مساء الفل
ملاحظة مهمة
النشر بين يوم ويوم . و يعتمد على التصويت ينزل بوقته ام لا
ما كلت يومي لكن كلت يصير البارت الف انزل بوقته ما اخره. الحمد الله نجحت المساومة وترة من ساومت ما مانة عليكم الشاهد الله بس اعرف جمهوري الا بالمساومة مع الاسف ولا تخافون ينزل بوقته والدليل وصل الشرط تحقق ، جميع البارتات القادمه الف تصويت ينزل بموعده بين يوم ويوم نشري اعيد واسفة غلطت وياكم بشغلة عصام مو ليث الي غلط على ابو ادم و ادم هد عليه باسم اشوية الاسماء دوختني . اذا البارت قصير يطلع عدكم احذفوه القصه من المكتبة ورجعوها يضهر كامل
ودمتم بخير يارب
أهدي لكم اغنية
ابلغ عزيزاً في ثنايا القلب منزله ..
بصوت فايا يونان
تمثل أنسام !
باسم
طبيت مثل الي يطب ميدان حربي
وهجمت على ابن عمي وبگلبي غصة امد يدي عليه بس الدم ما شفعله يغلط على ابوي الا اكسر راسه هالاجثم ، مطلته على الارض وضربته بوكس ، هو مجان متوقع احد يهجم عليه وهم فقد توازنه ، ظليت ماطله وهو يتلاوة وياي ، صعدت عليه بس ما كدرت اضربه بعد ايدي ما تنطيني ، ذياب راد يدخل وكف كدامه ادم ، واشر برجلة على عصام
- ما جنت اريد انمد ادينا على احد بيتنا بس الي يطاول على كبرينا (يقصد ابوي) هذا مكانة
ركز عمي على رجل ادم الي اشر بيها على ابنه
خله ذياب عروق رگبته تتفرقع ابوه لزمه وادم طردتهم
كمت عن عصام و گاملي عود يريد يهجم عمي ابو ليث وادم لزموه
طلعو برة مع تهديد ذياب و اخوه
عصام وكف بالحديقه وكال الي
-مراح انساها الك بالعلي العظيم يا باسم
عف.... ط. .. ت (صوت يطلق بالفم معيب صدوره )
زين عاد البنات ما طلعن للحديقة وشافني واني مستبيع
.
صار عرس ابرار وتم على خير ، انسام واخيرا صارو ينطوها حقها والحمدلله
سارة رجعت تداوم بنتظام
بيوم جنت مجاز وطلبت منها اوصلها وصلتها وكالت من ادك عليك تعالي كلت خوش
،
جاي عود وببالغ ذروتي اتقرب منها واني كل قواي عرضت توصيله بدل الخط وطول الطريق ساكت اذا احجي اتلاغه وياها على بلاطوها المجسم رفيع على جسمها بس بيه فرو بمتنه ، لو مكياجها لوالاسود الي لابسته حرام مو حزن على ابوها ويه بياضها اغراء صاير ! فسكتت ما عندي مواضيع
بالرجعة دكيت اغنية لنور الزين جانت حماسية
سارة ابصفي كاعده ، غيرت الاغنية الى فيروز كيفك انت جانت اول مرة اسمعها اجيت انام عليها صوتها مال واحد يمه المخده ، كل اشويه انطيها نظرة ،
تهز راسها ببطئ و اشفايفها تتحرك مع كلمات الاغنية من غير ما طلع صوت
يطلع الها تسكن بهاي الطريقة بگليبي ويحق الها احفي عليها هي الاساسي على كولة فيروز وبحبك بالاساس
دندنت
-بحبك انت هيدا انت ملا انت
سمعت ضحكاتها الخفيفة ادغدغ القلب وترد الروح
سألتها بعقدة احواجبي
سارة
- ههههه لا هيج هيج لا تعصب عفية
اضاهر تضحك عليه نسيت نفسي وفلتت مني سرحت بمرعى العشگ وصرت ادندن ويه فيروز
ضحكت بصوت على روحي اضرب على الاستيرن واضحك لهلدرجة اتخاف مني صار وجهه اصفر
- اشبيج ولج دخلتي بنص هدومج اني هيج اخوف
برطمت
-ما اشوف وجهك اشلون ينقلب يخوف يومه الله لا يراويك شبيهك
خلت ضحكي يزداد ! ما اعتقد كله من كلامها بس اكو فتحة بالروح دخلت الها طاقة شهية كبيرة بالحياة وراغبة بالضحك و الونس منسيتني اني منو وهي منو بس لأنها يمي استعمرت مشاعري الفرحة ،
عكبنا سيطرة وعلى الشارع السريع ، حسيت بسيارتين دبل قمارة بدن يكسرن عليه لو اني سايق ممتمكن جان فلت تحكمي ، ردت اطلع راسي وافشر بس البنية يمي
سارة
-شكو باسم هاي شنو
اضطريت اليوف على الفلكة و اطلع من غير شارع عكس واجهتي السيارتين ورايه كسرتني وحده طلعت الي من احد الفروع واني جنت بالشارع الخدمي نازل وكفتني وسارة خايفه
- باسم راح انموت
-ظلي اهنا مهما صار لا اطلعين راسج
-باسم لا تنزل بروح بابا لا تنزل
فتحت الباب وخزرتها
-سارة لا تنزلين ولا اتمدين راسج
سديت الباب شفتهم همه نزلو من كل سيارة اربعة جثمين السيارة الثانية رابعهم عصام !
__________________________
أنسام
اجاني الليل و بس صورة ذاك الرجال تطري ببالي وشاغله فكري ،
لامست وجداني مشاعر غريبة لاول مرة احس بيها مثل العذراء !
سمعت خطوات على الدرج ، حطيت شال على راسي و مديت راسي لانه مقداد ، سديت الباب وخيبة الامل انرسمت على وجهي المتعوب من ايام الجوع ، وين الدنيا مغيبتك عني وانت بنفس البيت وياي مدا المحك اليوم، الصبح الا شفت ادم كاعد يتريك ويه امه ومرته
يهنيالها عليك ، رجل متزن و مثقف و وسيم وشاب !
من نهد وكفاته وياي ما احس الا وهو محتل فكري ، اهتمامي بشوفته زاد، اعجابي حتى ببروده المغلف ، وياي شي و ويه ابني شي ثاني اب ، اب مو بس لابني لأخوته لابوه لأمه !اب للكل محتضنهم تحت عبايته احس كلشي عنده محسوب اتعارك ويه عمامه وعاداهم لخاطر اولاد فايز ، ابرار عرسها بعد ايام لاجل يزوجها تحمل ضغط عمامه عليه ومحاربتهم ،اني هم قضيتي وشهادته الي
احسه ديضحي وهو ماله اي مصلحة بينا ! حامي الضعن كله مثل ما يكولون اهلنا رجل بمعنى الكلمه اه ليش الله هيج زرعه بيه وهو محرم عليه وحرام كل فكرة اتوديني اله اني ارملة عمه !
*
قبل عرس ابرار بيوم من ابن خالها
سمعت ام ابرار اتكول والله اذا راحت انسام ما احضر عرسج يا ابرار ، هذا الكلام بالهول واتصيح حتى اسمعني واني بغرفتي ، طلعت ورة ساعه شفت ابرار بالمطبخ و الولد همين ياكلون فواكه باسك وادم
كلت الها ما اروح واتحججت بمرض جذابي هي ابسرعه فهمت وما لحت لانها بموقف محرج امها ما تريدني عرفتني سمعت امها ،
بيوم عرسها الكل راح حتى سلوى اخذتها ابرار ، بس اني بقيت مع انو جان بنفسي احضر عرسها بنفسي اشوف القاعه بعمري مشايفه شكلها غير بالمسلسلات بعمري مشايفه كوشه عروس مزينه ، ناهيك عن الكراسي الي احنه نخليهن و نجيب شرشف ابيض بعراسنا نغطيهن بيه !
اريد اشوف شنو هذا البوفيه الي يحجون عنه يعني شنو مصممة افراح ! شنو ديجي مدري ديدي، ناسهم اشلونها لبسهم كلش اشلوهه ،جان بنفسي اشتري الي ثوب و ادخل صالون بعمري ما مكيجني صالون بزواجي الاول انعام مكيجتني هي خوش تخط عين ،
ندكت بابي فتحتها طلع
باسم
- الاستاذ علي مطلوب
- ها تاخذة وياك
-اي هو يسلم اخته ههه
ضحك باسم
جاوبته بخاطر مكسور
-خاف يضايقكم
-هي فكرة سارة وهي تتورط بيه ورة الزفه ما تطلع
كلت بتعجب سارة !
ابتسم
-اي هي اتريده يحضر و هي جابت اله هذا القاط رفعه كدامي ، قاط عرسان يومه على حجمه مدري اشوكت ماخذه قياسه ؟
اخذت القاط و لبسته طلع امير ،اوليدي عمره ١٠ اشهر الا ١٠ ايام ! فديته وفديت طولة والله ،طلعت بالحديقة الورانية شفتهم باسم وادم وعمي كلهم قوط ، ما همني الوان بدلاتهم گد ذاك النسر الجمهوري الواكف ورہ كرسي ابوه من لمح علي اجاني
يواش يواش يا ابن امك (قاصده ادم )
بسمته الي مثل الطيف اوالحلم لان اعرفها لعلي مو الي واني اتخيلتها الي للحظة رحاب الروح شهگ من طخ ابهامي ايده وهو ياخذ الولد مني ،
بالضبط مشاعري مشابه لعلي الي يصفك باديه وبفرحة ملك الكون من شاله ادم ، نفس فرحته اليوم فرحتها لاني مرحت وياهم للعرس واتكحلت عيني بشوفة ادم بكماله اليوم ما احس بيه نقص ! كلشي مركون بمكانه وقصة شعرة المهذبة نظارته الطبية قاطة الجويتي ، اكو تغير بلحيته اشوية مخففها اضاهر من زين الصبح غير تعديلات بيه، واكفه على صفحة وبس اعاين ادم
باسم
-علي شوف امك راح تاكلك بنظراتها هنيالك اني امي اذا شافتني كاشخ اتفركع حرمل تخنكني
عزة انتبه عليه و عيني الجسرة ما ترضى تنزل، يا باسم اني بودي اطركع الروح الي انحرفت على اخوك !
وانتهى عرس ابرار على خير الحمدلله العمام استحو على دمهم وما دمرو البنية اليتيمة رجعت سلوى توصف الي عرس مدرستها ، بالمطبخ ودخل ادم سكتنا اثنينا اعيونا انحرفت عليه وهو اخذ جهازه ناسيه على الثلاجه وطلع واحنه نتبع خطاويه ، التفتت على سلوى
-اكلج يعني ماكو لفات كباب عروك بالعرس شو ايدج فارغه عبالي اتكرفين الي لفات، اتكرفصين لي شيلة جكليت لج سليوان
جانت اعيونها صوب الباب
-اشبيج ولج
سلوى
-لا هيج هيج شكلتي ! شنو كباب عروك هو مجلس للأمام العباس قابل !
كعدت الصبح اريد اصلي شفت وحده كدامي تركع!
-سلوى !
كمت وهي اصلي بستها وحضنتها حيل ! ارتاح بالي من شفتها كدامي بحرام الصلاة ماي زمزم ونزل بزردومي ، دفعتني بخفه وكالت حعيد من وراج
.
ثاني يوم هم اتعاركنا اني و ام ابرار عادي شي من الروتين وهم بوسط عركتها طردتني ، لمحو الي اكثر من مرة على طلعتي من البيت لكن وصلت رسالة غير مباشرة لادم بيد باسم اني ما اكدر اطلع مالي احد !
تمسكت حيل بكعدتي اهنا لأجل سببين الاول كاعده على گلب ام ابرار ببيتي وابني يتربى بيه والثاني طاعة وانصياع لأحاسيس ناعمة خضرت و جاي تنمو غصبا عني !
صرت اكعد الساعة السبعة ، سبعة ضبط ما يلحك يميل الميل وينزل هو بخطاويه من غرفته ، امه الي اسوي اله ريوك تكعد من بعد اذان الفجر, مرته لو تنزل وياه لو لا ، كالعاده لابسة صاية او عباة خليجية كانها ثوب اسود عريض و شال ع شكل شيلة الفه على وجهي الكمثري هالمرة من الصبح حطيت باودر ، معرف غيره! دققت بمطنقة حنجي حتى اخفي النهر احسه مقبحني ! واستعديت هذا الحجي من السته ونص بس نزل طلعت وراه منصاعة للمطبخ , شفته حط ملزمه وخلع نظارته الطبية وكعد
ادم
- يوم بس حليب
ام ادم
-يمه دكلك لكمه
-اكل بالمدرسة هسة ريكي ناشف بس حليب اريد
كلت بتودد واضح
-اكعدي خاله كملي ريوكج
جانت تتريك بيض سلك ابسرعة كعدت هي ،و كمت فورت حليب
ادم
- حطي هيل !
اوف زين عاد تنازلت وطلبت مني التفتت عليه جان راجع لابس مناظرة ويباوع للملزمة يقرا بيها ، لفت نظري اسمه عليها شنو هاي هو مألفها والله مفهمت شي هو يألف كتب !
كالت ام ادم
- اتبده يا
درت وجهي على الحليب فار و عدم الطباخ ،
التخمت وانحرجت صارت حركتي سريعه اوف بينما اني اعاين و ملتهية اعيوني بيك سرحانه ما تهون عليها اعيونك الحلوة لابسه نظارة اتفشلت بس لا المرة انتبهت عليه اعاين ابنها بتفحص ،
حاطه السفنجه امسح و اباوع للحليب جبت كوب دسكبه
حسيته طلع من الممر
-ادم صبيته وين؟
ادم
- تأخرت !
طلع واهتم لهتافاتي واني اقنعة بس يشربه على الواكف
امه كالت ما يحبه شايط ، مو اهنا المصيبة دخلت مرته وشافته ع السنك
سألت خالتها المن كالت الها اخذيه ماله صاحب ،
اني جنت اباوع اله وهو يطلع بسيارته
التفتت شفت السوسة تشرب بيه ، يا خسارة هالرجال بيج والله نفسته بعد
خابرتني نهاية تتوسل تجي يمي هم خطية هالبنية محد يدك بابها انهجر بسبب اختها وزوجها الديوث و خالتي الي ما قصرت وازوجت عن جديد متعه ، خالتي من اتوفى زوجها لليوم تتزوج متقطع لأجل تقبض المهر وفترة وتتزوج هم بعد ما يخلص الوقت و حتى عدها صديقات هنه هيج شغلهن واشوية من كبرت كعدت
وكلت بس هسة هم لفت ع شايب اضاهر يكولون بكال بالسوك (بقال)
بس اني مو مثلها , العالم الله الحوجة خلتني اسويها ابوي مربيني الرجال وامي خوش مرة من اتوفو طاح حظي !والحمدلله ما كملت بالزواج المشبوه ، ترة حتى فايز اتوسلت ياخذني بعقد سيد ما ردت محكمة وما قبل،
المهم عوفني من الماضي ، قبلت تجي لان امها الشفية اتريدها تاخذ ابن الي مزوجها متعه وهم متعه ! عادي البنت تاخذ مؤقت بس بعلم ولي الامر الاب والجد بس خالتي الله مسلطها علينا غضب ، اجتني العصر ، دخلتها و ام ابرار اتلكتني
-خير اشعندج جايبه النا ناس
-مثل ما يجوج اهلج عندي اهلي وها خليها ببالج نهاية ضيفتي محد يحاجيها
دردمت علينا وراحت ،
نهاية
-لج هاي صاكه ترة
-دنجبي عجيز شنو صاكه
الا تكتشف البيت ست نهاية ، فريتها البيت فرة بسيطة ، دخلنا للحديقه وجان باسم مدد ويلعب بتلفونه
كلت اله
-هلو
نهاية ورايه واكفه اكرص بيها
باسم فز
- ها
كام متفاجيء سأل
-هاي بت خالتج؟
-اي نهاية
-ليش خطية اسمها هيج
ضحك على الاسم و نهاية تضحك بخبال وياه كرصتها اتهدي ضحكتها فضحتنا
نهاية لزكت ما تمشي عن الرجال هو شال باكيت جكايرة و تلفونه واترخص
من يمنا
شو هاي نهاية لافت وراه لزمتها
-ولج !
-عيب عليه ما ارقمه هيج
جريتها تهجع
- لا تفشليني ولج
،
اعترضت ام ابرار يم ابو ادم ما تدري بيه ماخذه اذن منه وسابقتها ومسولفه اله معاناة نهاية فما انطى بيه و ماتت غيض هي ورضوى مبين من وجهه طالعه روحها مني ، كامت ما تنزل من طابقها بس وكت الاكل البيت صار وحشه من غير ابرار ، و اوحش من ادم ما ينزل من فوك ! ولا اعترض كالعاده ما مهتم ،ومرته غدية حتى بالعطل تاخذه وتطلع بدال ما يكعد ويه اهلة من يجي من الدوام يضل يمها ما صار يكعد ويه اهله حتى مرات ياكلون فوك او برة حتى ام ادم دوم ضايجه منها ويكرهنها سارة وامها ،
اما باسم اسبوعين بدوامه ويجي اسبوع حطيت عيني عليه لسلوى گلبت عليه ههههه الصراحه متسرع و طباكات و صغير علية !حتى لو بعمري يناسب سلوى ، بس ادم شي ملفت اكثر منه بس صدك اتمنينه لسلوى تعيش مرتاحة
كلت هذي العبارة كدام نهاية
- ياا شنو سلوى انطهيا الصغير واني الي باسم وانت هم كافي عزابيه لفي على ادم واخذيه على شرچ هههه والله رضوى هالعنطزية ( متكبرة ) ينكسر خشمها
-لج محرم عليه جا اني متانيتج تنشنين الي !
- منو محرم ام الفهم قابل جنتي ماخذه ابوه لو جده يثولة العم حاله حال حكم الاخ اذا مات او طلك يجوز الج تاخذين ابن الاخ
-والله صدك عود ؟ الا اسال شيخ شككتيني
-لج ماكو داعي اعرف وحده مزوجه ابن اخو زوجها من مات العم
،
رف رف گليبي لهذا الخبر الغير متوقع واني اكول روحي ولا شهكت للحرام بيوم! طلع يحل عليه واني الي اجر حسرات بس هذا اشلون التف عليه ؟ حتى يمكن بعده ما يطيقني لاجل ابني متحمل جهرتي ومرته قمر
.
ثاني يوم گبت عركه بيني وبين عقيلة(ام ابرار) ماكو داعي اذكر اسباب
بس اجه ابن اختها ادم طلبت منه يمشي بتقسيم الورث ، وغصبا ما عليه راح يقسمون الورث بينا !
بس راح اطول الشغله ماعدهم ولا مستند !
شفت ادم خطية كال اخذ اجازة وامشي بالاجرائات ، يعني مهما أخر التقسيم هو صاير صاير خل اريحه خطية
رحت اخذت الخزنه وصعدت لفوك ، دكيت بابه واني عواطفي متشتته ما بين الانجذاب اله و الخجل منه ، تجاهلت گلبي الخايف ودكيت مرة لخ
الساعه تسعه بالليل
افتح هو الباب
-ها شتريد ؟!
عباله واحد من الولد من شافني اتسمر كدامي واتسمرت حواسي ذابه ثوب الخجل ،لهفتي واني اشوف غير متكلف خلت اعيوني تتجول بكل انحاء جسده وهو ببرموده و فانيلة تك تعلاكه بهذا الشتا، ضيقها بارز صدرة المفتول ! و حبات عرق خفيفه تغطي شعراته ! بهذا الجو الدافي ما اكدر اكول بارد ،
اما شعر راسه كان ممبعثر من غير جل نازل كله على وجه ، حسيته صدرة يعلى وينزل كأنه كان على فرسه يتسابق !
اعيونه على الخزنه الي بين اديه واعيوني على صدرة لا اراديا مني كنت متحنطه بتشبيع نظري عافني وراح رجع بأقل ثانية لابس قميص
- اتفضلي
اشر لكدامي ، حتى نمشي ع الصالة الي كدامنا ، ما تحركت احاسيس انبثقت بشنو جان يسوي وليش ارتبك حبيت ارتباكه روحي هايمه بعيونه السود ما تبين نرجسية بالليل ،
- ام علي ؟
كنت اضاهر اهز براسي و شفتي ترتجف من ذاتها
ادم
-ليش اتهزين براسج تعالي فهميني هاي شسوي يمج واني ادورها اشهر وانت ناكرة هي يمج
كانه كام يحجي حتى تخفف اعيوني ذهولها بيه و ادخل وياه بالموضوع لكن لا حياة لقتيل العشگ شمرت الخزنه على اديه لزمها واجت توكع منه احتضنها على صدره
حروفي ما ترضى تطلع مخنوكه بماي وجهي حسيته حس عليه من سد زر قميصة تركته ورايه ما ادري شيسأل ونزلت مثل الطيارة الحربية راكضة لغرفتي ، اضاهر يعرف الرمز
و كل محامي على معرفته و مشى باول اجراء و وقعنا كلنا بس علي بالوصاية الي عندي راح تحدد اله حصته وحصتي ،
نسيت اذكر الكم سارة والتغيير الفضيع لا تدخل تعارك ويه امها ولا تنفخ ولا اتذب كلام ، بس احسها مكسورة خطيبها عافها وانكسرت شوكتها تستاهل والله ، الله يسلط على المتكبر متكبر !،
_________________________
سارة
اتخيلو وياي اغنية فيروز بصوت باسم
ما كدرت الزم رباط جأشي وصرت اضحك رغم الاسى ، اضحك رغم الانكسار بعدني زين بيه ضحكات ما طالعه عبالي خلصت من اتوفى بابا و وخاني الحبيب واختي راحت لحياة جديدة هاي كل التغيرات صارت من سنة ٢٠١٥ الى سنة ٢٠١٧ ،رغم شتانا الدافي جنت لابسة بالطوه فرو اسود ، وكاعده يم باسم هو عرض عليه توصيلة رغم محب احتك بيه بس وافقت خوفا منه بصراحه حيل اخاف منه ! خاصه من شفته ضرب عصام الضخم باسم قوي وعصبي حيل ، مرعب بس حباب ، خوفي اروح وياه لا هم يطلع الي شي زميل ويرجع يصير بينا تماس ،
المهم خنست من شفته صافن عليه واني اضحك بعدين طكها ضحكة وياي شكله كليا تغير من انفرج زاد وسامه و ألفه الصراحه مدري اشبيه خجلني من فرط ضحكته وكرمه عليه اليوم ،اباوع للدفتر الي بايدي وهم ابتسم ، انقطعت ضحكته من حسينا سيارة تربد بينا و ما اعرف شنو صار بس عكبنا سيطرة ، سرعته زادت كانه يريد يلحك يوصلنا لبر امان يكلي اسكتي لا اصيحين
واني صرعته شكو ما شكو
من التفينا حول الفلكه وطلعنا من شارع معاكس عافونا عبالي كلشي راح وبديت أساله ليش وشكو هاي السيارات المظلله تكسر علينا ،
حاطه اديه على صدري الي يريد يطلع من اضلاعي من كثر الخوف
كلت سترك ياارب ، سألته
ما يجاوب اول ما طلعنا ومشينا مسافه طلعت النا من جديد واني كمت اقرة المعوذات قربنا على مدرسة ادم الي اصلا ما تقرب لبيتنا بعيده ، باسم بس يريد يتخلص منهم طلع بينا كبل لاي شارع و همه بس وحده ورانه صارت
وصلنا لشارع شبه فارغ هو يطل ع مدرسة ادم باغتتنا سيارة مظلله الثانية من فرع جانت بيه تمشي بطرق مختصره صارت كدامنا وكفتنا
ظل يوصي بيه باسم واني ارتعش واسال واتوسل لا ينزل
صاح بيه هزيت راسي خايفه ،
ونزل الهم اني ازحزحت لكرسي القياده كعدت بيه و اباوع من الجامه المغلقه ، هذا عصام وياه زلم سبعه
ضخمين وبعضهم سمان كدام باسم اندفع گلبي من مكانه واجه يروح لليمين من شفت واحد بيهم دفع باسم
ميله اجه يوكع وصمد ما وكع مدري شنو يحجي وياهم
كمت اضرب بالسيارة بلكي عصام من يشوفني ما يأذيه (عصام جان يريدني واني صغيره دلوعه بابا رفض وكبل انخطبت لغيره اتخبل وبهاي الفترة ازوج وطلك وبعد السالفه انتست وخطب اختي ونفس الجواب لكه
محد باوع الي واني ادك بالجامة غير باسم
اشرلي بحاجبة و حط اصبعه على حلكه بمعنى اسكتي
ظليت ادكدك حيل واشوفهم هجمو عليه وبثواني اتحول من مهاجم وياهم الى فريسه بينهم ما واضح شكله بنصهم صار كمت اضرب بكل قوتي واعصابي اتقطعت ويه كل ركلة يركلوها اله وهو ايده على راسه وعلى الارض واكع ، وكعته بالنسبة الي مثل ليلة سقوط بغداد و الجلاوزة من نهبوها اضرب واصيح بروح شايغه
-ولكم عوفووه
قافل السيارة عليه
- لك باسم كوم ، كوم
حقراء عوفوه
عصام رفعه وضربه حيل على قفصة الصدري كأنه صدري الي اكسر وياه
ايدي على گلبي لا يوكف من شدة نبضة وبس دموعي جرت طيوف كل ذكرياتي وياه مر شريط حلو وانعفس الشريط واني اشوف حارسي مرمي على الارض شفته تنزف ويه كصته و خشمة
ركبو سيارتهم ، بس عصام من شافني
اجاني فتح الي السيارة بسويج باسم
- عود خابري سبع البرمبة يجي لاخوه
هاي مدرسته بس شارع بينا
ضحك
اني مثل المجنونه اتخازر وياه جنت تركني ونزلت باوع الي ولباسم دفرة برجلة على خاصرته و ولى سمعت أنينه ركضت اله واني اباوع للمحلات الي معزله الساعه ب٢ الضهر اساسا هاي المناطق السكنية اصير هادية وناسها ما مطشرة ارعش و امسح بوجهه بطرف شالي
لزمته بأثنين اديه وحطيت راسه بحضني
اشهك واحجي
-باسم جاوبني ،
قربت راسي على راسه وامسح عنه التراب والدم بطرف شالي
اباوع بكل الاكتار بلكي الكه احد ، ماكو طلعت تلفوني من جيبي واعيوني على باسم الي غايب عن الوعي ! ،
ابجي واحجي ما يفهم مني شي ادم
-تعال تعال اتعرضو النا احنه ب **
كلت اله المنطقة ، وباوعت ل لافته مخزن جملة طالع من بيت، قريت اسمه و كلته اله واني اصيح مو احجي
-عفية تعال
باسم باوعلي شسوي
دنكت عليه وكمت انحب راسي ع راسه ودموعي تنزل على خده اختلطت ويه دمه الي ما يرضى ينقطع عن شفته ،
اجانه رجال بسيارته اضاهر موضف مرته وياه نزل النا ، طلع بيته اهنا راح طلع اولاده و اخذو باسم للبيت
واني وراهم والرجال يسال بيه
-عمو اخوية ديرجعني والتمو علينا زلم ضربوه
ادم وصل يم سيارة باسم طلع الرجال دخله جان باسم بس يأن واني فوك راسه بصالة الناس واكفه وابجي بفرط
وهمه يمسحون اله جروح وجهه
دخل ادم رحت اله ذبيت نفسي على صدرة
-كتلوه ادم كدامي
وخرني و راح لاخوه
طلعنا لصديق ادم فتح عيادته لخاطرنا و ضمده جان مختنك حيل ، نقله لمدينة الطب لخاص اهناك حطو على الاوكسجين و ايده بيها خلع و راسه تخيط غير الجروح ، اني ويه ادم بكل مشاورية خابر خالي يجي النا و اني اخذني للبيت
جنت مخروسه ادم بس يتحلف ويقسم على عصام الطريق كوله واني اعيوني على اطراف شالي الي فكيتهم وكمت امسح بيهم دم باسم المتيبس
ما يبين اللون بس قطعه يابسه بالشاله صارت
وصلنا لكينا خالتي و امي يلوبن اتلوب
ادم شو ركض لغرفة امي !
دخلنا وراه اني وامي طلع من الخزنه الي حاطه ادم بغرفتها بعد ما ضهرت عند انسام
طلع منها سلاح و ركض واحنه النسوان وراه و خالتي اصيح
- يم ادم لا اضيع نفسك
دفعها من صدته و طلع من البيت بسيارته !
خالتي اصيح
-ولدي راحو ضاعو ولدي
اديب ولدك ضاعو اثنينهم
يتبع
المدرس الي كل خطوة يدرسها الف مرة شنو راح يسوي هالمرة وهو بقمة غضبة وهاد بالسلاح ؟