Maraming salamat kritiko sa pagkakandili ng aking tula
Kinagagalak kong mabatid na may silbi aking nilikha
Alam kong marami itong naisupling na pagkakamali
At ang wagas na dahila'y hindi ang aking pagmamadali
Ang iyong abang lingkod ay di nakapagtapos ng pag-aaral
Magulang ko'y hikahos kaya maaga akong sa lupa'y nasakdal
Nakipagpatintero sa ula't nakipaglaro sa araw
Mga karanasa'y pinagkasya sa papel upang inyong matanaw
Mabanaag ng iba ang nag-aaruga sa aming hirap
Mga bagyong sumira sa tahana't yaman na kay ilap
Magkaganon ma'y pilit kaming kumakapit sa dasal
Di gumawa ng masama dahil naniniwala sa Maykapal
Kaya mali man ang aking pagbaybay at di man lubos maunawa
Ang sukat, tunog at lalim, mga batayan ng isang tula
Pilit kong isinahimig ang nilalaman ng aking puso
Dinungisan ang papel upang mailabas ang tinatago
Damdamin ng tulad ko'y sino ba ang may karapatang mag-ulat
Kung bawat isa sa ami'y di kikibo't magiging pipi sa tinatamong sugat
Isasabibig kami ng mga artistang kailanma'y di nakakaunawa
Sasabihing isinuot aming sapatos, ngunit di nila alam na sapatos namin ay wala
Kaya muli maraming salamat kritiko sa pagmamahal sa aking tula
Kinagagalak kong mabatid na may silbi aking nilikha
Ang malamang sinulat ko'y sa puso mo'y kumurot
Na damdamin ng aking tula'y sa kaluluwa mo'y sumuot
written: June 16, 1015 at 6:30 pm
Mysterious Aries
YOU ARE READING
Kabiguan Ng Manunulat
PoetryMga tulang naisisilang tuwing pinagniniig ko ang lapis at papel...