Breaking the Rules (Mondragon Series #3)

Chapter Forty Three

Chapter Forty Three

Eliz

PARA AKONG pinagbagsakan ng langit at lupa sa narinig kong pagpapakilala ni Gael doon sa napakagandang babae na katabi nito at naka-pulupot pa rin ang mga braso sa kanya.

Hindi ko rin maiwasan na pagmasdan ang babae na nasa harapan ko mula ulo hanggang paa—ang blonde nitong buhok na kasalukuyang naka-French braid, ang may pagka-green nitong mga mata na hindi ko malaman kung totoo ba o contacts lang, ang hindi kalakihan nitong dibdib pero may katawang pang-modelo, ang itim nitong macro mini, at ang mahahaba at makinis nitong binti na hindi ko maintindihan kung talagang sobrang kinis lang talaga o sadyang nakakasilaw lang talaga ang mala-porselana nitong balat na halatang alaga rin sa mga mamahaling lotion.

Kumapara sa suot kong plain na blouse at pantalon, walang-wala ako kung ikukumpara kay Elisha.

"So, this is the one."

Muling bumalik ang atensyon ko sa mukha ni Elisha mula doon sa pagkakatitig ko doon sa paniguradong mahal niyang stilettos nang marinig ko ulit ang boses niya.

At hindi ko maintindihan kung para saan iyong pagtaas ng kilay niya at maging iyong nakaka-insultong pagtingin niya rin sa akin mula ulo hanggang paa.

Ngayon pa lang nasisiguro ko nang hindi ko makakasundo ang babae na 'to.

"I didn't know that you go from something like me to... this," halatang nag-isip pa ito ng magandang salita na gagamitin sa akin.

Napakunot-noo ako nang marinig ko ang pagtawa ni Gael doon sa binitawang salita ni Elisha sa halip na itama at ipagtanggol ako doon sa pang-uuyam at pangmamata na nakuha ko sa babaeng katabi niya.

"C'mon, Elisha! Alam mo namang walang makakapantay sa'yo."

Nagkibit-balikat muna ang babae bago sumagot. "Fair enough."

"Matagal na kayong magkakilala?" hindi na ako nag-abala na ipakita ang inis sa boses ko nang magtanong ako na siyang ikinataas ulit ng kilay ni Elisha at ikinakunot-noo ni Gael.

Nakita ko ang pagtataka sa mukha ni Gael sa inasal ko. Maya-maya pa ay tila nahanap na niya ang sagot at siya na kusang nag-alis ng kamay ni Elisha sa braso niya.

"Baby, it's not what you think..." sinubukan pa ni Gael na abutin ako pero mabilis akong umiwas habang hindi ko inaalis ang tingin ko kay Elisha.

"Did I somehow annoy you, Eliz?" tanong pa ni Elisha na may kasama pang pagsinghap at paglagay ng isang kamay nito sa tapat ng dibdib nito na tila ba siya pa ang naagrabyado dito.

"Hindi naman. Bakit naman ako maiinis sa'yo? Nagtatanong lang naman ako, hindi ba?" sabi ko habang ginagaya iyong uri ng tono ng pananalita niya sa akin kanina at nilagay ko rin ang isang kamay sa tapat ng dibdib ko at umarte na gulat na gulat sa akusasyon niya.

Biglang ngumiti sa akin si Elisha pero kitang-kita ko doon sa gilid ng labi niya iyong tinatago niyang inis sa akin.

"This bitch..." narinig ko pang sabi niya.

"Eliz, sandali lang." Napilitan akong humarap kay Gael nang hawakan niya ang braso ko at marahan akong pinaharap sa kanya. "It's not what you think. Family friend lang namin si Elisha. Importanteng business partner ng pamilya ang pamilya nila. Saka hindi ba ang sabi ko, girlfriend siya ni Eros? Kung ano man iyong naabutan mo, wala lang iyon! Nasanay lang talaga na ganyan si Elisha."