ယနေ့တွင် ယွီဝမ်ထုန်က သူမတို့ကိုထပ်ကာထပ်ကာ အရှက်ခွဲခဲ့သည်။ အနာဂတ်တွင် အရာရှိများ၏ဇနီးများအကြား၌ သူမကမည်သို့မျက်နှာပြရမည်နည်း။ သူမက ကျန်ဘဝတစ်လျှောက်လုံးတွင် အိမ်တွင်းအောင်းနေရမည်ဟုပင် ခံစားရသည်။
ယွီဝမ်ချီက ဒေါသတကြီး မတ်တပ်ထရပ်သည်။ "ကျွန်တော် လင်းကျန်ရဲ့နေရာကို သွားလိုက်မယ်။ အဲ့ဒီလင်းကျန်ဆိုတဲ့တစ်ယောက်က ကျွန်တော့်ဝမ်းကွဲကို ဒီလိုအရှက်မရှိ အတင့်ရဲပြီး လုယူမယ်လို့ ကျွန်တော်မယုံဘူး။"
ယွီဝမ်ဖုန်းကလည်း မျက်မှောင်ကြုတ်ထားသည်။ သူက ယွီဝမ်ချီကဲ့သို့ စိတ်လိုက်မာန်ပါလုပ်တတ်သူ မဟုတ်သည့်အပြင် စဉ်းစားဉာဏ်လည်းမလွတ်ချေ။ သူကပြောလိုက်သည်။ "ပြန်ထိုင်။"
"အစ်ကိုကြီး။ ဒီလိုဖြစ်ပြီးတာတောင် အစ်ကိုကဘယ်လိုလုပ် သည်းခံနိုင်သေးတာလဲ။ ယွီဝမ်ထုန်က ကျွန်တော်တို့ရဲ့ခံစားချက်တွေကို မထီမဲ့မြင်ပြုပြီး အိမ်ပြန်မလာဘူးလေ။" ယွီဝမ်ချီက အလွန်မကျေမနပ်ဖြစ်နေသည်။
"ထိုင်။" ယွီဝမ်ဖုန်းက ယွီဝမ်ချီကို ကြည့်ကာ ထပ်ပြောသည်။
ခံပြင်းဒေါသထွက်နေသည့် ယွီဝမ်ချီက ခုံတွင်ပြန်ထိုင်ကာပြောသည်။ "ကျွန်တော်က အဲ့ဒီကိုမသွားရင် ဘာလုပ်ရမှာလဲ။ လင်းကျန်ဆိုတဲ့တစ်ယောက် ထောင်ထောင်ထောင်ထောင်လုပ်နေတာကို ထိုင်ကြည့်နေရမှာလား။"
ယွီဝမ်ဖုန်းက မျက်မှောင်ကြုတ်ကာပြောသည်။ "ညီလေးကို ထန်းယန်ဆီလွှတ်လိုက်တာကြောင့် သူဒေါသထွက်ပြီး ဒီလိုလုပ်နေတာလို့ ကျွန်တော်ထင်တယ်၊ အဖေ။ ဒီနေ့အစောပိုင်းမှာဖြစ်ပျက်သွားတဲ့ကိစ္စကို ကြည့်ရင် သူကလင်းကျန်ကို တအားအရေးထားတယ်။"
ယွီဝမ်ကျီက သူ့ကိုကြည့်ကာ ပြန်ပြောသည်။ "မင်းက ငါ့ကို အပြစ်တင်နေတာလား။"
ယွီဝမ်ဖုန်းကပြောသည်။ "ကျွန်တော် မလုပ်ရဲပါဘူး၊ အဖေ။ ကျွန်တော်က ဖြစ်နိုင်ခြေကို ဆွဲထုတ်ပြရုံပါ။လက်ရှိမှာ ကျွန်တော်တို့ရဲ့ ပထမဦးစားပေးက သူ့ကိုချွေးသိပ်ဖို့လေ။ အဖေက လင်းကျန်ကို ဘယ်လောက်မကျေမနပ်ဖြစ်နေပါစေ တစ်မြို့လုံးရဲ့ ပြက်ရယ်ပြုစရာအဖြစ်ခံရမဲ့အစား မိသားစုထဲမှာပဲဖြေရှင်းသင့်တယ်။"
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...