ယွီဝမ်ထုန့်အဖေ၏ဦးလေးထံ သွားလည်ခြင်း
.......................................................
မြေခွေးဖြူလေး၏ တလက်လက်တောက်ပနေသော မျက်လုံးများထဲတွင် ဇဝေဇဝါဖြစ်မှုများ အပြည့်ပင်။ ဘာကြောင့် အိပ်ရာပေါ်သို့မတက်ရန် ရုတ်တရက်အတားခံလိုက်ရမှန်း သူနားမလည်နိုင်ပေ။ ဘာဖြစ်သွားသနည်း။
ယနေ့က ဗျာများ၍ ပင်ပန်းနွမ်းစရာနေ့ ဖြစ်ခဲ့သည်။ လင်းကျန်က ယွီဝမ်ထုန်ကိုပြောရမည့်ကိစ္စရှိမှန်း မရေမရာသတိရမိသော်လည်း မည်မျှကြိုးစားသည်ဖြစ်စေ မမှတ်မိပေ။ ခဏကြာသောအခါ သူအိပ်ပျော်သွားသည်။
သူ့ကိုအနှောင့်အယှက်မဖြစ်စေလိုသည့် ယွီဝမ်ထုန်က ဘေးတွင်အိပ်နေသည်။
*****
သူတို့နှစ်ယောက်လုံး အိပ်မောကျနေစဉ်တွင် ယွီဝမ်မိသားစုစံအိမ်၌မူ မီးအိမ်များတစ်ချိန်လုံးလင်းနေ၏။ ယနေ့ညတွင် နန်းတော်ထဲ၌ကျင်းပသော ကြိုဆိုပွဲ၌ သေလုနီးပါးဒေါသထွက်လာရသော ယွီဝမ်ကျီက သူ၏စာကြည့်ခန်းထဲမှ ပစ္စည်းတစ်ဝက်ကျော်ကို ပစ်ပေါက်ဖျက်ဆီးထားသည်။
ယွီဝမ်ဖုန်းက မျက်ခုံးကိုနှိပ်နယ်နေသည်။ လင်းကျန်သာ ကျေးဇူးရှင်ဆိုသည့်အချက်ကို ထုတ်ပြောလိုက်လျှင် သူတို့က ခုခံရမည့်အနေအထားသို့ ရောက်သွားမည်မှန်းသိ၍ လင်းကျန်အားပြဿနာမရှာရန် သူ့အဖေကို သတိပေးပြီးသားပင်။ ကံမကောင်းသည်မှာ သူ့အဖေထံသူပြောခဲ့သည့်စကားများက တစ်ဖက်နားမှဝင်ကာ တစ်ဖက်နားမှထွက်သွားသည်။ မည်သို့ပင်ဆိုစေ လင်းကျန်က ထင်ရသကဲ့သို့ မပျော့ညံ့ကြောင်း သူသိသွားလေပြီ။ ပွဲတွင် သူ့အဖေက အဖက်မလုပ်သော်လည်း လင်းကျန်က ချက်ချင်းတုန့်ပြန်ခဲ့သည်။ 'ထန်းယန်ကို အဖေ လူတွေလွှတ်လိုက်တဲ့ကိစ္စကြောင့် လင်းကျန်နဲ့ရန်သူဖြစ်ပြီးသားနေမယ်။' ယွီဝမ်ထုန်ကတွေးမိသည်။
ယွီဝမ်ဖုန်းက လင်းကျန်အား အနှောင့်အယှက်မပေးလိုခြင်းမှာ ယွီဝမ်ထုန်နှင့် ပြဿနာမတက်လိုသောကြောင့်ဖြစ်သည်။ သို့သော် လင်းကျန်က မကျေမနပ်ဖြစ်နေပြီးသားဆိုလျှင် မည်သို့ လုပ်မည်နည်း။ ထို့အပြင် လက်ရှိရှုထောင့်အရ သူ၏မိဘများက စိတ်ပြောင်းမည့်ပုံမပေါ်ချေ။ 'ငါဘာလုပ်သင့်လဲ။ ဘယ်လိုပဲဖြစ်ဖြစ် အဖေ့ကိုတော့ နားချရမယ်။ မနက်ဖြန်ကျရင် ယွီဝမ်ထုန်နဲ့လင်းကျန်က ဒီကိုလာတော့မယ်။ ကိစ္စတွေရှုပ်သွားအောင်လုပ်လို့ မဖြစ်ဘူး။"
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...
