Kabiguan Ng Manunulat

Hustisya Sa Kamay

Paano magtatagumpay ang katotohanan kung bulag ang saksi

Kung ang simbolo mismo ng hustisya'y mata'y tinakpan ng panyo

Tiyak ispadang kanyang dala'y lalata'y lamang sa biktimang sawi

Dahil mas matimbang sa kanyang panukat ang mga may hawak ng ginto

Paano mo igagalang ang hustisyang lantaran ang bulok

Kung pangalan n'ya mismo ay bulgarang nabibili

Mag-uumpisa pa lamang ang kaso alam mo na kung sino ang lunok

Kain at wasak ang mga walang kakayanang bumili

Paano mo bibigyang pugay ang sistemang mali

Kung batas mismo'y pananggalang ng mga kriminal

"Di sapat ang inyong ebidensya" ika ng tagapagtanggol sa mga inapi

Abogado nga nama'y pag nabayaran ng salapi nagiging animal

Paano natin babaguhin ang hustisyang ayaw umandar

Kung tayo mismo'y nakikiangkas sa kanyang sasakyan

Kung kadugo nati'y nanakit tiyak simpatya nati'y sa kanya'y lulugar

Pilit tayong pumapanig sa mali hindi sa wagas na nasaktan

Paano natin pipigilan ang taong ilalagay ang batas sa kanyang kamay

Kung ang simbolo ng hustisya'y sa kanya'y naging maramot

Paano natin sasabihing magpatawad ang taong pinakamamahal ay pinatay

Na mga walang awang krimimal ay sa Diyos na lamang managot

7-08-2015