"ဟုတ်ကဲ့ပါ၊ သခင်လေး။"
လင်းကျန်က မြို့တော်၌ အခြေကျပြီးလျှင် သူ၏အစောင့်များကို သင်ကြားပေးရန်အတွက် ကွန်ဖူးကျွမ်းကျင်သူတစ်ယောက်ကို ငှားလျှင်ကောင်းမလားဟု စတင်တွေးတောနေသည်။ ယခုရက်ပိုင်းအတွင်းတွင် သူတို့ကယောင်ရိတို့နှင့် အတူနေခဲ့ရပြီး တစ်ခါတစ်ရံတွင် သူတို့ကယောင်ရိတို့၏ ကွန်ဖူးစွမ်းရည်အား မည်မျှအားကျနေကြောင်းကို အပြင်လူပင်ပြောနိုင်သည်။
*****
"စံအိမ်ကို သန့်ရှင်းပြီးပြီ။ အဲ့ဒီအိမ်က လုံလုံလောက်လောက် ကြီးပြီး ယွီဝမ်မိသားစုနဲ့ သိပ်မဝေးဘူး။ လေ့ကျင့်ရေးကွင်းကျယ်ကျယ်လည်း ပါတယ်။ အစတုန်းကတော့ ခြံကိုလှလှပပနဲ့သပ်ရပ်အောင် ပြုပြင်ချင်ပေမဲ့ အစောင့်တွေက ခြံကိုစောင့်ကြည့်နေဖို့ အဆင်မပြေတော့ ကိုယ်စိတ်ပြောင်းပြီး မင်းခြံရဲ့နံရံတောက်လျှောက်မှာပဲ ဝါးပင်တစ်ချို့ စိုက်ထားတယ်။ လေ့ကျင့်ရေးကွင်းရှေ့မှာလည်း ဥယျာဉ်တစ်ခုရှိတယ်။"
ယွီဝမ်ထုန်က သူမြို့တော်တွင်လင်းကျန်အတွက် ဝယ်ထားသောစံအိမ်၏ ပိုင်ဆိုင်မှုစာချုပ်ကို ကမ်းပေးသည်။
လင်းကျန်က ပိုင်ဆိုင်မှုစာချုပ်ကို သိမ်းကာပြော၏။ "ကျွန်တော် သိပြီ။"
စံအိမ်က အဆင်သင့်ဖြစ်နေပြီဖြစ်ရာ စီစဉ်ရန်လိုအပ်သည်များကို သူပြင်ဆင်ရတော့မည်။
မကြာခင်တွင် လှည်းတန်းရှည်က မြို့ပြင်သို့ရောက်လာသည်။ သူတို့ကို လာတွေ့သူက အတော်များ၏။ ၎င်းတို့ထဲတွင် အမျိုးသားအားလုံးက ဝတ်ရုံများကို ဝတ်ဆင်ထားပြီး ရာထူးအတော်မြင့်ပုံပင်။ သူတို့ထဲတွင် အထင်းဆုံးမှာ မြင်းရထားလုံးထဲ၌ ထိုင်နေသော အမျိုးသမီးတစ်ယောက်ပင်။ ရထားလုံးက ထူးခြားပြီး အလွန်တန်ဖိုးကြီးသည်။ လေဒဏ်ကာကွယ်ပေးသော သာမန်ရထားလုံးများနှင့် မတူသည်မှာ ဤရထားလုံးတွင် ဘေးအကာချပ်ပြားမပါဘဲ တိုင်လေးတိုင်၊ မျက်နှာကြက်နှင့် လေပြေအကြား တလူလူလွင့်နေသော ဇာလိုက်ကာများသာပါသည်။ လေနှင့်အတူပါလာသော ရေမွှေးနံ့ကို လှည်းတန်းထဲမှလူများက အနံ့ရနေသည်။
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...
