Simbolo’y Ano?
Kung pambansang isda ay ang bangus na malinamnam,
Pagkat sumasagisag sa masaganang karagatan,
Magagawa ba nitong ang mga sikmura’y malamnan,
Makakaahon ba sa pagkalunod silang mayayaman?
Kung pambansang ulam ay ang adobong maalat,
Pagkain ng masa at sarap ay walang katapat
May silbi pa ba kaya kung hindi rin naman lahat,
Nakatitikim nito’t sa gutom lang namumulat?
Kung pambansang hayop ang masipag na kalabaw,
Sumisimbolo sa kasipagan, umula’t umaraw,
Bakit marami pa rin ang sa putikan, nadudungaw,
Pagkadukha pa rin itong s’yang umaalingawngaw?
Kung pambansang sayaw,ang maindak na carinosa,
Sumasalamin sa payak at makulay na kultura,
Bakit hanggang ngayon, sa indayog ay nadadala,
Sa halip na pag-unlad, sa pusali pa napupunta?
Pagkadami-dami man ng sagisag sa bayang sinilangan,
Nagpapakita ng tatak at pagkakakilanlan,
Lahat ito’y para saan kung nanatiling darang,
Sa malagitnit na apoy ng dalita’t kamangmangan?
Kung mananatiling bulag sa simbolong tinatangi,
Silbi nito’y ano, kung bansa nati’y nasasawi,
Baka kulang na lamang maging ang buwayang bungi,
Atin na ring sambahin sa pagkaitim ng budhi.
Edit:
Tinanggal ko na yung verse about sa national flower. Myghaad nakakahiya ako. Hahaha. Sorry guys, hahaha! :-)
BINABASA MO ANG
Mga Binhi: Antolohiya ng Isang Sawing Makata
PoetryMga katagang pinagbuklod ng kaisipang mapang-alipin. Mga taludturang nililok ng mga karanasan. Mga saknong na hinubog ng pagkakataon. Nagkaroon ng diwa. Nagkaroon ng damdamin. Nagkaroon ng puso. Nakabuo ng isang tula.