ရစ်မူးသေရည် သေဆုံးအိပ်မက်
အလုပ်ဆင်းသည့်အချိန်၌ အားလုံးက ညလယ်စာသွားစားရန်အတွက် အချိန်းအချက်ဖြင့်ထွက်လာခဲ့ကြ၏။Coco က သူမ၏ရုပ်ဖြောင့်သည့်ရည်းစား Mark ကိုခေါ်လာပြီး အားဖန်ကလည်း ဇာတိမြို့မှ ဤမြို့သို့အလုပ်လုပ်ရန် အတူထွက်လာသည့် သူ၏ရည်းစား 'မိန်မိန်' ကိုပါ ခေါ်လာ၏။ရူဖေးနှင့်ချီမော့ကလည်း တစ်တွဲဟုဆိုရမည်ဖြစ်ကာ ဝေ့ရှီကသာ တစ်ယောက်တည်းဖြစ်သည်။
လူ ၇ယောက်က ထိုင်ခုံ၈လုံးပါသည့် စားပွဲကိုယူလိုက်ကြ၏။
အတူဆုံကြသည့်အချိန်တိုင်း အမြဲဆူညံအောင်လုပ်နေကြဖြစ်ကာ ဆိုင်ရှင်ကပင် သူတို့အုပ်စုအား ကြောက်ရသည်အထိ။သို့သော် ယနေ့တွင် ထူးထူးဆန်းဆန်းတိတ်ဆိတ်နေကြသည်က အားဖန်တစ်ယောက် အရက်ခွက်ကို မကိုင်ခင်အထိဖြစ်၏။လွတ်နေသည့်ထိုင်ခုံဆီသို့ မျက်နှာမူလိုက်ပြီး
"ကျင့်ရှောင်ဝိန်"
အားလုံးက တစ်ယောက်ပြီးတစ်ယောက် ခွက်ကိုမြှောက်လိုက်ကြပြီး မြေကြီးပေါ်သို့ လောင်းချကြလေ၏။
အားလုံး၏အမူအရာက အနည်းငယ်သက်သောင့်သက်သာဖြစ်လာကြပြီးနောက် နင်တစ်လှည့် ငါတစ်လှည့် ရေပက်မဝင်အောင် စကားများလာကြကုန်၏။ဝေ့ရှီက ယနေ့တွင် အတော်လေးတိတ်ဆိတ်နေခဲ့၏။သို့သော် ရူဖေးသည်ကား ယခင်ကရော ယခုပါ အတက်ကြွဆုံးနှင့်စကားအများဆုံးတစ်ယောက်ဖြစ်ပြီး Mark ကိုလည်းတစ်မျိုးပြီးတစ်မျိုးစိန်ခေါ်နေလေ၏။ကြည့်ရသည်က ဤရုပ်ဖြောင့်သည့်ကောင်ချောလေးကို တစ်နည်းနည်းဖြင့်အနိုင်ယူရန် ဆုံးဖြတ်ထားပုံရ၏။
Coco က ပွဲကြည့်ပရိတ်သတ်လုပ်နေပြီး မည်သူ့ဘက်ကမှ ပါ၍ပြောပေးခြင်းမျိုးမရှိ။အားဖန်တို့အတွဲက ခေါင်းချင်းဆိုင်ပြီး ကြွက်နှစ်ကောင်အလားတတွတ်တွတ်ဖြင့် နှစ်ယောက်တည်းသီးသန့်ကမ္ဘာဖြစ်နေလေ၏။ချီမော့က နဂိုကတည်းက စကားနည်းသူဖြစ်ကာ ရယ်စရာဟာသများပြောသည့်အချိန်မျိုးတွင်တောင်မှ မထိတထိသာရယ်တတ်၏။
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။