ပြန်လည်မွေးဖွားပြီးနောက် ထင်ပေါ်ကျော်ကြားခြင်း

182

သူငယ်ချင်းဟောင်းများ ပြန်ဆုံခြင်း
...........................................

သူ၏ငယ်သားများက သူလူပျိုကြီးဘဝဖြင့် အရိုးထုတ်သွားရမည်ကို စိုးရိမ်နေကြမှန်း ယွီဝမ်ထုန်မသိပေ။ သူသာ သူတို့၏ယုံကြည်မှုနည်းပါးပုံကို သိသွားလျှင် ဒေါသထွက်ကာ ပြစ်ဒဏ်အနေဖြင့် သူတို့ကို လေ့ကျင်းရေးကွင်းထဲ၌ တစ်နေ့လုံးမတ်တပ်ရပ်ခိုင်းလိမ့်မည်။

ယွီဝမ်ထုန်က နမ်းနေရင်း မူးဝေလာသောလင်းကျန်ကို ပွေ့ချီကာ အိပ်ခန်းထဲခေါ်သွားသည်။ လင်းကျန်က ယွီဝမ်ထုန်၏ရင်ဘတ်ကို မသိစိတ်ဖြင့်ပွတ်သပ်ကာ ပါးစပ်အနည်းငယ်ဟ၍ အိပ်ပျော်နေသည်။ ယွီဝမ်ထုန်၏ရင်ခွင်မှာ နွေးထွေး၍ ဆန္ဒတစ်ခု လှုပ်ရှားထကြွနေသည်။ သူလင်းကျန်၏ နှဖူး၊ ပါးနှင့် နှုတ်ခမ်းတို့ကို ငုံ့နမ်းမိသည်။

ယနေ့ မွန်းလွဲပိုင်းမှကိစ္စက သူ့ကိုအလွန်မပျော်မရွှင်ဖြစ်စေသည်။ သူ့ဦးလေးက ပို၍ဝင်ပါလာသည်ဟု သူခံစားရသည်။ သူ့ဦးလေးကို သူ့ကိစ္စများ၌ ဝင်မပါရန် အကြိမ်အနည်းငယ်မျှ သတိပေးထားပြီးသားဖြစ်သော်လည်း သူ့ဦးလေးက ခေါင်းမာလွန်းပြီး အကြောင်းရင်းကိုနားမဝင်ချေ။ ယွီဝမ်ဖုန်းကပင် သူ့ထက်အလိုက်သိသေးသည်။ သူ့ဦးလေးက စစ်တပ်ထဲဝင်ရန်အတားခံလိုက်ရသည့်အတွက် အဖိုးကို အာဃာတထားနေကြောင်း ယွီဝမ်ထုန်သိသည်။ သူ့ဦးလေးငယ်စဉ်က စစ်မြေပြင်သုံး နည်းဗျူဟာများကိုသိ၍ စစ်ပွဲအတွင်းဂုဏ်သရေဆောင်နိုင်မည်ဟု ယုံကြည်နေပြီး စိတ်ကြီးဝင်နေသူဖြစ်သည်။ သို့သော် သူစာအုပ်များထဲမှအယူအဆများက တကယ့်စစ်ပွဲ၏ရက်စက်မှုနှင့် ထိပ်တိုက်ဆုံလျှင် လုံးဝအသုံးမဝင်ကြောင်း မသိပေ။ ထို့အပြင် ယင်းခေတ်တွင် ကြီးမြတ်သောယွဲ့တိုင်းပြည်က နိမ့်ပါးနေရာ စစ်ပွဲတိုင်းက အလွန်အရေးပါပြီး သတိမပြုမိသောအမှားအသေးစားကပင် ဤတိုင်းပြည်ကိုလက်အောက်ခံဖြစ်စေနိုင်သဖြင့် ပြည်သူများက သူ့ဦးလေးကို အမှားမှသင်ခန်းစာယူခွင့် မပြုနိုင်ချေ။ ယွီဝမ်မိသားစုထဲတွင်မူ ယွီဝမ်ထုန်၏အဖိုးနှင့်မိဘများက ရှေ့တန်းသို့ထွက်သွားကြပြီး သူ့ဦးလေးကသာ မိသားစုထောက်တိုင်အဖြစ် ကျန်ခဲ့သည်။ တိုင်းပြည်တစ်ပြည်လုံး ဟန်ချက်ထိန်းနေရချိန်တွင် သူ့ဦးလေးကို မြို့တော်တွင်နေစေခြင်းက မိသားစုမျိုးပြုတ်မသွားစေရန် အကာအကွယ်တစ်ခုဖြစ်ခဲ့သည်။ သို့ရာတွင် သူ့ဦးလေးက ဤသို့ မမြင်၊ သို့မဟုတ် မမြင်လိုဘဲ သူ့အဖိုး၏ဆုံးဖြတ်ချက်က သူ၏တစ်ဘဝလုံးကိုပျက်စီးစေကာ ယွီဝမ်ထုန်က သူ၏ဂုဏ်သတင်းကောင်းကို ယူသွားသည်ဟု တစ်ချိန်လုံးယုံကြည်နေသည်။