မြူနှင်းငွေ့ [အဆုံးမဲ့]『မြန်မာဘာသာပြန်』〘Completed〙

အပိုင်း(၃၈)

『Unicode』

《အောင်မြင်စွာ ကြားဝင်ဖြတ်တောက်ခြင်း 》

မုတ်ဆိတ်ကြီး၏ အာကာသယာဉ်မှာ အလွန်ကြီးမားလှပြီး သူတို့သည်လည်း ဤသို့ရောက်သည်မှာ မကြာသေးသဖြင့် အခန်းအကုန်လုံးသို့ မဝင်ကြည့်ရသေးပေ ။ ရလဒ်အနေဖြင့် ထိုနေရာတွင် လွတ်မြောက်ယာဉ်တစ်စီးရှိနေသည်ကိုလည်း သူတို့သတိမထားမိကြချေ ။

ဒီဘက်ခြမ်းတွင် တစ်စုံတစ်ခုဖြစ်နေသည်ကိုမြင်သော် မုတ်ဆိတ်ကြီးကသူ့အဖွဲ့သားများနှင့်အတူ လျှောက်လာခဲ့သည် ။ PU-18ရှိ ဤအဖွဲ့သည်လည်း အတော်လေး ငယ်နေသေး၏ ။ မုတ်ဆိတ်ကြီးက သူတို့ကို စကားပြောနေချိန်အတွင်း အလယ်တွင် ဒူးထောက်နေသောလူကို သူတို့သည် စိတ်ဝင်တစား ကြည့်နေကြ‌သည် ။ မုတ်ဆိတ်ကြီးသည် ဤအချိန်အ‌တောအတွင်း သူဖြစ်ပျက်ခဲ့သောအရာများကို သူတို့အား ရှင်းပြနေပုံပေါ်သည် ။

ကျစ်ယွီရှီသည် မုတ်ဆိတ်ကြီးကို လှမ်းကြည့်လိုက်ပြီး တစ်စုံတစ်ခုကို မေးလိုက်သည် ။

မုတ်ဆိတ်ကြီးက တစ်ခဏတာမျှ အနည်းငယ် အံ့ဩသွားပြီးနောက် ခေါင်းညိတ်ကာ တစ်ခုခုပြန်ပြောလာ၏ ။

ကျစ်ယွီရှီက သူ့အဖွဲ့သားများကို ပြောပြလိုက်သည် ။ "တကယ်ပဲ အဲ့ဒီမှာ အရင်က အခြားအဖွဲ့တစ်ဖွဲ့ထားခဲ့တဲ့ လွတ်‌‌မြောက်ယာဉ်တစ်စီးရှိတယ် ။ ပြန်ပြင်ပြီးရင် သုံးလို့ရတယ် "

လီချွင်းက ရှုပ်ထွေးသွားလေသည် ။ သူသည် ရှဲ့ရှန်ကိုမမေးဘဲ မနေနိုင်ခဲ့ပေ ။ "ဒါပေမဲ့ အက်ကွဲကြောင်းကို ပိတ်ပြီးတာနဲ့ လူတိုင်းက သူတို့မူလနေရာကို ပြန်ရောက်သွားမှာပဲကို ။ လွတ်မြောက်ယာဉ်ကို ဘာကိစ္စလိုတာတုန်း? "

မြေကြီးပေါ်တွင် ဒူးထောက်လျက်ရှိသော ရှဲ့ရှန်က သူ့ရှေ့ရှိလူများကို စိုက်ကြည့်နေသည် ။ သူအ‌‌ဖြေပေးမလာခဲ့ချေ ။

ခေါင်းဆောင်ချီက ပြောလိုက်သည် ။ "ဘာလို့လဲဆို သူက ပြန်မသွားချင်လို့လေ "

ထျန်းချုံတပ်ဖွဲ့ ၁၂သည် သူတို့၏မစ်ရှင်အတွင်း အက်ကွဲကြောင်းထဲသို့ ဆွဲစုပ်ခံလိုက်ရပြီး ဤနေရာတွင် ထွက်လမ်းကိုရှာမတွေ့ဘဲ ပိတ်မိနေခဲ့သည် ။ သူတို့ပိတ်မိနေခဲ့စဉ်အတွင်း အာကာသယာဉ်ထဲတွင် တစ်ယောက်တည်း နေထိုင်‌နေသော မုတ်ဆိတ်ကြီးကို ရှာဖွေတွေ့ရှိသွားခဲ့ကာ မုတ်ဆိတ်ကြီး၏ အကူအညီဖြင့် သူတို့၏အာကာသယာဉ်တစ်စီးကို အောင်အောင်မြင်မြင်ပြင်ဆင်နိုင်ရန် သုံးလို့ရသေးသည့် အစိတ်အပိုင်းအကုန်လုံးကို စုစည်းနိုင်ခဲ့သည် ။