[COMPLETED] ဗီလိန်ဗျူဟာ || ဘာသာပြန်

[၇၃] အီစီကလီရိုက်ခြင်း။

ယန်သခင်လေးပဟေဠိဖြစ်သွားပေမဲ့ ယွင်ရှဲ့ကသူ့ကိုဖိချထားသည်ဖြစ်ရာ သူကူကယ်ရာမဲ့စွာဖြင့်မှန်ကိုငုံ့ကြည့်လိုက်မိသည်။ မှန်ထဲ၌မူ၊ သူမြင်လိုက်ရသည်ကား သူ၏နံဘေး၌ အမျိုးသမီးတစ္ဆေတစ်ကောင်ရှိနေကာ ၎င်း၏လျှာရှည်ကြီးမှာ သူ၏လည်တိုင်အားလည်စည်းပုဝါသဖွယ်ရစ်ပတ်ထားကာ ၎င်း၏အစွယ်အပြည့်ပါးစပ်ကြီးအား သူ၏လည်မျိုဆီသို့ရွယ်ထားကာ ကိုက်စားဖို့ရန်စိတ်အားထက်သန်နေလေ၏။

သူ့၌ကြောက်လန့်တကြားအော်ဟစ်ဖို့ရာအချိန်မရှိသေးခင်မှာပင်၊ ကျန်းရွှင်းယီကအဝတ်စုတ်တစ်ခုယူလိုက်ပြီးသားဖြစ်ကာ သူ့ပါးစပ်ထဲသို့ထိုးထည့်လိုက်သည်။ ကံကောင်းထောက်မစွာဖြင့်၊ သူတို့သည် အနောက်ဖက်ကျသည့်နေရာ၌ထိုင်နေကြသည်ဖြစ်ရာ မည်သူတစ်ဦးတစ်ယောက်ကမျှသူတို့ကိုအာရုံစိုက်မနေပါချေ။ ကျန်းရွှင်းယီအော်လိုက်သည်။
"အခုပြောတော့! မဟုတ်ရင် အမျိုးသမီးတစ္ဆေကိုမင်းကိုသတ်ခွင့်ပေးလိုက်မယ်။"

ယွီဟောင်မှာ ဤတဒဂ်၌ ယွင်ရှဲ့တစ်ယောက်ကျန်းရွှင်းယီကိုမြင်သည့်အခါတိုင်း "မင်းကမသန့်စင်ဘူး"ဟုအမြဲပြောလေ့ရှိသည့်အကြောင်းရင်းကို နားလည်သွားပုံပေါ်၏။

ယန်သခင်လေးကနှစ်ကြိမ်တိတိညည်းညူလာ၍ ယွင်ရှဲ့ကအဝတ်စုတ်ကိုဖယ်ပေးသည်။ သူဖြေးဖြေးချင်းနှင့် ရှင်းလင်းပီသစွာပြောလိုက်သည်။
"မင်းအစ်မကိုမင်းဘာကြောင့်သတ်ခဲ့တာလဲ။"

ယန်သခင်လေးသည်တောင့်တင်းသွားရကာ ထစ်ထစ်အအဖြင့်-
"ကျုပ်မလုပ်..."

ကျန်းရွှင်းယီသည် စားပွဲခုံအားရိုက်ချလိုက်ရာ ယွင်ရှဲ့၏တိတ်တဆိတ်တင်းတင်းစေ့နေသောနှုတ်ခမ်းမှာ အပြုံးတစ်စွန်းတစ်စဖြစ်ပေါ်လာခဲ့၏။ ယန်သခင်လေးမှာ အနှီအေးစက်သောတစ်ယောက်နှင့် နွေးထွေးသောတစ်ယောက်ကြောင့် တစ်ပိုင်းသေသည်အထိကြောက်လန့်လာရကာ သူဆိတ်ဆိတ်နေဖို့ရာ အလွန်ကြောက်ရွံ့နေမိသည်။
"သူရဲကောင်းနှစ်ယောက်ခင်ဗျ၊ ကျုပ်-ကျုပ်-ကျုပ်မိသားစုက အရမ်းဆင်းရဲလွန်းတော့ ကျုပ်ဒီလိုလုပ်ခဲ့မိတာပါ။ ပြီး-ပြီးတော့လဲ ကျုပ်တို့မိသားစုတင်မဟုတ်ပါဘူး။ ပိုက်ဆံမရှိပေမဲ့ သမီးမိန်းကလေးအများကြီးရှိတဲ့မိသားစုတိုင်းက ဒီလိုပဲလုပ်ကြတာပါ..မကြာသေးခင်ကဆိုရင် ဘယ်သူကမှသတို့သားမဖြစ်ရဲကြတော့ သူတို့မှာသမီးရှိရင်တောင်မှ လက်ထပ်ဖို့နည်းလမ်းမရှိကြဘူးလေ။ ဒါပေမဲ့ သူတို့အလောင်းတွေကိုရောင်းလိုက်ရင် ငွေချောင်း၁၂၀ပြန်ရတယ်။ ဒါကြောင့်မို့ သူတို့ကအသက်ရှင်နေတာထက်စာရင် သေဖို့ပိုပြီးထိုက်တန်ပါတယ်..."