حكايات منار

حكاية " تدابير ربنا "

على الماسينجر
عمرو :الناس اللى سايبة محاضراتها وقاعدة تكتب فى خواطر
دينا :اول محاضرة اتلغت فانا فاضية ومستنية المحاضرة التانية
عمرو :يعنى انتى فاضية دلوقتى
دينا :اه
عمرو :كنت عايز اخد رايك فى حاجة كده
دينا :حاجة ايه
عمرو :هو لو واحد بيحب واحدة وخايف تضيع منه وتبقى لحد غيره يعمل ايه يعترفلها بحبه ويرتبط بيها
دينا :بص انا تقليدية شويتين فى موضوع الارتباط ده بالنسبالى ارتباط يبقى خطوبة وجواز يعنى على الاقل يبقى فى النور قدام اهلها وقدام كل الناس ومتبقاش خايف اهلها يخلوها تتخطب لغيرك تبقى انت فى الامان
عمرو :خطوبة خبط لزق كده
دينا :مش انت بتحبها
عمرو :بس هى مبتحبنيش متعرفنيش تعاملنا مع بعض بسيط اوى
دينا :اومال هما عملو الخطوبة ليه ما علشان تعرفك بقى وانت كمان تعرفها
عمرو :معاكى حق معلش تعبتك معايا ودوشتك
دينا :ولا دوشتنى ولا حاجة الجيران لبعضيها
دعاء :بت فى ايه شكلك فرحان انتى بتكلمى مين
دينا :ده عمرو
دعاء :وبعتلك ايه سى عمرو مفرحك كده
دينا :خدى اقرى بنفسك
بعد خمس دقايق
دعاء :هو بيتكلم عنك صح
دينا :اعتقد اومال باعتلى ليه وبيسألنى
دعاء وهى بتحضنها :مبروك يا حبييتى فرحت علشانك الكراش بتاعك طلع بيكراش عليكى هو كمان وهيتقدم اهو عقبالى يا رب
دينا :دعاء انتى مش هتسمعى كلامى وتبعدى انتى عنه الواد ده شكله مش بتاع جواز وبيتسلى
دعاء :انتى مفكرانى مفكرتش فى كلامك ده فكرت يا دينا وحاولت ابعد عنه مقدرتش ده اول واحد يهتم بيا ويسمعنى اول واحد فى الدنيا يقولى بحبك ووحشتينى اول واحد يغير عليا اول واحد انا احبه واتعلق بيه انا اكتشفت انى
عندى قلب لما حبيته اتعلمت الحب على ايده ومعاه مش عايزة اسيبه يا دينا مش عايزة اخسر حبى الاول عايزة نتجوز ويبقى حبى الاول والاخير كتير عليا ده مستحقش ان حلمى يتحقق
دينا وهى بتحضنها :متعيطيش انتى تستاهلى كل حاجة حلوة فى الدنيا يا دعاء انتى طيبة وجدعة وجميلة
دعاء :انا كتير بفكر انى كده بغضب ربنا وان ربنا مش هيباركلنا فى جوازنا بس مبقدرش ابعد عنه مبعرفش اعدى يوم من غير ما اكلمه وهو اصلا مبيسبنيش ابعد لو بعدت خطوة واحدة بكلامه ليا بيخلينى اقرب خطوتين بدل الخطوة اللى بعدتها انا حسا انه بيبحبنى بجد تفتكرى ممكن يكون احساسي بيه غلط وواهمة نفسى انه بيحبنى زى ما بحبه
انا بفكر ابعد عنه واسيبه لربنا واكيد ربنا هيجعله من نصيبى ويرجعهولى تانى
دينا :ده مش صح يا دعاء لو بعدتى عنه علشان ربنا يبقى تبعدى بجد مش تبعدى وانتى استغفر الله بتتشرطى على ربنا انه يرجهعولك ممكن تبقى من نصيب حد تانى وحتى لو فضلتى معاه ومبعدتيش ممكن برضه فى الاخر تبقى من نصبب حد تانى غيره مهما عملتى واتمسكتى بيه اللى ربنا عايزه هو اللى هيكون
دعاء :احساسى بالذنب معذبنى انا حسا انى بغلط فى حق بابا وحق نفسى كمان حسا انى رخصت نفسى اوى
دينا :انتى غالية يا دعاء متقوليش عن نفسك كده
دعاء :انا خلاص هسمع كلامك هقوله يا يجى يتقدم وان شاء الله حتى نتخطب تلت سنين عادى لحد ما اخوه يبقى يخطب ويتجوز قبلنا ياما ينسى انه عرف ان واحدة اسمها دعاء
بس انا خايفة يا دينا خايفة يخذلنى ويطلع بيلعب بيا وبيضيع وقت زى ما انتى قولتى
دينا :لو حصل اهو تبقى عرفتيه على حقيقته وخرجتيه من حياتك لانه ميستاهلش يفضل فيها