لَيتَني أستطيع أن أُسافر عَلى الفور، أن أُبُعَث بَعثاً جَديداً ، أن أحيا حياة جَديدة .
دوستويڤسكي تمثل أنسام
أدم
وكفت السيارة و غمضت اعيوني رافض اشوف النتائج ، امنين طلع بوجهي هذا
رفعت راسي ، شفت ماطورة كدامي ما بيه شي وهو هم واكف ، اللحظه جانت عسيرة من اتوقفت لكن عدت على خير
نزلت من السيارة
-ما تكلي امنين طلعت الي
رفع راسه مبتسم بحلاوة روح
- جنت مستعجل خوية اعذرني
-لو صاير بيك شي مجان ابتليت اني.
صارت زحمه ودكه هورنات اطمنت على سلامته وراح لحال سبيلة و صعدت انطلقت لبيت صديقي معزوم و وقتي ضيقك كلش يادوب ساعة ونص للفطور
وراها عندي مواعيد بالمعهد
___
انتهى رمضان و رحنا لبيت جدي هو متوفي بس بيبي بعدها عايشة ام ابوية وسلمنا عليها
ورجعنا اني والبنات خواتي
بسيارتي خواتي و بنات عمي بسيارة ابوهن ،
رجعنا لوالدي و الغده كان ضخم لأن خالاتي اثنين خطار يمنا و اجواء عائلية حميمة العصر طلعت خواتي صارت مهمتي لأن باسم ملتحق . رحت وياهن لمدينة الالعاب وسحلت مقداد ويانا. خواتي رؤيا و اطفالها و فاطمة و سمر و بنات عمي ابرار و سارة ابوهن وياهن رقيب الهن ،
،
كدام الطلبة .. شباب وبنات كاعد اصحح بالاختبار خلصت أخر ورقة ، و ووزعت الارواق الهم ،
صحت بأسم بنية دائما توزع الي ابتسامات !
اخذتها وراحت كعدت ، لمحتها ما زالت صافنه عليه ما شافت رسوبها !
مرحلة المراهقة صعبة جدا ، تذكرت مقداد و سوالفه هليام هادي يصوم من غير صلاة ! بس احسه متخارب ويه شلته من دخل عليهم باسم وجماعته هاجم ،وعايل
____________________________
سارة
نايمة بفراشي و المغذي مشكل بأيدي وبابا كاعد يمي
امي كاعدة على الارض تسبح . باوعت لبابا وكالت
-ابو ابرار شوف الموصل شو مجاي ينزل الها ؟
وكف بابا وكال
- متحرك هذا ،
حركه و مدري شسوة اله رجع ينقط
كال
- همزين رجع ينقط ما بيه اروح اصيح للمضمد مرة ثانية
كعد يمي من جديد
-شجرالج بابا ما اتحملتي صيام
اعيونج صفر
دمعت
- باجر ماكو صيام منا من تصحين ، امنين اجانه الفقر الدم ، شنو يبوية ما تاكلين عدل
امي هدت عليا
-اي ما تاكل فطورها اكل عصافير وما تاكل لحم ، ما اشوفها صفراوية
حظن باطن كفي و باسها بحنية
-بوية دربالج على نفسج واكلي لا تخربين علينا
بجيت ما اتحمل ابد حنيته الغزيرة علينا
شابكت اصابعي مع اصابعه وغمضت حتى لا يحس بعيوني دموع هايجه وما اعرف الها مبرر
دخلت ابرار
- يوم خالتي اتصيح الج
كامت امي الها وطلعن ظليت يم بابا ، ومن صار الفطور ، كوموني جبرا اكل وياهم مو بفراشي ،بابا يحب لمة العائلة
امشي على كيفي ،
بابا
-كومي بوية سمرقد (هي اسمها سمرقند احنه نختصرة بسمرقد واكثر شي سمر)
كوم سمر و اشرلي اجي يمه
كعدت يمه
- ااه
حسيت بودخه فضيعه
حط كدامي الشوربة
جنا حاطيه ع الشرقية دك المدفع درناه ع قناة كربلاء ننتظر اذانه يأذن من داخل العتبة الحسينية الا نفطر ،
باسم
-صبي الي لبن فطومة ، وياج وياج
ادم اليوم معزوم ماهو على السفرة ومكانه ثغرة صايره يسوي جو من يكعد ،
عمي حاطيلة مخدات مثبتيه عليها و زوجته يمه
اذن واخيرا
ابوية وهو رافع اديه كال بصوته الجوهري الحنين المبهج
- اللهم لك صمنا وعلى رزقك فطرنا ولصيام غدا نوينا اكل واشرلنا ناكل و اكلت وياه تمر ثلاث تمرات اساسا اني مفطرة بعد ما اتخربطت اليوم بالمطبخ واغمى عليه عندي فقر دم حاد مع هبوط ،
شرب لبن
وكال
- ذهب الظمأُ، وابتلَّت العروقُ، وثبت الأجرُ إن شاالله
الكلاص ثكيل مال اللبن ايدي تتهزهز ، كف كبير انحط فوك كفي لزمني الكلاص
-بوية اشبيج ركيكه حيل ،
شربني ابوية اشوية من اللبن وكلت ما اريد
ابرار
-بابا مو حيل مدللها
ابتسم
-بنت الگعدة اخر العنقود
باسم بعتنرة و استهزاء كالعاده
-شجاج ما تكولين النا كل رمضان يصير وجهج نومي بصرة
سمرقد ضحكت بصوتها العالي الرفيع
حتى امي تضحك صارت
بس بابا ياكل
باوعت اله بغل وعلى الي يضحكون عليه
داكل تمن و انتبهت لباسم الي كام فجأة
- يوم ادني ، افطري لهسة ما بليتي ريكج
- خل افطر ابوك يا يمه يعاند الا يصوم
-ادني يوم
ادنت كلمة باسم امة ما تثنيها ، و كعد يم ابوه يوكل بيه بدقه وعناية ايد يوكل وايد يحط ايده جوة حلك والده لا يوكع الاكل ، عمي اديه ترعش خطية صارلة ٨ سنوات مشلول بسبب موت ابنه الصغير كدام عينه ما اتحمل وانجلط وهذا حاله ، عمي من جان صاحي هو الطيب البسيط الي مايكول لا و ابوية جان يقود بيه بسيط جدا بفكرة وقراراته ،
-هاي شسويتي .
اخذني اعجابي بتصرف باسم من وكل ابوه وعاف نفسه رغم جان طول اليوم يضجور من الجوع والعطش !
باوعت لحظني موكعه التمن عليه .
دوخر بيه ، بابا سوة لفة دجاج و وحشرها بحلكي
ما امنطيني مجال للرفض ، اكلتها
-لا لا بابا لا
قرب الخاشوكه وخزرني اكل
-اكلي كل يوم واكعه ، اريدج اصيرين سباعية بابا
وكلني على ايده كم لكمه ،
مقداد اكل وادنى اشوية وانجطل (انطرح ) على الارض لازم بطنه
-اويلي انترست اكل
امه ضحكت عليه
كمت اغسل ضاحكه على الوضعية مالتهم كلهم كسلنوو
صليت و رحت انطرحت ،
دخل والدي عليه
- شنو بوية هم دختي ،
- لا بابا بس منعسة شو
-نامي بوية نامي ولا تنسين المقوي اخذيه
هذا فيتامين الج خوش
بوية اسمعين
-اي اي
اشكد يلح بس احبه ملحته ،
راح وترك الضوة مفتوح
-بابا سدة يووه ،شكومني
صوته وهو يبتعد عن الغرفة
-خليه خاف تحتاجين شي
خرب هسة اكوم وافتحه اذا اريد شي اوف ياربي ،
،
كعدتني امي من عز نومي حتى اخابر بابا واكله لا تتأخر ، اتصلت بيه طلبت منه ما يتأخر ويجينا ،
احس امي شاكه بيه وما تتجرئ تتصل بيه اصلا ما يرد عليها صايرة بينهم ثغرة من اخر مرة قبل سنتين راد يزوج عليها و كان علينا يريد ولد حجته بس امي راحت لهلهة وعندت على الطلاق و ما خلته يزوج شاف عائلته حيل تأثرت و خربت
الزواجه حتى يرجع امي و يلمنا ما ازوج لكن تغير عليها من جبرته غصبا عنه صار ما يتحمل كلمه منها اوف هو بالنسبة الي الاب المثالي بس مو الزوج المثالي لأمي بعد ما شابت وكبرت قبل وقتها من التعب والشغل والكراب الي ويه اهله هي وخالتي ام رؤيا(ام ادم يصيحوها ام رؤيا كون بتها الكبيرة رؤيا ومرات ام ادم )
صارت ما تملي عينه ! رغم هو ازوجها عن حب ! ،ما رجعت نمت طار النعاس من عيني ، كمت
شفت الساعه ب ١٢ بالليل كلت خل ادخل لبطني شي ، حطيت الشال على راسي و شفت ادم كاعد كدام الميز و حاط اديه على راسه دايخ ، خطية دروس تقوية ينطي طول النهار لدفعات تتناوب عليه طلاب الخامس الي ناجحين للسادس يتحضرون
لل١١ هو عنده دفعه ولد يجوه للمعهد ب ١٢ هسة اضاهر توه راجع
- ادم راح اسوي لنفسي حليب اتريد
-ياريت
وكفت كدام الطباخ فار الحليب ،
صبيته و درت وجهي على ادم
شفته حاط راسه على الطاولة ومغمض
- ادم ، ادم
فتح وفرك اعيونه
- ت اني نعست حيل
كام و كالي
- وديه لباسم بالهول اني اشتهيت النوم
بس شصعدني الدرج
راح واني حطيت الكلاصات بالصينية واتجهت للهول ، شفت باسم مالي النفاضة كطوف و يلعب بلي والجكارة بطرف شفته
باوعلي صفح
- انت شكعدج ،
-ممكن تنزل رجلك عن الميز
وخرهم اشبيك دحط الحليب سويتلك وياي
خزني بنظرة مفهمت شنو سببها دومه معصب وما طايقني
حطيت الصينية على الميز بعد ما وخرهم وكعدت يمه
- خنكه يمك دطفيها
-اشعدج جايه يمي ،
بعدين شايفتني اغو جايبة حليب الي
- سويته لادم بس نعس وكلي اجيبه الك
-ما احب الحليب ،
اخذت كلاصي ، و بلشت انفخ حرارته واشربه واباوع للواعيب بالشاشة
-انت ريال مو
مجاوب
- باسم ! انت ياهو منهم ؟ يا فريق دتلعب
نفخ انفاسه بتضجور
-اي ريال
- ليش ما لابس ابيض لعد
زين هاي شنو ثلوج دتنزل ؟ انت دتحطها
-اسكتي هدفو عليه من وراج
زجرني كالعاده
اخذت كلاصي و وكفت
- انت ليش تكرهني ؟!
خزني بحواجب معقوده واعيونه غاضبه ورجع يلعب
عفته ورحت لغرفة فاطمه و سمرقد ابرار يمهن ادري بيهن ما ينامن ورة اذان الفجر ينامن و يجرنها لل٢ الضهر بصياح امي وخالتي الا نكعد ،
رحت الهن ديتابعن مسلسل مصري
فاطمة
-ها لج صحيتي ؟!
- اي دشرب حليب و وديت لهذا الحقنه وفشلني
ضحكت فاطمه
- لا تندكن بيه دومه عصبيي
- ما ادري ليش احسه يكرهني ،
انفخ بالحليب الي اصلا مبيه دخان
- من جنا اطفال جان يدللني و يدافع الي ليش من كبرنا ابتعد عني ، اقصد عنا و صار حدي ؟
فاطمة
-ههههه وانت هم ما اكعدين راحه بس اداهري وتتحرشين بعصبيته ، ما انسة فصلج الناقص من سميتي كلبتج باسمة
ابتسمت متذكرة شقاوتي من جنت بالسادس اعدادي ، هسة ثكلت و نضجت اكثر
سألتهن
- شنو احداث هالمسلسل
محد جاوبتني ماخذه عقلهن المسلسل ،
كمت من يمهن رحت لغرفتي اخابر فرزدق احسن الي
،
خلص الشهر الفضيل واجانه العيد اني نصة ما صمته مريضة وانطلبته ، عدنا عادات نكعد الصبح ما نلكه ولا رجال بالبيت ، حتى عمي ياخذه ادم للجامع ويروحون لصلاة العيد ، لكيت ابرار اتصليها رحت توضيت و صليتها ، طلعت من غرفتي على ريحة البحت والدهن الحر اااه يا ريتي اشكد حبيت ريحتها . طبعا البحت مو كل العوائل اتسويه . اهل بغداد يجيبون كيمر وكاهي والبعض ريوك عادي ، بس احنه ماخذين عادات بعض الكربلائيين نسوي تمن بحليب بالدهن الحر .
شافتني واكفه يم باب المطبخ ماما
سلمت عليه وبوست ايدها وعايدتها
-يوم اشوكت ناكله
- غير يجي ابوج و عمج والولد تقصد مقداد و أدم
رحت للغرفة حطيت اشوية مكياج و انتظرت الاهل يلتمون ، دخلت ابرار عليه سلمنا على بعض ونضحك !البارحه جنا نتعارك لان غلست وما غسلت مواعين الفطور وياها
اجوي من الجامع ، دخل بابا واني بغرفتي اتحضر اشلون اسلم عليهم واسمع اصواتهم
طلعت شفت ابرار اسلم على عمي وادم واكف وراه
لمحني بابا وابتسم الي ،
رحت اله خجلانه منه لو اعرف ليش ينزل علينا خجل اول يوم العيد ،فتحلي اذراعاته وحضني مثل بت السبع سنوات يتعامل وياي بابا ، بيومها رحنا لبيت بيبي ورجعنا الضحى خالاتي تغدن يمنا والعصر رحنا لمدينة الألعاب
صعدت وية بابا مقص الا اصعده اصريت
خاف عليه وهو متردد جدا وصعد وياي ، اني اضحك ومتونسة هو بس يصفن
نزلنا
سألني
-ما خفتي ؟
- لا بابا ابد
واضحك
-اني خفت لا الحدايد يطكن علينا
ضحكت بصوت وهو جان لازم ايدي ،جنا قربنا نوصل للكافتريا الي بيها الملتقى
اجانه فرزدق سلم على بابا وعايده و عايدني بس بثكل . بابا كعد و فرزدق اترخص منه واخذني ورحنا اني وياه نمتشى بين الهوسة
- شو تتمضحكين
-هههه سمعت ضحكتي . مو صعدت اني وبابا وخاف من اللعبة ههههه
-يمعوده سدي حلكج ههههه اشحلاتج من اضحكين بس ضجت من سمعتها عالية
ابتسامتي شقت الوجه .
لمحنا ادم واخواته ومقداد واكفين سرة على لعبة عربة الموت او سكلة الموت
-خل نصعدها عفية فرزدق حباب
ما صعدو ادم وجماعته انتظرونا انصير بنفس الوجبة واتوزعنا ع العربات .
كل ثلاثة سوة
احلى شي سمر ضامه راسها بمتن ادم واصييح بصوت . وفاطمه ويانا اني وفرزدق هادئة
من نزلنا مقداد اعيونه بكصته ما طايقها
بس تتعارك وياه رويسيه
وصلنا لبابا كاعد يم رؤيا الي اعيونها حمر اول ما شافتنا كالت رايحه للمغاسل وكامت اضاهر كانت تشكي لبابا من زوجها المزعج ، مشيبها حيل صعب وبخيل
لليل راح بابا هو وادم لبيت زوجها اضاهر مسوي شي الها . وراها كلشي طبيعي ورجعت لبيتها من غير ما نعرف شي بس اكيد امي وخالتي يدرن
مرت فترة وقربت ايام الدراسة
___________________________
باسم
العب ودخلت عليه سارة بنحولها الي ما عاجبني شنو هذا خطيبها العار مزعلها ليش هيج هزيلة وماكو بوجهه الراحة،
بيدها كلاصات حليب ايدها تتهزهز اجت تفلت تصرفاتي مني واكوم واخذها منها واكعدها يمي ، ساورني شعور جبير اكوم امسح وجها الاصفر بلكت امحي شحوبه
وخرت رجليه واني اعيوني على الجيم ، تركيزي صار كله على جهتي اليمنة يم ريحة الملاك الي مجاورني بقنفة ابصفي حطت الحليب و كلت الها ما احبة احاول بكل كلمه اعاكس الي احس بيه لا تشعر بيه ، بس ابد ما ردت بيوم اوصلها مشاعر الكره ، نطقتها وراحت ، ذابت كلمتها كل برودي الضاهري و صار الالم يموج بصدري موجات مخيفة وهاجت بخافقي ذبذبات العشگ و اتعبت كاهلي بزيادة اني احبها للفطيرة وعبالها اكرها !
باوعت للحليب بتمعن
رفعت الكلاص و شربته كان دافي ما بيه حرارة جرعته جرعتين ما حب الحليب ولا مشتهي كونه صنع اديها تجرعته ودخلته معدتي برغبة ادخل اني بگلبها واقفل على نفسي ،
وحك العين واللام والياء احبنج حب فطري من طفولتي و نواعم اضافري وعيت وكلبي معلك بيج ، خليتج اتكبرين كدام عيني وحبيت مداهرتج الي و السانج الطويل و وكاحتج ، تفاجأت من اجه الغريب طلبج اكثر من مرة وانرفض
خفت اتضيعين من ايدي دزيت تلميح الج بيد فاطمه تلميح بصورة غير مباشرة و تأكدت اني اخو بنظرج تجنبت الاحراج وما حطيتج امام امر الواقع ولا خطبتج واستقويت بعمي الي كال الي اخطبها وما رديت عليه ! عرفتج هاوية غيري لا كرامتي ولا رجولتي سمحتلي اسويها ،
بس هسة ندمان كد شعر راسي ما سويتها واخذتج ولا خليت الغريب يدخل لبيتج خاطب ،
____________________________
أنسام
انتظرت وانتظرت وما اجه الي ،
اتصل عليه لو لا ، اووف شنو لهلدرجة ما معتبرني ينطيني موعد وما يجي بيه ضوجني ، خرقت القوانين واتصلت عليه .
ابسرعه رفض اتصالي !
شمرت الفون على المخده و كعدت على السرير بطراف اصابيعي لازمه راسي و اضافري اشربكت بين خصلات شعري ،
افرك بيه
اجتني رسالة ،
سحبت الفون
-بنتي مريضة مراح اكدر اجي !
فطرنا وخلصنا وكمت اغسل المواعين لافة راسي بحجاب و ادندن ، حسيت بباب الشقة ينسد ،
-منو بالباب نهاية
كلتها واني بمكاني احط بالسلة المواعين
دخل عليه فايز !
- السلام عليكم
-فايز !
-شسوين
حط علبة حلويات على الكاونتر .
دخلت خالتي
-هلا هلا با ابو ابرار توه ما نور البيت ، رمضان كريم حجي
رد عليها وحط ايده على متني وماشاني لغرفتنا ،
وخرت الحجاب عن راسي
-اشلونها بتك ،
-الحمدلله صارت احسن
- عسى ما شر عبالي مراح تجي ،
ابتسمت و فتحت شعري وهو ابصفي يباوع لعيوني
- صارلك اهواي كاطع
باسني من خدي
و راح للتعلاكه ينزع قميصه
- والله تدرين بداية الشهر الفضيل كله انعزم ، عند الاصدقاء والاقارب ،
نزعه و لبس كلبية واجه يمي جنت كاعده كدام الميز اتكحل
-حيل اتلوك الج الكحلة
ابتسمت اله من خلال المراية وكملت ،
راح للسرير وهو ممهوم
.
بينما اني ابصفة سرحانه بكبرته و الشيب الي متلحف ذقنه و شواربة الثخينه و التجعدات الي يم عينه ، وهو مدري وين فكرة سرحان مكان يباوع الي كان صافن على السكف واني منتجية على عجسي و اباوع اله بتواهان ، اكول منو هذا شعرف عنه ! يكبرني بعمر اشلون انجمعت وياه بغرفة وحدة ، شنو مستقبلي وياه طالعي شنو اعلومه وياه يا نهاية راح اصير نهايتي وياه ، احسة حنين بس أستغلالي ! ، رن تلفونه
-ناوشيني التلفون
سحبته من ع الميز واخذه مني ، جانت وحده اسمها سارة تدك عليه
- الو بوية
اشرلي لا اطلع صوت
- شنو بيج ،
ما أتأخر بوية ، خو ما رجعت الج الدوخه ، ارجعي نامي ، جاي جاي بس نامي
ابسرعه كام للحمام ، من طلع بدل ملابسة نفسهن الي اجاني بيهن ،
كعدت على سريري و لزمت ركبي بأدية
-شنو مراح اتبات
- لا
- ليش ، فايز صارلك ايام غايب عني ، مشتاقتلك حيل !
زين بس كلي اشوكت تجيني مرة لخ
ماكو جواب
كمت من كعد يلبس حذائة
- زين ممكن اعرف وين رايح لبيتك وهاي بتك الي اتصلت بيك ؟
وكف صار مقابيلي
- ما الج علاقة ،
تركني وراح
،
كلت بيأس لخالتي من رحت كعدت يمها
- خالة ما اعرف احسه من هسة بدة يمل مني
حاطه ايدي على خدي وبگلبي حركة من الي دا احسة ، وقتي نفذ وياه ، يعني هم راح اتهمش و اظل رخيصة
ادنت يمي صارت كلش ابصفي على سرير
وهمست
-احبلي و ورطيه
صفنت بوجهه
- يا حتى ابسرعه يذبني بالشارع ،
ظلت تنطيني نظرات تشجيع
-لا لاخالة خاف اشوف وجه الثاني يمعوده ،
غمزت الي
-سويها نسومه وكولي قضاء و قدر
- گلبي كام يدوك حيل بس من الفكرة اخاف اجازف
- بكيفج
كامت وعافتني بفكرتها دايخه ، تالي الليل ، افكر بيها
اذا خلص وقتي و عافني اخسر كلشي وارجع للشارع ، هاي الشقة اجار ، واذا احبل منه اورطه لو يزوجني علني لو اشوف منه وجه ثاني ، ما اعرف ما اعرف المصيبة وياي عسر و استغلني ! و وية بناته اشوفه بس وحده تتصل بيه يتغير جذريا ، حتى بالصدفة عرفتهن بناته سمعته يكول بوية ، بس ما اعرف عددهن !
المهم هو مسترخصني اخاف احبل و اروح ورة الشمس واحد قادر ،
.
انسام
رجعنا من المقابر
وسلوى اول ما دخلنا تضجورت وراحت تغير ملابسها ما عاجبها العجب هالبنت العصر اطلعها لمدينة الالعاب عسى ولعل يغزر بيها وتحجي وياي بدل ما دومها مطنكرة عليه ،
طبيت عليها لكيتها دتنزع البدي
ابسرعه رجعته ما نزعته
-شنو داخله عليه هيج
-اشبيج الي عندج عندي ترة واذا دخلت غريبه اني لو رجال
عوجت حلكها و اخذت ملابسها
-وين طالعه ، بدلي اهنا ، بس ردت اكلج حنطلع اليوم
-ما اريد اطلع
-حونسج
- ما اريد منج شي بس اطلعي اريد ابدل وارجع انام
غميتها و طلعت مو وجه دلال
صاحت ورايه
-لو ادري اشاجبني لهاي الدنيا وصرتي اختي !
مو وجه دلال
،
بعد ايام بينت نتيجة الي سويته والخوف والهلع تملكني ، لعبت بالنار وحطيت ادية بيها بجسارة ،الخوف والارتعاب من المواجهة طير مكان الفرح بگلبي الملجوم و سيطر على اعصابي التشنج و الترجي تعدي على خير ، فايز قبل يومين جان يمي و اليوم خابر وراح يجي ،
للساعه عشرة بالليل وللمرة الثالثه تجيني خالتي اتكولي احمي الج عشا
-ما اشتهي عوفيني بهمي الله يخليج
دخلت وكالت
-اشبيج اصيحين عليه ، فوك ما خايفه عليج ،
- بوية انت عوفيني بحالي . خالة اني جامده من خوفي عوفيني يا عشة هذا
-ترة من هسة اكلج اني مالي دخل مو بعدين اتكولين من ورايه
-يخاله عوفيني يا ناس اشك ملابسي عوفيني واطلعي
طلعت وهي تحجي عليه
اهنا سمعت صوته يسلم .
مدري اشبيه ارتبكت كمت من مكاني ورحت للتواليت ورجعت من غير ما ادخل ردت اطلع من الغرفة ، باوعت لنفسي بالمراية سمعت صوته يم الباب ركضت للسرير ، واديه ترعش كعدت اباوع على الارض اشتعل گلبي بلهيب الخوف ، نخيت الكاظم تعدي على خير
دخل وكأن ملك الموت داخل عليه يسحب روحي
-السلام عليكم
- هلا هلا ابو ابرار
كلتها و الهث وحاطه ايدي على گلبي
حاوط خصري ورفع راسي من حنجي
باسني على رصعتي
- شحلات الرصعة على الحنج
الخوف تملك هواجسي وعبث بگلبي اسمع كلامه وما حس بيه مثل الميته ، اعيوني شافت زويه تشرد بيها منه وكلت اله كاطعت كل كلامه
- حجي اني ، اني حامل
يتبع .
تاكات لصديقاتكم