عم انسام اجه يكمل عليه هم محاجي كبير عشريتنا رافض البنات يمنا،
من اجيت من عند شيخ عشيرتنا بنفسه طلبني ورحت اله وحاجاني
رحت الها لكيتها بالمطبخ كالعاده تطبخ عشا
-انسام شغله عمج لازم افضها خل نقسم البيت واعزلي افضل حل
كلتها بمرارة واني نار تستعر بصدري وعلى عيني اقسم بيتي بس ماكو حل غيره ،
كالعاده كانت متلبسة السواد جبة وحجاب فهذا هم نبهني لموضوع
فكلت الها
-قابل اظلين طول عمرج مربطه من ورانه ومقيده الافضل العزلة
التفتت عليه حسيت بشفتها حجي يريد يطلع
- خل نكعد نتفاهم و انشوف اشلون القسمه اصير
كلتها واني اجر كرسي وكعدت كبالها
وكفت كبالي و كانت ترتعد مثل الي جاي اضربها بمعول على راسها مو احاجيها كلام !؟
- ما اريد اعزل
-عندج حل ثاني لعد ؟
- اي
-احجي شنو
ظلت ساكته و منزلة راسها
- انسام تعبت من عمج كل يوم ومفشلني كدام الناس
شنو حلج بالله
-اعقد عليه !
يتبع الى الجزء الثاني الى اللقاء زهراء العراقية
سبب التأخير تشتت ذهني ، بنات اريدكم دائما اترشحون القصه اذا نالت رضاكم كون من اجي اكتب الكه تغيير جذري بعدد المشاهدة ودمتم سالمين طيبين