أخر أيام الحب
بقلم/ إيمووو
"الساعه دلوقت سبعه وربع الصبح..أنا دلوقت قاعد في بنزينه بنچور علي الطريق الدولي بشرب قهوتي وحطيت عليها كراميل عشان انتي بتحبيه وبريح شويه من الطريق وبمول بنزين عشان راجع القاهره تاني..
دلوقتي وصلك أشعار الرساله وانتي شلتي المخده من علي وشك اللي بتكتمي بيها دموعك وفتحتي عينيكي المعيطه اللي زي القمر دي وفتحتي التاب وبتقرأي الرساله..
خناقه كل عيد اللي بتحصل بينك وبين امك.. هي بتختار المناسبات السعيده عشان تنكد عليكي وتقولك أن يوسف وحش ويوسف ندل وده مكنش أختيارك وبرضه مهما حاولتي مش هخليكي تتجوزيه وعلي الرغم من محاولاتنا الكتير جدا مع بعض في أني اقولك متصدقهاش واحنا بنعد الأيام عشان تنوري بيتي وتبقي عروستي إلا أنك برضه بتتأثري بكلامها وبدل ما تخططي وتفكري في يوم العيد هنقضيه ازاي مع بعض بتقلبيها نكد والمطلوب مني إني أجي أصالحك أصل أنا فاضي لأهلك انا...!
انا مقدر يا حبيبي وعارف أنك بتحبيني وعشان كده مجرد الكلام في علاقتنا بيخوفك لكن برضه المفروض يكون ثقه فيا وفي حبي ليكي أكتر من كده...
خلصت أهوه قهوتي وهحاسب وهطلع تاني اسوق العربيه لأني للأسف مضطر أنزل القاهره عشان أجي اصالحك لأني ايوه مش فاضي غير لأهلك وهبوس ايدك وراسك و...... أشششش عيب بعد الجواز..
ايوه كده اضحكي خلي الشمس تطلع.. طبعا كنت قايلك أن أهلي عايزيني انا اللي ادبح أضحيه العيد السنه دي وعشان كده كنت عندهم وكنت هاجي أخر النهار لكن لما سمعت صوتك أمبارح وانتي بتحاولي علي قد ما تقدري تبيني أنك عادي ومبسوطه الا اني برضه قلبي فضل يقولي انك كدابه وفضل يلح عليا ويقولي تهون أي حاجه في الدنيا وتتعوض إلا أن مريم تزعل وتقضي العيد وهي بعيده عن حضنك..
قومي يلا بطلي عياط وصلي الصبح وصلي العيد وأعملي ماسكاتك وابعتيلي صورتك وانتي حاطه فحم علي وشك وطالعه زي العفريته عشان أضحك..
عارف برضه انك دلوقت بتضحكي وده خلاني أضحك دلوقت لأني للأسف أشتقت لضحكتك..
جبتلك سلسله الدهب الأبيض اللي كان نفسك فيها وجبتلك البرفيوم بتاعي لانه خلص من عندك وحاجات كتير عملتها في بوكس وطبعا منستش أجيبلك خروف العيد اللي بيغني.. تخيلي حبيبك بهيبته وبدلته دي كان واقف بينقي الخروف ويشوف بيغني ولا لأ والراجل بيسألني ده لبنت أختك قولتله بكل ثقه لأ لمراتي.. طبعا بتضحكي برضه علي منظري دلوقت صح!
وفوق كل ده لسه هاجي اديكي عيديتك ونقضي أحلي عيد مع بعض..
قومي يا بت يلا اتحركي كلها ساعه وأوصل القاهره....
كل سنه وانتي عيدي
بحبك يا أجمل يحور...
حبيبك يوسف....."
هو بعيدا عن الحلقه لسه بكره وأعتبرو ده اقتباس من الحلقه بس حبيت أسألكم... انتوا كستات وبنات ليه مش بيجيلكم text morning زي دي؟ 😂
YOU ARE READING
أخر أيام الحب
ChickLit" خايف بكره تندمي إنك في يوم حبيتيني " جمله بترن في ودانها كل يوم من خمس سنين ، ولو حد سألها وقتها عن ردها كانت هتقول أن حبه الحاجه الوحيده اللي عمرها ما هتندم عليها .. لو كانت عارفه وقتها أن القدر ممكن يلعب معاها وييجي يوم وتبقي الجمله دي حقيقه وت...
