မြူနှင်းငွေ့ [အဆုံးမဲ့]『မြန်မာဘာသာပြန်』〘Completed〙

အပိုင်း(၂၆)ပြောင်းရွှေ့စခန်း

『Unicode』

《ပြောင်းရွှေ့စခန်း》

"ကြိုဆိုပါသည် ကျစ်ယွီရှီ ။ ထျန်းချုံမှ ပြန်လည်ကြိုဆိုပါသည် "

ထျန်းချုံ၏ ရင်းနှီးနေသော ကြိုဆိုနှုတ်ဆက်သံ ထွက်ပေါ်လာသည် ။

အချိန်ခရီးသွားခြင်း၏ နောက်ဆက်တွဲဖြစ်သော မူးဝေပျို့အန်ခြင်းများမှ သက်သာစေရန် စက်ရုပ်လက်မောင်းသည် သူတို့အား အာဟာရဖြည့်စွက်ရည်တစ်ထုတ်ကို ကမ်းပေးလာသည် ။

ဒါက........စက်ဝန်း ထပ်စနေပြန်ပြီလား?

ကျစ်ယွီရှီသည် အာဟာရဖြည့်စွက်ရည်ကို လက်ခံယူလိုက်ပြီး တစ်ကျိုက်တည်း မော့ချလိုက်သည် ။ သူ့မျက်လုံးထောင့်မှ သူ၏ အနက်ရောင်အင်္ကျီလက်ကို မြင်နေရသည် ။ ယင်းမှာ စောင့်ရှောက်သူများ ဝတ်သော အနက်ရောင်တိုက်ခိုက်ရေးယူနီဖောင်းဖြစ်၏ ။ သူသည် သွေးစွန်းနေသော အဖြူရောင်တီရှပ်ကို ဝတ်မထားတော့ချေ ။

မဟုတ် ။ သူတို့ထပ်ပြီး ပြန်မစတင်ခဲ့ပေ ။

ကျစ်ယွီရှီ၏ မှတ်ဉာဏ်များ တဖြည်းဖြည်း ပြန်လည်ရောက်ရှိလာသည် ။ သူအခုသိလိုက်သည်က သူတို့ ရွေးချယ်ခဲ့သော ဒုတိယနည်းလမ်းက အောင်မြင်သွားခဲ့သည်ဆိုတာပင် ။

ဒုတိယအခြေစိုက်ဌာန၌ စွမ်းအင်ကူးပြောင်းစက်များကို ပိတ်ပြီးနောက် တာဝန်မှာ အမှန်တကယ် မပြီးဆုံးသေးပေ ။ သူတို့သည် ကျောက်ဆူးမှတ်အသစ်ကို အစပျိုးလိုက်ကာ ပိုကြီးသောသံသရာစက်ဝန်းထဲရောက်သွားပြီး မနက် ၅:၃၀တွင် ပန်းခြံစီမံခန့်ခွဲရေးရုံး၌ပေါ်လာသော အနက်ရောင်နံရံနှင့် ရွမ့်ကျင်းအဆောက်အဦးတွင် ပေါ်လာသော ဒုတိယမြောက်အနက်ရောင်နံရံကို ဖန်တီးခဲ့သည်........သူတို့ကိုယ်တိုင်ပြုလုပ်ခဲ့သည့် အနက်ရောင်နံရံများက စက်ဝန်းအသေးများရှိ သူတို့ကိုယ်တိုင်များစွာနောက်ကို ဆက်လက်လိုက်နေသည်ကို သူတို့ကြည့်နေခဲ့ရသည် ။ ထပ်ခါထပ်ခါ ပြန်လည်မွေးဖွားခြင်းများ ပြီးသည့်နောက်တွင်တော့ သူတို့သည် တဖြည်းဖြည်း ပန်းတိုင်ကို ရောက်ခဲ့ကြသည် ။

Ouroborosသည် မရေမတွက်နိုင်သော သူတို့ပေါင်းများစွာ၏ စုပေါင်းကြိုးပမ်းမှုတို့ကြောင့် နောက်ဆုံးတွင်တော့ စက်ဝိုင်းအပြည့်ကို ဆွဲနိုင်ခဲ့သည် ။