دلف إلى الغرفة التى يقيم بها عمه نصف ميت منذ رحل شقيقه .. نهضت الممرضة واقفة وردت تحيته المقتضبة بمثلها .. تطلع إلى عمه الزائغ النظرات ووجه حديثه للمرضة قائلاً :
- سيبينا لوحدنا شوية
هزت الفتاة رأسها فى تفهم وغادرت الغرفة
جذب كرسياً وجلس فى مواجهة السرير الذى التصق به كامل بائساً مستكيناً لا يريد مفارقته .. أخبره الأطباء بأن حالته نفسية بحتة وبعدم وجود أى سبب عضوى مباشر للشلل الذى أصاب لسانه وأطرافه
رمقه كامل بنظرة خاطفة قبل أن يعاود الدخول فى غيبوبته الاختيارية .. تنهد حسن قائلاً :
- أنا عارف انك سامعنى كويس .. وانك متابع كل حاجة بتحصل حواليك مهما اتظاهرت بعكس كده
لم يبد على عمه أى من علامات التأثر فضغط على كلماته مردفاً :
- أنا لقيت البت اللى قتلت سعيد
رفع عمه عينيه وثبتها فوق وجهه فى تحفز فابتسم حسن فى انتصار قائلاً :
- كانت عايزة تقتل ابنه زى ما قتلته .. بس أنا لحقتها فى الوقت المناسب
تضاعف الاهتمام على وجه كامل وهو يستمع إلى ابن أخيه الأقرب إليه من نفسه رغم كل ما أبداه من عشق واهتمام بشقيقه الأصغر .. حسن هو ابنه الذى لم يلده .. نسخته التى لن تتكرر بالجودة ذاتها أبداً مهما أنجبت الحياة .. لا ينكر أنه مغروم بكبريائه واستبداده بقدر كرهه لهما ..
- الحيوانة كانت حامل لما طردتها من هنا .. أيوه .. أنا عارف ان انت اللى طردتها وانها مسرقتش الخزنة .. أنا مش عاتب عليك فى أى حاجة عملتها .. ولو كنت مكانك كنت هاعمل اللى انت عملته وأكتر .. سعيد الله يرحمه كان غبى
اتسعت ابتسامته عندما تأوه عمه وتحرك لسانه فى لوعة وإن كان فى النهاية قد ظل عاجزاً عن الكلام .. لا بأس .. سوف يفعلها يوماً ما .. سوف يشفى ما أن ينتقم له من تلك السفاحة .. عاد يهتف فى حماسة :
- الولد فى الحضانة حالياً .. سميته شادى .. كان نفسى اسميه سعيد .. بس ماقدرتش .. مش متخيل انى انده على اخويا وحد غيره هو اللى يرد عليا حتى ولو كان ابنه .. وكمان مش عايزها تشك فى حاجة دلوقت .. أنا قلت لها ان سعيد مسافر لحد ما اشوف هانتقم منها ازاى .. أنا ممكن آخد منها الولد واسيبها تموت نفسها زى ما عملت مع أبوه .. لولا انى مش متأكد أنها هتعملها .. خايف تنساه وتكمل حياتها عادى .. أنا عايز اشوفها وهى بتموت قدامى كل يوم وكل ساعة وكل ثانية
هز عمه رأسه موافقاً فنهض حسن وقبل رأسه قائلاً :
- أول ما ابن سعيد يخرج من الحضانة ويشد حيله هجيبهولك تشوفه .. بس شد حيلك انت كمان عشان تقدر تشيله وتاخده فى حضنك
YOU ARE READING
بيلاَّ ( قريبًا)
Romanceجحيم .. هو الآن فى الجحيم .. لا تفسير آخر .. جحيم لم يعد يرى فيه سوى تلك الشيطانة التى بات يحترق بلهيبها طوال الوقت .. كتنين رهيب تبثه نارها أينما ذهب .. تطل عليه من كل الوجوه لتخرج له لسانها وتضحك فى شماتة .. قتلت أخيه وسوف تصيبه هو بالجنون .. حتى...
