စိတ်စွမ်းအားကျင့်စဉ်၏ ပထမဆုံးအလွှာ
..................................................
ဤအတွင်းအားစိတ်ကျင့်စဉ်တွင် စုစုပေါင်း အလွှာဆယ့်နှစ်လွှာရှိသည်။ လင်းကျန်က ကိုယ့်ကိုယ်ကိုယ်မေ့လောက်သည်အထိ အတွင်းအားကျင့်ရာတွင်သာ ဆယ်ရက်နီးပါးနစ်မြုပ်နေခဲ့သည်။ မမျှော်လင့်ထားစွာဖြင့် ဆယ်ရက်မြောက်တွင် သူ ထိုးဖောက်ကျော်လွှားနိုင်ကာ ပထမအဆင့်သို့ရောက်သွားသည်။
ယွီဝမ်ထုန်က သူ၏သွေးကြောများကို ဖွင့်ပေးထား၍၊ သို့မဟုတ် ကျင့်ကြံသည့်နည်းလမ်းက သူနှင့်ကိုက်ညီနေ၍ အခြေအနေမှာ အံ့ဩစရာ ချောမွေ့နေသည်။
"ဘုန်း..."
လင်းကျန်က လေ့ကျင့်ရေးကွင်းဘေးမှ ကျောက်တုံးကြီးကိုချိန်ရွယ်ကာ အားကုန်သုံး၍ ရိုက်ချလိုက်သည်။ ကျောက်တုံးကြီးက ဧရာမတူကြီးဖြင့် အထုခံလိုက်ရသည့်အလား အစိတ်စိတ်အမြွှာမြွှာ ကွဲသွားသည်။
လင်းကျန်က ဤကဲ့သို့ အားများများထုတ်လိုက်နိုင်သည်ကို ယုံရခက်ကာ လက်ဖဝါးကို ပျော်ရွှင် အံ့ဩစွာ ကြည့်မိသည်။
သူက ယခုလေးတင် တံခါးပိတ်ကျင့်ကြံပြီးသွားပြီပင်။ အတွင်းအားစိတ်ကျင့်စဉ်၏ ပထမအလွှာကို ရောက်လာသော်လည်း ၎င်းကဘာဆိုလိုသည်ကို သူ သေချာမသိပေ။ ကျောက်တုံးကြီးကို လက်ဝါးရိုက်ချက်ဖြင့် ခွဲလိုက်ချိန်မှသာ သူယခုမည်မျှအင်အားကြီးကြောင်းကို ထင်ရှားစွာသဘောပေါက်သည်။
လွန်ခဲ့သည့် ဆယ်ရက်ခန့်က သူ၏အင်အားကိုထိန်းရန် ယွီဝမ်ထုန်၏အကူအညီကိုလိုအပ်သေးသော်လည်း ယခုအခါ လက်ဝါးချက်ကောင်းကောင်းရိုက်ရန် အတွင်းအား မည်သို့စုစည်းရမည်ကို သူသိလာသည်။
ယွီဝမ်ထုန်သည်လည်း အံ့ဩဝမ်းသာကာ စိတ်လှုပ်ရှားနေသည်။ သူက မေး၏။ "ကျင့်စဉ်ရဲ့ ပထမဆုံးတစ်ခန်းကို ပြီးသွားပြီလား။"
လင်းကျန်က ခေါင်းညှိတ်ပြသည်။ "ကျွန်တော့်ခန္ဓာကိုယ်မှာ ဘာမှထူးထူးခြားခြားဖြစ်မလာတာနဲ့ ဆက်လေ့ကျင့်လိုက်တာ သတိတောင်မထားမိဘဲ ပထမဆုံးအခန်းကိုပြီးသွားတယ်။ ဒါပေမဲ့ အဲ့ဒါပြီးတော့ အခန်းနှစ်က တကယ်ခက်နေတာနဲ့ ရပ်လိုက်တယ်။ ကျွန်တော်လုပ်နေတာ တအားနှေးလား။"
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...
