القاسي والبريئة (قصة جزائرية🇩🇿)

✨الحلقة 66✨

جاو خارجين حتى تقابلهم فاطمة
فاطمة: ولادي واش صرا
أنس ومجد ماحبوش يقولولها خايفين ليصرالها حاجة واصلا مراد خبرهم مايقولوش
مجد: مكان والو جدة برك خرج لينا شغل نروحو نفروه
أنس: ايه جدة
فاطمة ماأمنتهمش من وجوهم يبانو راهم يكذبو
فاطمة: لالا ولادي كشما صرا علابالي
أنس: ماصرا والو جدة
مجد مسح على وجهو
فاطمة: مجد اهدر واش صرا راني عارفكم تكذبو عليا
شاف في أنس
مجد: جدة لحقونا أخبار على مراد ومنار
فاطمة: قولي راهم ملاح اهدر
هبطت سارة من دروج
سارة: واش صاير
مجد: جدة منار تصاوبت وراهي في العملية
شهقت فاطمة وحطت يدها على فمها  وسارة عينيها وساعو ماسمعو غير صوت حاجة طاحت في لرض دارو يشوفو حتى يلقاو خديجة طايحة مغمية ومصطفى يحاول ينوض فيها وإيناس وادهم وهيثم تان
مصطفى يضرب كفوف صغار على وجها يحاول يفيقها راحت إيناس تجري ليهم وتعيط
إيناس: كيفاه هاذي راهي في السبيطار كيفاه تصاوبت
مجد: ماتعيطيش نقصي صوتك
إيناس حكمت في شعرها وتعيط
إيناس: بسباب خوك صرا هكذا بسباب خوك راهي بين الحياة والموت
هيثم: كيفاه هاذي راهي في سبيطار وماخبرتوناش
أدهم: وكتاه صار هاذ الشئ
مجد بالعياط: سكرو فامكم عليا هاذوين وصلني الخبر
فاطمة كانت مع خديجة ومصطفى تان يحاولو يفطنوها دارولها ريحة حتى بدات تنوض بشوي وتمتم
خديجة: بنتي...جيبولي بنتي
فاطمة: راح نروحو عندها اا بنتي
سارة: هدي روحك
خديجة بالبكا: كيفاه تصاوبت وماخبرتوناش اا يما هكا ديرو فيا
فاطمة بالبكا: هاذوين سمعنا يابنتي
مصطفى راح عند مجد
مصطفى: وشمن سبيطار راهم
مجد: سبيطار********
ناضت خديجة
خديجة: هيا نروحو دوكا بنتي بين الحياة والموت ياربي احفظها ياربي اهئ اهئ اهئ
حتى ينزل جاسر ومن شكلو باين كان نايم ودوخان
جاسر: وشبيكم تبكيو
إيناس راحت ليه عنقاتو
إيناس: مكان والو اا صغيور برك تفكرنا ليامات
جاسر: توحشت ماما وبابا
خديجة قوات على بكيتها وفاطمة تصبر فيها ومصطفى يصبر
مصطفى: اهدي ماراكيش تشوفي طفل هنا
خديجة: مش قادرة هيا نروحو
فاطمة : كيفاه نعملو لجاسر
إيناس: ناخذوه معانا
مجد: واشياا
إيناس: هيا نلبسلك ااا بطل
جاسر: وين رايحين
إيناس: عند ماما اا عمري
مجد تقلق مش حاب جاسر يروح وهو مزال صغير ومراد يتقلق اصلا ويكسرو كي هو كي أنس
مجد: لا مش راح يروح راح يقعد هنا
إيناس: انت بذات مادخلش روحك
مجد جا يروح ليها حكمو انس
أنس: اهدأ مش وقت مضاربة
مجد: مراكش تسمع فيها واصلا جاسر مايصلحش ندوه معانا وزيد مراد يكسرنا أنا وياك اليوما
أنس: خليه يكسرنا وهوما عندهم الحق خاصتن يماها مراكش تشوف حالتها
مسح مجد على وجهو
مجد: هيا دوكا نروحو

في سبيطار:

واقف قدام باب العمليات حالتو حالة يشوف في الفراغ تفكيرو كامل فيها يتذكر في لحظاتو معاها في ضحكتها.... كلامها....كي تزعف....كي ترجع الهدرة....ابتسامتها....اهتمامها.... ماقدرش حاسس انو قلبو توقف بدا يضرب بيديه على الحيط ومش حاسس بشئ مايحس غير بصوتو حبس في هاذيك الثانية يحسابلو يتخايل حتى دار وتأكد
جاسر: بابا
قعد جامد في بلاصتو يحاول يكذب نفسو حتى يسمع صوت خديجة تبكي
خديجة: بنتي واش صار لبنتي
دار ليهم جا يجري ليه جاسر حضنو ورفدو في حملتو يشم ريحتو توحشو
جاسر: بابي توحشتك
مراد: حتى أنا ااا بطلي
جاسر: بابا ماما وشبيها
مراد: جرح صغير برك اا عمري راح تشوف ماما
ماقاطعهم غير صوت باب تفتح تع غرفة العمليات راحو يجرو للممرضة لخرجت
ممرضة: نحتاجو دم زمرة B+
مراد: شكون زمرة B+
خديجة: ياربي مشي نفس زمرتي
مصطفى: حتى أنا حتى حد زمرتو B+
إيناس بالعياط ودموع في عينيها: بسبابك صار هاذ الشئ منار بين الحياة والموت بسبابك
مراد بالعياط: سكري****** تع فمك
فاطمة: اهدي بنتي مش وقت هاذ الشئ لازم نلقاو شكون يتبرع
ممرضة: لازم في ساعة تلقاو متبرع اذا تفوت ساعة يكون خطر كبير على المريضة
مسح مراد على وجهو وإيناس تبكي بالساكت وفاطمة وخديجة دايرين حالة بالبكا ماحبسهم غير صوتو
فاضل: أنا نتبرع
لحظة صمت...لحظة صدمة....لحظة استوعاب
مراد شاف فيه بنظرات باردة ولحد الآن مش واثق فيه بالنسبة لفاطمة لشهقت وحلت عينيها على وسعهم من شوفتو واقف قدامها ولا خديجة لمش مأمنة انو خوها لكان ضدها ودارلها مشاكل ويكرها راح يتبرع لبنتها ومصطفى لقاعد يشوف ومصدوم بكل صفة عامة كامل قاعدين جامدين في بلايصهم مايقطع هذا صمت غير صوت فاطمة لحكات بالغصة
فاطمة : فاضل جا يقرب ليها حبساتو بيدها
فاطمة: وقف وشمن وجه عندك بعدما رحت بسباب الدراهم لأغراوك وبعدوك
فاضل: يما كنت مجبور وكل حاجة درتها لمصلحة
فاطمة: مجبور على واش نتا هجرتنا في الوقت لي كان لازم عليك تكون مع يماك وبعدما ختك لدرتلها المشاكل وانا ماكانش علابالي بلي كاينة وبلاصتها وين كل مشاكل صراو بسبابك وخوك أحمد لمات ونتا لا خبر
فاضل فضل يقعد ساكت لأنو مش راح تفهمو هو صح مع لول دار هذاك شئ بصح بعدتيك ولات عندو مصلحة علاش دار هاذ الشئ بصح ندم على فعلو مع خديجة
شاف في خديجة لي نظراتها كلها حقد ونظرات باردة
خديجة: مانسمحش واحد كيما نتا تتبرع لبنتي فاهم
فاضل: مش وقت هاذ الكلام وزيد هي بين الحياة والموت لازم تسلك
خديجة: موحال نسمح فاهم
مراد اكتفى يشوف وشاف في فاضل وفاهمو انو وراه حكاية كبيرة ومش عارفها بصح تقبل انو يتبرع لمنار المهم حبيبتو تكون بخير بالنسبة ليه في هاذ الثانية مايهمو شئ غير انو تكون بخير
مراد: راح يتبرع المهم منار تكون بخير مالازمش نضيعو الوقت
خديجة: لا نحوسو على متبرع آخر
مراد: مكانش وقت نحوسو على متبرع اا عمتي يخي المهم تكون منار بخير بالمسبة ليك
خديجة: مرانيش حاباتو يتبرع
مراد: شوفي عمتي ماتقلقيش******* راح يتبرع معنتها راح يتبرع المهم بالنسبة ليا تسلك على خير مش وقت رفضك وهدرتك الزايدة
خديجة سكتت وتبكي وفاطمة تصبر فيها وتقعنها
فاطمة : معليش يابنتي المهم تكون منار بخير ومهما يصرا هو يبقى خوك
خديجة: يما نسيتي واش دار فيا
فاطمة: عارفة ااا بنتي يخي بالنسبة لينا المهم تكون بخير
خديجة:ايه هذا هو صح
راح مراد مع فاضل ينحي دم كمل عطى الدم الكافي خرجو وشاف فيه مراد بنظرات ثاقبة
مراد: واش سبب مساعدتك اا عمي
فاضل: راح تعرف قريبا وحنا أصلا من نفس الأصل والدم
ضحك مراد بسخرية على كلامو
مراد: هاذوين تفكرت الرابط ودوكا خلينا من كلام هذا سعيد خذيتو لمصنع لخبرتك عليه
فاضل: امممممم هو فماك
مراد: ياويلك راك تتلاعب معايا
فاضل: حط ثقة فيا واصلا اذا كانت نيتي نتلاعب كان ماخليتكمش تروحو
سكت وخلاه رجع لبلاصتو لقا خديجة مع مصطفى قاعدين وفاطمة اما جاسر مالقاهش وعرف انو راهو مع إيناس من قبيلة كي جا فاضل خذاتو إيناس باش مايتأثرش بكلامهم

خديجة: ان شاء الله تسلك بنتي برك نديها موحال تقعد معاك فاهم
مراد جنون حمرة دارو بيه كي سمع هدرتها
مراد بالبرود : فكرة هاذي نحيها من بالك اا عمتي ماتنسايش عندنا ولدنا وموحال نسمح فيها
مصطفى: نتا راك مااهتميتش فيها وشوف واش صرالها
مراد: مانعاودش هدرتي مرتين ولي في بالكم غير نحوه ونهد السبيطار على ريوسكم وعلابالكم نديرها
سكت مصطفى وخديجة بلعت فمها

خرج طبيب ناضو يجرو
مراد: كيفاه حالتها
طبيبة: نجحت العملية وتجاوزت مرحلة الخطر
مراد: حمد لله يعطيك صحة دكتور 
خديجة: حمد لله ياربي شكرا دكتور
مصطفى: حمد لله
فاطمة: حمد لله حفيدتي بخير
جاو إيناس وادهم وهيثم
إيناس: راهي مليحة خبروني
هيثم: احكو
أدهم: هيا
فاطمة: حمد لله سلكت على خير وتجاوزت مرحلة الخطر
إيناس عنقت خديجة وفرحو
إيناس: حمد لله عارفة منار قوية
جاسر: ماما بخير
مراد راح ليه رفدو في حضنو
مراد: بخير اا ولدي ماما قوية وبطلة
جاسر: ايه قوية
عنقو ومراد دمعة طاحتلو هو من عادتو مايحبش يبين ضعفو لحتى واحد مسح دمعتو لحقو مجد وأنس وخبروهم وفرحو حضن مجد مراد
مجد: راهي قوية وحمد الله راهي بخير
مراد: حمد لله
أنس: ايه حمد لله شوف حالتك نتا كيفاه
مراد: مش وقت حالتي انا مهم هي تكون بخير هي حياتي كلها
مجد: امممممم عارفين مكلاه تبدا تيري الهدرة لتوصلنا للعيب
ضربو مراد على كرشو ومجد بعد وهو يضحك
مراد: سكر فمك ماراكش تشوف جاسر هنا وتهدر هكا
جاسر: ااا حي بابا نعرف عمو مجد هكا
غمزلو مجد
مراد: ااا ماتبعش عمك راهو مسوفج رايح فيها
أنس: ايه ماتبعوش جاسر
مجد: ااا تتفقو عليا ماتسمعلهمش جاسر
غمزلو جاسر ومجد ضحك
مراد: راك تغمزلو علينا جاسر
جاسر: اوبس شفتني
مراد ضحك ضحكة خفيفة وباسو

رايكم جماعة في البارت وعلابالي راني نطول ونحاول قدر الإمكان نكتب والكرونيك مابقالهاش بزاف ونكملها نتوما برك كملو أحداث باسكو مزال ماتكشفوش اسرار ❤️