အပြင်ဘက် ဧည့်ခန်းတွင် ဆန်းရှန် စောင့်ရလွန်း၍ စိတ်မရှည်တော့ပေ။ သို့သော် ရှီခွန်းကိုမြင်သည်နှင့် အပြုံးတစ်ခု သူ့မျက်နှာတွင် တပ်ဆင်လိုက်ရသည်။
"ရှီသခင်လေး မတွေ့ရတာ အတော်ကြာပြီ။ အရင်လို ချောမောနေတုန်းပဲ"
ရှီခွန်း၏ ဒေါသထွက်နေသော မျက်နှာမှာလည်း အပြုံးတစ်ခု အစားထိုးလာသည်။
"မြို့တော်မှာ လမ်းခွဲလိုက်တာ တကယ့်ကို ကြာပြီပဲ။ ခင်ဗျားက ခုထိ စိတ်ဝင်စားစရာကောင်းနေတုန်းပဲ"
သူတို့နှစ်ယောက်က သိကျွမ်းကြလေသည်။ အာလာပသလ္လာပတစ်ချို့ ပြောပြီးနောက် ရှီခွန်း လိုရင်းကို ပြောလိုက်သည်။
"မင်းအဖေ အကြံက ဘာလဲ သိလို့ရမလား။ လင်ချွမ်းပြည်ကို တာဝန်ကျတာ ကြာတာတောင် ခုထိ ဘာမှမလုပ်ရသေးဘူး။ သူ့အစီအစဉ်ကို ကျုပ်သေချာမသိဘူးဗျ"
ဆန်းရှန် ပြုံးလိုက်သည်။
"ကျုပ်အဖေက လိုအပ်တာတွေပြင်ဖို့ အချိန်ယူနေတာပါ။ ရှီသခင်လေးသာ တစ်ခုခုလှုပ်ရှားချင်ရင် လုပ်လို့ရတယ်လို့ သူကမှာလိုက်တယ်။ ခင်ဗျားအစီအစဉ်က ကျုပ်တို့နဲ့ မတိုက်ဘူးတဲ့"
"အုပ်ချုပ်ရေးမှူး ဆန်းဟုန်က တစ်ခုခုမလုပ်ခင် အသေးစိတ်ပြင်ဆင်တတ်တယ်လို့ ကျုပ်ကြားဖူးပြီးသား။ ကြည့်ရတာ တကယ်ပဲနဲ့ တူတယ်"
သို့သော် စိတ်ထဲတွင်တော့ ရှီခွန်းက လှောင်လိုက်သည်။
သူက ငါ့ကို ဖြစ်သမျှ တာဝန်ခံဖို့ ရှေ့ပို့နေတာ။ ငါက ချူအိမ်ကို မဖြေရှင်းနိုင်လို့ မင်းတို့က နောက်ဆုံးမှ ဝင်ဖြေရှင်းလိုက်ရတဲ့ ပုံစံ ဖမ်းမလို့မလား။
"အစ်ကိုရှီက ယဉ်ကျေးလွန်းနေပါပြီ။ ကျုပ်တို့ စလှုပ်ရှားလိုက်ရင် အစ်ကိုရှီရဲ့ ချူအိမ်ပထမသခင်မလေးကို အရယူမယ့် အစီအစဉ်ကို ပျက်မှာစိုးလို့ပါ။ ချူပထမသခင်မလေးကို မင်းဘက်ကို ဆွဲခေါ်နိုင်ရင် ကျုပ်တို့ အလုပ်ရှုပ်စရာ မလိုတော့ဘူးပေါ့"
ဆန်းရှန်စကားက ယဉ်ကျေးနေသော်လည်း စိတ်ထဲက အားကျမှုများ အပြည့်ပင်။ ချူအိမ်သခင်မလေး၏ လှပထူးချွန်မှုကို မြင်ရပြီးနောက် စိတ်မလှုပ်ရှားသော ယောက်ျားမရှိပေ။ ကံမကောင်းစွာနဲ့ သူ့အဖေက ရာထူးများတိုးလာသော်လည်း ဆန်းအိမ်တော်၏ အခြေခံအုတ်မြစ်က တစ်ခြားအိမ်တော်များ၏ နှစ်ရာချီတည်ရှိလာသော အမွေအနှစ်မရှိသေးပေ။
YOU ARE READING
ကီးဘုတ်အင်မော်တယ်-ဇူအန် (Zawgyi + Unicode)
Actionအင်မော်တယ် ဇူအန် (မိတ်ဆက်) Keyboard Immortal ဘာသာပြန် Action Sharp မိုးကြိုးပစ်ခံရကာ ဘဝပြောင်းသွားသော ဇူအန်...။ လပြည့်မြို့တော်၏ လူ့အန္ဓ တစ်ယောက်အဖြစ် နိုးထလာသည်။ သို့သော် စိုင်ကော်၍ ခြုံပေါ်ရောက်ဆိုသလို ချူးကလန်မှ ထိပ်တန်းပါရမီရှင်အလှပဂေးသမီးပျိုလေ...
