ပြန်လည်မွေးဖွားပြီးနောက် ထင်ပေါ်ကျော်ကြားခြင်း

168

ဝင်ခွင့်မပြုခြင်း
...................

မြို့တော်တွင် သူလျှိုများ ခြေချင်းလိမ်နေရာ နန်းတော်မှယွီဝမ်ထုန်ထွက်လာသည့်သတင်းက အကြောင်းကြားသင့်သူများထံရောက်သွားသည်။

ယွီဝမ်ထုန်က ယွီဝမ်မိသားစုစံအိမ်သို့ မပြန်ပေ။ ထိုအစား သူက 'လင်းမိသားစု' နာမည်ထွင်းထားသည့် ပျဉ်ချပ်ကို အရှေ့တံခါးတွင်ချိတ်ထားသော စံအိမ်သို့သွားသည်။

ယွီဝမ်ထုန်က လင်းကျန်ကိုတွေ့ရန်အတွက် ထိုနေရာသို့သွားကြောင်း လူတိုင်းသိကြသည်။

အခြားလူများထက် ယွီဝမ်ကျီကထိုအကြောင်းကို သိရသောအခါ လက်ဖက်ရည်ခွက်ကို အလွန်အမင်းသုန်မှုန်နေသောမျက်နှာထားဖြင့် တစ်စစီပစ်ပေါက်လိုက်သည်။ ယွီဝမ်ထုန်က မြို့ထဲသို့ရောက်လာပြီးနောက် အိမ်သို့အရင်ဆုံးမပြန်ခြင်းကပင် သူ့ကိုအရှက်ရစေသဖြင့် တောက်လျှောက်ဒေါသထိန်းနေရသော်လည်း ယခုအခါ ယွီဝမ်ထုန်က နန်းတော်မှပြန်ရောက်ပြီးနောက် အိမ်မပြန်ဘဲ လင်းကျန်၏နေရာသို့သွားခြင်းက သူ့အားသည်းမခံနိုင်လောက်အောင် ဒေါသထွက်စေသည်။

ယွီဝမ်ကျီက သူ့ကိုယ်သူ မြို့တော်ရှိဂုဏ်သရေရှိလူများအားလုံး၏အချုပ်ဟု မှတ်ယူထားရာ အဆောင်အယောင်နှင့် ဂုဏ်သိက္ခာကို များစွာဂရုစိုက်သည်။ တော်ဝင်မိသားစုဝင်များမှလွဲ၍ မည်သည့်နေရာတွင်မဆို မည်သူ့ကိုမှ အလျှော့ပေးခြင်းမရှိပေ။ လူတိုင်းက သူ့အားဆန့်ကျင်မည့်အရာတစ်ခုခုမလုပ်ခင် နှစ်ခါစဉ်းစားရသည်။ သူက ယွီဝမ်ထုန်နှင့်မသင့်မြတ်သည်မှာ မှန်သော်လည်း အတိတ်တွင် ယွီဝမ်ထုန်က နယ်စပ်ဒေသမှပြန်လာတိုင်း၌ သူ့ကိုသာဦးစွာလာတွေ့သည်။ ယွီဝမ်ထုန်က သူ့အပေါ်ဤသို့ မလေးမစားမလုပ်ဖူးပေ။

'ငါ ဘယ်လိုမျက်နှာပြရမလဲ။ ဒီမြို့မှာ တခြားလူတွေက ငါ့ကိုဘယ်လိုထင်ကြမလဲ။'

မည်သူကမှ သူ့အပေါ်ဤသို့အရှက်မခွဲဖူးဘူးဟု ခံစားရကာ အသက်ရှူကျပ်လာသည်။

"ကျွန်မ ပြောသားပဲ။ အဲ့ဒီလင်းကျန်က ပြည့်တန်ဆာကောင်ပါဆို။ ဖုန်းအာက ကျွန်မအဲ့ဒီစကားကိုပြောလို့ ဝေဖန်လိုက်သေးတယ်။ အခုဘာဖြစ်နေပြီလဲ တွေ့တယ်မလား။ အဲ့ဒီပြည့်တန်ဆာကောင်က ယွီဝမ်ထုန်ကိုပြုစားပြီး သူ့လက်ထဲ ထည့်ထားတယ်မလား။ သူ့အိမ်ဘယ်မှာရှိလဲဆိုတာကိုတောင် မေ့သွားပြီ။ သူက ကျွန်မတို့ကို တစ်စက်ကလေးတောင် လေးစားတော့ရဲ့လား။ ရှင်က သူ့ဦးလေး၊ ကျွန်မက သူ့အဒေါ်ဆိုတာကို သူမှတ်မိရဲ့လား။ သူ့ရဲ့မျိုးရိုးနာမည်က ယွီဝမ်ဆိုတာကိုတောင် မေ့သွားပြီထင်တယ်။" ကျန့်ရှီသည်လည်း အလွန်မခံမရပ်နိုင်ဖြစ်နေသည်။