Big Boys Don't Cry (published under PHR)

Chapter Eleven: The Past (Part Three)

Chapter Eleven: The Past (Part Three)

"Tutulungan na kita, Valjean."

Bago pa siya makatanggi ay kinuha na ni Noel sa kanya ang mga bitbit na test paper. Napag-utusan kasi siya ng kanilang adviser na dalhin iyon sa faulty.

"Salamat," sabi niya at hinayaan na lamang ang kaklase. Hindi rin naman biro ang bigat ng mga papel na iyon. Hindi pa sila nakakalayo nang bigla na lang huminto si Noel. Nakaharang kasi sa daraanan nito si Vince.

"T-tinulungan ko lang s-si Valjean." Bakas sa mukha nito ang takot at basta na lamang ibinigay sa binata ang mga bitbit na papel. "M-mauna na ako sayo, Valjean." Pagkatapos ay nagmamadali si Noel. Nagtataka na sinundan na lamang niya ng tingin ito.

"Kung kani-kanino ka nagpapatulong, nandito naman ako!" Banayad na asik ni Vince na nagpalingon sa kanya. Ngayon niya lamang ito nakita na wala sa mood.

"Selos ka naman!" Naisip niyang magbiro ngunit sa sinabi niya ay lalo itong sumimangot.

"If this is your way of making me jealous, then you win." Basta na lamang siyang iniwanan ni Vince at hindi maipinta ang mukha.

Seryoso siya?

"Vince!" Tawag niya habang hinahabol ang malalaki nitong mga hakbang. Ngunt hindi man lang siya nilingon ng binata. Tuluy-tuloy ito na naglakad na tila walang naririnig. Hala! Napikon yata sa sinabi niya.

Naalala bigla ni Valjean ang iniingatan niya sa loob ng kanyang bag. Kanina pa niya hinihintay si Vince para lamang maibigay iyon.

"Para sayo, " sabi niya na basta na lamang ipinatong ang sandwich sa ibabaw ng mga bitbit nitong mga papel. Hindi niya magawang tumingin dito. Ang totoo ay nahihiya siya na ibigay ang ginawa niyang sandwich. Hindi iyon kasing sarap na gawa ng mama nito pero pinaghirapan pa rin niyang gawin iyon.

Sa isang iglap ay nagbagong bigla ang mood ni Vince. Tuwang-tuwa ito sa ibinigay niya at hindi inaalis ang tingin sa plastic container. Tuluyan na nitong nakalimutan ang pagta-trantums.

"Vince, anong hinahanap mo dyan?" Nagtataka na tanong ni Valjean habang hinahalungkat nito ang loob ng kanyang bag.

"Baka may natitira pang sandwich," wika nito na hindi tumitingin sa kanya.

Gusto niyang matawa. Hindi naman niya akalain na magugustuhan nito iyon. "Dalawa lang ang ginawa ko. Isa sa iyo at isa sa akin."

"Basta bukas gawan mo ulit ako ng sandwich," parang bata na sabi pa nito habang nakanguso.

Hindi niya napigilang mapangiti. "Sabado bukas. Walang pasok."

Napakamot ng ulo si Vince. Naroon ang iritasyon sa kanyang mukha. "Eh di sa lunes na lang." Nang bigla na lamang itong tumayo sa kanyang pagkamangha.

"Saan tayo pupunta?" Basta na lamang kasi siyang hinila ni Vince sa kamay. "Magka-cutting classes ulit tayo?" Subconciously ay bigla siyang na-excite.

Huminto si Vince at lumingon sa kanya. "I won't do that again. Muntikan ka ng mapahamak kahapon nang dahil sa akin. Okay na ba ang sugat mo?"

Ang tinutukoy nito ay ang mahabang galos sa kanyang binti na natamo niya nang tumalon silang dalawa sa pader.

"Hindi naman masakit," sagot ni Valjean at wala sa loob na iniangat ang palda para ipakita iyon sa binata.

Agad naman iyon ibinababa ni Vince at tinignan siya ng masama. "Halika na nga!" At muli siyang hinila nito.