မြူနှင်းငွေ့ [အဆုံးမဲ့]『မြန်မာဘာသာပြန်』〘Completed〙

အပိုင်း(၅၅)

ယခုအချိန်တွင် သူသည် ကျိုးမင်ရွှမ်းအခြေအနေကို ကိုယ်ချင်းစာနိုင်လွန်းသဖြင့် သူ၏ မျက်နှာအမူအရာ အစစ်အမှန်ကို မျက်နှာအတုဖြင့် ဖုံးကွယ်ထားခဲ့တာတောင် သူမလိမ်ညာနိုင်ခဲ့ ။

အဖွဲ့သားများအားလုံးက သူ့အား မျှော်လင့်တကြီး ကြည့်နေကြပြီး ကျိုးမင်ရွှမ်း၏ အဓိပ္ပာယ်မရှိသော စိတ်ကူးယာဉ်များကို သူဖျက်ဆီးပစ်ရန် မျှော်လင့်နေကြသည် ။ သို့သော် ကျစ်ယွီရှီက သူ့မေးခွန်းကို အမှန်အတိုင်းသာ ဖြေလိုက်၏ ။

သူ "အင်း "ဟုပြောလိုက်သည် ။

အကုန်လုံး ပြောစရာစကားပျောက်ရှသွားလေ၏ ။

ဒီကမ္ဘာကြီး ဆက်သွားနေတဲ့ ‌ဖြစ်နိုင်ချေလဲ ရှိသေးတယ်ပေါ့ ?

"ဒါပေမဲ့ " ကျစ်ယွီရှီက တည်ငြိမ်မြန်ဆန်စွာ ပြောလာခဲ့သည် ။ "ခင်ဗျား ပြန်လိုက်မလာရင် ကျွန်တော်တို့ အမှတ်'B'ကို ရောက်တဲ့အခါ လူတစ်ယောက် လျော့နေလိမ့်မယ် ။ ခင်ဗျားရဲ့ သူငယ်ချင်းတွေ ၊ ရဲဘော်ရဲဘက်တွေနဲ့ ခင်ဗျားဘဝမှာ ကျန်နေသေးတဲ့သူတွေအကုန်လုံး လူတိုင်းက ခင်ဗျားကို ဆုံးရှုံးလိုက်ရမှာ ။ ထျန်းချုံတပ်ဖွဲ့ ၇က ကျိုးမင်ရွှမ်းကို ဆုံးရှုံးလိုက်ရပြီး တပ်ဖွဲ့က ထပ်ပြီး ပြည့်စုံတော့မှာမဟုတ်ဘူး ။ ဒါက အဖွဲ့ရဲ့ကင်းထောက် 'လောင်ယွီ' ဒဏ်ရာရသွားတာထက် ပို‌ကြောက်စရာကောင်းတဲ့ရလဒ်ပဲ ။ ခဏတာစိတ်ပျော့ပြီး ခင်ဗျားကို ကျန်နေခွင့်ပြုလိုက်ရတဲ့ အပြစ်ရှိစိတ်က တပ်ဖွဲ့၇က ကျန်တဲ့အဖွဲ့သားတွေအကုန်လုံးရဲ့ ဘဝတစ်လျှောက်လုံးလိုက်နေတော့မှာမို့လို့လေ "

ကျစ်ယွီရှီက ဆို၏ ။ "နောက်ဆုံး ပူဖောင်းကမ္ဘာဆိုတာလဲ ပူဖောင်းသပ်သပ်ပဲကိုး ။ ခင်ဗျားရဲ့အဲ့ဒီနောင်တကို ဖြည့်ဆည်းပေးပြီးသွားရင် တဖြည်းဖြည်းပျောက်ကွယ်သွားမှာပေမဲ့ ခင်ဗျားဘဝကတော့ မဟုတ်ဘူး ။ အဲ့အချိန်ရောက်လာရင် ခင်ဗျားတစ်ယောက်တည်း ဒီမှာ ဘာလုပ်မှာလဲ ? ခင်‌ဗျားဘဝရဲ့ ရည်မှန်းချက်က အဲ့ဒီဟာတစ်ခုတည်းအတွက် မဟုတ်ခဲ့ရင်ပေါ့ "

အခြေအနေကို ဆန်းစစ်ရသော အချိန်မှလွဲလျှင် ဤသည်က လူတိုင်း၏ရှေ့တွင် ကျစ်ယွီရှီ စကားအများကြီးပြောသည့် ပထမဆုံးအကြိမ်ပင် ။