ပထမဆုံးည
မိုးသောက်ရောင်ခြည်ပြပြကို မြင်ရသည်နှင့်တပြိုင်နက် ဝေ့ရှီက အိပ်ခန်းထဲမှ ထွက်လာခဲ့၏။မီးခိုချောင်ထဲတွင် မနက်စာပြင်ဆင်နေသည့်အိမ်အကူနှင့် အပြင်ဘက်ခြံဝန်းထဲတွင် ပျိုးပင်များကိုပေါင်းသင်နေသည့်သူအားတွေ့ရ၏။လတ်စသတ်တော့ ဤနေရာတွင် အခြားသူ မရှိနေခြင်းမဟုတ် ပျောက်ကွယ်ပေးသင့်အချိန်တွင် မြင်ကွင်းထဲပေါ်မလာအောင် နေထိုင်ပေးတတ်ကြခြင်းသာဖြစ်၏။
သူမကို တွေ့လိုက်သည်နှင့် အစေခံများအားလုံးက လန့်လန့်ဖြန့်ဖြန်ဖြစ်ကုန်ကြ၏။မနေ့ညက အပေါ်အောက်ပြောင်းပြန်လှန်အောင် သောင်းကျန်းခံထားရသည့်အခြေအနေကို ကျော်ဖြတ်လာပြီး ယခုလိုမတ်တပ်ရပ်နေနိုင်သေးသည်ကို မျက်ဝါးထင်ထင်မြင်နေရခြင်းအား အထူးအဆန်းဖြစ်နေပုံရသည်။
ဝေ့ရှီက ဗီလာထဲမှ လျှောက်ထွက်လာခဲ့၏။မည်သူကမှ တားဆီးခြင်းမရှိသဖြင့် အပိုစကားပြောနေရန်ပင်မလို။
တံခါးအပြင်ဘက်သို့ရောက်နှင့် driver က ပြေးထွက်လာပြီး ကားကိုအသုံးပြုမပြု မေးမြန်းလာ၏။စကားမဆိုဘဲ လက်ကိုရမ်းပြ၍ ခြံဝန်းအတွင်းမှ နောက်လှည့်မကြည့်ဘဲထွက်လာခဲ့၏။အများသုံးဘတ်စ်ကားဂိတ်တွင် ရပ်နေကာ မကြာလိုက်သည့်အချိန်အတွင်း မြို့ထဲဝင်မည့်ဘတ်စ်ကားတစ်စင်း ရောက်လာခဲ့၏။
မနက်စောစောဖြစ်သည့်အတွက်ကြောင့် ဘတ်စ်ကားပေါ်တွင် ခရီးသည်က သိပ်မရှိ။ကားပေါ်သို့ တက်လိုက်သည်နှင့် လူအချို့က ထူးဆန်းသောမျက်လုံးများဖြင့် ကြည့်လာကြ၏။ဝေ့ရှီက သတိထားမိသဖြင့် ခန္ဓာကိုယ်ပေါ်သို့ ခေါင်းငုံ့ကြည့်လိုက်၏။ရင်ညွှန့်တဝိုက်တွင် အနီရောင်နှင့်ခရမ်းရောင်ရောနှောနေသည့်အမှတ်အသားများကိုတွေ့လိုက်သည့်အချိန်တွင်မှ နားလည်သွားရ၏။အလောတကြီးထွက်လာခြင်းဖြစ်ကာ ဤအမှတ်အသားများကို သတိမထားမိခဲ့ခြင်း။လက်နှင့်ဖုံးလိုက်မည်အပြု လက်ပေါ်တွင် ထင်းရဲနေသည့်အနီရောင်အစင်းကြောင်းများကြောင့် ပို၍လန့်ဖြန့်သွားခဲ့၏။
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။