كالنوافذ قلوبنا خلف كل نافذة ، قصة
وخلف القصه قلوب مختلفة تنبض بالحب ، بالحنين ،بالآلم ، بالوجع
بالفقدان ، وبمآ لآيشتهى ان يحكى
الوجع أصم ، والحنين أخرس ، والشوق لا يرى وأصدق ما نشعر به ، أصعب من أن يرى او يكتب اكتفيت بقرب رضوى وكأنها المنفى عن الواقع المرير ، سددت دفعات صديقي وبقى بس القرض ياخذ نصف راتبي و النصف الاخر السلفة الي سددت بيها مبلغ صديقي ، اما دفعات المعهد مصاريفي ومنها اجمع لدفع قسط لعمي و اريد اسقط وحده من الكمبيلات الضايعة ، الغريب اجت انسام وانطتني الخزنه الي كنت باصم بالعشرة عدها وضامتهاوطلعت ضنوني الصح ، ضهرت الخزنه بيها اوراق عمي لكن ولا فلس بيها!' هذا مو مهم المهم كمبيلاتي ولا وحده لكيت !
اكيد عندها واكيد فاتحتها عمي ما يترك خزنته من غير مبالغ ولو كانت مو كبيرة ،
شنو من مرة دخلتها لحياتنا يا عمي ، ولا ارتاحيت الها !؛ وحده تلطلطت بمصارع الحياة اكيد مراح يتعدل مسارها بسرعه الله الي يستر وما اسوي الي مصيبة واشمت عمامي الي وكفت ضدهم ،
،
واكف كدام صور عمي بالاستقبال
و دواخلي تحجي وياه
-اني سويت الي اكدر عليه حتى اخلي ابنك بقربي اتحملتها هي و اختها وكفت بجانبها اصون اصل ابنك على قدر طاقتي ، جابت الي بت خالتها
اشلون اعزل ابنك عنهم !
رحت ادرس اختي سادس السنة ، طلبت منها تصيح سلوى ، وصرت ادرسها فيزياء و كيمياء و حتى اترجم الها قطع اللغة الانكليزية ببداية الليل بعد العشا انطي ساعه لأختي والها نصف ساعه اساعد بطريقه سريعه بس الي ما فاهمته ،
،
خابرني الصبح صديقي مدرس رياضيات قبلي ياخذ دفعه بالمعهد احنه شاركه بيه ،
- ادم تعال
رحت اله قلق ،جان يوم جمعة ، وشفت المعهد الكراسي مكسره و السبورات و شاشة العرض المكان منكوب ومكسر
سألني اياد
- هاي ليش مكسريهن وعايفيهن حتى مو سرقة !
ضربت بايدي الحايط وعرفت ذياب نفذ تهديده ،
خابرت عمي ابو فاطمه وكلت اله ما يصدك ابن اخوه يكسر الباب و يدخل يكسر مصدر رزقي ،
عرض اياد نشتكي جبنا الشرطة حققو وسالو الجيران محد اتوصل لشي كاميرات المراقبة تبع البيت الي ابصفنا لاقطه واحد ملثم فايت من يمها بس ما كدرنا نعرف هويته ، ما عندي دليل اذا اشتكي كل عمامي يوكفون ضدي حتى المحايدين ،
ما جبت طاري للبيت ب الي صار فقط رضوى تدري ، خوفا من باسم يتهور
يوم الاحد
جنت راجع من الدوام واتغده ويه رضوى بالمطبخ خابرتني سارة!
مدري شنو تحجي هبطتني وهي تبجي عبالي مسوين حادث
رضوى
-شكو
سديت الخط
-معتدين على باسم
طلعت ابسرعه واسوق بسرعه الضوء
وصلت لمكان سيارة باسم ما اشوف غير يمها دم على مسافه بسيطه يمها طلع الي رجال واني منظر الدم وقف عقلي ، دخلت وشفته مرمي شلته !
بين اديه و ركضت ما اسمع الي حولي
بين اديه اخوية فاقد الوعي على حافة الحياة واكف انفاسة ثقيلة
صعدته واحس كلشي بيه جامد وبردانه ضلوعي وارتجافة قوية تتبعها دگات قوية بقلبي منذرتني بخوف يضاعف عمري عشر اضعاف ،
وصلت لعياده صديقي خابرته واني بالسيارة ، حوله لمستشفى
رجعت للبيت ماكو ببالي غير اخذ بثار اخوية اخذت سلاح عمي و لبيت عمي هو مشتمل من بيت جدي ،
اذا ما اصرعك يا عصام اليوم موتك
على ايدي
اول ما نزلت خوالي بباب بيت جدي واكفين! واثنين من اولادهم
التمو عليه واني رافع سلاحي
خالي الكبير رجال معكل
- كول يا الله ادم نزل السلاح
خالي الثاني ابو فرح
- نزله ادم
اولاده واحد لزم ايدي والثاني يريد يلزم الثانيه وياخذ مني السلاح
والمارة تتفرج مشهد اعتيادي ترة خاصة بالمنطقة هاي اتعددت الفصائل و المليشيات واقل عركه بالعراق يحضر بيها السلاح
طلقت بالهوى بعدتهم عني
- اطلب دم اليوم و ماخذه ماخذه
ابو فرح
-هاي انت العاقل ، ادم هذا بيت عمك دمك
- اشنه بماي دمي ولا اسكت اليوم
طلع الي عمي الناقص
-ادز ابنك يتكاثر على اخوية يا رافد (العار) ابو ذياب اسمه رافد
-عمي ذب اسلاحك اني عمك الجبير
اتعوذ من الشيطان هالعار قسما بالله ما ادري بيه وهو شارد
خوالي يتوسلون مدري شجابهم و هذا كدامي يتمسكن
دفعت ابن خالي وزركت للمشتمل ادور على عصام
عمي ورايه، ماهمه اولاده بس نسوان ومرت عمي تبجي
خزرتها
-حضري نفسج اني لباسكم الاسود اليوم
طلعت واني اصيح
-وين يروح الكاه المرة يتكاثر بربعة على اخوية ويتمرجل
وكفت كدام الباب
وضربت طلقتين خليت عمي يجمد بمكانه كانت قريبه عليه على الباب
- قرابتكم ساقطه لا عمي وما نعرف غير وبينا وبينك دم ناخذه
مشيت تارك ورايه علامات على الباب تعلن نيران العداوة الي اشتعلت داخل صدري
اسمع خوالي ورايه يكولون والناس ملتمه حولهم
-هذا مو ادم !
ما يدرون كل انسان عنده شيطان يضهر من تصقله المصايب وتتبع الى أن ينضرب الحليم على نقطة ضعفة يتحول لشيطان احمر يحرك كل الي حولة ، رحت لاخويه واشتكيت على عصام صار من المطلوبين ،
طبعا من صحى باسم الا استهديت و قدمت شكوى ،
امي واني وياه فقط وهو صاحي غافي !
مفتح و يباوع للسكف بضياع نسأله شنو حاس ما يجاوب شالو عنه الاوكسجين بعد يومين طلعنا بيه
نزل من سيارتي الضهر وامي وياه يمشي ببطئ مدنك راسه
فتحت الباب واتقربت يمه لزمت ذقنه ورفعت راسه واشرت اله لكدام
-ادخل
طلعو النا خالتي وانسام و رضوى
اتحمدو اله وهو ما يرد ، ترك الكل و دخل لغرفته يمشي يعرج ، واني كعدت بالهول
اجتمعت بالاهل عدا سارة كانت بالدوام هي وسلوى و سمر
- لحد يتحمد اله من الي ما سلمو عليه
ولحد يذكر كدامه الي صار
ولحد يساله عن صحته
بلغو الغايبين
هيج طلبت ادري بأخوية وطباعه مو سهل الي صارله
للعصر كال يريد يروح لعون يم خالي ما عارضته وصلته ورجعت
ظل اهنا اسبوع ومناك راح التحق لدوامه بيد مخلوعه و وجه معلم عليه
الزم عصام واحتارو عمامي شيجبون الي ولابوية حتى نتنازل بس اني وباسم رافضين وابوية صار يتوسل بيه وبيها كسرت بخاطره وما وافقت !
اتحولت قضيته للقضاء
حبيت ادخل الفرح لبيتنا وفاتحت خالتي
طلبت منها تسأل بتها توافق على باسم اذا تقدم الها لو لا وتحاول تقنعها
،
ما قبلت ورفضت رفض قاطع واجهتني بيه معتذرة باسم مثل اخوها
- سارة هذا طبيعي للغرسوه داخلنا الاهل حتى نتعايش ، لكن لو صير و تجتعمون تحت عقد قران راح يتبدل كلشي
كانت كاعده كدامي بالهول ، عقدت اديها على صدرها
سارة
- ما اعتقد هذا صحيح وانت الاعرف ادم المفروض تفهمني اول ما رفضت
فهمتها تقصد موضوع ابرار ورفضي لنفس الاسباب ، سديت السالفه وما وصلتها اله و وصيت امي لا تكول اله اساسا محد يدري غيرنا احنه الاربعه أمي وامها وهي ،
اشتاقيت اله هالمعجون بماي الكبرياء اشلون كدامها انضرب شهر كامل ما يوصل للبيت امي راحت لعون من نزل مجاز اهناك واستمر الحال هروب منه ما يوصل للبيت لمدة شهرين
،
بدت الاتفاقيات تحاك بين الطرفين انسام وابنها و خالتي بناتها تم حصر الاملاك اما تقسيمها بينهم بالعدل او تباع و توزع اموالها على الورثة ،
اما شغلة افلوسهم الي يطلبوها الي ، المحامي كال مدام ماعدهم الورثة مستند يدل على انهم يطلبوك تكدر ما تدفع شي ! تثاقلت على ضميري الاحمال ، اجلت موضوعي الى ان احل الهم سالفتهم, شي طبيعي ما نبيع شي من الاملاك لكن نحدد كلشي تم بالتراضي خالتي كل همها تفصل امولها عن اموال بناتها ،
كنت كاعد بنصهم والمحامي وياي
بالاستقبال
خالتي والبنات الثنين و انسام
المحامي
- سعر عمارة الاطباء اكثر بمقدار خمسة وعشرون مليون عن سعر نصف البيت
احنه اتفقنا الخوات وعلي القاصر تتحول الى أسمائهم دونمات الاراضي الي يملكها المرحوم
ما صدر من خالتي غير نظرات نارية لأنسام الي كاعده وديعه ، بالنسبة الها ربح ما كان بالاحلامها لكن بالنسبة لخالتي خسارة بعد مشوار العمر وتعب
تلاقي شريك باخر المطاف وتكعد هاي الكعدة ،
الاراضي الزراعية انحل أمر توزيعها تفاوضن على كلشي شراكه و هنه حصصهن خالتي و بيبي من رصيد المرحوم البنكي ! لكن انسام ما كفت ارصدة فايز تثمن حصتها وخالتي اصرت تاخذ حصتها مال مو ملك الاملاك فقط لبناتها
اني سالت المحامي
-اي استاذ والبيت اشلون تسدد خالتي لأنسام والطفل بقى هو العمارة ما كلت طريقة تقسيمها الى راح يتفقون عليها شنو
المحامي كال يتنازلن البنات عن العمارة وامهن هم بعد مالها حصة اساسا العمارة تصير وحدها لعلي
خالتي
-شنو ليش هاي بس وارادها بالشهر مليونين ! ماليش تتساوة ويه البيت هيج وبناتي يفلسن
ابرار
-يوم مساحه البيت ٢٥٠ متر
وصح العمارة ٣٥٠
لكن الفرق مو كبير بين سعر اراضيهم احنه بمطنقه ارقى
ام ابرار
-لج بس مكانها امتيازي و عليها العين مأجريها عيادات الها وارد مو جامده مثل البيت
كلت الها
-خالتي احنه مو اتفقنا قبل ما يجي الاستاذ
-شتفقنا خاله انت ما كلت هيج بناتي ضاع حقهن
المحامي كال كل كلامنا مجرد كلام بعد حصر التركة اهدي ام ابرار
اخذتها بالصاله و انعيد بالحسابات
املاك فايز قطعه زراعية هي قطعتين وهو اشتراهم و دمج الدونمات هد السياج لكن بالعقار هنه عقارين مختلفين و عمارة الاطباء و ارصده بالبنك و هذا البيت ، المخازن اجار مكانن ملكه لكن لمدة اربع سنوات بعد وعنده افلوس بالسوك تجارته ابو ذياب ما وكفها
بدأ التخوف يتسلل لدواخلي من جهه خالتي حسيت اكو خطر وراح تختلف النفوس ، رجعنا كعدنا يمه
المحامي كال الها
- الافضل تتفقون اذا اصريتي على مشاركتها بالعمارة يتوجب عليج تتنازلين عن نصيب
قاطعتها انسام
- اشكد تطلع حصتي
حصتي اني مو حصة ابني
واشكد يثمن البيت هذا ؟
جاوبها واني التفت على وعلى المحامي ، منتظر خالتي تكول شي ينافي كلام انسام الي اقترحت عليها
انسام
- اني مستعده اتنازل عن حصتي بالعمارة
المحامي
-حصة علي ما اكدرين
- اي علي وياي بالبيت كل الحصة بسمنا و علي تظل حصته وياهم اذا عنده اني حصتي اريدها نص البيت
واذا اتريد ام ابرار اطيح الها
ابتسم المحامي وكانها كاعده بعلوى اطيح
المحامي
- شطيحين
مو الف لو الفين هذا حقك
-ما كلت اتنازل عن حصتي كلت اتساهل وياها بالمقابل انطيها العمارة الي اتريدها هي وبناتها و اني و ابني ناخذ البيت و اني اساهل وياها بحصتي بالعمارة لان اكو فرق كلتو بالاسعار و همين ابني انت اتشوف هي اسدد اله تتنازل من حصتها جا هي مو اخذت افلوس
سكت المحامي وبعدها اقترح على
ام ابرار
نصف البيت يروح بصالح انسام و العمارة لخالتي لكن اكو فرق يندفع لعلي فقط انسام تاخذ نسبتها كلها من نصف البيت وحصة علي يكدرون البنات ينطوها من خلال زيادة عدد نسبة حصته بالاراضي
اني بس نظراتي اصد خالتي المتردده وابرار واهز براسي الهن شتاخذ انسام
طلع المحامي واني رجعت الهن
كلت الها بحزم
-انسام اشوية بس اريد احجي ويه خالتي
كامت راحت
كعدت يم خالتي
- خالة اتفقنا البيت اصلا ما يدخل التقسيم من البداية ينحسم امرة الكم
ام ابرار
-يخاله اني شسوي بالبيوت والعقار الي يجيب وارد ينفع بناتي اكثر
-سكنهم ملجأهم حتى بعد الزواج وبالمستقبل اشتري منكم هيج خليتي بتفقنا اني وعمي
سكتت
وجهت كلامي لابرار
- وانت ابرار شو ساكته !
ابرار
-يوم ناخذ البيت
ام ابرار
- العمارة ما اكدر افرط بيها يمه وسمعتيها كالت اتساهل وياكم
هاي فرصه حتى املاكم تصفى شي ينفعكم للعوزة اني شسوي ب٢٥٠ واكفه (تقصد نصف البيت)
اكدر اخذلي بيت صغير ماعندي غير سارة
الكلام اتبدل والطمع غير النفوس
ادم
-خاله نسبة انسام راح اصير البيت ابنها ماله شي بيه حصتها راح اصير راح اتبيعين لمتنا الها شسوين بالفلوس ؟
ضربت النفاضه و كمت معصب يم الباب وكفت و التفتت على خالتي
- لو ادري تعبي هيج راح يضيع فلا ادخل هاي الدخله وياكم
وحده من الشارع راح تشاركني
ام ابرار
-يمه خل انكول اقبل بالبيت انت منيلك بالمستقبل تاخذه مني اتريد اذا انت ديونك هسة ما شفنها منها شي
اهنا كمت احجي بحركه وبعصاب
- اني اريد اطلعها بهذا التقسيم الطايح حظه راح تشاركني مدى العمر
هاي الي ما طايق شوفه وجهه شريكتي ليش خاله تتنازلين عن البيت بيت فايز لهلدرجة ما طايقه عيشتج بيه ليش كولي كارهته لهدرجه
اتبيعيه واتعيشين ويه اختج وحده غريبة الله بلانا بيها
أريد خالتي تفهمني كاني احجي ويه الهوى ،
التفتت لكيت انسام واريه واتباوع الي بنظرات ما فهمتها
اضاهر كانت بالصالة ف وكفت وراية
تحاسبني بعيونها على كلامي ،
رفعت حاجبها وهزت ايدها ما اعرف على شنو مستهزائة ،
،
بعد فترة زمنية تحول لكل شي رسمي اشتغل المحامي على تدوير الاملاك
عمي ابو ذياب بعد سجن ابنه سنوات ماله عين يحجي والبقية هو جان يقويهم و يحثهم محد كدر يحجي او يدخل المال اله اصحاب و العدواة والقطيعه ما زالت قائمة
،
خابرت باسم خالي ما عنده بنات بس اثنين اولاد طلاب و ظال يمهم باسم الاسبوع الي ينزل يقضيه بعون ما زال هارب وتاركني
-راح اظل اعايش ببيت خالك
ما تجي
- شتريد مني عوفني بعيد عن مشاكلكم
طفيت الجكارة و وكعت من النفاضه فائضة من كثرة القطوف !
سعلت
-الو ادم كولي اشلونك ؟
شنو جاي تبجي لك لو تكح
ادم
اشلونك ياب
-محتاجك !
نطقتها بضعف و بمرارة الايام والي يمر عليه بيها من بؤس
سديت الخط كانت الساعه ١١
صعدت لغرفتي لكيت رضوى نايمه . كعدت يمها ولعبت بشعرها ، طالب راحة بالها ،
نزلت عن السرير وكعدت على الارض اباوع للحياطين صارت شريكتي انسام بيهم اليوم ورسميا (مر وقت لتدوار الاملاك قانونيا )
كدامي الساعه اعلنت وصولها لرقم ال٢ بعد نص الليل واني اعيوني مساهرة رفيقة الغدر ، ليش يا خالتي ليش
ضربت براسي
اندكت بابي . باوعت الساعه قاربت اصير ال ٣
فتحتها ورضوى كعدت تشكي
-هاي شنو ادم منو
صار بوجهي باسم
يمسح عن وجه العرق
- لك خليتني اسوق من غير تكيف سيارتي ، يحتاج صيانه
اكلك عندك فد ٥٠ مبتك خل اصلحها
يفرك بصدره ويحجي
واني ما زلت اباوع اله بنظرات حانية وهو نزل احواجبه
- تنطيني لو اروح
سوة حركه بأيده بمعنى ما ادري وحرك امتونه
-حقيقا مدري شجابني لا تخاف عندي باجر اوديها
تركت الباب الي لازمها و احتضنته ذاب تعبي و مقسم الهم بينا !
_________________________
انسام
-ولج ردح ردح نهاية اردحي
بالغرفة بالليل ندوك ونركص على اغنية لفي بينا يا دنيا
اني ونهاية اليوم اتحول البيت اقصد نصه النا
-لج نهاية البيت النا صار شوود عيني
نهاية
- ولفي بينا يا دنيا
سلوى كاعده اتباوع لجنونه وتمادينا بتعلاة الاغنية وأصوات ضحكنا تتعلاة
- لج نهاية صرنا اصحاب املاك
نهاية
- اي عيني مبارك وهلا عيني شوود
شلت شعري وكمت اهز ركبه و افر بشعري بحركه دائرية
فرحي كانت الدنيا اصغر من ان تحمله
وجهك عليه خير يا علي يا ابو عيون حلوة كمرة بليل اظلم نورت حياتي يروحي بيت ابوك صار الك ، والله لاخليك كبيرهم ملجأة الهم الي كانو رافضيك !
طلعت نهاية تغسل وجهه ورجعت كالت
هذا ادم شفته بالصاله لهسة كاعد يدخن عبالي ما يدخن شكله كيكه
شفايفه ما صابغهن الدخان!
-ما شايفته من قبل يدخن ، بس باسم يدخن
مو مهم خليه بحاله واحنه بحالنا !
-هاا هيج صارت ! مو هذا الي جنت اكولين معجبة بخلاق...
-اش لا تكملين ، لا معجبة باحد ولا شي اني مرة محترمة نفسي عايشة لابني شريفه شنو هذا الكلام
شايفتني ابصبص على الزلم
زمخت بيها صديتها بطريقه عجبتها
رفعت زيجها وتفت على صدرها
-تف تف خرعتيني كبيتي بوجهي شكلنا يا الخضرة الشريفه
-شريفه غصبا ما عليج
ما عليكم كلكم اشرف منكم كلكم
ما سوي شي محد يدري بيه
كل الموضوع انتم محد يدري بسوالفكم ما مكشوفه
الله يفضح شكو واحد يستقل بيه !
احجي بحركه وبدفاع عن نفسي ماله مبرر خليت نهاية تصفن عليه
نهاية
-جبح خربتي الليلة
__________________________
سارة
من طلع ادم ابسرعه خابرت امي خالي الي بنفس الحي ساكن بس بغير قطاع
يلحكون على ادم الهاد بعمري كله ما اتخيلت ادم هيج يصير شكله اتمنيته صدوك يكتله بس محد يحاسبه !، كل ضربه بجسد باسم كانت كرة نار تنرمي عليه ، اتعلمنا احنه وياهم عائلة وحده ودمنا واحد ،
اضاهر متلاحكيه مصار شي ،مؤسف مفرح عصام شارد الكلب
كنت بالدوام ما شفته مع الاسف من طلع ورجعت جان نايم ، رحت نمت كعدت سألت عنه كالو راح لعون فد انهضمت ملحكت اشوفه ، اضطريت اتصل بيه ما رد عليه اضاهر ما خازن رقمي الجديد من عرفت بخيانه صديقتي غيرته وما اعتقد اذكر بيوم طلبه مني او اني انطيته اله ما بينه كلام خارج البيت ،
ولو بالفترة الاخيرة فارد وجهه و يحاول يحجي وياي طبيعي مو معصب كالعاده يمكن حاله حال اهلي كاسرة خاطرة !! وصار يتقرب مني و يقبل يوصلني
غاب عن البيت اهواي ، شنو من كبرياء عندك يشبه والدي تقريبا مثله هسة لو بس اشوفه وافهمه احنه اشلون انشوفه !
حصصنه الورث اندار من اسم بابا الى أسمائها وانمحى اسمه من الحياة ما بقى غير على ضهر جناسينا ، من كانن أمي وابرار يتفاوضن على ملكية البيت والعمارة اني دموعي تتدفقت بمدمعي
بودي اكول الهم ما اصبرون اشويه بلكي يرجع ! لا تغيرون شي !
بس حدث العاقل بما يعقل، خليت السالفه ورة امي هي تعرف مصلحتنا
ما همها امي البيت اساسا اتريد بيت قرب خوالي تبتعد قدر الامكان عن انسام لان ادم حتى اذا اخذنا احنه البيت يريد يسكنها ببيت قريب علينا لخاطر علي ، علي الي بدت مشاعري تنحدر اتجاهه واشوف بعيونه روح بابا
يمكن الي يسمع الي حكوله راح يبصم بجنوني بس اتخيل دوم من علي يباوع الي روح بابا داخله تتبعني من اخطي من يمه ،
شفنا زعل ادم منا بسبب تنازلنا عن البيت ، وما حتى عاتب ماما و ما دخل بعد شال ايده خوالي ساعدو امي ، الاراضي شغلتهم حطول اشوية
بس العمارة اندارت بسمائنا اني وابرار
والأراضي نسبتنا اقل من علي ، هو اكثر واحد ورث بينا كلنا لان الولد الي بابا كان يريده من ماما بيوم ،
بيومها شفت علي يلعب بالهول اخذته وشردت لغرفتي كالعادة الاعبة وارجعه!
ثاني يوم الصبح طلعت من غرفتي وصادفت باسم
جان على الدرج دينزل وكفت كدامه مبتهجة
احسه سمنان اشويه ديتحول الى ثلاثيني بهاي الثلاثه اشهر زايد وسامه ورجولة بشواربة المصصفات و بس لحيته خفيفه بسبب عمله ،
لابس فانيلة رياضية اعتقد بادي يلعب حديد هيج توقعت هو اشكد عمره هسة اعتقد دخل ب ٣٠
خطف من يمي
-هلو سارة
على الطاير كالها كأنه ريح وهب من يمي
-باسم
هرولت حتى اوصل يمه
- وين رايح يمعود مشتاقيلك
-منو اتقصدين مشتاقلي
خرب احرجني
-شنو منو مشتاقلك !، اني وكلنا نسيت انت من هذا البيت
كانت عينه على الارض
- شرايده هسة !
كالها بجمود
- راح تستقر اهنا لو هم اتروح لعون
- حسب
- ها على راحتك
راد يروح
صرت مقابيلة
- باسم اني حيل معجبة بشجاعتك وقوتك
عينه البنية صدت بعيني العسلية
- تنزل من السيارة فاتح صدرك ما شفت الخوف بعينك ولا بحركتك من نزلت .
حك شعره واعيونه تتلفت بالممر
-ما يحق الك تغيب هاي الغيبة كلها انت بنظرنا كلنا بطلنا الي نعتمد عليه
ظلت اعيونه تتبع اعيوني وايده نزلت كانه جمد صنم كدامي
اعتقد تفاجئ كوني دوم اتحاشاه
- تبقى المحامي مالي
اتراجعت خطواتي للخلف بس وجهي عليه ، كلت اله كل أحاسيسي ما نيمتها خوفا من الخسارة قبل الميعاد مثل ما صار ويه بابا
- صدك باسم من باوعت الي وانت برة واني بالسيارة
شفت بيك بابا
كلتها ولفيت ودرت رايحه للمطبخ
.
للعصر اجتني امي وهم فتحت موضوع باسم ، كنت بغرفتي ادرس
السنة الاخيرة الي عمري٢٣ واشهر
- يوم الولد هلمرة كال مو اخوه ولا امه
صابتني صدمه باسم بنفسه طلبني !؟
-باسم !
انيشبه ابتسامه تعجب ضهرت على وجهي
- ماما باسم رادني ، عجيب والله مابيوم حسيت يفكر بيه غير مثل خواته !
كمت من كدام ميزي الماليزي
ولفيت بالغرفه وافكر بصوت مسموع لامي
- ماما لا يكون لان اليوم حجيت وياه
بس مجنت
-شحجيتي وياه
-هيج كلام عادي ماما
باسم مو بالي ولا غيره ، اني طلعت من تجربة يرادلي دهر الا اكدر افكر اعيد مثلها ،
-ميخالف سارة فكري ابن عمك ما يتفوت
-بعدني صغيره على خوض تجربتين! انتظر جرحي يلتأم والله يوفق باسم بالي احسن مني ،
ضجت حيل عليه واشفقت الرفض هسة راح ياذيه ادري ، اوف ليش فكرت بيه يا باسم ،
امي ما ردت اله خبر وظلت تضغط عليه ،
ثاني يوم الصبح كعدت على صوت امي وانسام يحجن ، كمت طلعت شفت انسام واكفه كدام غرفة امي
ام ابرار
- ما حلت بعينج غير غرفتي
-والله يا ام ابرار غرفتج من اكبر الغرف وبيها حمام داخلها جناح مو غرفه مثلي واعتقد البيت بيتي صار
ورة الريوك فرغيها الي
كالتها و وصلت يمي وكالت
-وانت هم غرفتج تلزمني لاختي و بت خالتي اريد اعزلهن عني وغرفتي الحالية انطيها لعلي وبس
صفنت مذهولة اباوع لامي اشوفها شسوي ، سكتت، وهي تدخل الا كالت الها ، بس شهر زمان ونطلع من البيت كله لا تعجلينا انطينا مجال
-حصبر اسبوعين بس لخاطر اني بنت اصل
فاتت من يمي انسام وعلى وجهه ابتسامه صفرة
الضحى كالت اريد اغير البرادي ما عاجبني المزيج مالتهم ابيض و اسود ذوق رضوى محلو
خالتي كالت الها
- بس قبل شهر غيرناهن جدد على ذوق رضوى تدرين
- الها الطابق الفوك تلعب بيه مثل متريد اني هم اريد اخذ راحتي ببيتي !
طلعت من المطبخ مضايقه صرت بالفعل هذا مو مكاني
باسم التحق وما اخذ خبر مني
وبعد اكثر من اسبوعين احنه جهزنا ملحق ببيت خالي جهزة النا احدث اثاث على ذوق امي و اليوم لازم الملم غراضنا الي بالبيت
اجانه خالي الي راح نسكن يمه ياخذ جزء من الجنط ، عفته كاعد بالهول وهم امي عافته وراحت اتحضر الجنط اله ،
اني صعدت لفوك و لابسه ثوب برنسيسه و لافه شال باهمال باجر ننتقل ، مضايقه ماكو بصدري هوى تغيير مجرى حياتي فوق طاقتي تحمله ، سمعت باسم اضاهر نزل مجاز
جنت واكف فوك كدام الدرجات اكو رفوف على الحايط كل محتواه خاص بينا دا اخذ تحفيات و اشكال اثريه حلوة واحط بكارتونه ،
ما حسيت الا وباسم ورايه بلبسه العسكري
يأسر على خطوط ببدلته
-باوعي باوعي اترفعت وصرت رئيس عرفات هههه الترفيع الجاي اصير نائب ضابط جولة اسرح ما معقولة ههههه
-هلو باسم حياك الله ،
رجعت التفتت على الرف
بكسران خطار كلت اله
-راح نشيل باسم حنعوفكم
غصبا عليه دمعتي واتحول صوتي لباكي
- دكولي موافقة وفضيني
التفتت عليه مستغربه !؟
____________________________
باسم
مالي قوى اشوف اهلي بعد الي صار والي ماحب ينذكر ، يصعب عليه تذكر طيحتي كدامها تمنيت من صحيت لو روحي زاهقة وصاعده لربها ولا تصحى اشوف اخوية او وجه امي مكسور بسببي ، كيف سارة الي صار كلشي كدامها ، اول ما طلعت شردت لخالي
ظليت يمه منا من اتصل بيه ادم جنت اعرف اخباره و سالفه البيت الي قالقته واخذ انسام لنص البيت ، ما ضجت حيل ولا حزنت مثل ادم ، خليه البيت ياخذه علي هو زلمتهم وبيت ابوه الاصح يبقى مفتوح بيه بس ادم ما يشوفها من هاي الزاويه حيل ماخذ موقف من امه للطفل ، رحت اله حسيته محتاجني
بالحديقة بعد الكعده و العتاب
تبادلنا الاراء باالي صار كلمن اله وجه نظره هو حيل ماخذ نظرة على انسام على انها خبيثه و عدها كمبيالاته
- لا ما اعتقد انسام وحده فطيره ترة و صارت مدمغه ترة بسبب فطرتها خالتها استغلتها والضروف ساعدت
سحب مني جكارتي و هو يباوع لكدامنا على النخلة
-تؤ لا انت ما تعرفها اني عندي نظرة بالناس ، وعرفت من اول ما كالت الخزنه مو يمي ،
عدها وضامتها هالحرامية
- هسة انت مو ساعدتها و وكفت يمها شغيرك
- لعلي وكفت مو الها ابد مو الها ، اذا عمامك طلعو امه عاهرة اشلون راح يواجه المجتمع
ابد مو الها سويت الي سويته
وهاي خالتك الطمع غيرها
وما وكفت ويانا ، تتوقع هاي الغريبه راح توكف لك شوف اذا ما طلعت طامعه بالبيت كله ولهيج ما طلعت الكمبيالات
-بالعكس يا ادم جان طلعتهن و خلتك حاير اشلون اسدد وتكدر اعتقد حتى اسجنك . تريث لا تحكم عليها
- اتراهن وياك يا باسم مو مثل ما متوقعها حية جوة تبن خاتله
- واني قبلت الرهان ، بس لا اظل شايل حمل مالي داعي ، هاي علي راح يظل دوم جوة اعيونا .
،
نزلت الصبح و اجيت اروح لعون واول شخص مشتاق اله كد قطرات نهر دجلة وعدد الطيور التحوم حولة بربيعه ، شفتها واني خاطري مكسورة
اشلون اباوع بعيونها واشلوني اني بنظرها اتهرب منها والكاها كدامي اول شخص اصبح بوجهه!
فتت من يمها واني داخلي امنيات بداخلي تنسيني وتنسيها طيحتي كدامها !
صاحت الي وصارت ابصفي
كالت الي كالته مثل الي دتحجي الي قصة وردية تتلاعب ب تعابير وجهي تبتسم وياها و ابلعها للابتسامه وترجع تحيها من جديد ، اااخ كالت معجبة ياريت عندي ربع جرئتج يبت عمي ياريت بس
كملت كلامها الي مثل النبيذ خلاني طاير على الغيوم هايم وسلطني
وعدل المزاج وريحت الروح
رجعت ودكيت الباب على امي ما انطيتها مجال ودخلت لكيتها تغير لابوية
ابويه
-ما تعرف تنتظر ولك هتلي مشتاق الك
اتباوس وياه وبست ايده وضربني على علباي( القفا)
-هاي بس الك العلبة نازله تضربها
وكفت كدام امي
ضربتني على صدري
-هيج باسم اتعوفنا واتخليني اني اروح الك واعوف ابوك زين من ذكرت عدك اهل ،
بستها و وكفت كدامهم
- لا تاخذوني بكلامكم انت وياه اثنينكم اريد اعرس
خطبولي سارة !
امي حطت ايدها على صدرها
-اشبيج يمه قابل كلت اكتلها ترة اني خوش اوليد والله راح ادريها لبت اختج ، اصلا شوفي وسامتي
احرك حرك بشواربي
وصدك دخلت نادي وكمت حتى بالجيش العب حديد
اريد هالعضلات تبزغ
لا اضحكون عليه بعدني هسة
ها شكلتو
شفتهم مصدومين
-اشبيكم ، اشبيج يمه المفروض انت اتركضين ورايه ترة عجزت وراح اعنس
-اتريد سارة !؟
واخيرا حجت امي
-اي واشبيج هيج اتكوليها ، سارة اميرة وابنية تستاهل مثقالها ذهب
شفتها اتباوع لوالدي بضياع
- اشبيج يمه ، ترة اني بنفسي اروح لخالتي قابل مستحي منها
طلعت من غرفتهم واتريكنا ، كلت لادم بالكراج ، جان يريد يروح للدوام
-٠أشبيك انت الثاني اتوقعتك تفرح شو مثل امك تنحرت .
- لا ابد بس متفاجأ ،
- لا تتفاجئ انت بعد ضروفك تحسنت بعد ضياع الكمبيلات
- تتوقع اني ضميري يسمح الي
-اهوو هسة عوفنا من سوالفك
اليوم تحجون ويه البنية ترى اني مستعجل
-الا سارة ، البنية فاسخه وتدري نفسيتها بعدها تعبانه والنذل ازوج صديقتها
-اني اعدلها لنفسيتها، وبعد رجائا لا تذكر هذا الموضوع كدامي ، صارلها مده قابل البارحه واني كبرت ، اخطبوها ومعليكم
- باسم شوف اني مرة جسيت النبض و حسيتها ما عدها ميول الك ، يعني اشلون اني وابرار
ابتسمت بثقة حقه ما سمعها شكالت
-خجل بنات راح احاجي اني امها واعلكها عليكم حتى لخالي كنعان اكول(خالي الجبير)
فات يوم كامل وما سمعت حسهم لاهلي لو ادري اشبيهم حتى لخالتي كلت وما شفت رد يشفي ، البنية من كلامها مبين عدها شي تجاهي ويحق الها تدلل انتظر هاليوم ولو صار عليه بطول نومة اهل الكهف
ورحت للدوام وخبصت امي واني اهناك وهي اتكول اصبر يمه اصبر
خلصت دوام وحل نزولي ، اجه كتاب بترفيعي رحت
بلبسي العسكري الحني و التبني الها واني مقرر بنفسي احجي وياها
لكيت خالي وحده كاعد ياكل فواكه سلمت عليه و اترخصت بس ابدل واجيه ، والكاها كدامي اتعدل بالرف ،
رحت الها
شفت حزن بعيونها بلعت ريكي و سكنت ترددي و طويت مخاوفي بتلاقي الرفض وكأني راح احكم على نفسي و انهي الجلسة بنفسي بلا او نعم
سالتها واني منتظر الاصدار شنو يكون قبول لو نفي
شفتها استغربت من كلت الها
دوافقي وفضيني
- طلبتج للزواج ليش الرد تأخر كولي اي حتى ما نخليكم اطلعون ،
نزلت من التخت الي صاعده عليه حتى تلوح الرفوف و صار الدرج خلفها
- بس باسم فاجئني انت من طلبت ايدي ما توقعت بيوم تخطبني
-ليش مو رجال
-لا لا هاي شدخلها بس انت مثل...
شفتها تماطل وسكتت حلكها قبل لا يدس السم بالعسل وايكول انت مثل اخويه
- اني احبج واريدج
جانت اعيوني اتباوع والها بتفرعن و قوة وحده و ركبتي تهتز بارزه عروقي كاني حققت معجزة ، جنت منتفض لان فاض بيه وهي ماتحس ، جنت اريد ادخل داخلها واكول لنفسي اي واريح نفسي ما راضي بلا وابد ما رايدها للكلمه
شفتها توترت وانتقل الها الارتعاش رجعت رجلها للخلف ما لكيت نفسي غير واني لازمها من خصرها محتضنها على جسدي ! حاميها من بايات الدرج الي اجت توكع وتدربى عليهم
راسي يم ركبتها
-دوافقي
ودسيت خشمي بعنگها
كنت اشم نسيمها وثملت بلمسة محرمة!تسوى عقوبة جهنم ونارها
خالي صار بوجهي جوة
خالي
-لك باسم شسوي !
الصورة الفوك حضن باسم لسارة 👆
يتبع
اللاصت باي اشوفكم بعدين لو مو طاوات عليه جدورة تتراكع اتأخر اذا شفت خمول يلا ديرو و صوتم على ١٨ وهذا هم لكم مو عيب باسم وادم ما ماخذين مركز بين القصص لهسة
ترة ٢٠ تبدي الرومانثية (بلثاء) بالقصة
وها هاي القصة جزئين هذا اوشك على الختام و مشيت وياكم بخوش فصل عبارة عن اجتماعيات الثاني رومانسيات لاني حيل اهتم بتطرقاتي الاجتماعية اكثر من العاطفية ولحد اتكول توها الاحداث بدت تحلى باحثه فقط عن الحب و تظلم ما كتب ب ١٩ يحزني جدا الاثارة الي واضبت احطها بين الاخوين ما مأخوذة بعين الاعتبار
صوتم وادعو صديقاتكم للقصة وبالفيس ايضا من يسألون البنات عن قصص رشحوها اعتقد تسوى 😂 الفصل مقدارة ٤٣٤٩ كلمة
تحياتي
زهراء العراقية