[COMPLETED] ဗီလိန်ဗျူဟာ || ဘာသာပြန်

[၈၇] မင်းကိုယုံတယ်။

ယွင်ရှဲ့၏နှုတ်ခမ်းလှုပ်ရှားသွားကာ ရိုင်းစိုင်းတာတစ်ခုခုပြောတော့မည်ကိုကြည့်နေရင်းဖြင့် ကျန်းရွှင်းယီကသူ့လက်ကိုလျင်မြန်စွာဆွဲလိုက်ပြီးနောက် အမြန်ကြားဖြတ်ပြောလိုက်သည်။
"ယွင်ရှဲ့နဲ့ငါက...ရှစ်စွင်း?"

ကျန်းမော့လုံသည် သူ့အကြည့်အတိုင်း သာမန်ကာလျှံကာစိုက်ကြည့်လိုက်၏။
"စကားလမ်းကြောင်းမလွှဲ..."

သူ၏စကားအလယ်မှာပင်၊ သူလည်းပဲတန့်သွားကာ ရှီးဆွေ့ကျောက်စိမ်းပေါ်တွင် ပြသနေသောပုံရိပ်ကား ထာဝရရှင်သန်သူဆရာတိမင်ပင်ဖြစ်၏!

ကျန်းရွှင်းယီနှင့်ကျန်းမော့လုံမှာ မိန်းမောသွားကြကာ သူတို့နှစ်ဦးစလုံးရှေ့ကိုအတူပြေးသွားမိကြသည်။ သို့သော် ထာဝရရှင်သန်သူဆရာတိမင်နှင့်တိုက်ခိုက်နေသောလူမှာ.... ယွင်ရှဲ့ဖြစ်နေသည်။

ယွင်ရှဲ့က ဆရာတိမင်ကို ရှီးဆွေ့ကျောက်စိမ်းနှင့်ထိခိုက်စေခဲ့သည့် တစ်ယောက်လား?!

ကျန်းမော့လုံကားသွေးအေးသောသူဖြစ်ကာ ဤကမ္ဘာပေါ်တွင်သူဂရုစိုက်သောလူနှစ်ယောက်မှာ သူ၏ရှစ်စွင်းနှင့်ရှစ်ရှုန်းပင်ဖြစ်သည်။ သူ့ရှစ်စွင်း၏သေဆုံးခြင်းအားသူ့မျက်စိဖြင့်တပ်အပ်မြင်လိုက်ရသဖြင့် ရှော့ခ်ရလွန်းကာ စကားမပြောနိုင်တော့ပေ။ သူ့ဦးခေါင်းဆီသို့သွေးဆောင့်တက်လာကာ မစဥ်းစားဘဲနှင့် ဓားကိုဒေါသတကြီးဆွဲထုတ်ရင်း လှည့်ကာ ယွင်ရှဲ့ထံသို့လွှဲခုတ်လိုက်မိသည်။

ဓားသွားကတစ်ဝက်တောင်မသွားရသေးခင်မှာဘဲ ဓားသွားမှာတစ်စုံတစ်​​ယောက်၏ရပ်တန့်ခြင်းခံလိုက်ရပေသည်။ ဤကား ယွင်ရှဲ့၏ဘေးရှေ့တွင်ရပ်နေသော ကျန်းရွှင်းယီတစ်ယောက် တိုက်ကွက်ကိုတားဆီးလိုက်ခြင်းဖြစ်သည်။ သူသည် ဓားသွားအား သူ၏လက်ချောင်းလေးများဖြင့် ရုတ်ခြည်းဖိနှိပ်လိုက်ကာ သူ့ဓားသူဆွဲထုတ်ဖို့ရန်ပင်အလွန်စိတ်မရှည်ဖြစ်နေ၏။ ဓားအားလက်ဗလာဖြင့်တားမြစ်ဖို့ရန် သူ့အားအင်အကုန်သုံးလိုက်ရကာ သူ့လက်ဖမိုးရှိသွေးကြောများထောင်တက်လာခဲ့သည်။

"မော့လုံ၊ စိတ်အေးအေးထား။ အခြေအနေကိုအရင်ရှင်းသင့်တယ်။"

ဒီကနေ့မြင်ကွင်းကိုသူမမြင်ရသေးခင်၊ ဘာဖြစ်ခဲ့မှန်း ကျန်းရွှင်းယီခန့်မှန်းမိပြီးသားပင်။ ထာဝရရှင်သန်သူဆရာတိမင်အပေါ် သူ၏ခံစားချက်များမှာ ကျန်းမော့လုံနှင့်အတူတူပင်ဖြစ်သော်လည်း၊ ထိုကဲ့သို့အရာများဟာ သူ့အားစိတ်လွတ်အောင်မလုပ်နိုင်ပေ။ ထိုလူက ယွင်ရှဲ့ဆိုရင်.....ပြောမနေနှင့်တော့။