Mga Binhi
Ang bawat isa'y nagsimulang isang binhi
Iba-iba: pino, bubot, maliit, munti
Ngunit lahat ay puno ng luwalhati
Wala sa ating isinilang na mali.
Sa pagkatagal, nagkaroon ng sibol,
Dumaa'y: bagyo, init, baha, tuyot, ambon,
Nanatiling matatag, walang nalipol,
Simbolo ng pag-asa: mumunting dahon.
Panahon din ang nagsubok sa ating tibay,
Lumaki, sumanga,yumabong, nabuhay,
Mananatili pa rin tayong nakahimlay,
Ang ugat sa lupa ay hindi mawawalay.
Gaano na man katayog ang ating puno,
Bunga'y: pipitasin, mabubulok, tutubo,
Mananatili tayong binhi't maglalaho,
Babalik din sa binhi, walang magbabago.
BINABASA MO ANG
Mga Binhi: Antolohiya ng Isang Sawing Makata
PoetryMga katagang pinagbuklod ng kaisipang mapang-alipin. Mga taludturang nililok ng mga karanasan. Mga saknong na hinubog ng pagkakataon. Nagkaroon ng diwa. Nagkaroon ng damdamin. Nagkaroon ng puso. Nakabuo ng isang tula.