مساء الورد
الصحة مكانت تمام والهامي ذابل مثل جفني اعتذر ،
سارة
كأني انغمست بمكان ما بين العالمين !
فوك رياض جنة لقاء الاحبه ما بعد الحياة !، كانت دقات قلبي مو طبول هاونات تضرب بداخلي خوفا من السقوط و صدمة بوين اني رحت ؟، زهقت روحي وصعدت لأبويا! ولو هو يمي بأي عالم اني ؟ لحظات سكنت جوارحي واني متغاضيه عن الهمسات والانفاس الحارقه الي على رقبتي جاهلة اني بقرب منو ؟
خالي
-باسم شسوي
كأن ماي حار و اتبدى عليه انصرعت مبتعده عنه وهو هم لكفني عن الدرج و وكفني وراه
دقيقة اني شسوي جنت ؟
وليش هيج لازكه بابن عمي !
القرب فضيع بعمرنا ما تقاربنا من بعض هيج اي ناهيك عن الموقف البايخ بالحديقه بس هسة احاسيس باغتتني والخجل اكتسح روحي واني اشوف خالي يباوع النا واعيونه بكصته
باسم حط اديه ببنطلونة وبكل بهدوء
-شكو خالي ما شفتها اتريد اتوكع لزمتها
ظل يخزر بباسم واني وراه كاني اتغطى بيه واستر حالي اعض باظفري الطويل متخوفة ومنحرجه مثل المذنبة
التفتت عليه باسم
-انتبهي انت ولمي الغراض وانزلي
خالي بس ابدل واجيك هسة اشبيك
هيج تباوع ما اشوفها اشلون وجهه
اصفر ارتبكت ما تعرف اخلاقي
خالي
- لاني اعرفك انصدمت والله
يالله مصار شي وانت انتبهي لنفسج
راح باسم وخالي راح يغسل واني نزلت راكضه لامي سولفت الها وهي اتعدل بالغراض من كلت الها الي كاله باسم
وكعت ساعه منضدية من ايدها
-كلج احبج يا
كعدت متفاجأة واكول امه اتكول ماكل گلبي بس يلح يريد جواب ،
- ماما استحي اطلع بعد لخالي
- ديلا ريحي الولد وخل اكله انطيك مرة
- لا ماما
-لج ليش اشلعين گلبي
-يوم افكر هسة صدوك افكر
-شتفكرين صارله كومه الولد متاني جواب
-يوم جنت رافضه هسة دكلج افكر اوي هذا زواج مو لعب
-دروحي لمشي شكو غرض اني جايبته من غراض المطبخ ، انتبهي مو مواعين بس اجهزة ، الغلاية و تحفيات المملاح التسعة و الخلاط وبعد شكو يربي
-ماااا انت اتعرفين غراضج اني مطلع بعد
بيومها خالي يتعشى يمنا الا يروح واني ظليت حبسيه غرفتي ما طلعت
مستحية وهمين ضايعه بكلشي صار ع الدرج
ريحة بابا بباسم !، اعترافه الي خلاني اشوفه بغير مراية كانه شاب جديد
وحضنه لي مو مال واحد يلزم واحد ، اني مو قطة مغمضه من تجربتي السابقة اعرف كلش زين معنى الحضن الي صار كاني مرته ، معقول كل هذا بداخلك ياباسم واني ما ادري !؟
وكفت كدام المراية
واباوع لملامح بشرتي
-زين ليش ما حسستني بيوم ؟
واشلون ردت صديقتي قبلي ؟
حبيتني هسة لو من زمان
صاحولي احرجوني
طلعت بالمطبخ لكيت امي وخالتي يحضرن العشا وامي تحجي علينا لان ما نساعد
ام ابرار
-بالله سمر عدها سادس انت شعندج ها
وهاي المسمومه انسام ما تطلع اذا اجانه خطار
اني وخالتج تعبانات واكفات على حيلنا نسوي زقنبوت
دخلت سمر اتكول جوعانه
ام ادم
-زين يمه من طلعتي من كهفج
سمر
-ماما زوجوني و لا قهر السادس اووف
غمتها امها
وكفت اگلي بدل امي وخالتي اتخوط بجدر التشريب
وسمر كعدت تاكل تصبيرة
ام ادم
-اي يمه شصار ع الدرج
اخترعت وباوعت لامي الي ما اضم سالفه
وجوهن مبتسمه وخالتي عضتلي الشفه
-احجي احجي هذا المسلعم طلع بيه بلا
سمر
-يمه شصار
خزرت سمر اني تسكت
امي كالت
- اي ابنج طلع مو هين جانت رافضه ومنشفه ريگنا ، بشسمه خلاها اتفكر
كلت لامي بعتب
-ماما
خالتي تتمضحك
عاتبت امي
-المفروض ماما اتروحين اتحاسبيه ومو اتضحكين عليه
امي
-خلي هو بس الي كدر يلين هذا الراس الناشف
سمر
-شصار حبابين احجو شنو صار ع الدرج خرب اريد اعرف
اتخصرت ودرت وجهي على سمر الي كاعد كدام الميز
-اشصار مصار اجيت اوكع من الدرج واخوج لزمني
-ها وانت لنتي من رفض الى تفكير ياي اخوي ساحر
شلت حبة تفاح وردت اشمرها عليها
اتراجعت ما هونت حرام نعمة
-ولي لج منو يسحرني اني ، وانت ماما
ماطول هيج فضحتيني ما اريده لابن اختج زين
ام ادم
-يخاله دوافقي لا يجيب الي واحده مثل هاي رضوى عايشه ويانه خطار
اريد وحده مني وبيه الي
لزمت خاصره وحده وكلت بدلال متقصده اغيض سمر الي ناصبه عليه
-اي بس اذا وافقت على ابنج اذا يعني اريد ما اطبخ ولا توكفيني اگلي و يخليني اكتل بسمر
هزت ايدها خالتي يمكن لان عفت الگلي هسة عليها
باسم
-تفداج سمر
التفت مخترعه ومصدومة هو ورايه وسمر هلكانه ضحك
على كلمته علقت سمر
- ها باسم هيج اتبيع اختك لام سلعوم
- خل توافق وبعدين شوفي شسوي بيها لاجلج
ويغمز لاخته الي كاعده نفشت ريشاتها
وامي وامه يتمضحكن واني دخلت بنص ملابسي يربي هذا داخل ويضحك وميانه كاني خطيبته واني لهسة منحرجه منه ع الي صار العصر غطيت وجهي بطرف شالي وطلعت اهرول شارده منهم
ثاني يوم رحنا لبيتنا الجديد ، كانن غرفتين و صالة مطله على مطبخ مفتوح صغير عليها و حمام وغيره ،
حسيت بوحشة وغربة كبيرة بيه و
امي ما كفت ، ضهرت وجها الاخر ،الي يضهر بالمواقف الصعبة وهو الوجه العنيد نفسه الي كانت تواجه بيه بابا من يخالفها بأمر مهم ،
كنا بالصالة كدام ميز الطعام دناكل بعد يوم متعب بالترتيب من صاحت بوجهي
-كافي دلع
جفلتني
حطت الخبز ابرار جايه يمنا اليوم تساعدنا وكعدت
ابرار
- يوم اهدي
ام ابرار
-ما اهدأ اليوم راح انطي خبر لاختي موافقين صارلي قرن متانيه حضرتها
-هاي هي لعد اذا ما تنطيني مجال افكر انطيهم علم اني رافضه
-ماكو خيار الرفض شيلي من بالج . غبيه عمامج ما يردون تروحين للغرب و حتى اولاد اخوه ممزوجين او شباب ماعندي بعد عاد تسترين مثل اختج ماكو غير باسم
تردين انطيج لليث لو غسان
والله يحلمن امهاتهم انطيهن مرة
-ماما محد يجبرني
-يجبروج وغصبا على راسج يا غبيه ادم بعد خربت علاقتي بيه مراح يوكف بوجهم و عمج بعد هم يشيل ايده اصلا هو الكلام كله بيد ادم اذا رفضتي ابنهم تتأزم علاقتنا اكثر
-زين خل افكر و احسبها
-اني فكرت عنج اخذي باسم يصونج ويصون مالج يالغبية
باوعت لامي بزعل
-هاهي ماما اجبريني وزوجيني غصب
كمت من على السفرة واني متاكده مراح تدز الهم خبر ولا راح تغصب مدام اني ما راضية ،
كعدت الصبح على صوت تليفوني
رقم غريب رديت
-صباح الخير
هذا باسم عجيب عرفت صوته شو ابسرعه!
-صباح النور باسم اشعجب
-اشلونج
-احم زينه
-اليوم جايكم عندي كلام وياج
-وياي!
-ارجعي نامي
سده بوجهي اضاهر واضح على صوتي النعاس بس شريد مني بعد الرفض اهو والله ما بيه قابلية اضوجه ليش اصر يشوفني وجه لوجه
نفخت بحلكي هوى وطلعته بغضب نزلت من سريري الحديدي ، باوعت لشعري البني وخصلاته الناعمه مسرسحه على وجنتي بداية تزرعه بيه شقار خفيف من تطول الشعرة تتحول بنية هذا المزيج مسوي بيه تموجات لكن لو ينصبغ يصير اشع واحلى من هذا البهوت صارلي اهواي مصابغته ولونه ظال ع الطبيعي ،
رحت غسلت لكيت امي تتريك جبن و صمون ،
-مام اريد بيض من تخلصين سوي اليى وصيحيلي
ردت اطلع ابدل ملابسي
- اليوم ارجعي من وكت باسم جاي
-اي شو خابرني وكال الي ، مامي حبابه اني حسخت وما اجي من وكت منا من يروح
-سويها حتى اكسرلج رجلج
جريت كرسي بغضب
-ماما شنو هذا الاسلوب
- تجين من وكت
-ماما اني مو رفضته ليش جاي
- يتفق وياج على اموركم
-امورنا !
- انطيتهم موافقه
كالتها ببرود واخذت رشفة شاي واتباوع للأكل ولا كأنها كايله الي قنبلة
-ماما بس انت
-انت گلتي موافقه
-يا اني گلت مموافقه اذا تردين اجبريني كولت الج كولي الهم موافقه
ماما لا تحورين الكلام
-انت ما اتعرفين مصلحتج ، رحتي مشيتي على هواج وابوج صفك الج طفله خطبج لواحد غريب باعج باول فرصه بس لمحت اله احنه مديونين وابوج افلوسه كلها عد التجار باعج وراح
-شنو !؟
- ردت اشوف اصله
-دقيقة دقيقة ماما انت لمحتي لفرزدق واشوكت وليش اني ما ادري
-من مات ابوج ،
يوم ابن عمج شاريج و طلع نفسه بيج اخذي الي يحبج وانجبي
كمت من يم ماما والدنيا اتلف بيه
اه يا الهي عود صدوك هالكلام وطلع الك يا فرزدق ميت وجه الله لا ينطيك تلعب بمشاعري
بجيت و الندم زاد
كلبت بفوني بسكرينات قديمه محتفظه بيها لكلامنا ، حذفتهم وغليلي ما شافي منه ، باوعت بخانه الرسائل ابن عمي ليث يراسلني يسأل عني ، وما رد عليه غثيث ولانه صديق عصام اكرهه ،
رشا بت عمي ابو ناجي تلمح الي على اخوها غسان وهي البارحه اجتي وعود ساعدتنا وبس تمدح وتلمح على اخوها كل ذولة ضهرو بعد فسخي مو لسواد اعيوني لورثي الي صارو يديروه خوالي ،
وهذا باسم وين جان حبه توه ضهر !
طلعت لامي جنت مبدلة ، واني اتريك وهي كدامي كاعده تصد بيه بنظراتها
-لا تباوعين الي هيج ماما
رحت للدوام جنت اجنب الطلعه بالحدائق او الكافيه بسبب تجنبي لنرجس ، كنت اكابر و حتى ما رحت عاتبتها حيل تعز عليه نفسي ، لكن اليوم بس ردت اشوفها !
طلعت لنادي الصيد اعرفها تحب تتختل اهناك ،
ترجيت عيوني ما تمطر ، وكفتهم ويه بعض طعنات بالوتين ، لازم ايدها ويتمشون عرفتهم من قفاهم وراهم اتمشى و بطئ واعيوني غدرتني ودمعت همه وكفو واني ما وكفت صرت وراهم مباشرتا
طلعت كلنس مسحت دموعي واتمنيت يختفي اثر بكائي لكن شفايفي ترعش فاضحتني جفني مبتل رغم تنشيفي الها
التفتتو رادو يدورون صرت بوجهم
غيم وجه نرجس وهي تضغط على ايده واني اعيوني بس على اديهم و حلقاتهم ، مديورة باليمين اعتقد من اسبوعين لو اكثر شهر مدري صارلهم اشكد مزوجين ،
- مبروك !
هي ما ردت ،
وهو رد بصوت مخنوك
- الله يبارك بيج ويعوضج !
- عوضني اليوم خطوبتي !
وجه تلون والتفت على مرته الي تسحب بأيده تطلب الطلعه منا
- ابن عمي باسم اذا اتعرفه كلتها و شبه ابتسامه باكيه ضهرت على وجهي
هو اكتسح وجه الغضب والاحتقان
راد يروح وكال
-مبروك
نرجس
-مبروك عيني مهناية بالعسكري
كانها تعيرني كونه مو خريج جامعي
- ما اعتقد حخليه بالعسكرية
استلمت نصف عمارة ورثي و حصتي بأراضي بابا وابن عمي يديرهن الي
حسيت وجهه كله غيره وهو اكتسحه الحزن ، اخذ مرته وراح من وجهي
لزمت فكي اليرعش ، وبكيت بحركه حركتي كانت بايخه واني احجي وياهم بصوت باكي بالكوة يطلع
،
رجعت للبيت الضهر اتغديت والعصر اجانه باسم اسمع صوته بالصاله ويه امي ،
كلمت نفسي
يا الله يا سارة اطلعي ، وابدي من جديد شوفيهم همه ما يسون وحياتج مواكفه عليهم
هم بجيت من تذكرت وكفت كدامي
اوووف امداني ضعيفه ،
ورة نص ساعه الا طلعت تارسه وجهي مكياج يخفي علامات البكاء حتى عدسات زرك لبست، رموش كنتور و اضائة كاني رايحه لحفل حطيت حجاب هم ازرك ويه لون العيون و حمرة بصلي ، ثوب بصلي بلون الحمرة وصبغ اظافري هم ازرق ، (من دارت سنه بابا خلعت الاسود)
شفت ضهرة او قفاه مبين من ورة القنفه اعتقد لابس قميص ازرك غامق
اشلون صدفه ، فوكاه يلك اسود
سلمت عليه و وكف الي ، امي ظلت صافنه على مكياجي وحطت ايدها على حلكها متعجبة من تصرفاتي
ومبين خايفه مني لا اخرب كلشي
ابرار لفت علينا ، ترة ابرار اصير كنته خالي الي ساكنين بملحق بجورنا يعني بس ادور علينا اصير يمنا سلمت و حجت وياه و هي دقايق بعد الضيافه امي واختي اختفن ،
السكوت كان حليفنا ، واني اجنب اباوع اله مدنگه ، ركزت ع بنطلونه اسود جيد خوش تنسيق بس لو الحذاء رياضي وازرق ومن غير جواريب اكثر عصرية من حذائة الرسمي الاسود ،
شنو هاي الجو احسه مشحون
رفعت نظري على وجه ، عزة اوف طلع يباوع لوجهي ومركز همين منين اجتك هاي الجرأة جنت ما ترفع عينك عليه وان رفعتها نظرتها احسها عفيفة اخوية مو هيج !
- بما ان تمت الموافقه الي اتأخرت
اجيت اليوم حتى احجي وياج واني طلبت من خالتي تتركنا
زواجنا ما اريد خطوبة طويله
بس ما عندي شي ثاني اذا عندج شي كولي
شفت امي ماده راسها من باب الغرفه وتخزرني
كانها تحذرني كل ظنها راح اكول لا
نطقت
- زين واني عندي شروط واولها الخطوبة اطول
ابتسم اول شي اطلبه عكس اول واخر شي هو طلبة
-قابل ندرس بعض بيها!
-اي ليش لا
-يعني ما اتعرفيني ! مجرد موافقتج هي معناها رضيتي بيه لانج اتعرفيني واني هم اعرفج وراضي ماكو داعي الها
ضوجتني كلمة راضي ! جاوبته
-ما ادري اني اريد هيج
كلتها بقلة خلك واني اريد ابجي واني اعرف الي اسويه هو الصواب ماكو غيره يحميني من نفسي و من الي حولي !
- زين هاي بعد الخطوبة نشوف اذا تطول او لا مو مشكله
وبعد
-بعد التخرج اتوظف
- وظيفة حكومية اي والله كريم عود
- واريد اشتري سيارة واسوق واريد متسع من الحرية
-سواقه اهنا بالعراق للبنية وخاصه بالعاصمه خطرة ما شجع عليها
بس هم بسيطه
- نسكن بيت بابا اقصد ببيتك مو بمكان ثاني
- وهو كذلك
- ما اريد بيوم تفرض عليه رأي هاي هي اني معندي طلبات مادية ومو بحاجه اصلا !
ابتسم و وكف عدل قميصة نزلة
وكعد على نفس القنفه بمسافه بينا
همس بصوت هادي
- واني ما راح اقصر وياج ، راح احتويج لكن لا اجرحيني بيوم ،
راح اكلم العمام اقصد عمي ابو فاطمه وابو ناجي وهمه يصرفون ،
(بس ابو ذياب قطع وياهم احنه )
وكف وهو يعدل بايلكه واخذ فونه من على الميز وباكيت الجكاير
-يلا خاله اني رايح
طلعت اله امي اتمسكت بيه على العشة ما قبل اتعذر وراح ،
اول ما طلع وراه ابرار اتوصله واني اخذت فوني اتصفح وامي اجتني ندستني على متني
-ايي ايي اصبعج ماما
حكيت متني
ام ابرار
- اشلون هيج تحجين وياه
-شكولت ، سويت الي ترديه
بعد شكو!
اجتي ابرار
- اشلون اتلمحين تلميح محلو حتى ابسرعه كالج لا اجرحيني
-شنو مفهمت
ام ابرار
- ما فهمتي اتكولين اله ما محتاجه شي مادي مو عيب لج ابسرعه فهم ورد عليج الولد بأدب واصلا اتعجبت على طولة باله وياج عبالي دمه حامك ومراح يتحمل منج هالجفا و الجمود
شكول عليج يا سارة
،
هيج لعد وصلت اله والهم هم بس مجنت اقصد اوصل اله اني اقصد مبحاجه يتعب نفسه بمهر وهاي
السوالف شروط بس معنوية مو مادية
بس اضاهر طريقة تعبيري خانتني ،
ثاني يوم اجت خالتي ام ادم و خالتي سراب و خالاتي الثانيات تجمع يم امي بمناسبة انتقالها ، بس يحجن بخطبتي من باسم
خالتي سراب
-حرامات جنت حاطه عيني على باسم لننوسه بتي
ام ادم
-بتج عمرها ١٦ سنه وابني مستعجل ما يتاني هههههه
ام ابرار
-ذاك اليوم جانت سارة طفله تلعب وياه
رؤيا شاركت وياريتها ما شاركت
-ههههههه اي وتذكرين من سبحها باسم وحصل كتله معدلة من عمي هههههه
خالتي سراب
-يا معزاي من صغرة يسبح هههههههه
لعد هسة شسوي ههههه
امي اختنكت من الضحك وهي تذكر ذاك اليوم وكعدت اسولف الهن التفاصيل واني تذكرته للموقف جان عمري ٥ سنوات وهو اكبر مني ٧ سنوات عمره ١٢ سنه
كانت الدنيا صيف حار استحريت حيل دخلت للحمام اطبش امي طلعتني وصاحت بيه الصبح سابحه طلعت للحديقه هذا الحجي ببيت جدي وكومه عوائل بالبيت بس وقت الضهرية كل وحده تلم أطفالها واتنام ، شفت باسم يغسل رجليه كلها تراب اضاهر جان بالشارع يلعب بالهل ضهاري وطافر من الحايط وداخل
شافني
-حارة ولج ادخلي جوة
-ما ما اريد اطبش بالماي
- لج ادخلي
اذا ما تخليني اكول لبابا عليك
جنت طالع عيني عيني
عندا بيه رشني بالصونده وعباله ابجي كمت اضحك وانزع بملابسي اصلخت بس البكيني الابيض ابو الدناديش الكيبور ظليت بيه و هو رافع الصونده مسويها مثل الدوش واني جوة اسبح واطبش واضحك
طبعا امي جانت اتغدي ابويه ما نايمه لانه جاي من الشغل فكاعدين بهاي الضهرية وغرفتهم فوك فأمنت ،و هو هم نزع تيشرته و ظل بسروالة و اثنينا طبشنا بالهحر حنفية التأسيس تسمط يجي من البوري حار بس هو مشكل الصونده على حنفية الخزان الي والدي مغلفه ليضل بارد مايه ،
ما انشوف الا وبابا يخزنا جنا اثنينا لازكين ببعض اني واصله لحزام باسم ولازكه بيه حتى يوصلني ماي وهو يرش ساعه عليه ساعه عليه
-ولك شسوي كلب
نفس الصونده الي جنا نسبح بيها فلتها بابا و طاح دك على ضهره وهو يركض وبابا وراه منا من حصره بزاوية و على ضهره المكشوف اجت امي خلصته من بين اديه
صاح معصب
-راقبيهم انت ، شوفي هذا الهتلي شمسوي
اخذني بابا شالني واني ابجي على باسم الي يباوع النا ولا يبجي !
وبايده بابا لبسني وهو يغلط على باسم
الضحكات تحولت الى ضوجه على باسم من امي ذكرت اشلون بابا حمر اله ضهره جان قاسي عليهم حيل وخاصه باسم لانه حرك حيل ودومه يسوي شغلات و عمايل تخوف مو مخله بالاداب لكن حرك حيل وحتى مرة عركه زلم مشوربه صارت بسببه من جان عمره ٨ سنوات والي اتعارك على موده بابا !
رؤيا
-هو وكح خارج البيت وسارة جانت وكحه داخل البيت اشلون اثنين
طنجرة ولقت غطاها ههه
رجعن يضحكن علينا
طبعا مجتمعين بستقبال خالي لان جبير وعدهم الغده صار ، وبس يحجون بسالفتنا اني وباسم،
ابرار طلعت حامل ، و تمت خطبتنا مبدأيا صرنا مخطوبين وقرت فاتحتنا عادي
،
وتقرر عقدنا وامي اصرت اسوي حفلة مهر واذكر اشكد توسلت اسوي حفله بمهري السابق كانت رافضه بسبب معاجبها خطوبتي وتتحجج ،اهواي منغصات بخطوبتي الاولى ، بهاي عقدنا شيخ بمكتب و عقدنا محكمه واني وجهي ما يتفسر بسبب مشاعري واضحه كلش محبطه و متخوفة
وافقت عليه كونه الشاب الانسب الي لكن اي مشاعر او ميول ماعندي اله
هو ما ادري كان ساكت وبيوم عقد الشيخ مرتبك ، راح ويانه ادم وخالتي وامي ،
ورة ما خلصنا الصبح اخر اجرات عقد المحكمة العصر حفلتي ، رحت لمركزي المعتاده عليه معروف ببغداد ، حليت شعري وشسورته وصل لضهري برز طولة ، رغم شموع فرحي مطفيه لكن من دخلت المركز انفتحت نفسي اتمكيجت مكياج خطوبة اختاريت زهري للشفة و رسم عين من غير ظل محبه بس مع نحت الخشم و الاضائة طلعت فد شي
لبست فستان امي اشترته الي لونه اصفر فاتح نفش فول لبست ستريج و فوكه تنورة بيضه جوة الثوب ومن اوصل للبيت اخلعهن بس للسترة،الفستان بلا اكمام او تعلايك ، صدرة قلب حب شذر اصفر ،
طنكرت عليهن الا احط الكبوس مفتوح يعني وجهي طالع لا اوكع عمياوي ، اجه باسم الي ياخذني للبيت
واكف كدام سيارته فتحها النا واتقرب علينا شاور امي و رجع لزم النا الباب
امي من غير ما تحجي وياي جرت البرنص (طرحه) على وجهي زايد وكعدوني مثل الغنمه ياهو بدينا عاد بفرض الاراء عود شرطت اني عليه وهاي بدينها من الاول حزم وخرتها عن وجهي
كلت
-مكياجي يخرب
باوعلي من الجامه ونفخ بحلكه هوى ،
هلا عيني حتى ما شفت بعيونه نظرة اعجاب بس قهر مني وضوجه ،
ما تونست ولا فرحت و لا عبالك الحفله الي ، باسم بدايتها وياي و بعدها راح و كله ركص ودي جي لكن محاسة غير بغمته و حاسه نفسي اتسرعت
- اني شسويت بروحي من مشيت ورة ماما
واخذت الي يحبني هو وينه الحب هذا كانه جاي يادي واجب خله وشرد و من وصلني بس ضايج وطالعه روحه حتى سياقته سريعه و معصب وما يتحاجه
مشيت ورة طيبه قلبه ونسيت اكو صفات بيه ما اتحملها واولها عصبيته
بخطوبتي الاولى مكانت غير عزومه غده وفرحت بيومها فرح استمر الى ان غدر بيه وتركني يمكن هذا احد الاسباب الي خلاني اوافق على باسم الطيب الي بوجه واحد واضح كلش وبسيط ، خبث فرزدق كرهني بالشاب الاكثر توصل وتفكر من باسم ،
حاولت اقنع نفسي بهذي الافكار حتى اقنع نفسي ، خلصت الحلفه وجان راسي طبل توسلت لامي ابسرعه نرجع مقبلت كالت نبات اتريد تصالح ادم ،
اني رحت لغرفة سمر اخذت غيار ردت ابدل واجتني كالت يردوج بالاستقبال هذا الحجي المغرب والولد ماكو بالبيت
عبالي امي او خالتي رفعت بدلتي ورحت اشوفهن دخلت ولكيته هو بوجهي
احمر وجهي وخجلت من نظراته ، مجانت هيج الضهر
ظل صافن اهواي عليه الا اتكلم
- همزين ما غيرتي
طالعه حلوة
هذا بس هذا الي كدره عليه تهي بي زين من نطق ابو الهول
-شكرا
كلتها بطرف خشمي ونسيت اني شلابسه
شو هذا اتقرب يمي وجانت نظراته على اضلوعي و اديه المكشوفات ،
خبثا بعيونه جبت شعري عليهم
لزمه وظل يفرد بيه خصله خصله ويباوع اله ويرجعه للخلف كأنه دا يصفطه للخلف على متني و رجع كشف متني وايديه الخشنه اثنينهن حطهن على اموتني من كدام
اختلط عندي الخجل منه و الاعتراض
اديه كان ملمسها حيل خشن احسه راح يشخطهم وحتى نظراته مكنت متقبلتها هو كله ما متقبلته هيج يصير الي ، والله ما اكرهك واحبك حيل بس مو هيج مكدر
وخرت اديه
-اسف
اعتذر بس ما تتصورين هاي اللحظه حتى بطلت انتظرها وايست منها
تعجبت و بين على ملامحي الاستغراب
- انت ، انت . مجنت مبين الي اشوكت هاي عود ؟
- حيل حلوة وانت سافرة ، روحي غيري لا يجي واحد من الولد
رفعت البدلة و رحت واني ضايجه مجاوب وغير الموضوع ،
بالعشة بالكوة متحملة وكاعده بينهم ، كلنا مجتمعين ، همه محد جاب طارينا اني وباسم حتى لا يحرجوني بس اني مدري اشبيه نازل عليه الخجل ،
داكل و رفعت نظري صدفه ولمحت رضوى اتباوع الي ، ركزت بيها لا هاي جاي تتخازر وياي اشبيها !؟
هي كاعده ابصف زوجها الي ياكل ولا بباله
حركت احواجبي بمعنى اشبيج
الا استحت على دمها و نزلت نظرها عني ،
كلساع واحد يكلي اليوم الج نظرة ثانية بيج نشعه جديده ومحلوة (محلوة مزدادة جمال مو مو حلوة)، اشبيهم مدري شو نفس خلقتي البائسة ،
جنت واكفه يم البنات رؤيا وفاطمه و ابرار كاعده والبقية يغسلن مواعين واجتني سمر مرسال باسم كالت يريدني رحت للأستقبال وجان الكه مقداد كاعد بس شافني دخلت طلع ، اوف والله زمن جانو يكعدون كلهم على گلبي بخطوبتي الاولى هسة همه يسون اجواء للأستاذ باسم ، وهذا ادم وينه الي جان يكول لا يكثر فرزدق جياته شو اخوه كلساع صايح الي واني لهسة محاسه بينا عقد مقدس واني انتمي اله ! ،
تعالي وياي اريد اراويج شغله
اخذني من ايدي وهاي ثاني مرة يلزمها ، العصر لبسني الحلقه مالته وهسة جرني واخذني وياه ولا همه احد
وكفت يم باب الدرج
-وين يمعود
-وين معود اني ؟ بعدني ممصدك حتى اتعود
دتعالي
اخذني و صعدني وياه كانت رجليه تنصاع اله وحدها وبگلبي رجفة وربي اذا يدخلني لغرفته لفضحه !
دخلني و دخلت !
بصوت يرجف
- ليش دخلتني ؟
اتقرب ناحيتي رجعت للخلف وهو اتعداني وسد الباب ، من سدها كلت اذا اتقرب وربي اضربه بين رجليه واشرد بس خاف محلك ويلزمني ،
هو جان واكف قريب يمي و بس هم صافن عليه ،
زين اصيح وافضحه !
بس خل اشوف شسوي واصيح ،
صار فكري يسرح شمال اكثر من اللازم
انقطعت صفنته اووف يربي لزم ايدي ومدري شنو يحجي حتى منتبهت اله بس هو بصورة عامه يغازل بطريقه ثكيله كلماته بالكوة تطلع ، مجاهزة ابد حتى اخوض وياك تجربة الخطوبة وسوالف المخطوبين هاي كارهتها حيل بسبب الي غدرني الله يجازيه
يا ابن عمي على كيفك وياي ساكته مريد اخرب شي بس انت لا تسوي شي اكثر من هذا القرب ولزمت الايد ، اخذني وكعدني على كرسي وظل كدامي يلعب بكذلتي الي طلعها من الحجاب واني نظراتي للفراغ بضياع وتشتت فضيع وافكر بس بالتالي ! واتخيل اذا باسني اشلون راح اتقبل شفته لهسه ممتأقلمة وممستعوبه هو زوجي !
كعد على ركبة وهم اخذني بدوكه كلام
وكاني حلمه من زمان باس ايدي
باسم باس ايدي حسيت برضا و بهجة رضى غروري الانوثي الفطري باسم الصارم يبوس ايدي اني ودغدغ شاربه ايدي ، مع هذا دقات قلبي زادت ما هدأت واني خايفه من القادم لعبت ايده بخدي و وكفني من جديد كأني لعبة بايده تصغى اله ، كلت هاي هي راح يتقرب اكثر اجه يمي اني ابتعدت
-باسم حباب مو مال هيج
شو ضحك واتقرب واتعداني فتح كنتورة
طلع من كنتورة علبة
- اريد اراويج شغله ، هي امانه بس مراح ارجعها الج
-شنو هي ؟
العلبة كانت مستطيلة و طويلة ورفيعه لونها نيلي وبيها فيونكه بالوسط سودة ،
انطاها الي وكال افتحيها ،
فتحتها وظليت صافنه عليها !
- ش ش شنو هاي ، ؟ هاي المن
-ما عرفتي جزء منج ؟
- تقصد هاي الي ؟
- اي
-معقولة!؟ ظفيرتي لا لا
ههه
ضحكت بندهاش
-هاي ظفيرتي كصيتها واني بالثانوية و و و هههه
دمعت اعيوني
- هذي من جنت صف خامس اعدادي كصيتها و ضاعت مدري ذبتها امي ونسيتها بيومها زعل عليه بابا لان جان واصل حيل حيل طويل و اني وصلته لمتني بكصتي لان يساقط تعبني
سرحت بفكري واني اباوع الها ورفعتها حتى نفس الاستيكات على ظفرتها !!!
اذكر نسيتها على المغسلة مشدوده من الجهتين جنت اريد انطيها لصديقتي امها كوافيره تحتاجها وما لكيتها بعد
باوعتله بوجه مغسول بدموع ما اعرف الها مبرر
-انت محتفظ بيها !
غمض اعيونه
-لعد شكلت قبل اشويه
اه ما انتبهت ولا ركزت بكلامه قبل اشويه كان عبالي يريد يسوي وياي سوالف مخطوبين ومتوترة وحايرة
شميتها ورجعتها بمكانها بدين ترعش شفته يباوع الي بنظرات كلها عشك و وحنية
حطيتها على الكرسي
وطلعت شاردة ، مو منه من لوم نفسي التفتت عليه واني يم المحجر وهو واكف يم الباب
يباوع الي
عضيت شفتي ندم على كل كلمه كلتها لواحد خداع وتاركه كنت قلب يحبني بالخفاء ما منتظر مني شي ،
رجعت اله وكلت
-ليش ما كلت الي ، ليش خليتني
اجيت الومه
تراجعت و رحت من كدامه و صارت خلفي رضوى اتباوع لباسم والي بستهزاء ازعجني
نزلت واني اكول
لا اذب الوم عليه ، الملام اني الي كانت غشاوة على اعيوني وقلبي صم بكم ولا حاسه بأي تخلجات بداخله الي لو مركزة اكيد جنت حسيت بشي
طلعت بالحديقه شارده عن تساولات فاطمه وابرار سمر كايله الهن
بس انت السبب لو مخليني اشوف منك غير نظرة الاخت مكان تدخل على التيار اي طرف وسلبني اعز ما املك قلبي و لهفتي بالحب ،
__________________________
باسم
جنت كاعد على اعصابي و انتظر رد منهم حاصرت خالتي من راحو لبيتهم بوقت محدد ترد عليه بي بنعم لو لا لان مليت الانتظار ، خابرتني بالليل الساعه فوق ال١١ بلغتني بموافقه سارة ، يا يابة احس تيار هوى منعش ونزل على ريتي مقطوع عن التنفس اسنين واليوم انعشني هوى عليل
طلعت من غرفتي ما عارف اخفي مشاعر الفرح والسعاده دخلت ع مقداد لكيته يدخن
خاف وطفى الجكارة
- لك مطي كلنا ندري ادخن واسوي مكسرات جنت ، بس اليوم دخن بالعلن ومحد اله كلمه عليك
ضل صافن مثل المطي(حمار)
-اذا اتريد اجيب ابطاله (مشروب )
هم محد اله حجايه وياك
اخيك راح يزوج
وكفلي وهو يضحك
-الله ، الف حمد وشكر حباب ازوج اربعه حتى تنعاد هاي الليلة عليه ههههاي
-انجب لك صدكت خسيس انطيني الباكيت
اخذته منه وكلت
-همزين اني مخلص يفيد
طلعت لبره ودكيت الباب على ادم
طلع الي مكشر
-اشبيك ادم ضايج
.-شتريد ، واشبيك هيج فرحان
-وافقت لك سارة وافقت بعد ما نشفت ريجي
-وهيج فرحان ،راح اتاكلها وره شهر اشوف نفسك اشلون جنت غبي على هاي اللهفة
- دسكت يا ابو الاوادم صدك ريجي ناشف اسنين
خل انزل ابشر امي
هذا مبوز ابو الاوادم اضاهر متلاغي ويه المدام ،
نزلت دخلت عليهم الوالد نايم و امي نايمه ابصفه
فتحت على دخلتي نومتها خفيفه
- باسم يمه شكو
فتحت الضوة
ابوية هم فز
- شكو منهو مات ، امك
اشرت اله ابصفه كاعده
ابو ادم
- ولك جنك عزرايل هاجم علينا شكو
-بوية اجيت ابلغكم بخبر يفرحكم عشر سنوات لكدام
جنت حيل مرتاح وقاصد اداهر وياه
-بوية راح احقق الك مناك و افرحك
راح ازوج سارة وافقت
ام ادم
- مبروك يوم بيها الخير بس لو متاني للصبح مو احسن
-هتلي ولك اصحيني من نومي على هيج خبر طيح الله حضك باجر تجي تبجي ندم
ام ادم
-نام نام شمحصله منك غير المذمه
هز ايده و ارجع غمض وغمني
فتح مرة لخ و اشرلي على ركبته بمعنى تخنك
يعني الزوجه تخنك
وهو يضحك وامي كامت كالت اصلي صلاة الليل مدام فزيت ،
رحت ادورلي واحد لاخ افرحه شفت انسام بالمطبخ اتحمي بماي
-باجر اجيب الج غلاية
-مرت عمك اخذتها وياها من عزلت وظليت احمي لعلوش
- هههه تجيج افضل غلايه ، تأمرين
عدلت ترشيتي وكلت واني نافش صدري
- ماكو مبروك زواجي قرب
-اها وافقت ست الحسن هههه على الخير والف مبروك ولو مستخسرتك بهاي المردانه الصفرة (صرصر اصفر)
ضحكت على شقاها
- اشلون بيجن ولا تتوالمن
- والله انت راح اضرني ماعونت اخلص منها راح اترجعها الي
-ههههه والله مثل طيبة قلبها ماكو بس
دلوعه وتغار لانج اخذتي والدها
- ههههه الله يسعدك دوم انشالله و يهدي هاي ام سلعوم الك وما طين عيشتك
-ويسعدج يارب
-امين بس هاي الك مني اطك هلهولة اشطولها هم افرحك بيها وهم اطك عرج ام سلعوم بس ها اعزمني عود هههههه حتى افرسها بعرسها
-ههههه افه عليج اول الحاضرين
بيومها انتعشت الروح و اجتاحتني مشاعر اللهفة على تتميم الموضوع باسرع وقت لا الحلم ما لحك احققه بودي هسة نكمل كلشي لا يصبح الصبح ويتغير شي ،
رحت طلعت ظفيرتها المخزونه سنوات عندي ، مابيها ريحه زيتها اختفت من كثر شمي الها ، عطرتها من العطر الي تستخدمه هي و شميتها واني اكول الها
- ياربي تتقلص الليالي و تختفي منها ايام و المس بايدي شعرها المزروع براسها بدل هل التراث المحتفظ بيه
بستها بشغف لا يقل عن كل مرة و ضميت بيدي ظفيرة خليلتي المستقبلية نمت بيومها واني محتضن الدنيا بسعادتي وأحلامي كله واحد ورة الثاني بسارتي ،
الصبح اول ما فزيت خابرتها اجاني صوتها المخمور اويلي يابة تتنفس ببطئ من تحجي كانها مخدرة سطرني صوتها دخل الشيطان داخل مخيلتي خلاني اتخيلها يمي و تحجي هيج وهي بثوبها الاسود !
زلت بالصلوات افكاري و بلغتها اليوم اجي وابسرعه سديت الخط رافض انحدر بمشاعري على هذا النحو ،
من رحت الهم وشفتها بكامل اناقتها ارتاح گلبي اكثر لتقبلها السريع الي ،
عفتها تتشرط عليه واني اكول بگلبي بسيطه مراح اخضعج لشي بس اروضج على ايدي واغرس بيج حبي يخليج تتقبلين كلشي حلو مني
مرت الايام البطيئة حيل وبعد ما التحقت ورجعت مجاز عجلت امي بالعقد عقدنا سيد و محمكة واني كل ما تطلع وياي احترك لان مرتي ما تلبس جبه او عباة وساكت وبالعها بالگوة واكول اصبر بعدها ما ندرات بالكامل لعصمتك من اجيبها لبيتك بسيطه اصبر على دلالها يا باسم
بيوم حلفة المهر رحت اجيبها ،
طلعت من المركز والله لو ميت وطالعين على جنازتي ولا تطلع بارزه وجهه انوب الحقيرة طالعه گمرہ بليلة ظلمه كأن ماكو غيرها يمشي حسيت العيون عليها وشي طبيعي عروس تطلع الناس فضولها يتبعها اشوف طلتها
بودي انزع جاكيتي واغشيها هالغشميه حبي وعشگي مكدرت اتحمل رحت لامها وكلت الها
- غطيها لا والله احرك الدنيا عليكم شمطلعين انتم
ضحكت وراحت نزلت الطرحه على وجهه
شفتها كامت تتعثر وكعدت بالسيارة بت اللذين الا تلبس بدلة منفوشه ارتفعت وهي تصعد همزين لابسة مدري شنو جواها ابيض يمكن ثوب واذا طلع اتك فمصيبة مرتي طلع اتكها
همزين اقل الثانيه وامها عدلتها و كعدن ، براسي مغروسه الشياطين واني افكر لا احد من الامن ركز بيها لو من صعدت واحد لمح اتكها توء يا باسم هي ابسرعه كعدت واصلا مبين ثوب مو اتك ، بس بالله شافها واحد عينه ضيكه زين المركز بيه نزله درجات لا يكون احد واكف اهناك و لمحها تنزل ، ناهيك هن وجهه خرب يومج يا سارة احتار بوجهك لو باتكج
دخلت للبيت وياها وبديت الازاهيج والركص و الاغاني بوجهنا طشو ورد واني امشيها بالكراج جنت مستعجل و افكر من نزلتها لا واحد من الجيران مر وهم ارتفعت بالبدلة بس اني الي نزلتها خرب من هاي الجيوش مكدرت ادخل سيارتي جوة وافضها ،
، كعدنا بالاستقبال الكبير جدا كانه قاعه كبيرة يضج بالنساء الاقارب كاني مرابط و كدامي قائد العمليات بفخامته كعدن يفصلني تفصيل ،
حتى شككني بروحي واني كاعد بوسطهن كنت لابس قاط اختيار ادم ،
نيلي والجاكيت فتحته من كعدت برز اليلك النيلي والقميص الابيض ، توني جاي من عماد الحلاق ومسوي مساج مخلي وجهي بيه نعشه ورديه كرهني بروحي ما حبيتها قابل انه ج ر و ،
استثقلت كعدتي كلت لامي اجيب الحلقات الي هنه اشترنهن البسهن وافلت ، ما فتهمت شي من عروسي بوسط هاي الهوسة ، لبستها و لبتستني ايدها جامده بارده يحظي اشبيها لعد ايدي ترجف و حارة نارة خرب حظ النسوان تحرج اكعد بوسط فيلق معسكر امريكي ولا هاي الكعده منتبهات لاقل تفصيله ، طلعت شارد منهن اتلكاني ادم بالكراج هم يريد يفلت
-ها باسم ليش طلعت
-يمعود فصلني تفصيل شظل
ياخوفي عرفن لون لباسي !
- ههههههههه
ظل يضحك ادم بصوت على المأزق مالتي ويكول الي
- بعد ولك هاي تمهيدات بالعرس اكثر بعد ناس تجي مخصوص اشوفك ههههههه
-قلقتني كاني راح افلت وانهزم
،
ما شبعت منها شوف جانت لابسه اصفر مثل الثريا تلمع وتلالي بيه عبالي ضعيفه ، بس طلعت مخبية فتنتها وانوثتها ، رشاقتها تلسع الگلب و تاخذ لب العقل ، شعرها طولان على ضهرها ،
طلبت من سمر اصيحها قبل لا تغير ،
اجتني وانصدمت معبالها اني ،
استقبلتها اعيوني الفرحانه بيها وصعدت لسابع سما بشوفتها وهي مثل اميرات دزني تلأ لأ وتشع بضواها اكثر من الشمس يمكن ،
كلت الها طالعة حلوة
كالت شكرا بجفا ،شفتها ارتبكت وغطت جسدها الي اباوع اله واني احسد كل نظرة لاول مرة تنزل عليها لأنها حلالي مالي !ملكي
غطت بشعرها زنودها وصدرها الؤلؤ الصغير مثل ما تتخبأ داخل قوقعتها
كنت ما اتكلم ما عندي طاقه للكلام السان حالي انشل واشتعل گليبي بلهيب الغرام حسيت بنظارتي كومه مشاعرهادرة مراح تكدر تستوعبها البنية الي ما تعرف عنها شي ولا تبادلني بيها ، بالكوة نطقت بكلمه طالعه حلوة ، مكان عندي كلام تعبيري للبداخلي كان جبير على لساني ما يعرف ينطق حروف توصلها
بودي اعرف اعبر الها شوكي لهاي اللحظة واكول الها مشتاك الها شوك الحمامة لعشها ، شوك الأم لوليدها ، شوك قصيدة الحب لمتيمها ، اترس شفتها بوس يروي عطشي !
اتلميست اديه شعراتها نبضت بداخلي
دگات الانسجام واني ابعده عنها خصله خصله وما اريده يخلص
ملمسة وهو براسها انعم حرير بيد شاري فقير وتوه الله غناه بانعم وارقى الحرير البني ،
لو لا خجلها جنت بسته كدامها ، بعد ما ابعدته عنها برز الي صدرها اليافع الصغير كان يعلوى ويهبط ومن شده تقربي منها و من حطيت اديه على امتونها ارتفع وصار تنفسها سريع
لدرجه طخ بيه حسيت شفايفها من ترعش اتصح الي ، وخرت اديه عنها
واعتذرت بلا ارادة مني
لأن شفت متنها بيه احمرار يا هشاشة قلبي اذيتج ،
كلت الها هي حلوة من سافرة ، ادري غزلي بسيط بس شسوي شلت حالي واني النجر ،
سألتني واني رجعت رغبة تقبيلها تراودني تايه بيها
طلبت منها اتروح لان دنت نفسي عليها حيل ،
هذا اليوم الي صارت مرتي بيه رغبت حيل اراويها ظفيرتها ،
صعدتها وياي امي شافتني اشرت الها فهمت مسوي شي بيها ، تدري بيه اشكد اخاف عليهن ،
بس الصراحه اني مضامن نفسي!
لكن من شفت ترددها وخوفها وحيرتها كلت ما اتقرب منها والزم نفسي ،
راويت الها دليل حبي الها من سنوات ، ما عندي غيره ،
شفت احوالها اتغيرت وبجت شمتها اكيد عرفت عطرها ، عطرها الي كل ما اتغيره اغيره وياها !
بعيونها عتب نبت بروحي الندم ، اخ يا بت عمي جنتي صغيرة ومدللة ما توقعت ابوج يخطبج ويقبل بالغريب واني جنت مجاهز ما عندي تعين مثل هسة ، والله بنفسي اكون اني اول رجل بحياتج وحيل حاز بنفسي هذا الشي و طامرة لخاطرج ،
دزيت الها رسالة
الي راح راح يا بت عمي ، المهم الحاضر اريدج ويايه دوم حتى نبدي من جديد حياة جديده ،
ما اجاني شي بس تمت الرؤيا
،
وصلتها هي وامها ثاني يوم لبيتهم طبعا خاله اهواي اعتذرت من ادم ،
مرت ايام واني على تواصل بس قليل ويه سارة ما فاتحه الي گلبها وبارده
بيوم نزلت بالليل اكل شي صاير اكل اهواي بالليل ، هيج من وكت الساعه ب١٠ يمكن ،
سمعت اصوات وعركه نسائية
رضوى
- ادم طفلة ويه طفله هيج انت
نفسك دنيئة
رضوى تبجي وتعاتب ادم الي مدنك وانسام واكفه كدامها
كلت شكو محد جاوب
ادم
-رضوى اسمعي
- خوش درس ادم تحضن و تلزم ويه الطفله
انسام
-احترمي نفسج اختي محد طخها
رضوى
-ربي اختج بالاول وتعالي صدوك ربي نفسج هم ترة فاهمتج عينج على ادم
شهكت انسام
وامي كالت الها
-عيب شنو هذا الكلام رضوى المرة مرت عمه
رضوى
- واختها الي حاضنها اهنا ينطيها دروس بالحب
ضربت الميز و وكعت الكتب الي عليه
يتبع
هذا الجزء بيه تعويض التأخير لانه دمج جزئين شوفو عدد الكلمات صورته