ကျားကျုံး၏ဒေါသ
........................
ဝါးစိမ်းစံအိမ်သို့ လင်းကျန်ပြန်ရောက်သောအခါ ကျန်းလျှိုမရှိတော့ပေ။ ထို့ကြောင့် သူကယွီဝမ်ထုန်ကိုမေးလိုက်သည်။ "ခင်ဗျားတို့ ပြောပြီးပြီလား။ အစောင့်ကျန်း ဘယ်ရောက်သွားတာလဲ။"
"သူအခန်းထဲမှာ အနားယူဖို့ ကိုယ် ယောင်ရိကို ခေါ်သွားခိုင်းလိုက်တယ်။ မင်းဦးလေးနဲ့ စကားပြောတာဘယ်လိုနေလဲ။"
"မက်မွန်ပွင့်ချပ်ဥယျာဉ်ထဲကို အစောင့်ကျန်းဝင်နိုင်ဖို့ စီစဉ်ထားလိုက်မယ်လို့ ကျွန်တော့်ဦးလေးကပြောတယ်။"
ယွီဝမ်ထုန်က ခေါင်းညှိတ်သည်။ "ကောင်းတယ်။"
လင်းကျောက်ဝမ်က အမြန်လုပ်ဆောင်သည်။ နောက်တစ်နေ့မွန်းတည့်ပိုင်းတွင် သူမက်မွန်ပွင့်ချပ်ဥယျာဉ်မှပြန်လာသောအခါ သူလိုအပ်သောအစီအစဉ်များ ပြင်ဆင်ပြီးပြီဖြစ်၍ ကျန်းလျှိုကမွန်းလွဲပိုင်းတွင် မက်မွန်ပွင့်ချပ်ဥယျာဉ်သို့ ဝင်ရောက်နိုင်ကြောင်းကို ယွီဝမ်ထုန်၏နေရာဝယ်သွားပြောသည်။
ကျန်းလျှိုက မီးယပ်ရောဂါကုပညာကို ကျွမ်းကျင်သော မျက်မမြင်သမားတော်အဖြစ် ရုပ်ဖျက်လိုက်သည်။ သူက ပညာရှင်သဖွယ်ဝတ်စားထားပြီး ရိုးရှင်းသော မျက်နှာသွင်ပြင်ပြောင်းလဲမှု လုပ်ထားသည်။ သူက မျက်လုံးပိတ်၍ ဆေးသေတ္တာကိုကျောတွင်လွယ်ကာ လက်တွင် တောင်ဝှေးကိုကိုင်ထားသည်။ သူ့ခြေလှမ်းမှာ အနည်းငယ် မတည်မငြိမ်ဖြစ်နေပြီး ယခင်ညကကဲ့သို့ မျက်လုံးတောက်တောက်၊ ခြေသံလုံလုံ၊ သွက်လတ်ဖျတ်လတ်သော အစောင့်ပုံစံနှင့် အကွာကြီးပင်။
လင်းကျန် အံ့ဩသွားသည်။ "ခင်ဗျားက ရုပ်ဖျက် သိပ်တော်တာပဲ။"
"သခင်လေးရဲ့ ချီးကျူးမှုအတွက် ကျေးဇူးတင်ပါတယ်။" ယောင်ရိက လင်းကျန်၏ချီးကျူးစကားကို ဘာမှဟန်မဆောင်ဘဲ ဘဝင်ခိုက်နေသောအပြုံးဖြင့် လက်ခံသည်။
လင်းကျန်ကလည်း ပြုံးသည်။ "အရင်က ခင်ဗျား ဦးလေးလုကို ရုပ်ဖျက်ပေးတယ်။ ဒီနေ့လည်း အလားတူပဲ၊ အစောင့်ကျန်းကိုရုပ်ဖျက်ပေးတယ်။ ခင်ဗျား ရုပ်ဖျက်ပညာကို သင်တာကြာပြီလား။"
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...
