"ကျွန်တော်သင်တာ ဆယ့်နှစ်နှစ် ရှိပါပြီ။" ယောင်ရိကဖြေသည်။
'တော်တော်ကြာပြီပဲ။' ဤသို့အံအားသင့်စရာပညာကို နှစ်ချီလေ့ကျင့်မှုမရှိဘဲ မကျွမ်းကျင်နိုင်ကြောင်း သူမျှော်လင့်ထားပြီးသားဖြစ်၍ လင်းကျန် သက်ပြင်းခိုးချသည်။
"ကျွန်တော့်ဦးလေးနဲ့ ကျွန်တော်က ခဏနေရင် လုမိသားစုဆီသွားမလို့။ မနက်တုန်းက ကျွန်တော်အစောင့်တွေကို ပထမဆုံးအစီအရင် သင်ဖို့ပြင်ဆင်ပြီးပြီ။" လင်းကျန်က ယွီဝမ်ထုန်ကိုပြောသည်။
"ကိုယ်တွေ့တယ်။ သူတို့က တော်တော် တော်တယ်။ အခြေခံရသွားတော့ သူတို့က အတော်တိုးတက်လာတာပဲ။" ယွီဝမ်ထုန်က မှတ်ချက်ချသည်။
လင်းကျန်က ဤအစောင့်များအား သင်ကြားရာတွင် အတော်အားစိုက်ထုတ်ထားရာ ယွီဝမ်ထုန့်ထံမှ သူတို့အကြောင်းချီးကျူးသံကြားသောအခါ ဂုဏ်ယူမိသည်။
"ဒီကကိစ္စတွေအားလုံး ပြီးသွားရင် ဆေးစိုက်ခင်းက ဆယ့်နှစ်ယောက်ကို ပြန်ခေါ်ရဦးမယ်။"
"ဆေးစိုက်ခင်းမှာ မဖြေရှင်းရသေးတဲ့ကိစ္စတွေများ ရှိလို့လား။"
ဆေးစိုက်ခင်းတွင် ကြီးကြပ်သူကျိုးနှင့် အစောင့်ဆယ့်နှစ်ယောက်တို့ရှိပြီး လယ်သမားများကလည်း သတိဝီရိယရှိရာ စိုက်ခင်းက အခိုက်အတန့်မျှ လုံခြုံသေးသည်။
ကျန်ချောင်းတွင် ဆေးစိုက်ခင်းထံ လူလွှတ်၍ ပြဿနာရှာရန် အချိန်ရှိလောက်မည်မဟုတ်ဟု လင်းကျန်ယုံကြည်သည်။
*****
ထိုနေ့ မွန်းလွဲပိုင်း၌ လုမိသားစုသို့ သွားစဉ်တွင် ကျန်ချောင်းနှင့် မထင်မှတ်ဘဲတွေ့ဆုံခဲ့သည်။
သဘာဝကျစွာပင် လင်းကျန်က ကျန်ချောင်းနှင့်ပက်သက်သူတိုင်းကို တရင်းတနှီးမဆက်ဆံပေ။ လင်းကျောက်ဝမ်ရှိနေသောကြောင့်သာ သူကကျန်ချောင်းကို ခပ်ပေါ့ပေါ့နှုတ်ဆက်ခြင်းပင်။
ကျန်ချောင်းက လင်းကျန်ကို ခဏအကဲဖြတ်ကာ နားလည်ရခက်စွာ ကြည့်သည်။ "သခင်လေးလင်းလဲ ဒီကိုလာတာလား။ ငါတို့မတွေ့တာ ရက်တော်တော်ကြာပြီ။ မင်းက ပိုကျန်းမာလာပုံပဲ။"
YOU ARE READING
ပြန်လည်မွေးဖွားပြီးနောက် ထင်ပေါ်ကျော်ကြားခြင်း
Historical Fictionစေ့စပ်မှုဖျက်သိမ်းသည့်စာတစ်စောင်က ထန်းယန်မှ လင်းမိသားစုအား အဆုံးမဲ့ကြမ္မာဆိုးဝင်စေသည်။ သူ ဟူသည့် လင်းကျန်က ခြေထောက်များရက်စက်စွာအချိုးခံရပြီးနောက် သေသည်အထိ ညှင်းပန်းနှိပ်စက်ခံခဲ့ရသည်။ ယခုပြန်လည်မွေးဖွားလာပြီးနောက် သူ့မိသားစုအတွက် ဂုဏ်ကျက်သရေယူဆောင်...
