Kabiguan Ng Manunulat

Puso Para Sa Bayan

Kung pag-irog mo sa baya'y tunay

Banaag mo ang nagbabalatkayo

Mga leon na nag-aanimong tupa

Mga puting ikinubli lamang

Ang mga pulang kulay nito

Mga taong muling magtatakda

Ng kasaysayang tinagpi-tagpi

Pipilitin nila tayong maniwala

Na tama, kahit mali

Ididilat ba yaring mata

O kaya'y mas pipiliin nating

Maging bulag

Di nanaising makialam

Hangga't di tayo

Ang nasasaktang nasa bungad

Sandamakmak na kalabisan

Hangga't di tayo ang biktima

Di na tayo papalag

Hangga't di natin kalamnan

Ang nasusugata'y

Magpapabaya na lamang ba?

Ang di makakita ng multo

Sa kanilang balintataw

Ay tanging manhid na lamang

Sino mang di makakarinig at makakaramdam

Nitong nag-iiyakang batingaw

Ay walang puso para sa bayan...

May 31, 2017