မြူနှင်းငွေ့ [အဆုံးမဲ့]『မြန်မာဘာသာပြန်』〘Completed〙

အပိုင်း(၂၆)ပြောင်းရွှေ့စခန်း

ထိုအခါတွင်တော့ သူတို့ တာဝန်ကို အမှန်တကယ် ပြီးမြောက်သွားခဲ့သည် ။

တာဝန်ပြီးဆုံးသွားသည့်နောက်တွင်တော့ သူတို့သည် အမှောင်ထုထဲ ကျရောက်သွားရ၏ ။

ပြန်နိုးလာသောအခါ သူတို့သည် ထျန်းချုံမှ ပြန်ပေးဆွဲခံရကာ သတိပေးအချက်ပေးသံများ မြည်နေသည့်အချိန်ကို ပြန်ရောက်သွားမှန်း သိလိုက်ရသည် ။  စမှတ်ကို ပြန်ရောက်သွားသော အခြားသူတို့နှင့်လည်း အောင်မြင်စွာ အတူတကွစုပေါင်းသွားပြီဖြစ်၏ ။

စုန့်ချင်းလန်ပြောခဲ့သည့်အတိုင်း ရလဒ်က  မျှော်မှန်းထားသည်ထက် ပိုကောင်းနေခဲ့သည် ။

တစ်ချိန်တည်း တစ်နေရာတည်းတွင် ပေါ်လာခဲ့ခြင်းကြောင့် အပြိုင်အချိန်လမ်းကြောင်းနှစ်ခုမှ သူတို့သည် မကောင်းဆိုးဝါးအဖြစ် ပြောင်းလဲမသွားခဲ့ချေ ။

PU-31မှ အရာအားလုံးသည် အိပ်မက်ဆိုးကဲ့သို့ပင် ။ ဖုတ်ကောင်များ ၊ ဗီဇပြောင်းအရာများ ၊ ကမ္ဘာပျက်ဘေး.....၎င်းနှင့်ပတ်သက်သည့် အမှတ်တရဆိုးများရှိနေသည်မှလွဲ၍ ဤအရာများအားလုံး မဖြစ်ပျက်ခင်အချိန်မှ သူတို့မူလပုံစံအတိုင်း ရှိနေခြင်းမှာ သူတို့သည် အာကာသယာဥ်ထဲမှ ဘယ်တုန်းကမျှ မထွက်ခဲ့ဘဲ PU-31သို့ လုံးဝ မရောက်ခဲ့သည့်နှယ် ။

၎င်းမှာ ပြီးပြည့်စုံသော အချိန်နှင့်အာကာသ အနုကြမ်းစီးမှုတစ်ခုဖြစ်ခဲ့သည် ။

ဒါပေမဲ့......အခု ဘာတွေဖြစ်နေတာလဲ?

သူတို့ရဲ့ Aအဆင့်မစ်ရှင် ပြီးအောင်လုပ်ဖို့ သွားတဲ့လမ်းမှာ ရှိနေသင့်တာမဟုတ်ဘူးလား?

ကျစ်ယွီရှီ သူ၏အာကာသယာဥ်ငယ်တံခါးကို ဖွင့်လိုက်ရာ မျက်စိကျိန်းလောက်သည့် အဖြူရောင်အလင်းနှင့် ကြုံ၏ ။

သူသည် အလင်းစူးစူးနှင့် အသားကျသွားပြီးသည့်နောက် ဤနေရာက ကြီးကြပ်ကွပ်ကဲရေးစင်တာနှင့် တူညီနေကြောင်း သူနားလည်သွားခဲ့သည် ။

"အစ်ကိုဝမ် ! ကျွန်တော်တို့ တာဝန်ပြီးသွားပြီ!" လီချွင်းတစ်ယောက် ဝမ်းသာမျက်ရည်များပင် ကျလုမတတ် ။ သူသည် လက်မောင်းကို သွမ့်ဝမ်၏လည်ပင်းတစ်လျှောက် သိုင်းဖက်လိုက်ကာ စိတ်လှုပ်ရှားစွာ ​အော်ဟစ်လာ၏ ။ "ကျွန်တော်တို့ အဲ့ကိုပြန်သွားတော့မှာ မဟုတ်ဘူးကွ ! "