ضفائر صبريه

الحلقة ٤

تشاهدت لهنا وخلص احلامي انتهت لهنا و الموت جانا ...

الخوف جان كفيلي و ظليت اناشغ خايفة

- خالو ذول مين اجو؟! ...

ما يجاوب كدر يسرع اكثر وصل لمفترق القرية وكدرنا نتحرر من مطاردتهم.

درت راسي اباوع لورى راحوا لفرع بساحة جول صبخة
جريت نفس و بعدني متهسترة ما مصدكة عبالي متنا.
خايفة اسوء دقايق مرت علي كوة ساندة روحي بالكرسي

ما خليت امام ما نخيتة يطلعنا من هذا الوضع..

- خالو سلابة بالنهار؟ هم مو بالليل شغلهم..!

- ما اعرف عفاف ما جاي التم على روحي .
بعلو صوتي ابجي واناشغ
- يا بوية جا متنا يا بوية سلابة تطير هجمت علينا..

رزلني خالي
- اشش كافي خبال

يم بداية القرية تركتر محمل صناديك طماطة ...
وكفت سيارتنه ..

رفع خالي ايده يحمد الله ويشكره وانتجه على مقعده غمض عيونة مهبوط جسمة يرجف وبس لسانة يردد
- يارب سترتنا الف الحمد لله والشكر ..

- خالو لو رايح على طريق الهارثة شارع رئيسي وسيطرات يارب دخيلك التسليب حتى بالنهار ...

وصلني لاهلي

لاكتنا امي جانت متوزرة وعلى راسها حطب ذبت الحطب
وباوعتلي واكفة يم السيارة ...

اجت شبكتني وهي تشم بية

- هلا بريحة كل هلي هلة بعفيفة يمة ولج صايرة شحلاتج
سلم خالي عليها

- خوية هاي امانتكم عطلتها بعد اسبوع و تخلص ..

- يا خوية زارتنا البركة خوية تفضلم (تفضل)

شفت امي بستها و بجيت

- جا مدريتي مو ردت اموت انة وخالو سلابة اجت علينا ضربت رصاص كومة بس خالي بالسيارة يزاور لو كلما تجي رصاصة خالي يرفع التايرات عن الكاع حتى لا توصلنا.

بس والله يمة موقف ولا خفت بنيت عرب انة اي والله توصل الرصاصة يمي واشكفها بيدي ...

سكتت من شفت خالي يخزرني ويعض شفة ...

ضحكت امي
- هلا بحسج يمة عاد تشكفين الرصاصة شنو يمة مخرزة ..

- خوية عوفيها جاهلة هاي باجر الدنية خوش تلوجها

#################
بجرف صياح عركة ..
ضرب ....
طشطشة ماي ..
غلط فشار ..

ركضت وانة اتعثر مرة ... و بيدي اشمر بالزرع وافوت من بينة جان كلبي يرجف وي رجفات جسمي وانة اسمع المصايح
-وهناك جانت نورية تعاين علي و لحكتني وهي تهف بالبردي .. (بعودتها)....

- ولج يصبرية وشصاير يخيتي شنو هذا المصارخ دخيلك يا سيد دخيل وشصاير.

وكفت على حافة الجرف و حجارة يم رجلي تدهربت وطاحت بالنهر وهي تغرك ومبين منها بس دوائر الروج شوية و اختفت .