بعتذر عن حلقه النهارده لكن بجد لازم تسمعوني جدا قبل ما أكمل الروايه دي.. الناس الكبيره والناس الصغيره انا عارفه إن متابعني بنات من أول سن ال١٣ فيما فوق ودول أكتر حد عايزاهم يركزو معايا في اللي أنا هقوله ده يعني البنت اللي لسه في سن المراهقه تصحصح معايا هنا....
أمبارح كلمتني بنت قد مريم في السن وأبدت أعجابها في الروايه وقالتلي بالحرف إنتي غيرتي مفهومي عن الحب في مرحله الثانويه ونفسي أجرب الحب ده وانا كنت قافله علي الموضوع ده وهفتحه... وواحده تانيه برضه قدها امبارح قالتلي انها حبت الروايه وحكت لي حكايه معينه ليها وقالتلي اعمل ايه وانا عايزه احب واتحب وحبيت يوسف جدا وبتاع..
والنهارده واحده هاجمتني وقالتلي إنتي بالروايه دي هتكوني بتحرضي البنات علي الحب والعلاقات وأنها تخبي علي أهلها وتعيش من وراهم والحوار أشتد بيننا.. وكذلك التعليقات اللي بشوفها بيقولو عايزين الحب ده ونفسنا في حد زي يوسف وعايزين حد يغير حياتنا كده وكلام هنا علي الخاص وكلام علي الواتس وكلام علي الفيس وكل ده وأنا لسه في الحلقه الرابعه ولسه محكتش غير حلقتين في قصه مريم ويوسف يعني لسه في الأول وشئ بسيط لسه مشفتوش باقي الحكايه...
أنا هرد علي الرسائل دي عشان متأكده لو محطتش حد من دلوقت هتهاجم أكتر لما ادخل في تفاصيل اكتر ما بين يوسف ومريم في الحلقات الجايه وهيدخلي بنات اكتر وهشوف تعليقات تمني اكتر من كده...
لا يا جماعه.. لا يا قمر أوعي تحبي وانتي في السن ده او تتعلقي وانتي في السن ده بحد.. اوعي تحطي نفسك مكان مريم وتفكري انك هتلاقي يوسف.. يوسف ده مش موجود.. يوسف لو هتقارنيه بشباب الأيام دي اللي معظمهم ولاد كلب أصلا مش هتلاقي يوسف بينهم ولا موجود معاهم..
في الأول كده.. مريم.. إنتي مش زي مريم.. مريم لا أب موجود وأم شخصيتها زباله هتوضح اكتر في الحلقات الجايه.. شخصيتها ضعيفه.. خوافه.. مبتعملش حاجه غير أنها تذاكر وتبقي شاطره عشان خايفه من أمها.. أمها متعرفش أنها كانت بتكلم شباب كتير علي الفيس ولو عرفت هتقتلها.. مريم انطوائيه.. بريئه جدا مفيهاش خبث لأ.. هي حد نضيف أوي وجميل و روحها حلوه لكن مكسوره ووحيده.. عشان كده زي ما يكون ربنا هو اللي عوضها بيوسف.. زي ما يكون ربنا خلق لها حد زي يوسف يكون معاها وجنبها لأن في الزمن ده مفيش حد زي يوسف..
متفكريش يا قمر انتي وهي لما هتحبي في السن ده أو ترتبطي إنك هتلاقي يوسف مستنيكي لأ.. انتي بتحلمي.. مفيش حد هيتعامل معاكي بالأحترام والحب والحنان والطيبه ويعتبرك بنته بجد مهما غلطتي مفيش الكلام ده.. لو عملتي كده وسلمتي نفسك لحد زي ما مريم كانت مسلمه ليوسف هتروحي في داهيه.. هياخد اللي عايزه منك ويرميكي وهتضيعي.. ( انا بكلم اللي في سن المراهقه)
ثانيا.. هل إنتي زي مريم بظروفها؟ لأ.. مريم ليها ظروف خاصه انتوا شفتوها ولسه هتشوفوا اللي اكتر من كده.. وحتي لو كانت حياتك زي مريم أو شبيهه ليها برضه مش هتلاقي يوسف.. اعتبروا يوسف ده يا جماعه كانت نسخه واحده منه وخلصت.. وأي واحده في سن مراهقه هتسلم نفسها لواحد مش هيرحمها احنا حقيقي في مجتمع زباله ويوسف ذات نفسه هيقول كده في الروايه...
لا يا حبايبي اوعوا الروايه دي تغير مفهومكم عن حاجه.. اللي قافله علي قلبها وبتقرأها علي انها روايه فقط ياريت تفضل كده ومتفكرش نهائي انها هتقابل يوسف.. متأمنوش لحد متثقوش في حد..انتو أصلا لو ركزتوا في بدايه الروايه في الكلمه اللي كتبتها " خايف تندمي انك في يوم حبيتيني" الكلمه دي اللي يوسف قالها لمريم وفي أول حلقتين عرفنا أن يوسف سايب مريم من خمس سنين ومتجوز كمان حاليا..
يعني بعد اللي انتو هتشوفوه في قصه حبهم دي واللي انتو شخصيا هتقولو مستحيل يبعدوا.. مستحيل يوسف يتخلي عن مريم.. انتو حرفيا هتتجننو وتعرفوا ايه اللي حصل وليه بعد عنها ده حياتها ده طوق النجاه ليها ده احنا حلفنا أن يوسف ومريم دول شخص واحد... يعني عايزه اقولكم أن بعد ده كله اي كان السبب لكن يوسف ساب مريم ودي حقيقه وهتتصدموا من السبب لما تعرفوا..
يعني في الأخر برضه متأمنيش لراجل الراجل بيكلم عشر بنات مع بعض ويقنع كل واحده أنها مفيش غيرها...
وعلي رأي اللي قال هيقولك انتي الأولي وكمان الأخيرة قوليله أمك حلوه وعامله دفيره 😂😂💃
مريم لما يوسف سابها بقت حد تاني.. بقت حد ميعرفش نفسه.. حد غريب جدا اتغيرت ٣٦٠ درجه ولعنت الدنيا ولعنت كل حاجه موجوده فيها وأولهم الحب.. لأن مفيش حد في الدنيا كان بيحب زي ما يوسف حبها واهو يوسف اتخلي عنها...
انتي لو حبيتي دلوقت يعني في سن المراهقه وسابك هتنهاري.. يا بنات الاسطوانه بتاعت ابو ادم سابني وكاتينج ناو والهبل بتاع الاندر ايدج ده حقيقي احنا طبعا بنضحك عليهم ونتريق وكده لكن هما بيعملو كاتينج وبيبقوا متأثرين نفسيا وقافلين علي نفسهم وحالتهم النفسيه بتسوء جدا وبيتعبوا.. طيب انتي مش بتعملي كاتينج وكبيره وعاقله بس برضه لو حبيتي في السن ده مشاعرك كلها هتتاخد وهتبقي زي اللي في حاله ادمان مفيكيش عقل قلبك هو المسيطر عليكي ومتحكم فيكي لمجرد انك متخيله أن ده حب عمرك الاول والاخير وأنه لما يسيبك الدنيا هتقف وممكن تعملي اي حاجه عشان يرجعلك ووقتها أول ما يشوفك بالشكل ده هيحط شروطه وهيطلب منك حاجات وحشه جدا وللأسف انتي هتعملي كده عشان بتحبيه وهو بيضحك عليكي وبيستغلك وانتي زي الهبله هتضيعي نفسك..
اوعي تصدقي ولد او تأمني لولد أو تعجبك قصه في روايه وتفكري أن ده الواقع.. الناس بتهرب من الواقع في الروايات وياريت تاخدو الروايه علي انها مجرد روايه رومانسيه مش واقع.....
لو عايزه تحبي ياريت متفكريش فيه غير بعد سن ال١٨.. بعد ما عقلك يبدأ في النضوج وتكبري.. عشان لما هتحبي وقتها ويسيبك مثلا تقولي أنه كانت تجربه فاشله.. تعرفي تحبي بعلقك وبقلبك.. مش زي المراهقه تحبي بقلبك بس..بعد سن ١٨ لو سابك هتعرفي بدماغك تسيطري علي نفسك وتتحكمي في مشاعرك.. تعرفي تحددي وتفكري كويس اذا ينفع ترجعي ولا لا.. تعرفي انتي كمان تحطي له شروط وتتحكمي في العلاقه مهما كانت خطوبه حب جواز أي حاجه..
مشكله الروايه دي تحديدا واللي مخلاش مريم قدرت أنها تتخطاه وتنساه هو انه خد منها حب مراهقتها وحب نضوجها مدالهاش فرصه تحط لها شخصيه مستقله بيها.. مريم حبته بقلبها وبمشاعرها زي ما هتشوفو أن مريم ضعيفه بتحبه جدا مبتقولش لأ وهو اللي متحكم في العلاقه عرفها قبل ما تتم ١٧ سنه بظروفها بحياتها عرف ياخدها كلها جواه ويشكلها زي ما هو عايز.. وبرضه مريم لما عدت ال١٨ وعقلها بدأ ينضج كان يوسف معاها برضه وهو اللي بيشكل ويغير عقلها.. كان بيخليها حاجه خاصه بيه هو.. هتاخد من شخصيته من كلامه من أسلوبه من عقله من حكمته لكن برضه مش هتقدر تخرج عن طوعه.. يوسف هيخاف علي مريم من نفسه هيعتبرها فعلا بنته مسؤوله منه.. كل اللي بقوله ده لسه هتشوفوه..
المهم يعني عايزه اقولكم أن مشكله الروايه واللي خلي علي مريم مستحيل أنها تتخطي يوسف ولو بعد ١٠٠ سنه هو إنه خد قلبها بكل مراحله..
عشان كده بقولك متحبيش ولا تأمني لحد في مرحله المراهقه عشان ميستغلش ده ولا حتي وانتي في ٣ ثانوي عشان مش هتلاقيه خايف عليكي زي يوسف..
وكلمه أخيره للامهات.. قربوا من بناتكم وحبوا بناتكم وصاحبوهم.. مريم لو كانت امها صاحبتها مكنتش هتكون محتاجه لوجود يوسف في حياتها أصلا.. لكن مريم اتحرمت من كل انواع الحنان وملقتهوش غير مع يوسف..
لو بناتك بيقرأو روايات وهما في السن ده حاولي تعرفيهم الفرق بين الروايات والواقع.. عرفيهم البطل اللي في الروايات وأنه مش هتلاقي زيه في الواقع غير نوادر..
وعشان الناس اللي ممكن تهاجمني علي الكلام ده وتقول ان لأ في حب وفي شباب محترمه بتحب وفي مش عارفه ايه.. أنا مقلتش أن مفيش حب وفي قصص حب حقيقيه احلي من الروايات كمان.. لكن الروايه دي مختلفه عن اي روايه وانا بناشد فئه معينه فيها وبوجه رساله معينه للبنات اللي تحت سن ال١٨ والرواية دي غيرتهم أو هتغيرهم.. فـ بالله عليكم افهموا وجهه نظري.. وزي ما إيمان حجازي اللي عامله قصه مريم ويوسف والحب اللي فيها إيمان حجازي برضه بتقولكم أن الحب ده مش موجود في الحقيقه ويوسف مش موجود في الحقيقه ومتجربيش ولا تسلمي نفسك ولا قلبك لحد زي ما مريم سلمت ليوسف..
اللهم بلغت.. اللهم فأشهد..
مواعيد الروايه هتبقي ٣ أيام في الأسبوع..
الأحد.. الثلاثاء.. الجمعه
الساعه ٨ مساء...
انا عارفه اني كنت بنزل كل يومين بس اكتشفت اني لازم احط مواعيد وهو يعتبر كل يومين برضه لكن في يوم هيبقي زياده واليوم ده هيبقي ليا انا فتره راحه لأني بجد محتاجاه..
في حلقه النهارده لكن الساعه ١٠ أن شاء الله عشان لازم تقراو الكلام ده ضروري قبل ما أكمل..
الحلقه الجايه هتبقي يوم التلات❤️
وبعدها الجمعه..
# إيمووو