ချူချူယန်၏ မျက်နှာထက်၌ ရှက်သွေးဖြာ အနီရောင်သန်းလာခဲ့ပြီး ရှင်းပြလိုက်သည်။ “ကျွန်မက ဒီအတိုင်း ရည်ရွယ်ချက်မကြီးမားတဲ့ သာမာန်ယောကျာ်းလေးတစ်ယောက်ကို ရွေးချယ်ဖို့ပဲ စဉ်းစားထားခဲ့တာ။ ရှင်က အဲ့အချက်တွေနဲ့ ကိုက်ညီတယ်လို့ ထင်ခဲ့တာ။ လောကကြီးက ရှင့်ကို အသုံးမကျဘူးလို့ ပြောကြတဲ့အချိန်မှာ ကျွန်မအဲ့ဒါတွေအားလုံးကို ဂရုမစိုက်ဘူး။ ဒါပေမယ့် အခုတော့ ရှင် ကျွန်မကို အကြာကြီး ဖုံးကွယ်နေခဲ့တာပဲဆိုတာ သိသွားပြီ”
ချင်ဝမ်ယွီလည်း ဝင်ပြောလိုက်သည်။ “အမှန်ပဲ။ ငါတို့ရှေ့မှာ အန္တရာယ်မရှိသလိုမျိုး ပေါ်နိုင်အောင် မင်းရဲ့ခွန်အားအမှန်ကို ဖုံးကွယ်ဖို့ မင်း အားအများကြီး စိုက်ထုတ်ခဲ့တာ။ မင်း ကြီးကြီးမားမား တစ်ခုခုကို ကြံစည်ထားတာဖြစ်ရမယ်ဆိုတာ ပြောစရာတောင်မလိုတော့ဘူး။အဲ့ဒါတွေအပြင် ငါတို့စုံစမ်းတဲ့ မင်းရဲ့နေထိုင်ပုံ နောက်ကြောင်းတွေကိုတောင် မင်း လှည့်စားနိုင်ခဲ့တယ်။ ဆိုလိုတာက မင်းကို ကူညီပေးနေတဲ့ အင်အားကြီးအဖွဲ့အစည်းတစ်ခုခုရှိနေတယ်ဆိုတာပဲ။ ပြောစမ်း။ မင်းကို မိဖုရားကြီးတို့အုပ်စုဘက်က စေလွှတ်တာလား ဒါမှမဟုတ် ချီဘုရင် တို့အုပ်စုဘက်က စေလွှတ်တာလား”
နောက်ဆုံး၌ သူတို့ အဘယ်ကြောင့် သူ့ကို အရမ်းစိတ်ဆိုးနေကြလဲဆိုသည်ကို ဇူအန် နားလည်သွားသည်။ သူက ပြန်ဖြေလိုက်သည်။ “ယောက္ခမကြီး ဒါဆိုလည်း ကျုပ်ကို စေလွှတ်တဲ့သူက ဘယ်သူလို့ ထင်လဲ”
“ပါးစပ်ပိတ်ထားစမ်း။ ငါ့ကို ယောက္ခမလို့ မခေါ်နဲ့” ချင်ဝမ်ယွီက ဒေါသတကြီးဖြင့် အော်လိုက်သည်။ “ပြောစရာတောင် လိုသေးလို့လား မင်းက……”
စကားတစ်ဝက်တစ်ပျက်ဖြင့် ရုတ်တရက် သူမ ရပ်လိုက်သည်။ ဇူအန်၏ လုပ်ရပ်များသည် သူမ ပြောခဲ့သည့် ဘယ်အုပ်စုကိုမဆို အကျိုးမပြုကြောင်း သူမ သဘောပေါက်လိုက်သည်။
“တကယ်လို့ ကျုပ် စိတ်ထဲမှာ တခြားအကြံအစည်တွေသာ ရှိနေရင် အိမ်တော်ပြိုင်ပွဲမှာ ချူမိသားစုက အနိုင်ရနိုင်အောင် ကျုပ်ကိုယ်ကျုပ် ဘာလို့ဖော်ထုတ်ရမှာလဲ။ ဒီပြိုင်ပွဲနောက်ကွယ်က လျို့ဝှက်ပါဝင်ပတ်သက်နေသူတွေကို ခင်ဗျားလည်း သိထားမှာပဲလေ” ဇူအန်က ထပ်ပြောလိုက်သည်။
YOU ARE READING
ကီးဘုတ်အင်မော်တယ်-ဇူအန် (Zawgyi + Unicode)
Actionအင်မော်တယ် ဇူအန် (မိတ်ဆက်) Keyboard Immortal ဘာသာပြန် Action Sharp မိုးကြိုးပစ်ခံရကာ ဘဝပြောင်းသွားသော ဇူအန်...။ လပြည့်မြို့တော်၏ လူ့အန္ဓ တစ်ယောက်အဖြစ် နိုးထလာသည်။ သို့သော် စိုင်ကော်၍ ခြုံပေါ်ရောက်ဆိုသလို ချူးကလန်မှ ထိပ်တန်းပါရမီရှင်အလှပဂေးသမီးပျိုလေ...
