Don't Play With Fire (Published under Pop Fiction)

Chapter 16

Chapter 16

"O-okay." Sagot ko.

Nagpatuloy ako sa pagmamaniubra ng kabayo hanggang sa tumigil kami sa lugar kung saan maraming mga bahay. Maliit lamang ang mga ito.

Tumikhim ako. "Whose houses are those?"

"Sa mga trabahador." Bumaba siya at inalalayan ako.

Pinagmasdan ko ang mga kabahayan. Nilingon ko siya na itinatali ang kabayo sa isang puno.

Lumapit siya sa akin at hinawakan ang aking kamay. Bumagsak ang mga mata ko dito at napalunok.

"If you don't want to hold hands with me, you can freely let go." Mahina niyang sabi at nagsimulang maglakad. "Inang Aiza! Tatang Justino!"

Lumabas sa unang bahay ang dalawang matanda. Napatingin ako sa mga ito na sa tingin ko ay mga sixty years old na.

Bumakas sa mukha ng mga ito ang magkahalong gulat at saya nang makita siya. Lumapit sa kanya ang matandang babae at walang pag-aalinlangan niya naman itong niyakap.

"Senyorito-"

"Fire ho, inang." Pagtatama niya. Pinakawalan niya ang matandang babae at hinaplos ang buhok nito. Tumingin siya sa akin.

Pilit akong ngumiti.

"Hijo, mabuti at napasyal ka. Hindi mo alam kung gaano ka namimiss ng mga tao dito." Lumapit sa kanya ang tatang kung tawagin niya.

Niyakap din siya nito, mahina silang tumawa.

"Talaga po? Ganun po yata talaga... sanay ho kasi ang lahat na makakita ng gwapo."

"Yabang!" Mahina at natatawa kong sabi.

Tumingin sa akin ang dalawang matanda. Natutop ko ang bibig.

"Sino ang magandang dalagitang ito, Fire?" Kunot-noong tanong ng matandang lalaki.

"Nililigawan ko po." Diretso niyang sagot.

Lumunok ako lalo na nang makita sa mukha ng mag-asawa ang pagkalito.

"Nililigawan?" Sabay pa nilang tanong.

Iniwas ko ang tingin at umayos ng tayo.

"Akala ko ba ay si Forrah ang nililigawan mo?" Bulong ng matandang babae ngunit narinig ko pa rin ito. "Hindi ba't naging kayo na? Pinakiusapan ka lang ng batang iyon na magtapos muna kayo."

"Kaya ba hindi mo kasama si Forrah, hijo?" Tanong pa ng matandang lalaki.

Narinig ko ang kanyang pagtikhim. Nagtagpo ang aming mga mata. Lumapit siya sa akin at hinawakang muli ang aking kamay. Pinisil niya ito.

"Si Forrah, busy sa pag-aaral, inang, tatang." Nilingon niya ako. "Si Tamiya Dela Vega po, katulad ng sabi ko, nililigawan ko."

Lumapit sa amin ang matandang babae. Hindi ko naman alam ang aking gagawin kaya't napabitaw ako kay Altamirano.

"Magandang bata..." Ngumiti siya.

Tila may nabunot sa aking lalamunan dahil doon.

"Taga saan ka, hija?"

"Manila." Sagot ko.

"Halatang nahihiya ang magandang dalagitang ito, Fire."

"Talk to her, she won't bite you." Bulong niya sa akin.

Tumango ako at hinarap ang matanda. I composed myself and smiled at her. Katulad ng mga napapanood ko sa TV minsan ay kinuha ko ang kanyang kamay at kahit huli na ay nagmano pa rin ako.