⚜️ الــــــجـــان ⚜️
سكينة سليماني
البارت 30:
ختام: مي لالة نتي كتعرفيها ؟؟؟
ميمونة: كنعرفها ابنتي ...
ختام: مافهمت والو ...فهميني شنو بغات منا
ميمونة: انا لي مافهمتوش هو شنو كديري هنا ياكما قت//لتي السلطان ؟؟؟
ختام: السلطان راه لفوق فبيتي ...ماعرفتش حتى كيفاش رجعنا لهنا
...خلاتها و زادت كتزرب و ختام تابعاها...حلات لباب د بيتها و مع رمات الخطوة لولة تحط سيف على عنقها
حيدر: شكون نتوما و شنو بغيتو
ميمونة: حيد السيف و صبر على خبزتك حتى طيب جبت ليك كلام فيه الفايدة ينفع و ينور ليك الطريق
...حيد السيف من على عنقها و دخلات و دخلات ختام معاها كتخنزر فيه و يخنزر فيها جلسات فوق النموسية و عيطاتلهم
ميمونة: اجيو جلسو نعاود ليكم
حيدر: مكاين لاش ...الى كان مرادك الذهب و الجوهر قوليها نغرقك بيهم و رجعيني لقصري
ختام: واااش نتا كيحسابلك حنا سحارين...جمع شوية راسك معانا راه الميمة بغات تعاود لينا شيحاجا
ميمونة: سمع اولدي نقوليك حنا هنا على كفة وحدة ...الى غرقنا اتغرق نتا معانا و الى غرقتي حنا انغرقو معاك ...
ختام: ماتديش عليه كيعرف غير يضرب و يق//تل ...
حيدر: شنو كتخرجي من فمك اديك ذميمة...
ختام: الذميمة هو نتااا
حيدر :(ضورها عندو ) عاااودي شنو قلتي
...بقات كتشوف فيه بتحدي و يشوف فيها عينيهم فيهم شرارة الغضب على بعضياتهم...نطقات ميمونة مبعداهم...
ميمونة: الى باغيين تفكو من هادشي بجوج ...سمعو لهاد القصة ...
حيدر: بغيت الحل
ميمونة: راه كنقول ليك صبر ...لي خصك تعرفو هو نتا ماشي فبلادك و زمانك ...هادا زمان اخر و بلاد اخرى غريبة عليك ناسها و طريقة حياتها...
حيدر: و كيفاش وصلت لهنا ؟
ميمونة: ماعرفتش اللعنة كتقول بلي سلالتي خصها تق//تل سلالتك لابغات تفك و تعيش...المجية ديالك لهنا غريبة عمرها وقعات
ختام: راه كان بغا يقت//لني ماشفتيش السيف...
حيدر: الغدر عندكم سلالة ...
ختام: يااااك اشريف
حيدر: شكون بغا يغدرني فنعاسي؟ و يغدر الماكلة و الشراب و يسيب دمي
ختام: كون تيقتيني كاع مايوقع هادشي ...رجعتيني مجنونة
حيدر: و راااك مجنونة نيييت و باش مكملاها و مجملاها بالقباحة و اللسان السليط
ختام: منين انا لساني سليط اسيدي اشداك تعيطلي للخلوة و لا بقا فيك لحال حيت خليتك مقطوع
ميمونة: ختاااام نعلي الشيطان راه معلوم مايتيقكش...كاين شيواحد بعقلو غادي يتيق هاد الخبير...
ختام: عفاك الميمة الى عندك شي حل باش يرجع و يهنينا من صداعو عطيه لينا ...
حيدر: (كيشوف ف ختام بكره) قصي علينا القصة لي بغيتي تعاودي و عليك الامان...
YOU ARE READING
⚜️ الـــجٰـــــان ⚜️كاملة
Fantasyبقلم : ✨ سكينة سليماني ✨ قالو ناس زمان الى المحبة دخلات للقلب و تربعات عمرها تزول واخا يتدخلو سلاطين الجان و قالو الى شفتي جوج توالمو و على الدوام تعاشرو عرف بلي الدرك على واحد و بلي حبيبو معذبو و مشربو علقم يامو...نصليو على خير الناس و ا...